Geeshsha Maxaafaa Azazoy Neessi Ubbatoo Koshshii?

NENA yelidaageeti neeyyo naatettan daro higgiyaa kessennan aggokkona. Neeni dicciyo wode eti yaatidoy neessi qoppiyo gishshataassa gidiyoogaa akeekaasa. Neeni gasttada nena yelidaageetuura deꞌennaba gidikkonne, naatettan eti nena tamaarissido amarida maarata haꞌꞌikka kaallennan aggakka.

Saluwan deꞌiya nu Aaway Yihooway ba Qaalan nuuyyo daro higgeta immiis. Leemisuwawu, eeqawu goynnennaadan, shaaramuxennaadan, wodiraa laammennaadaaninne wuuqqennaadan I diggiis. (Kessaabaa 20:1-17; Oosuwaa 15:28, 29) Ayyaanaaban ‘nuuni ubbaban dicciyo wode,’ Yihooway higgeta immidoy nu goꞌꞌaassa gidiyoogaanne he higgeti nuna laꞌatettaa diggennaagaa akeekoos.—Efisoona 4:15; Isiyaasa 48:17, 18; 54:13.

Gidikkokka, Geeshsha Maxaafan higgee imettibeenna daro hanotati deꞌoosona. Hegaappe denddidaagan, issoti issoti hegaa mala hanotatun eti koyiyoobaa aybanne oottana danddayiyaabadan qoppoosona. Eti koshshiyaaba gidiyaakko, Xoossay ba sheniyaa qonccissiya azazuwaa yootana giidi qoppoosona.

Hegaadan qoppiya asati darotoo eti guyyeppe keehi zilꞌꞌettanaadan oottiya, akeeki paccidobaa kuuyoosona. Eti Geeshsha Maxaafan higge xalla gidennan, Xoossaa qofaa eranawu maaddiyaabatikka deꞌiyoogaa akeekokkona. Nuuni Geeshsha Maxaafaa xannaꞌidi Yihoowa qofaa akeekiyo wode, nu kahaa Geeshsha Maxaafaa maaran loohissoos; hegee qassi nuuni kuuyiyoobay Yihoowa qofaara maayiyaaba gidanaadan oottees. Yaatiyo wode Yihoowa ufayssoos, qassi aadhdhida eratettan kuuyiyo gishshawu goꞌettoos.—Efisoona 5:1.

Geeshsha Maxaafay Yootiyo Loꞌꞌo Leemiso Gidiyaageeta

Geeshsha Maxaafan etabay odettido Xoossaa ashkkaratubaa nabbabiyo wode, qoncce higgee imettibeennabankka eti Yihoowa qofaa banttawu kaaleto oottidoogaa akeekoos. Yooseefa leemisuwaa qoppa. PHoxiifaara machchiyaa Yooseefi iira zinꞌꞌanaadan lambbeechchiyo wode, Xoossaa ayyaanay denttettin xaafettida, shaaramuxennaadan diggiya higgee baawa. SHin qoncce higgee imettana xayikkokka, wodiraa laammiya uri ba bollinne “Xoossaa bolli” nagaraa oottiyoogaa Yooseefi akeekiis. (Doomettaabaa 39:9) Wodiraa laammiyoogee Yihooway Edenen oottidoban qonccida A qofaa phalqqiyaaba gidiyoogaa Yooseefi eridoogee qoncce.—Doomettaabaa 2:24.

Hara leemisuwaa beꞌa. Oosuwaa 16:3y, PHawuloosi haggaazuwawu banaara efaanaappe kase, Ximootiyoosa qaxxaridoogaa yootees. SHin hegaappe simmin, PHawuloosinne Ximootiyoosi “Yesuusi kiittido Yerusalaamen de7iyaageetinne cimati wottido higgiyaa” yootiiddi katamatuura aadhdhidoogaa paydo 4y yootees. He higgetuppe issoy qaxxarettiyoogee Kiristtaanetussi koshshiyaabaa gidennaagaa qonccissees. (Oosuwaa 15:5, 6, 28, 29) Yaatin, PHawuloosi Ximootiyoosi qaxxarettana koshshiyaabadan qoppidoy aybissee? Ximootiyoosa “aawai Giriike asa gididoogaa he sohuwan de7iya Aihuda ubbai eriyo” gishshataassa. PHawuloosi harata yiilloyana woy xubbana danddayiyaabaa oottana koyibeenna. A qofissida waannabay Kiristtaaneti ‘Xoossaa sinttan asa ubbaa kahan’ akeekettiya bessiyaabaa haniyoogaa.—2 Qoronttoosa 4:2; 1 Qoronttoosa 9:19-23.

Hegaadan qoppiyoogee PHawuloosawunne Ximootiyoosawu meeze gididaba. Roome 14:15, 20, 21, qassi 1 Qoronttoosa 8:9-13; 10:23-33 mala xiqiseta nabbabada harati, ubba qassi bala gidennabaykka xubbana danddayiyo Kiristtaaneti ayyaanaaban minnidi deꞌiyoogee PHawuloosa ay keena qofissiyaakko akeeka. PHawuloosi Ximootiyoosabaa hagaadan giis: “Intte de7uwaabau wozanappe hirggiya a mala asi harai ooninne tau baawa. Aissi giikko, harati ubbati bantta huuphebaa koyoosona; Yesuus Kiristtoosabaa koyokkona. SHin na7i ba aawau oottiyoogaadan, Ximootiyoosi tanaara issippe gididi wonggeliyaa oosuwaa oottidoogan, ammanettiya asa gidiyoogaa erissidoogaa intte ereeta.” (Piliphphisiyuusa 2:20-22) Ha naaꞌꞌu Kiristtaaneti ha wodiyan deꞌiya nuuyyo keehi loꞌꞌo leemiso! Qoncce higgee imettibeenna yohuwan banttana goꞌꞌiyaabaa woy ufayssiyaabaa oottiyoogaappe, eti kuuyiyooban harati ayyaanaaban ay keena qohettanaakko qoppiyoogan Yihoowanne Yesuusa siiquwaa leemisuwaa kaallidosona.

Nuussi waanna leemiso gidida Yesuus Kiristtoosabaakka qoppa. Yesuusi Maatiyoosa 5-7 tamaarissidoban, Xoossaa higgee imettido gaasuwaa akeekida uri yaata yaatoppa geetettana xayikkokka higgiyawu azazettanaagaa odiis. (Maatiyoosa 5:21, 22, 27, 28) Yesuusi, PHawuloosi, Ximootiyoosi woy Yooseefi issibaa xeelliyaagan qoncce higgee baynnaba gidikko, issi uri bana ufayssiyaabaa oottana danddayees giidi qoppibookkona. Eti Xoossaagaadan qoppiyoogan, issi uri Xoossaa siiqanaadaaninne ba shooruwaa siiqanaadan azazido, Yesuusi ubbaappe aadhdhiya naaꞌꞌu azazo giidoogeeta kaalloosona.—Maatiyoosa 22:36-40.

Ha Wodiyan Deꞌiya Kiristtaaneti SHin?

Nuuni Geeshsha Maxaafaa oottana bessiya ubbabaa oyqqida higge maxaafadan xeellana bessennaagee qoncce. Nuuni higgee imettibeenna yohuwaara gayttidabankka Xoossaa qofaara maayettiyaabaa oottanawu dooriyo wode, Yihooway keehi ufayttees. Hegaa giyoogee, ubbatoo Geeshsha Maxaafaappe qoncce higge naagiyoogaappe, ‘Yihooway koyiyoobay aybakko akeekoos’ giyoogaa. (Efisoona 5:17; Roome 12:2) Hegee Yihoowa ufayssiyoy aybissee? Hegee nu dosiyoobaappe woy nu maataappe aaruwan, nuuni Yihoowa ufayssanawu keehi koyiyoogaa bessiyo gishshataassa. Hegee qassi nuuni Xoossaa siiquwaa keehi nashshiyo gishshawu, he siiqoy nuna denttettin A milatanawu koyiyoogaa bessiyaaba. (Leemiso 23:15; 27:11) Qassi, Geeshsha Maxaafaa maaraa kaallidi oottiyoobay ayyaanaabankka, darotoo asatettankka payya gidanawu maaddees.

Ane hegaa issi uri ba deꞌuwan waati oosuwan peeshshanaakko beꞌoos.

Wodiyaa Aattiyoobaa Dooriyoogaa

Duuqettida muuziqaa shammanawu koyiya yelagaabaa qoppa. He muuziqaappe siyido yettaa I keehi dosiis; shin koohuwan xaafettida danttoy keehi pokkoba gidiyoogee A qofissiis. Qassi he yettaappe dariya baggay hanqquwaanne makkalaa qonccissiyoogaa I akeekiis. He yelagay Yihoowa siiqiyo gishshawu, he yohuwaa xeelliyaagan Yihoowa qofaanne ayyo siyettiyaabaa eranawu koyees. Yaatin I hegaara gayttidaagan Xoossay koyiyoobay aybakko waati erana danddayii?

Kiitettida PHawuloosi Galaatiyaa Kiristtaanetuyyo xaafidoban asatettaa oosuwaanne Xoossaa ayyaanaa ayfiyaa yootiis. Xoossaa ayyaanaa ayfiyaa, hegeekka siiquwaa, ufayssaa, sarotettaa, danddayaa, kehatettaa, loꞌꞌotettaa, ammanuwaa, ashkketettaa, ba huuphiyaa naagiyoogaa neeni erennan aggakka. Asatettaa oosoy shin aybee aybee? PHawuloosi hagaadan giis: “Asatettaa oosoi erettidaagaa; ikka aibee giikko, shaaramuxiyoogaa, tunatettaa, yeellaa xayiyoogaa, eeqau goinniyoogaa, bitiyoogaa, morkketettaa, palamaa, qanaatiyoogaa, hanqquwaa, bana xoqqissiyoogaa, ooyettiyoogaa, issoi issuwaappe shaahettiyoogaa, miqqainniyoogaa, woriyoogaa, mattottiyoogaa, yettanchcha kiyiyoogaanne hageeta milatiyaageeta. Kasekka taani intteyyo yootidoogaadan, hageeta milatiyaageeta ooottiyaageeti Xoossaa kawotettaa laattokkona.”—Galaatiyaa 5:19-23.

“Hageeta milatiyaageeta” giya wurssetta qofaa akeeka. Asatettaa ooso geetettana danddayiya ubbabaa PHawuloosi wurssi yootibeenna. SHin hegee ‘PHawuloosi asatettaa ooso giidoogeetun baynna aybanne oottennaadan Geeshsha Maxaafay diggenna’ giidi issi uri qoppana danddayees giyoogaa gidenna. SHin, odettidabatun deꞌana xayikkonne, “hageeta milatiyaageta” geetettidaageeta shaakki eranawu nabbabiyaageeti bantta akeekaa abbiyaa goꞌettana bessees. Odettidaban deꞌana xayikkonne, “hageeta milatiyaageeta” geetettidabata oottiiddi ba nagaraappe simmenna uri Xoossaa Kawotettaa anjjota laattenna.

Yaatiyo gishshawu, nuuni Yihooway ixxiyoobay aybakko akeekana koshshees. Hegee deexxiyaabee? Leemisuwawu, dottoree neeni mittaa ayfiyaanne ataakilttiyaa darissada maanaadan, qassi buskutiyaa, karameelaanne hegaa malabaa meennaadan odiis gaada qoppa. Yaatin, keekkee hegeetuppe awugan qoodettiyaakko eranaagee nena metanee? Ane zaarettadakka Xoossaa ayyaanaa ayfiyaanne asatettaa oosuwaa qoppa. Yaatin qommoora denttido duuqettida muuziqay awugan qoodettii? Hegee siiquwaara, loꞌꞌotettaara, ba huuphiyaa naagiyoogaara woy Xoossaa ayyaanaa ayfiyaara gayttida hara eeshshata mule qonccissennaagee tuma. Issi uri hegaa mala muuziqay Xoossaa qofaa phalqqiyaaba gidiyoogaa akeekanaadan qoncce higgee deꞌana koshshenna. Nabbabiyoobawu, biidotussi, televizhiine prograametussi, komppiyutere kaassawu, websaytiyawunne hegaa malabawukka he maaray hanees.

Bessiyaagaadan Maayiyoogaanne Puulattiyoogaa

Maayiyoobawunne puulattiyoobawukka Geeshsha Maxaafay maarata yootees. Kiristtaaneti ubbay giiganne ufayssiya hanotan ubbatoo maayanawunne puulattanawu he maarati maaddoosona. Yihoowa siiqiya uri maayiyoobaanne puulattiyoobaakka baayyo ufayttanaassa gidennan, saluwan deꞌiya ba Aawaa ufayssana danddayiyoobadan xeellees. Nuuni kasetidi beꞌidoogaadan, issibaa xeelliyaagan Yihooway qoncce higgiyaa immibeennaagee A asay oottiyoobay A qofissenna giyoogaa gidenna. Maayiyoobaynne puulattiyoobay heeraappe heeran dummatees; ubba issi heerankka wodiyaappe wodiyan laamettees. SHin Xoossay ay wodiyankka awankka deꞌiya A asay kaallana bessiya maarata immiis.

Leemisuwawu, 1 Ximootiyoosa 2:9, 10y hagaadan gees: “Hegaadan qassi maccaasaikka bessiya maayuwaa kiphataaninne banttana shiishshi ekkiyoogan maayona. Xoossau yayyais giya maccaasau bessiyoogaadan, lo77obaa oottiyoogaanappe attin huuphiyaa shurubbaa daddiyoogan, worqqan woikko inqquwan, woikko daro al77o afalan banttana alleeqissoppona.” Yaatiyo gishshawu, Kiristtaane maccaasaykka attumaasaykka bantta heeran deꞌiya asati “Xoossau yayyais giya” uri ay mala maayo maayana gi qoppiyaakko loytti akeekana bessees. Issi Kiristtaanee, I maayiyoobaynne puulattiyoobay asay I yootiyo Geeshsha Maxaafaa waati xeellanaadan oottiyaakko loytti qoppana bessees. (2 Qoronttoosa 6:3) Loꞌꞌo leemiso gidiya Kiristtaanee haratu qofaa wora zaarennaadan woy eta xubbennaadan keehi qoppeesippe attin, ba dosiyoobaa woy ba maata giyoobaa qoppenna.—Maatiyoosa 18:6; Piliphphisiyuusa 1:10.

Issi Kiristtaanee I maayiyoobay woy puulattiyoobay harata yiilloyiyoogaa woy xubbiyoogaa akeekikko, PHawuloosaagaadan bana ufayssiyaabaappe aattidi harati ayyaanaaban qohettennaadan qoppees. PHawuloosi, “Taani Kiristtoosadan haniyoogaadan inttekka tanadan hanite” yaagiis. (1 Qoronttoosa 11:1) Qassi PHawuloosi, “Harai atto Kiristtoosikka bana ufaissibeenna” yaagidi Yesuusabaa yootiis. PHawuloosi Kiristtaaneta ubbaa zoridobay qoncce: “Nuuni ammanuwan minnidaageeti daafuranchchatu toohuwaa tookkanau bessees; nuuni nu xalaalaa ufaissanau bessenna. Nuuni huuphiyan huuphiyan nu ishaa maaddanau, ammanuwan a minttanaunne ufaissanau bessees.”—Roome 15:1-3.

Loꞌꞌobaa Kuuyiyoogaa Waati Meezetana Danddayiyoo?

Qoncce higgee imettibeenna yohuwankka Yihoowa waati ufayssanaakko eranawu, nuuni iitaa kehaa shaakki eriyoogaa waati meezetana danddayiyoo? Nuuni A Qaalaa ubba galla nabbabiyaaba, ubbatoo xannaꞌiyaabanne nabbabidobaa wotti dentti qoppiyaaba gidikko, Yihoowa ufayssiyaabaa loytti erananne loꞌꞌobaa kuuyana. Hegee sohuwaara haniyaaba gidenna. Issi naꞌi akeekennan loddan loddan dicciyoogaadan, nuunikka asi erennan loddan loddan Yihoowaara dabbotaa minttidi loꞌꞌobaa kuuyoos. Yaatiyo gishshawu, nuuni sohuwaara laamettana xayikko, hidootaa qanxxiyoogaappe danddayan naagana bessees. Hara baggaara qassi, daro wodee aadhdhiyoogaa xallay loꞌꞌobaa waati kuuyanaakko meezetanaadan oottenna. He wodiyan, qommoora denttidoogaadan Xoossaa Qaalaa ubbatoo xannaꞌananne nuuyyo danddayettida ubban hegaa oosuwan peeshshana koshshees.—Ibraawe 5:14.

Xoossaa higgeti nuuni ayyo azazettiyaakkonne paaccoosona; A maarati nuuni ayyaanaaban ay keena kaymakkonne A ufayssanawu ay keena koyiyaakko paaccoosona. Nuuni ayyaanaaban dicciyo wode, Yihoowanne Yesuusa leemisuwaa waati kaallanaakko kaaseegaappe aaruwan qoppoos. Qassi Geeshsha Maxaafan qonccida Xoossaa qofaa maaran ubbabaa kuuyanawu wozanappe koyoos. Nu ooso ubban saluwan deꞌiya nu Aawaa ufayssiyo wode, nuunikka kaseegaappe aaruwan ufayttoos.

[Misiliyaa]

Asay maayiyoobay heeraappe heeran dummatikkonne, nuuni Geeshsha Maxaafaa maaraa kaallidi doorana bessees