Zoꞌo Abban Oottido Maalaalissiyaabaa

Paarooni Israaꞌeelati Gibxxeppe kiyidoogaa siyidi, eta yeddanawu qoppido ba qofaa sohuwaara laammiis. I ba olanchata hagaadan giis: ‘Ta para gaareta ubbaa koorite, yaatidi eta yedettoos! Nuuni eta yeddana koshshenna.’ Inne a asati Israaꞌeelata yedettiyoogaa doommidosona.

Yihoowi gallassi shaaraa, qammi tamaa goꞌettidi ba asaa kaalettiis. I eta Zoꞌo Abbaakko kaalettidi eti dunkkaaniyaa dunkkaananaadan etawu yootiis.

He wode Paarooninne a olanchati banttana yedettiyoogaa Israaꞌeelati beꞌidosona. Eti Zoꞌo Abbaappenne banttana yedettiya Gibxxe olanchatuppe gidduwan biyoosaa yiyoosaa xayidosona. Eti Muusessi, ‘Nuuni hayqqoos! Neeni nuna Gibxxeppe kessana bessenna shin’ yaagidosona. SHin Muusee, ‘Yayyoppite; Yihoowi nuna waatidi ashshanaakko beꞌanawu naagite’ yaagiis. Muusee wozanappe Yihoowan ammanettidoogee tuma.

Yihoowi Israaꞌeelati baanaadan yootiis. He qammi Yihoowi shaaraa denttidi Gibxxetuppenne Israaꞌeelatuppe giddon essiis. Gibxxetu baggay xuma. SHin Israaꞌeelatu baggay pooꞌo.

Muusee ba kushiyaa abban miccanaadan Yihoowi yootiis. He wode Yihoowi qamma ubban wolqqaama carkkoy carkkanaadan oottiis. Abbay naaꞌꞌawu shaahettin, Israaꞌeelati abbaa gidduwaara hemettidosona. Miilooniyan qoodettiya Israaꞌeelati haattay etappe ya baggaaranne ha baggaara godadan eqqidaashin mela biittaara pinnidosona.

Paarooninne a olanchati abbaa gidduwan mela biittaara Israaꞌeelata kaallidosona. He wode Yihoowi olanchatu wozanaa bashshiis. Para gaaretu irzzoti kolettiyoogaa doommidosona. He wotaaddarati, ‘Yihoowi etayyo olettiyo gishshawu, ane nuuni hagaappe kiyoos’ yaagidosona.

Yihoowi Muuseyyo, ‘Ne kushiyaa abbaa bollan micca’ yaagiis. Sohuwaara, godaadan eqqida haattay Gibxxe olanchatu bolli guyye goggiis. Paarooninne a olanchati ubbay hayqqidosona. Etappe issoynne attibeenna.

Haattaappe hefinttan keehi daro asay mazamuriyan hagaadan yexxidi Xoossaa sabbiis: “Bonchchuwan i keehi xoqqu xoqqu giido gishshau, taani [Yihoowayyo] mazamuriyaa yexxana. Paraanne paraa toggidaagaa abban oliis.” Asay yexxiyo wode, maccaasay duriisinne karaabiyaa baqqiis. Eti laꞌa kiyido gishshawu, ubbaykka keehi ufayttidosona.