Wozuwaa Ubbatoo Xoqqu Oottada Xeella

1-2. Wozoy aybee, qassi hegee nuussi koshshiyoy aybissee?

WOTTIYOOBI BAYNNA asa gidida Addaamee nagaraa oottido wode, merinawu deꞌiyo hidootay A xallaappe gidennan, A zariyaappekka haliis. Addaame oottidobawu gaasoyiyoobi baawa. I nagaraa oottanawu dooriis. SHin A zerettay ay balanne oottibeenna; qassi Addaamee nagaraa oottanaadan eti gaaso gidokkona. (Roo. 5:12, 14) Addaamee ba oottido nagaraa gishshawu hayqqana koshshiis. Gidoppe attin, Addaamee naati merinawu deꞌanaadan Yihooway oottana danddayiyoobay deꞌii? Ee, deꞌees! Addaamee nagaraa ootti simmin takkennan, Yihooway miilooniyan qoodettiya Addaame zerettata nagaraappenne hayquwaappe laꞌa waati kessanaakko bessiis. (Doo. 3:15) Yihooway ba keerido wodiyan, ba Naꞌay ‘darota wozanawu ba shemppuwaa immanaadan’ saluwaappe kiittiis.—Mar. 10:45; Yoh. 6:51.

² Wozoy aybee? Wozoy Addaameppe halidabaa zaaranawu Yesuusi qanxxido waagaa gidiyoogaa Giriikettuwan Xaafettida Geeshsha Maxaafay qonccissees. (1 Qor. 15:22) Nuuyyo wozoy koshshiyoy aybissee? Yihooway suure pirddawu kessido Higgee deꞌuwaa gishshaa deꞌuwaa immanaadan yootiyo gishshaassa. (Kes. 21:23, 24) Wottiyoobi baynna deꞌoy Addaameppe haliis. Xoossaa suure pirddaa polanawu Yesuusi wottiyoobi baynna ba deꞌuwaa immiis. (Roo. 5:17) Hegaa gishshawu, wozuwan ammaniya ubbawu I “Merinaa Aawaa” gidees.—Isi. 9:6; Roo. 3:23, 24.

3. Yohaannisa 14:31⁠nne 15:13⁠y yootiyoogaadan, Yesuusi wottiyoobi baynna ba deꞌuwaa yarshshanawu eeno giidoy aybissee?

³ Yesuusi saluwan deꞌiya ba Aawaanne nuna keehi siiqiyo gishshawu, ba deꞌuwaa yarshshanawu eeno giis. (Yohaannisa 14:31; 15:13 nabbaba.) Yesuusi Yihoowanne nuna keehi siiqido gishshawu, ba deꞌo laytta ubban ammanettidi deꞌanawunne ba Aawaa sheniyaa oottanawu murttiis. Yesuusi hayqqana gakkanaashin ammanettidi deꞌiyoogan hegaadan oottiis. Hegaappe denddidaagan, Yihooway asawunne saꞌawu koyro halchchido halchchoy polettana. Yesuusi hayqqanaappe kase keehi barchchetanaadan Xoossay ayssi paqqadidaakko nuuni ha huuphe yohuwan beꞌana. Qassi Geeshsha Maxaafaa xaafidaageetuppe wozuwaa loytti nashshida issuwaabaa qanttan beꞌana. Wurssettan, wozuwaa gishshawu keehi galatiyoogaa nuuni waati bessana danddayiyaakko, qassi Yihoowaynne Yesuusi nuussi giigissido yarshshuwaa wozanappe nashshiyoogaa waati bessana danddayiyaakkokka beꞌana.

YESUUSI WAAYETTIDOY AYBISSEE?

4. Yesuusi waani hayqqidaakko qonccissa.

⁴ Yesuusi hayqqanaappe kase gallassi aybi hanidaakko qoppa. I daro kiitanchchati bana naaganaadan eta maaduwaa oychchana danddayees shin oychchibeenna. I Rooma wotaaddarati bana oyqqanaadaaninne shocanaadan eeno giis. (Maa. 26:52-54; Yoh. 18:3; 19:1) Eti A bollaa keehi qohiya lissuwan garafidosona. Guyyeppe, A zokkuwaara suuttay goggishin keehi deexxiya mittaa toossidosona. Yesuusi he mittaa tookkidi eti A woriyo sohuwaa gakkanawu efaanawu daafuriis. SHin sohuwaara Rooma wotaaddarati issi bitanee A maaddanaadan azazidosona. (Maa. 27:32) Yesuusi hayqqana sohuwaa gakkido wode, wotaaddaarati mittan kaqqidi A kushiyaanne tohuwaa misimaariyan xishidosona. Yesuusa kaqqido wode, misimaariyan xishin masunxxida sohuwaa Yesuusa bollaa deexoy duge dafees. A laggeti azzaniyaabanne A aayyiyaa yeekkiyaaba gidikkonne, Ayhuda halaqati Yesuusa bolli qilliccoosona. (Luq. 23:32-38; Yoh. 19:25) Yesuusi unddenna saatiyawu waayettiis. A wozanaynne goofinee keehi daafurido gishshawu, I shemppanawu keehippe metootiis. Yesuusi I ammanettidi deꞌidoogaa eriis; qassi I hayqqanaappe guuttaa kasetidi wurssetta woosaa Yihoowa woossiis. I ba huuphiyaa ziqqi oottidi ba deꞌuwaa immiis. (Mar. 15:37; Luq. 23:46; Yoh. 10:17, 18; 19:30) I waayettiiddi takkidi kawushsha hayqo hayqqidoogee tuma!

5. Yesuusi hayqqido ogiyaappe aaruwan I unꞌꞌettanaadan oottidabay aybee?

⁵ Yesuusi hayqqido ogee I waayettanaadan oottida harabaappe deexxiyaaba gidenna. Eti A woranawu mootido mootuwawu gaaso oottidoban keehi unꞌꞌettiis. Xoossaa woy A sunttaa bonchchennaagaanne cayiyaagaa giidi Yesuusa wordduwan mootidosona. (Maa. 26:64-66) Yesuusi Xoossaa bonchchenna giidi asay mootido gishshawu keehi unꞌꞌettiis; qassi I hagaa mala ogiyan kawuyanaadan ba Aaway paqqadenna giidi qoppiis. (Maa. 26:38, 39, 42) Yihooway ba siiqiyo Naꞌay waayettidi hayqqanaadan paqqadidoy aybissee? Heezzu gaasota ane beꞌoos.

6. Yesuusi mittaa bolli kaqettidi barchchetana koshshidoy aybissee?

⁶ Koyruwan, Yesuusi Ayhudata qanggettaappe laꞌa kessanawu mittan kaqettana koshshiis. (Gal. 3:10, 13) Eti Xoossaa Higgiyawu azazettanawu qaalaa gelidi azazettibeenna gishshawu qanggettidosona. Qassi, eti Addaame zare gidiyo gishshawu hayqqana koshshikkonne, he qanggettaappe laꞌa kiyana danddayokkona. (Roo. 5:12) Issi uri hayquwaa pirddissiya nagaraa oottikko hayqqana koshshiyoogaa Xoossay Israaꞌeelatussi immido Higgee qonccissees. Hegaappe simmin, A anhay mittan kaqettana danddayees.b (Zaa. 21:22, 23; 27:26) Yesuusi mittan kaqettido gishshawu, Ayhudati he qanggettaappe laꞌa kiyana danddayidosona; qassi eti A ixxiyaaba gidikkonne A yarshshoy eta maaddana danddayees.

7. Xoossay ba Naꞌay waayettanaadan paqqadido naaꞌꞌantto gaasoy aybee?

⁷ Xoossay ba Naꞌay waayettanaadan paqqadido naaꞌꞌantto gaasuwaa beꞌa. I Yesuusi Qeese Ubbatu Halaqaa gidanaadan loohissiis. Wolqqaama paacee gakkishin Xoossawu azazettiyoogee ay keena metiyaabakko Yesuusi beꞌiis. I keehippe unꞌꞌettido gishshawu, Xoossay maaddana mala “keehi yeekkidinne afuxxidi” woossiis. Yesuusi keehi unꞌꞌetido gishshawu, nuuyyo koshshiyaabaa akeekees; qassi nuuni “paacettiyo” wode “[nuna] maaddanau danddayees.” “Nuuni daafuriyo wode nuuyyo qarettanau” danddayiya maariya Qeese Ubbatu Halaqay nuna haaranaadan Yihooway sunttido gishshawu keehi galatoos!—Ibr. 2:17, 18; 4:14-16; 5:7-10.

8. Xoossay ba Naꞌay keehi paacettanaadan paqqadido heezzantto gaasoy aybee?

⁸ Heezzanttuwan, keehi koshshiya oyshaa zaaranawu Yesuusi keehi waayettanaadan Yihooway paqqadiis: Wolqqaama paacee gakkishinkka asi Yihoowawu ammanettidi deꞌana danddayii? Seexaanay ay asinne ammanettidi deꞌana danddayenna gees! I asay Xoossawu oottiyoy ba goꞌꞌaassa giidi yootees. Qassi Addaameegaadan etikka Yihoowa siiqokkona giidi qoppees. (Iyy. 1:9-11; 2:4, 5) Yesuusi ammanettidi deꞌanaagaa Yihooway eriyo gishshawu ba Naꞌay keehi paacettanaadan paqqadiis. Yesuusi ammanettidi deꞌiyoogan Seexaanay worddanchcha gidiyoogaa bessiis.

GEESHSHA MAXAAFAA XAAFIDAAGEETUPPE ISSOY WOZUWAA LOYTTI NASHSHIIS

9. Kiitettida Yohaannisi nuussi aybin leemiso gidii?

⁹ Wozuwaabaa tamaarissiyoogan daro Kiristtaanetu ammanoy minniis. Yedetay deꞌishinkka eti aggennan sabbakidosonanne bantta deꞌo laytta ubban daro paaceta genccidosona. Kiitettida Yohaannisa hanotaa qoppa. I geella 60ppe dariya layttawu Kiristtoosabaanne wozuwaabaa ammanettidi sabbakiis. Awu layttay 100 heera gidikkonne, Roomaa kawotettay A keehi iita asa gi qoppidi Paaximo giyo haruuruwan qachchiis. I ay bala oottidee? I “Xoossaa qaalaa yootido gishshaunne Yesuusabaa markkatido gishshau” qashettiis. (Ajj. 1:9) Yohaannisi ammanuwaaninne genccan keehi loꞌꞌo leemiso.

10. Yohaannisi xaafidobati I wozuwaa gishshawu galatidoogaa waati bessiyoonaa?

¹⁰ Ayyaanay kaalettin Yohaannisi xaafido ba dabddaabbiyan I Yesuusa wozanappe siiqiyoogaanne wozuwaa gishshawu galatiyoogaa qonccissiis. I wozuwaabaa woy wozoy demissana danddayiyo loꞌꞌobaa 100ppe dariya sohuwan yootiis. Leemisuwawu, Yohaannisi hagaadan giis: “Ooninne nagaraa oottikko, Aawaa matan nuuyyo gaannatiya Yesuus Kiristtoosi, Xilloi, de7ees.” (1 Yoh. 2:1, 2) Yesuusabaa markkattiyoogee keehi koshshiyaaba gidiyoogaakka Yohaannisi xaafidobati qonccissoosona. (Ajj. 19:10) Yohaannisi wozuwaa gishshawu keehi galatidoogee qoncce. Nuunikka hegaadan galatiyoogaa waati bessana danddayiyoo?

WOZUWAA GISHSHAWU NEENI KEEHI GALATIYOOGAA WAATA BESSANA DANDDAYAY?

11. Paaciyaa eqettanaadan nuna aybi maaddana danddayii?

¹¹ Nagaraa oottanaadan paacciyaaba eqetta. Nuuni wozuwaa gishshawu keehi galatikko, hagaadan qoppokko: ‘Taani paacettiyo wode nagaraa oottennan agganawu baaxetana koshshenna. Taani nagaraa oottada atto gaanaadan oychchana danddayays.’ SHin, nuuni balabaa oottanaadan paacettiyo wode hagaadan gaana danddayoos: ‘CHii! Yihoowaynne Yesuusi taayyo ha ubbabaa oottido gishshawu, taani hagaa mala iitabaa mule oottikke.’ Hegaara maayettiya ogiyan Yihooway nuussi minotettaa immana mala, A hagaadan woossana danddayoos: ‘Tana paaciyan gelissoppa.’—Maa. 6:13.

12. Koyro Yohaannisa 3:16-18⁠n deꞌiya zoriyaa waati oosuwan peeshshana danddayiyoo?

¹² Ne ishanttanne michchontta siiqa. Nuuni siiqiyo wode wozuwaa gishshawu galatiyoogaakka bessoos. Aybissi? Yesuusi ba deꞌuwaa nu xallawu gidennan, nu ishanttussinne michchonttussikka immido gishshataassa. Yesuusi etawu hayqqanawu eeno giis. Yaatiyo gishshawu, I eta keehi siiqiyoogee qoncce. (1 Yohaannisa 3:16-18 nabbaba.) Nuuni nu ishanttanne michchontta siiqiyoogaa etawu oottiyooban bessoos. (Efi. 4:29, 31–5:2) Leemisuwawu, eti sahettiyo wode woy meretay gattiyo daafaa gujjin eti wolqqaama metota gencciyo wode eta maaddoos. Gidoppe attin, nu mala Kiristtaanee nuna yilloyiyaabaa oottiyo woy haasayiyo wode waatana koshshii?

13. Nuuni atto gaana koshshiyoy aybissee?

¹³ Neeni issi ishawu woy michcheessi atto gaanawu issi issitoo metoota eray? (Wog. 19:18) Yaatikko, ha zoriyaa oosuwan peeshsha: “Issoi issuwaabaa danddayite; ooninne ba laggiyaa bolli hanqqettidobai de7ikko, issoi issuwau atto yaago. “[Yihooway, NW]” intteyyo atto giidoogaadan, inttekka atto giite.” (Qol. 3:13) Nuuni nu ishawu woy michcheessi atto giyo wode ubban, wozuwaa gishshawu saluwan deꞌiya nu Aawaa tumuppe galatiyoogaa bessoos. Nuuni Xoossay immido ha imotaa gishshawu ubbatoo wozanappe A waani galatana danddayiyoo?

WOZUWAA KEEHI XOQQU OOTTADA XEELLIYOOGAA WAATA BESSANA DANDDAYAY?

14. Nuuni wozuwaa kaseppe aaruwan xoqqu oottidi xeellana danddayiyo issi ogee aybee?

¹⁴ Wozuwaa gishshawu Yihoowa galata. Layttay 83 gidido, Hindden deꞌiya Joꞌaano giyo cima michchiyaa hagaadan gaasu: “Ta woosan ubba galla wozuwaabaa qonccissiyoogeenne hegaa gishshawu Yihoowa galatiyoogee keehi koshshiyaaba gaada qoppays.” Ubba galla neeni woossiyo wode, ne mooridobaa Yihoowayyo yootada I atto gaanaadan oychcha. Neeni gita nagaraa oottikko, cimatu maadoy neessi koshshees. Eti neeni yootiyoobaa ezggidi Xoossaa Qaalaappe siiquwan nena zorana. Eti nenaara woossana, qassi neeni Yihoowaara zaarettada dabbotana mala Yihooway neessi atto gaanaadan oychchana.—Yaaq. 5:14-16.

15. Nuuni wozuwaabaa takki giidi nabbabananne wotti dentti qoppana koshshiyoy aybissee?

¹⁵ Wozuwaabaa wotta dentta qoppa. Layttay 73 gidido Rajamano giyo cima michchiyaa hagaadan gaasu: “Taani Yesuusi waayettidoogaa nabbabiyo wode ubban, ta ayfiyan afuttay yooliyoolees.” Xoossaa Naꞌay keehi waayettidoogaa qoppiyo wode neenikka azzanennan waaya aggana. SHin neeni Yesuusa yarshshuwaabaa loyttada wotta dentta qoppikko, anne A Aawaa kaseppe aaruwan siiqana. Wozuwaabaa wotta dentta qoppanaadan nena maaddana mala, ha huuphe yohuwaa loytta xannaꞌiyoogee loꞌꞌo.

16. Wozuwaabaa harata tamaarissiyoogee nuna waati maaddana danddayii? (Koyro sinttan deꞌiya misiliyaa xeella.)

¹⁶ Wozuwaabaa harata tamaarissa. Nuuni wozuwaabaa haraatuyyo yootiyo wode ubban, kaseegaappe aaruwan wozuwaa nashshana. Yesuusi nuussi hayqqidoy aybissakko haratussi yootanawu nuna maaddiya keehi loꞌꞌo xuufetinne biidoti deꞌoosona. Leemisuwawu, Xoossaappe Yiya Mishiraachuwaa! giya brooshuriyaa timirtte 4 goꞌettana danddayoos. He timirttiyaa huuphe yohoy, “Yesuusi Kiristtoosi Oonee?” yaagees. Woy Geeshsha Maxaafay Nuna Ay Tamaarissii? giya maxaafan shemppo 5 goꞌettana danddayoos. He shemppuwaa huuphe yohoy, “Wozoy Xoossay Immido Ubbabaappe Aadhdhiyaagaa” yaagees. Qassi layttan layttan Yesuusa Hayquwaa Hassayiyo Baalaa bonchchanawu shiiqiyoogaaninne haratikka nunaara shiiqanaadan loytti shoobbiyoogan nuuni wozuwaa kaseegaappe aaruwan nashshana danddayoos. Yihooway nuuni A Naꞌaabaa harata tamaarissiyo gita aawatettaa nuussi immiis!

17. Wozoy Xoossay asawu immido imota ubbaappe aadhdhiya imota gidiyoy aybissee?

¹⁷ Nuuni wozuwaa gishshawu Yihoowa ubbatoo wozanappe galatanaadan oottiya gaasoy deꞌiyoogee qoncce. Nuuni nagaranchcha gidikkonne, wozuwaa gaasuwan Yihoowaara dabbotaa minttana danddayoos. Wozoy Dabloosa oosoy muleera xayanaadan oottana. (1 Yoh. 3:8) Wozuwaa gaasuwan, saꞌawu Yihooway koyro halchchidobay polettana. Kumetta saꞌay gannate gidana. Nenaara gayttiya ubbay Yihoowa siiqiyaanne ayyo haggaaziyaagaa gidana. Xoossay asawu immido ay imotappenne aadhdhiya imota gidida wozuwaa gishshawu ubbatoo Yihoowaa galatiyaageeta gidoos!