Geedoonanne A 300U Asata

HAGAN haniiddi deꞌiyabaa beꞌay? Ha asati ubbay Israaꞌeele olanchchata. Hokkida asati haattaa uyiiddi deꞌoosona. Eta matan eqqida bitanee, Daannaa Geedoona. I eti haattaa waati uyiiddi deꞌiyakko xeellees.

Asati haattaa uyiyo dumma dumma ogiyaa loytta xeella. Issoti issoti bantta somꞌꞌuwan haattaa bochchana hanoosona. SHin issoy heeran hanettiiddi deꞌiyabaa beꞌanau danddayanaadan, haattaa ba kushiyan ekkidi uyees. Yihooway Geedoonassi, haattaa uyiiddi hanettiyaabaa wochchiya asatu xalaalaa dooranaadan yootido gishshau, hegee daro koshshiyaaba. Haraati soo simmana koshshiyoogaa Xoossay Geedoonassi yootiis. Hegee ayssi hanidaakko ane beꞌoos.

Israaꞌeeleti wodhdhi eqqidikka daro metuwan gelidosona. Hegau gaasoy eti Yihoowassi azazettibeennaagaa. Midiyaama asay eta qohidi haaridosona. Hegaa gishshau, Israaꞌeeleti maaduwau Yihoowakko waassin, Yihooway eta waasuwaa siyiis.

Geedooni olanchchata shiishshanaadan Yihooway yootin, Geedooni 32,000⁠u olanchcha asata shiishshiis. SHin Israaꞌeeleta olanau yiya asay 135,000. Gidikkonne, Yihooway Geedoonassi: ‘Ne asay keehi daro’ yaagiis. Yihooway aybissi hegaadan giidee?

I hegaadan giidoy, Israaꞌeeleti olan xooniyaabaa gidikko, eti bantta wolqqan xoonidobadan qoppana danddayiyo gishshataassa. Xoonanau Yihoowa maaduwaa koyibookko giidi qoppana danddayoosona. Hegaa gishshau, Yihooway Geedoonassi: ‘Yayyiya asay ubbay soo simmanaadan yoota’ yaagiis. Geedooni hegaadan oottin, a olanchchatuppe 22,000⁠u asay soo simmiis. Hegaappe denddidaagan, he 135,000⁠u wotaaddarata olanau, aara 10,000⁠u asa xallay attiis.

SHin siya! Yihooway: ‘Ne asay haꞌꞌikka keehi daro’ yaagiis. Geedooni ha shaafaappe asay haattaa uyanadan oottidi, haattaa uyanau xuggunnida asata ubbaa soo zaari yeddanaadan Yihooway yootiis. Yihooway: ‘Haattaa uyiiddi, hanettiyaabaa xeelliya 300⁠u asatun taani neeyyo xoonuwaa immana’ yaagidi qaalaa geliis.

Olettiyo wodee gakkiis. Geedooni ba 300⁠u asata heezzusan shaakkiis. Asatussi huuphiyan huuphiyan malkkataanne, a giddon eexxiyaa xomppee deꞌiyo xaaruwaa immiis. Qammau giddo shaaho gidiyo wode, eti ubbay eta morkke wotaaddarati kambbido heeran shiiqidosona. Hegaappe eti ubbay issi kutti bantta malkkataa punniiddinne bantta xaaruwaa menttidi waassiiddi: ‘Yihoowanne Geedoona bisuwaa!’ yaagidosona. Eta morkke wotaaddarati xiskkuwaappe beegottidi, haniyoobaa xayidosonanne yaayyidosona. Eti ubbay wottaa doommin, Israaꞌeeleti olan xoonidosona.