Qareti Baynna Alamiyan Qarettiyoogaa

BURUNDDIN deꞌiya issi bitanee shekkeeree oyqqin keehi sahettiis. I eesuwan hosppitaaliyaa baana koshshiis. SHin ayba ogiyan? A efaanau kaamee baawa. Naaꞌꞌu laggeti a maaddanau yiidosona. Eti a bishkkiliitiyaa togissidi, deriyaara kanttidi daafurssiya ichashu saate ogiyaa sugidosona. Guutta gallassaappe simmin, au kehiis.

Amarkka biittan Naase 2005n meretay gattiyo daafay abbaa heeran deꞌiya sohota bashshi simmin, bantta dosan maaddiyaageetu issi citay, mittay a bolli kunddido issi keettaa demmidosona. He keettaa godiyaa mule erenna he asati keettaa bolli kunddida mittaa adussaa magaaziyan qanxxiiddinne buuraa denttiiddi kumetta gallassaa peꞌidosona. Keettaayiyaa: “Taani ha asata keehippe galatays” yaagaasu.

Televizhiiniyaanne eraadooniyaa milatiyaabatun darotoo qareti baynnabay odettees. Ha odettiyaabati, asay galla galla qaretaanne kehatettaa bessiyoogee darotoo hassayettennaadan oottoosona. Gidikkokka, ha hanotay ubbasan deꞌiya asay siiquwaa, kehatettaanne qaretaa keehippe koyiyoogaa diggenna. Qarettiyoogee ubbaassi keehi koshshiyaaba! Ufayssa Masqqalaa bonchiyo wodetun daroti, “asaassi sarotettai gido” giidi haasayiyo woykko yexxiyo wode qaretaa bessiyoogee meeze gididaba.—Luqaasa 2:14.

Asaa siiqoy keehippe irxxido alamiyan qarettiyoogee metiyaaba gidana danddayees. Kehennaageenne qarettennaagee ufayssiya deꞌuwaa deꞌanau maaddees giyo xeelay ubbasan asay meezetidoba. Qarettiyoogaappe meqettaa iitiyoogee eratetta giya qofaadan daroti deꞌiyaaba milatees. Yaaretiyoogeenne bana siiqiyoogee qarettennaadan oottees.

Hegaappe denddidaagan, daroti haratussi siyettiyaabaa woykko eta koshshaa qexenne geennan banttana kaseyoosona. Ispporttiyan, pilmiyaaninne hegaa malaban qara gidida attuma asati, asau qarettenna “mino attuma asadan” (gijjedan) qonccoosona. Issi issi polotikaa asatikka hegaadan oottoosona.

Yaatiyo gishshau, nu huuphiyaa hagaadan oychana koshshees: Nuuni qarettana koshshiyoy aybissee? Qarettiyoogee loꞌꞌobaa oottanau maaddii? Qarettiyaageeta gidanaadan nuna aybi maaddii? Kaalliya huuphe yohoy ha oyshata zaarees.

[Sinttaa 3n de‵iya saaxiniyaa]

•Qarettiyoogee laafatettee?

•Qarettiyoogee loꞌꞌobaa oottanaadan maaddii?

•Qarettiyoogaa ayba ogiyan bessana danddayay?