Neeni Yihoowaagaadan Qoppiyoogaa Meezetay?

1, 2. Nuuni ayyaanaaban dicciyo wode, ay oottiyoogaa tamaariyoo? Leemisuwaa yoota.

ISSI guutta naꞌay imotaa ekkees. A aawaynne aayyiyaa ayyo, “Galatays ga” yaagoosona. I eti azazido gishsha xallawu hegaadan oottees. I dicciyo wode, bana yelidaageetu qofaanne haratu kehatettaa loytti akeekees. He wode I wozanappe galatees. Aybissi? I galatiya ura gidiyoogaa tamaarido gishshataassa.

² Hegaadan, nuuni tumaa koyro erido wode, Yihooway nuuppe koyiyoobata azazettiyoogee keehi koshshiyoogaa tamaarida. SHin, nuuni ayyaanaaban dicci dicci biyo wode, Yihoowa qofaabaa, hegeekka I dosiyoobaa, I ixxiyoobaanne dumma dummabaa I xeelliyo ogiyaa kaseegaappe aaruwan tamaaroos. Hegaadan qoppiyoogaa tamaariyoogaaninne he qofay denttettin oottiyoogaaninne dooriyoogan, Yihoowaagaadan qoppiyoogaa meezetiyoogaa bessoos.

3. Yihoowaagaadan qoppiyoogaa meezetiyoogee metiyaaba gidana danddayiyoy aybissee?

³ Yihoowaagaadan qoppiyoogaa tamaariyoogee ufayssiyaaba gidikkonne, metiyaaba gidanakka danddayees. Nu bala qofay nuna issi issitoo metana danddayees. Leemisuwawu, shaaramuxiyoogaa, aquwaa siiqiyoogaa, sabbakiyo oosuwaa, bessenna ogiyan suuttaa goꞌettiyoogaa woy harabaa xeelliyaagan Yihoowa qofaa akeekanawu metootana danddayoos. Yaatin, nuuni ay oottana danddayiyoo? Xoossaagaadan qoppiyoogaa waati gujji gujji meezetana danddayiyoo? Qassi haꞌꞌikka sinttappekka loꞌꞌobaa kuuyanaadan hegee nuna waati maaddanee?

XOOSSAAGAADAN QOPPIYOOGAA

4. PHawuloosi nu ‘qofaa muumeera dummayanaadan’ zoridobaa polanawu nuuni ay oottana koshshii?

⁴ Roome 12:2 nabbaba. Ha xiqisiyan kiitettida PHawuloosi Yihoowaagaadan qoppiyoogaa tamaaranawu aybi koshshiyaakko qonccissiis. Nuuni ‘ha saꞌaa asaa milatiyoogaa’ agganawu alamiyaa qofaa ekkana bessennaagaa akeekanaadan hagaappe kasetiya huuphe yohoy nuna maaddiis. SHin PHawuloosi nuuni nu ‘qofaa muumeera dummayana’ koshshiyoogaakka yootiis. Hegaa giyoogee nuuni Xoossaa Qaalaa xannaꞌana, A qofaa akeekana, hegaa wotti dentti qoppananne issibaa aagaadan xeellanawu minni oottana koshshees giyoogaa.

5. Xannaꞌiyoogee eesuwan nabbabiyoogaappe waani dummatiyaakko qonccissa.

⁵ Xannaꞌiyoogee eesuwan nabbabiyoogaanne xannaꞌanawu maaddiya oyshawu zaaruwaa malaatiyoogaa xalla gidenna. Nuuni xannaꞌiyo wode, xannaꞌiyo xuufee Yihoowabaa, A ogiyaabaanne A qofaabaa nuna ay tamaarissiyaakko nuuni qoppoos. Nuuni Xoossay issibaa azaziyoynne haraa diggiyoy aybissakko akeekanawu maloos. Nu deꞌuwaaninne nu qofan ay laammana koshshiyaakkokka nuuni qoppoos. Xannaꞌiyo wode ubban ha ubbabaa qoppennan aggana danddayikkonne, amarida wodiyaa, geella xannaꞌiyo saatiyaappe bagga gidiyaagaa nu nabbabidobaa wotti dentti qoppanawu wodiyaa bazziyoogee maaddees.—Maz. 119:97; 1 Xim. 4:15.

6. Nuuni Yihoowa qofaa wotti dentti qoppiyo wode haniyaabay aybee?

⁶ Nuuni Xoossaa Qaalaa ubbatoo wotti dentti qoppiyo wode, maalaaliyaabay hanees. Nuuni Yihoowa qofawu wottiyoobi baynnaagaa shaakki ‘eroos’ woy ammanoos. Nuuni issibaa aagaadan xeelliyoogaa doommoosinne A qofaa maayoos. Nu qofay ‘dummatees,’ qassi nuuni ooratta ogiyan qoppiyoogaa doommoos. Nuuni Yihoowaagaadan qoppiyoogaa loddan loddan meezetoos.

NU QOPPIYOOBAY NUNA OOSUWAWU DENTTETTEES

7, 8. (a) Aquwan duretiyoogaa xeelliyaagan Yihoowa qofay aybee? (Doomettan deꞌiya misileta xeella.) (b) Nuuni aagaadan qoppikko, ubba wode ay sinttayaanee?

⁷ Nuuni qoppiyoobay nuussi issibay siyettanaadan oottiyoogaa xalla gidennan, oosuwawukka nuna denttettees. (Mar. 7:21-23; Yaaq. 2:17) Hegaa loytti akeekanawu amarida leemisota ane beꞌoos. Leemisuwawu, Wonggeleti aquwaabaa xeelliyaagan Yihoowa qofaa nuussi loytti bessoosona. Xoossay daro aqoy baynna Yooseefinne Mayraama ba Naꞌaa dichchanaadan dooriis. (Wog. 12:8; Luq. 2:24) Yesuusi yeletido wode, Mayraama “imattai aqiyo keettan sohoi bainna gishshau, . . . miizzai kattaa wottin miyo qoriyan [A] zin77issaasu.” (Luq. 2:7) Yihooway koyiyaakko, ba Naꞌay yelettanawu keehi injjetiya sohuwaa giigissana danddayees. SHin, Yihoowa keehi qofissidabay Yesuusi ayyaanaabaa sinttayiya keettan dicciyoogaa.

⁸ Yesuusa yeletaabaa yootiya ha Geeshsha Maxaafaa taarikiyaappe Yihooway aquwaabaa waati xeelliyaakko nuuni akeekana danddayoos. Issi issi aawatinne aayeti bantta naata hegee ayyaanaaban keehi qohikkokka, aquwaaban etawu injjetanaadan mintti zoroosona. SHin Yihooway ayyaanaabaa aybippenne xoqqu ootti xeelliyoogee qoncce. Neeni Yihoowaagaadan qoppay? Neeni oottiyoobay ay qonccissii?—Ibraawe 13:5 nabbaba.

9, 10. Harata xubbiyoogaa nuuni Yihoowaagaadan xeelliyoogaa waati bessana danddayiyoo?

⁹ Hara leemisoy haratuyyo xube gidiyoogaara gayttidaagan Xoossaa qofaa. Yesuusi hagaadan giis: “Tana ammaniya ha guuttatuppe issuwaa balettiya oonanne, gaacciyo wogga woxaa a qooriyan qachchidi, abban a oliyoogee au keha.” (Mar. 9:42) Harata xubbiyoogaa Yesuusi keehi iitabadan xeellidoogee qoncce! Yesuusi wottiyoobi baynnan ba Aawaa milatiyo gishshawu, issi uri oottido iitabay Yesuusa kaalliya ura xubbiyo wode Yihoowawukka hegaadan siyettiyoogaa ammanettana danddayoos.—Yoh. 14:9.

¹⁰ Nuuni Yihoowaagaadaaninne Yesuusaagaadan qoppiyoo? Nuuni oottiyoobay ay qonccissii? Leemisuwawu, nuuni gubaaꞌiyan deꞌiya issota issota yiilloyana danddayiyaabaa woy qassi harati pokkobaa qaaqqatanaadan oottana danddayiyaabaa maayiyoogaa woy aleeqettiyoogaa dosoos giidi qoppoos. Nuuni nu mala Kiristtaaneta siiqiyoogeenne etawu qoppiyoogee nu dooruwaa agganaadan oottanee?—1 Xim. 2:9, 10.

11, 12. Iitabaa Xoossaagaadan xeelliyoogeenne nuna naagiyoogee nuuni iitabaa oottennaadan waati naaganee?

¹¹ Heezzantto leemisuwaa: Yihooway iitabaa ixxees. (Isi. 61:8) Nuuni laattido nagaraappe denddidaagan likkebaa oottanawu issi issitoo metootiyoogaa I erikkonne, aagaadan iitabaa ixxanaadan nuna zorees. (Amoxa 5:15 nabbaba.) Nuuni Yihooway iitabaa aybissi shenetiyaakko wotti dentti qoppiyoogee aagaadan qoppanaadan nuna maaddana; hegee nuuni iitabaa mule oottennaadan wolqqaa immees.

¹² Nuuni Yihoowaagaadan iitabaa ixxiyoogee Xoossaa Qaalan odettibeenna issi issi oosoti bala gidiyoogaa nuuni shaakki eranaadankka nuna maaddana. Leemisuwawu, lap danssing giyo shori baynna durssay alamiyan meeze gidiiddi deꞌees. Issoti issoti hegee mattumaa gaytetta gidenna giidi mooroy baynnabadan xeelloosona.a SHin hegaadan oottiyoogee iitabaa ubbaa ixxiya Xoossaa qofaa qonccissiyaabee? Simi nuna naagiyoogaaninne Yihooway ixxiyoobaa shenetiyoogan iitabaa oottiyoogaappe naagettoos.—Roo. 12:9.

SINTTAPPE KUUYANABAA KASETIDI QOPPIYOOGAA

13. Nuuni sinttappe akeekan kuuyana mala, issibaa Yihooway waati xeelliyaakko haꞌꞌi qoppana koshshiyoy aybissee?

¹³ Nuuni xannaꞌiyo wode, Yihooway issibaa waati xeelliyaakko nuuni qoppana koshshees; ayssi giikko, nuuni sinttappe akeekan kuuyanaadan hegee nuna maaddana danddayees. Yaatiyoogan, sohuwaara kuuyana koshshiyaabay merettiyo wode, oottanabay nuussi kirqqi geenna. (Lee. 22:3) Geeshsha Maxaafay yootiyo amarida asatubaa qoppa.

14. Yooseefi PHoxiifaara machcheeyyo ixxis giidoogaappe nuuni ay tamaariyoo?

¹⁴ Yooseefi bana PHoxiifaara machchiyaa lambbeechchanawu malido wode sohuwaara eqettiyoogan, aqo deꞌuwan ammanettiyoogaa Yihooway waati xeelliyaakko qoppidoogaa bessiis. (Doomettaabaa 39:8, 9 nabbaba.) Qassi I, “Taani waatada hagaa mala daro iitabaa hanada Xoossaa bolli nagaraa oottoo?” yaagidi PHoxiifaara machcheeyyo zaaridoogee I Xoossaagaadan qoppiyoogaa bessees. Nuuni shin? Nenaara oottiya uri laambbeechchiyoogaa doommiis gaada qoppa. Woy qassi pokkobawu denttettiya kiitaa woy misiliyaa ne silkkiyan kiittikko shin?b Nuuni hegaa malaban Yihoowa qofaa kasetidi tamaaridabanne aagaadan qoppiyaaba, qassi ay oottanaakko kasetidi kuuyidaba gidikko, Yihoowawu ammanettanawu metootokko.

15. Yihoowawu ammanettennaadan nuna paaciyaabaa heezzu Ibraawetuugaadan nuuni waati eqettana danddayiyoo?

¹⁵ Sidiraaqa, Misaaqanne Abddanaaga giyo heezzu Ibraawetu hanotaa ane qoppa. Eti Kawoy Naabukadanaxoori essido worqqa misiliyawu goynnennan ixxidoogeenne zirxxa zaaruwaa kawuwawu zaaridoogee Yihoowawu ammanettidi deꞌanawu eti ay oottana koshshiyaakko qoppidoogaa bessees. (Kes. 20:4, 5; Dane. 3:4-6, 12, 16-18) Nena ootissiyaagee worddo haymaanootiyaa baalaa bonchchiyoogaara gayttidabawu miishshaa immanaadan nena oychchiis gaada qoppa. Neeni waatanee? Hegee hanana gakkanaashin naagiyoogaappe, Yihooway hegaa malabaa waati xeelliyaakko haꞌꞌi qoppiyoogee loꞌꞌo. Yaatiyo wode, hegaa malabay merettikko, heezzu Ibraawetuugaadan suurebaa haasayanawunne oottanawu neeni metootakka.

16. Yihoowa qofaa loytti akeekiyoogee eesuwan akkamettana koshshiyaabawu giigettanaadan nuna waati maaddii?

¹⁶ Ammanettidi deꞌana koshshiyoogaa kaseti qoppiyoogee eesuwan akkamettanaadan oottiyaabay merettiyo wodekka maaddana danddayees. Nuuni kumetta suuttaa woy suuttawu oyddu waanna kifiletuppe awugaanne akkamuwawu goꞌettennaadan murttikkonne, suuttaara gayttida issi issi akkamuwawu Geeshsha Maxaafay Yihoowa qofaabaa yootiyo maaraa kaallidi nuuni kuuyana koshshees. (Oos. 15:28, 29) Hegaa malabaa hosppitaaliyan qoppiyoogee bessiyaaba gidennaagee qoncce; he wode nuuni keehi sahettana danddayoos, qassi eesuwan kuuyanaadan harati iisettana danddayoosona. Haꞌꞌi neeni loytta pilggana, akkamuwawu neeni koyiyoobaa higgiyaa maaraadan xaafa wottananne ne dottoriyaara haasayana koshshees.c

17-19. Nuuni Yihoowaagaadan qoppiyoogaa haꞌꞌi tamaarana koshshiyoy aybissee? Issi leemisuwaa yoota.

¹⁷ Wurssettan, PHeexiroosi, “Ta Godawu, neessi kehabaa qoppa” yaagidi bessennabaa zorido wode Yesuusi sohuwaara zaaridobaa qoppa. Yesuusi Xoossaa shenee ayyo aybakko, qassi saꞌan A deꞌuwaaranne hayquwaara gayttidaagan Geeshsha Maxaafay yootiyoobaa kasetidi loytti qoppennan waayi aggana. Hegaa eridoogee I Yihoowawu ammanettidi deꞌanawunne ba deꞌuwaa asa ubbawu aatti immanawu minnanaadan oottiis.—Maatiyoosa 16:21, 22, NW, 23 nabbaba.d

¹⁸ Ha wodiyan, Xoossay A asay aara dabbotanaadaaninne danddayettida ubban A oosuwaa loytti oottanaadan koyees. (Maa. 6:33; 28:19, 20; Yaaq. 4:8) Yesuusa gakkidaagaadan, loꞌꞌobaa qoppidi issi issi asay nuuni hegaadan oottennaadan zorana danddayees. Leemisuwawu, kase amarida wodiyan neeni ayyaanaabaa oottiyoogaa issi loꞌꞌo oosoy diggiyaaba gidikkonne, nena ootissiyaagee neeyyo damoozaa gujjidi he oosuwaa immikko shin? Woy qassi neeni tamaare gidikko, gujjada tamaaranawu intte sooppe haahosaa baanawu shoobettidabadan qoppa. Neeni woossananne xannaꞌana, qassi so asaanne geella cimata zoriyaa oychchada kuuyana koshshiyoy he wodee? Hegaa malaban Yihoowa qofay aybakko haꞌꞌi tamaariyoogeenne aagaadan qoppanawu baaxetiyoogee loꞌꞌo. Yaanikko, hegaa malabay nena gakkikko, hegee neeyyo paace gidennan aggana danddayees. Neeni ayyaanaabaa halchcha uttadasanne ne wozanan murttadasa; attidabay neeni kasetada kuuyidobaa poliyoogaa.

¹⁹ Qoppennan merettiya hara hanotatakka qoppana danddayaasa. Nuuni gakkana danddayiya ubbabawu giigettana danddayennaagee qoncce. SHin, nuuni xannaꞌiyo wode Yihoowa qofaa wotti dentti qoppikko, nuuni xannaꞌidobaa hassayananne ayba hanotankka hegaa goꞌettidi loꞌꞌobaa kuuyana danddayoos. Simi yaakko, dumma dumma hanotatun Yihoowa qofaa akeekana koshshiyoogaa, qassi aagaadan qoppananne Xoossaagaadan qoppiyoogee haꞌꞌikka sinttappekka oottiyooban nuna waati maaddiyaakko akeekana koshshiyoogaa hassayoos.

YIHOOWA QOFAANNE NEENI SINTTAPPE DEMMANABAA

20, 21. (a) Ooratta alamiyan nuuni nu laꞌatettan ufayttanay aybissee? (b) Nuuni haꞌꞌi nu deꞌuwan waani ufayttana danddayiyoo?

²⁰ Nuuni ooratta alamiyaa yeemuwan naagoos. Nuuppe daroti gannate gidiya saꞌan merinawu deꞌanawu yeemottoos. Xoossaa Kawotettan, asay ha alamiyan deꞌiya azzanuwaappe laꞌa kiyana. He wodekka, asay ba koyidobaa doorana. Asa ubbay ba koyiyoobaanne ba dosiyoobaa doorana.

²¹ He laꞌatettawu zaway deꞌiyoogee qoncce. He wode ashkketi likkebaanne likke gidennabaa xeelliyaagan Yihoowa higgiyaanne A qofaa kaallana. Hegee zawi baynna ufayssanne sarotettaa demissana. (Maz. 37:11) He wode gakkanaashin, Yihoowaagaadan qoppiyoogaa meezetiiddi haꞌꞌikka ufayttana danddayoos.