Neeni Xoossaabaa Tamaarana Koshshees

Xoossaa dabbo gidanau abaa tamaarana koshshees. Ne dabboti ne sunttaa eridi an xeegiyoonaa? Ee, xeegoosoona. Xoossaykka neeni a sunttaa erada an xeeganaadan koyees. Xoossaa sunttay Yihoowa. (Kessaabaa 6:3 Amaarattuwan, 1879n Attamettidaagaa; Mazamure 83:18; Maatiyoosa 6:9) Qassi neeni i dosiyoobaanne ixxiyoobaakka tamaarana koshshees. Neeni a dabbotanne a morkketakka erana koshshees. Issi uraa eranau wodiyaa ekkees. Geeshsha Maxaafay Yihoowabaa tamaaranau wodiyaa immiyoogee eratetta yaagees.—Efisoona 5:15, 16.

Xoossaa dabboti a ufayssiyaabaa oottoosona. Ane ne dabbotubaa qoppa. Eta neeni iita ogiyan oyqqiyaabanne eti ixxiyoobaa oottiyaaba gidikko, eti ne dabbo gididi deꞌanee? Deꞌennaagee qoncce! Hegaadankka, neeni Xoossaa dabbo gidana koyikko, a ufayssiyaaba oottana koshshees.—Yohaannisa 4:24.

Xoossaa dabbo gidanaadan kaalettiyay ubba Haymaanootiya gidenna. Xoossau ooppenne keehi mata dabbo gidida Yesuusi, naaꞌꞌu ogiyaabaa yootiis. Issi ogee aahonne daro asan kummidaagaa. He ogee bashshau kaalettees. Hara ogee xunttanne aara biyaageeti amarida asata. He ogee merinaa deꞌuwau kaalettees. Hagaa giyoogee neeni Xoossaa dabbotettaa koyikko, ayyo goynniyo tumu ogiyaa tamaarana koshshees yaagiyoogaa.—Maatiyoosa 7:13, 14.