SHemppuwaa Ichchasha

Wozuwaa—Xoossay Immido Ubbabaappe Aadhdhiyaagaa

Wozoy Aybee?

I waani giigi imettidee?

Neeni appe ayba goꞌꞌa demmana danddayay?

Neeni a nashshiyoogaa waata bessana danddayay?

1, 2. (a) Imoti neeyyo gita goꞌꞌaara deꞌiyaagaa gidiyoy awudee? (b) Neeni demmana danddayiyo imota ubbaappe aadhdhiya alꞌꞌobi wozuwaa geetettana danddayiyoy aybissee?

HANNO gakkanaashin neeni ekkido imota ubbaappe aadhdhiyaagee awugee? Imoti daro koshshiyaaba gidiyoogee alꞌꞌo gidiyoogaana gidenna. Imotau tumu goꞌꞌay miishshan washettana bessenna. Hegaappe, issi imoti neeyyo gita goꞌꞌaara deꞌiyaaba gidiyoy, nena ufayssiyaagaa gidiyo wode, woykko tumuppe koshshida pacaa kunttiyaagaa gidiyo wode.

² Neeni awudenne gidin demmanau hidoota wottiyo imota ubbaappe aadhdhiya issi imoti deꞌees. Hegee Xoossay asaayyo immido imota. Yihooway nuussi darobaa immiis; shin i nuuyyo immido ayba imotappenne aadhdhiyaagee, a Naꞌaa Yesuus Kiristtoosa wozuwaa yarshshuwaa. (Maatiyoosa 20:28) Nuuni ha shemppuwan beꞌanaagaadan, wozoy neessi zawi baynna ufayssaa ehanaunne nena keehi koshshiya pacata kunttanau danddayiyo gishshau, neeni demmana danddayiyo imota ubbaappe aadhdhiya alꞌꞌoba. Wozoy tumukka Yihooway nena siiqido oge ubbaappe aadhdhiyaagaa.

WOZOY AYBEE?

3. Wozoy aybee? Ha alꞌꞌo imotaa nashshanau, nuuni ay akeekana bessii?

³ Wozoy qanttan, Yihooway asaa nagaraappenne hayquwaappe ashshiyo ogiyaa. (Efisoona 1:7) Geeshsha Maxaafan deꞌiya ha timirttiyaa birshshettaa akeekanau, Edene ataakiltte sohuwan hanidabaa guyye simmidi qoppana bessees. Wozoy nuussi hegaa keena alꞌꞌoba gidiyoogaa nashshana danddayiyoy, Addaamee nagaraa oottido wode appe halidabaa akeekiyoogaa xallaana.

4. Polo asa gididi deꞌiyoogee Addaamessi woygiyoogee?

⁴ Yihooway Addaama medhdhido wode, issi tumuppe alꞌꞌo gididaba immiis; hegeekka polo asa deꞌuwaa. Hegee Addaamessi woygiyoogaakko ane qoppa. Polo gidida bollaaranne wozanaa kahaara merettido gishshau, i mulekka sahettennan, cimennan woy hayqqennan deꞌanau danddayees. Polo asa gidiyoogaadan, ayyo Yihoowaara dumma dabbotay deꞌees. Geeshsha Maxaafay, Addaamee “Xoossaa na7aa” gididoogaa yootees. (Luqaasa 3:38) Yaatiyo gishshau, naꞌi bana siiqiya aawaara matattiyoogaadan, Addaamee Xoossaa Yihoowaara mata dabbotan ufayttidi deꞌiis. Yihooway saꞌan deꞌiya ba naꞌaayyo ufayssiya oosuwaa immiyo wodenne appe koyettiyaabaa yootiyo wode, aara haasayiis.—Doomettaabaa 1:28-30; 2:16, 17.

5. Geeshsha Maxaafay Addaamee “Xoossaa leemisuwan” merettiis giyo wode woygiyoogee?

⁵ Addaamee ‘Xoossaa leemisuwan’ merettiis. (Doomettaabaa 1:27) Hegee Addaamee meran Xoossaa milatees giyoogaa gidenna. Nuuni ha Maxaafaa SHemppuwaa 1n tamaaridoogaadan, Yihooway ayfiyan beettenna ayyaana. (Yohaannisa 4:24) Yaatiyo gishshau, Yihoowassi asa bolladan ashoynne suutti baawa. Addaamee Xoossaa leemisuwan merettiis giyoogee, siiquwaa, eraa, pirddaanne wolqqaa gujjin Xoossaagaa mala eeshshaara merettiis giyoogaa. Addaamee hara keehi koshshiya ogiyan, giishin koyidoogaa oottiyo maatan ba Aawaa mala. Yaatiyo gishshau Addaamee, asay ba koyidobaa xallaa oottanau medhdhido maashiine mala gidenna. Hegaappe, i iitaa kehaa shaakkidi, baayyo koyiyoobaa oottanau qofaa qachchana danddayees. Xoossaayyo azazettanau i dooridaba gidiyaakko, Gannate saꞌan merinau deꞌana danddayees.

6. Addaamee Xoossaayyo azazettibeenna wode appe halidabi aybee? A zerettay qassi waanidi qohettidee?

⁶ Hegaa gishshau, Addaamee Xoossaayyo azazettennan aggidi hayquwau pirddettido wode, keehi alꞌꞌobi appe halidoogee qoncce. A nagaray, polo asa gididi deꞌiyo a deꞌoynne hegaara gayttida anjjo ubbay appe halanaadan oottiis. (Doomettaabaa 3:17-19) Azzanttiyaabay, Addaamee ba xallaappe gidennan ba zerettaa ubbaappe he alꞌꞌo deꞌuwaa halissiis. Xoossaa Qaalay: “Nagarai ha sa7aa issi asa [Addaame] baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido gishshau, haiqoi asa zare ubbaa gakkiis” yaagees. (Roome 5:12) Nuuni ubbay Addaameppe nagaraa laattidoogee tuma. Yaatiyo gishshau, Geeshsha Maxaafay i bananne ba zerettaa, nagaraanne hayquwaa aylletettau ‘bayzziis’ yaagees. (Roome 7:14) Addaameenne Hewaana bantta dosan Xoossaassi azazettennan ixxido gishshau, etassi ayba hidootinne baawa. Gidoppe attin, nuna gujjin eta zerettaabaashin woygana danddayettii?

7, 8. Wozuwau deꞌiya naaꞌꞌu waanna birshshettati aybee aybee?

⁷ Yihooway wozuwaa baggaara asaa naata ashshanau koyiyoogaa oosuwan bessiis. Wozoy aybee? Wozuwaayyo naaꞌꞌu waanna birshshettati deꞌoosona. Koyro birshshettay, wozoy issi ura laꞌa kessanau woykko issibaa baassi zaaranau qanxxiyooba. Hegaa, olaa gaasuwan qashettida ura birshshissanau qanxxiyoobaara geeddarissanau danddayettees. Naaꞌꞌanttuwan, wozoy issibau kiyida waagaa zaaranau qanxxiyo kaasaa. Hegaa, qohoy gakkido urassi qanxxiyo afilaamaara geeddarissana danddayettees. Leemisuwau, issi uri haraa bolli qoho gattikko, he gakkida qohuwaayyo ubbaban mise gididabaa qanxxana bessees.

⁸ Addaamee nu ubbaa bolli ehiido wolqqaama pacaa kunttanaageenne nuna nagaraanne hayquwaa aylletettaappe kessanaagee, waani danddayettii? Yihooway giigissi immido wozuwaanne hegee neeyyo ayba goꞌꞌa immiyaakko ane beꞌoos.

YIHOOWAY WOZUWAA GIIGISSI IMMIDO OGIYAA

9. Koshshiya wozoy ay mala wozoo?

⁹ Xayiday polo asa deꞌo gidiyo gishshau, polo gidenna asa deꞌoy aynne hegaa wozanau danddayenna. (Mazamure 49:7, 8) Koshshiya wozoy xayida polo asa deꞌuwaara mise gidana bessees. Hagee, Xoossaa Qaalan deꞌiya: “SHemppoi haiqqikko shemppo” yaagiya polo pirddaara moggottiyaaba. (Kessaabaa 21:23) Yaatin, Addaamee xayssido polo asa shemppuwaa woykko deꞌuwaa wozana danddayiya, hegaara mise gididabi aybee? Demmanau bessiya mise wozoy hara polo asa deꞌo.—1 Ximootiyoosa 2:6.

10. Yihooway wozuwaa waatidi giigissi immidee?

¹⁰ Yihooway wozuwaa waatidi giigissi immidee? I polo gidida ba ayyaana naatuppe issuwaa saꞌau kiittiis. SHin Yihooway coo issi ayyaana mereta kiittibeenna. I baayyo keehi alꞌꞌo gididaagaa, ba issi Naꞌaa kiittiis. (1 Yohaannisa 4:9, 10) Ha Naꞌay ba dosan, saluwan deꞌiyoosaa aggidi yiis. (Piliphphisiyuusa 2:7) Nuuni hagaappe kase aadhdhida ha maxaafaa shemppuwan tamaaridoogaadan, Yihooway ba Naꞌaa deꞌuwaa Mayraami uluwau aattido wode, maalaalissiyaaba oottiis. Xoossaa geeshsha ayyaanaa baggaara, Yesuusi polo asa gididi yelettido gishshau, nagaraa qixaatee a xeellenna.—Luqaasa 1:35.

11. Issi asi waanidi miilooniyan qoodettiya asaassi wozo gidana danddayii?

¹¹ Issi asi waanidi daro asaassi, ubba miilooniyan qoodettiya asaassi wozo gidana danddayii? Kochchooruwan, miilooniyan qoodettiya asay waanidi nagaranchcha gidana danddayidee? Addaamee nagaraa oottidoogan, alꞌꞌo aqo gidida polo asa deꞌoy appe halidoogaa hassaya. Yaatiyo gishshau, i ba zerettaassi polo asa deꞌo laatissana danddayenna. Hegaappe, i laatissana danddayiyoy nagaraanne hayquwaa. Geeshsha Maxaafay ‘wurssetta Addaama’ yaagiyo Yesuus Kiristtoosayyo polo asa deꞌoy deꞌees; qassi i mule nagara oottibeenna. (1 Qoronttoosa 15:45) Hegee, Yesuusi nuna ashshanau Addaame sohuwaa oyqqiis yaagiyoogaa. I Xoossaayyo xibennan azazettidi ba polo deꞌuwaa yarshshiyoogan, Addaame nagaraa waagaa qanxxiis. Yesuusi hegaadan oottidi, Addaame zerettaayyo hidootay deꞌanaadan oottiis.—Roome 5:19; 1 Qoronttoosa 15:21, 22.

12. Yesuusi beꞌido waayiyan aybi tumattidee?

¹² Geeshsha Maxaafay Yesuusi hayqqanaappe kase genccidi aattido waayiyaa birshshidi yootees. I iita shochcha shocettiis, qareti baynna hanotan kaqettiisinne mittaa bolli daro barchchiyaa beꞌidi hayqqiis. (Yohaannisa 19:1, 16-18, 30; Gujo Timirttiyaa, sinttaa 204-6) Yesuusi hegaa keena waayiyaa beꞌana koshshidoy aybissee? Ha Maxaafan takkidi beꞌana shemppuwan, paacee gakkin Yihoowassi ammanettidi aqiya asa naꞌi deꞌiyoogau Seexaanay oyshaa denttidoogaa tamaarana. Yesuusi wolqqaama metoy gakkishinkka gencci ammanettidi, Seexaanaa oyshaayyo bixe zaaruwaa immiis. Dabloosi ay oottikkonne, ba koyidoogaa dooridi oottiyo maati deꞌiyo polo asi, Xoossaayyo polo gidida ogiyan ammanettiyaagaa gididi deꞌana danddayiyoogaa Yesuusi boxooxissiis. Ba siiqo Naꞌay hegaadan ammanettidoogau Yihooway ay keena ufayttideeshsha!—Leemiso 27:11.

13. Wozoy waanidi qanxxettidee?

¹³ Wozoy waanidi qanxxettidee? Ayhudatu aginaa Niisaane 14n, 33n K.Y.S., Yihooway nagari baynna ba polo Naꞌaa asay woriyo wode coꞌꞌu giidi xeelliis. Hegaadan Yesuusi polo asa deꞌo gidida ba deꞌuwaa yarshsho oottidi immin, nuuni “issitoo . . . geeyi aggida.” (Ibraawe 10:10) Yesuusi hayqqido heezzantto gallassi, Yihooway assi zaarettidi ayyaana deꞌuwaa immidi denttiis. Yesuusi Addaame zerettaa wozanau yarshshido polo asa gididi deꞌana danddayiyo maataa, saluwan Xoossaayyo sheedhdhiis. (Ibraawe 9:24) Yihooway Yesuusa yarshshuwaa, asaa naata nagaraanne hayquwaa aylletettaappe kessiya wozo oottidi ekkiis.—Roome 3:23, 24.

WOZUWAAPPE NEENI AYBA GOꞌꞌA DEMMANA DANDDAYAY?

14, 15. Nuuni ‘nu nagaray atto’ geetettanaadan ay oottana bessii?

¹⁴ Nuuni nagaranchcha gidikkonne, wozuwaa gaasuwan alꞌꞌo anjjuwaa demmidi ufayttana danddayoos. Xoossaa imota ubbaappe aadhdhiya ha imotay nuuyyo haꞌꞌinne sinttanau immiyo goꞌꞌatuppe amaridaagaa ane beꞌoos.

¹⁵ Nagaray atto geetettiyoogaa. Laattido polotettaa pacaappe denddidaagan, nuuni suure gididabaa oottanau wolqqaama baaxiyaa baaxeteettees. Nuuni ubbay doonan woykko oosuwan nagaraa ootteettees. SHin Yesuusa wozuwaa yarshshuwaa baggaara, ‘nu nagaray atto’ geetettana danddayees. (Qolasiyaasa 1:13, 14) Gidikkonne, nu nagaray hegaadan atto geetettana mala nuuni wozanappe Xoossaakko simmana bessees. Qassi Yihooway ba Naꞌaa wozuwaa yarshshuwan deꞌiya nu ammanuwaa beꞌidi nuussi atto gaanaadan, nu huuphiyaa kawushshidi a oychchana bessees.—1 Yohaannisa 1:8, 9.

16. Geeshsha zoriya wozanaa oyqqidi, Xoossaayyo goynnanaadan maaddiyay aybee? Hegaa mala zoriya wozanaa goꞌꞌay aybee?

¹⁶ Xoossaa sinttan geeshsha gidida zoriya wozanaa. Nu zoriya wozanay nu bolli pirddikko, hegee nuna hidoota qanxxanaadaaninne pattennabadan siyettanaadan oottanaagee metennaba. Gidikkonne, nuuni polo gidennan deꞌishinkka wozuwaa baggaara nagaraa atto giyo injjiyaa medhdhidi, Yihooway ba kehatettan geeshsha gidida zoriya wozanan assi goynnanaadan oottiis. (Ibraawe 9:13, 14) Hegee nuuni Yihoowaara yayyennan haasayiyo injjiyaa medhdhiis. Hegaa gishshau, aynne yayyennan woosan akko shiiqana danddayoos. (Ibraawe 4:14-16) Geeshsha zoriya wozanaara deꞌiyoogee woppatettaa immees, nu huuphessi loꞌꞌo xeelay deꞌanaadan ootteesinne ufayssaa gujjees.

17. Yesuusi nuussi hayqqido gishshau, ayba anjjota demmiyo injjee deꞌii?

¹⁷ Gannate saꞌan merinaa deꞌuwaa demmiyo hidootaa. Roome 6:23y: “Nagarai qanxxiyo miishshai haiquwaa” yaagees. He payduwankka gujjidi: “SHin Xoossai nu Godaa Kiristtoos Yesuusa baggaara immiyo imoi merinaa de7⁠uwaa” yaagees. Ha maxaafaayyo SHemppuwaa 3n, matan yaana Gannaate saꞌan demmana anjjuwaabaa tobbida. (Ajjuutaa 21:3, 4) Polo payyatettan deꞌiyo merinaa deꞌuwaa gujjin, sinttanaa anjjoti ubbay deꞌana danddayidoy Yesuusi nuussi hayqqido gishshataassa. He anjjota demmanau, wozuwaa imotaa nashshiyoogaa bessana koshshees.

NEENI NASHSHIYOOGAA WAATADA BESSANA DANDDAYAY?

18. Wozuwaa imotaassi nuuni Yihoowa galatana bessiyoy aybissee?

¹⁸ Nuuni wozuwaa gishshau, Yihoowa wozanappe galatana bessiyoy aybissee? Imota immida uri hegaa immanau ba wodiyaa immidaba, ba wolqqaanne ba miishshaa kessidaba gidikko, he imotay keehi alꞌꞌo imota. He immido imotay, he uri nuna tumuppe siiqiyoogaa bessiyaagaa gidiyo wode, keehippe qarettiyaaba. Wozuwaa nuussi giigissidi immanau Xoossay aybippenne aadhdhiya yarshsho immido gishshau, wozoy ayba imotappenne alꞌꞌoba. Yohaannisa 3:16y: “Xoossai ha sa7aa keehi siiqido gishshau, ba mexi issi Na7aa immiis” yaagees. Yihooway nuna siiqiyoogaa bessiya aybippenne aadhdhiya naqaashay wozuwaa. Yesuusi ba dosan ba deꞌuwaa nuussi aatti immido gishshau, wozoy Yesuusa siiquwaakka bessiya naqaasha. (Yohaannisa 15:13) Hegaa gishshau wozuwaa imotay, Yihoowaynne a Naꞌay nuna huuphiyan huuphiyan siiqiyoogaa ammananaadan oottiyaagaa gidana bessees.—Galaatiyaa 2:20.

19, 20. Xoossay immido wozuwaa imotaa nashshiyoogaa neeni ayba ogetun bessana danddayay?

¹⁹ Yaatin, neeni Xoossay immido wozuwaa imotaa nashshiyoogaa waatada bessana danddayay? Koyruwan, Immiya Gitaa, Yihoowabaa loyttada eranau baaxeta. (Yohaannisa 17:3) Ha maxaafan goꞌettada Geeshsha Maxaafaa xannaꞌiyoogee, ne hegaa oottanaadan maaddees. Yihoowa neeni kaseegaappe aattada era era biyo wode, ayyo deꞌiya ne siiqoy gujji gujji baana. Hegaappe, he siiqoy neeni a ufayssanau koyanaadan denttettana.—1 Yohaannisa 5:3.

²⁰ Yesuusa wozuwaa yarshshuwan ammaniyoogaa oosuwan bessa. Yesuusa xeelliyaagan: “Na7aa ammaniya urau merinaa de7⁠oi de7⁠ees” geetettiis. (Yohaannisa 3:36) Yesuusan ammaniyoogaa waatidi oosuwan bessana danddayiyoo? Hegaa mala ammanuwaa doona xallan bessana danddayettenna. Yaaqooba 2:26y: “Oosoi shaahettido ammanoi haiqqidaagaa” yaagees. Ee, tumu ammanoy ‘oosuwan,’ giishin, nuuni ekkiyo tangguwan qonccees. Nuuni Yesuusan ammaniyoogaa bessiyo issi ogee, a milatanau nuussi hanettidaba ubbaa oottiyoogaana; doona xallaana gidennan, nu oottiyoobankka bessana koshshees.—Yohaannisa 13:15.

21, 22. (a) Nuuni layttan issitoo bonchchettiya Godaa Kahuwaa baalan ayssi beettana bessii? (b) SHemppuwaa 6⁠ninne 7n qonccanabay aybee?

²¹ Layttan layttan Godaa Kahuwaa bonchchiyo shiiquwan beetta. Niisaane 14n, 33n K.Y.S., Yesuusi Geeshsha Maxaafan “Godaa kahuwaa” geetettiya dumma baalaa essiis. (1 Qoronttoosa 11:20; Maatiyoosa 26:26-28) Ha baalay Kiristtoosa hayquwaa Hassayiyo Baalaakka geetettees. Yesuusi ha baalaa essidoy, kiitettidaageetinne etappe guyyiyan tumu Kiristtaane gididaageeti ubbay, i polo asa gididi hayqqidoogan, ba shemppuwaa woykko ba deꞌuwaa wozo oottidi immidoogaa hassayanaadan maaddanaassa. Ha baalaa xeelliyaagan Yesuusi: “Hagan tana hassayite” yaagidi azaziis. (Luqaasa 22:19) Godaa Kahuwaa bonchchiyoogee, wozuwaa baggaara Yihoowaynne Yesuusi nuna siiqido gita siiquwaa nuuni hassayanaadan oottees. Nuuni layttan issitoo bonchchettiya Yesuusa hayquwaa Hassayiyo Baalan beettiyoogan, wozuwaa nashshiyoogaa bessana danddayoos.a

²² Yihooway giigissidi immido wozoy tumukka alꞌꞌo imota. (2 Qoronttoosa 9:14, 15) Ha alꞌꞌo imotay hayqqidaageetakka goꞌꞌana danddayees. Hegee waanidi hananaakko SHemppuwaa 6⁠ninne 7n qonccana.

[Tohossa qofaa]

GEESHSHA MAXAAFAY TAMAARISSIYOOBAA

▪ Wozoy Yihooway asaa naata nagaraappenne hayquwaappe ashshiyo oge.—Efisoona 1:7.

▪ Yihooway ba issi Naꞌay nuussi hayqqana mala saꞌau kiittidi wozuwaa giigissidi immiis. —1 Yohaannisa 4:9, 10.

▪ Wozuwaa baggaara, nu nagaray atto geetettees, qassi geeshsha gidida zoriya wozanaanne merinaa deꞌuwaa hidootaa demmeettees.—1 Yohaannisa 1:8, 9.

▪ Yihoowabaa kaseegaappe aaruwaa eranau baaxetiyoogan, Yesuusa wozuwaa yarshshuwan ammaniyoogaa oosuwan bessiyoogaaninne Godaa Kahuwaa baalaa bonchchiyoogan wozuwaa nashshiyoogaa bessoos.—Yohaannisa 3:16.

[Sinttaa 52n diya misiliyaa]

Yihooway ba mexi issi Naꞌaa nuussi wozo ootti immiis

[Sinttaa 54n diya misiliyaa]

Yihoowabaa kaseegaappe aaruwan eranau baaxetiyoogee i immido wozuwaa imotaa neeni nashshiyo issi oge