Meretay Yihoowa Aadhida Eratettaa Qonccissees

“Beettenna a eeshshay . . . medhidobaappe qonccidi beettees.”—ROOME 1:20, NW.

1. Ha wodiyan alamiyaa aadhida eratettay darotu bolli ay kaalettidee?

ASAY “aadhida eratettaa” giya qaalaa bessenna ogiyan goꞌettees. Issi issi asay issi uri darobaa eriyo gishshau aadhida erancha yaagees. Gidikkokka, tumuppe giiga deꞌuwaa deꞌanau maaddiya ammanttiya kaaletuwaa alamiyan aadhida erancha geetettiyaageeti immokkona. Hegaappe dumma hanotan, hegaa mala asatu eraa kaalliyaageeti ‘beetan yaanne haanne shocettidi, asaa timirtte carkko ubban sugettoosona.’—Efisoona 4:14.

2, 3. (a) “Aadhdhida eratettai a xalaalau” deꞌiyoy Yihoowa gididoy aybissee? (b) Xoossaa aadhida eratettay alamiyaagaappe dumma gididoy ayba ogiyaanee?

² Xoossaa Yihoowappe beettiya tumu aadhida eratettaa demmiyaageetu hanotay hegaappe keehi dumma! Geeshsha Maxaafay, “aadhdhida eratettai a xalaalau,” giishin Yihoowa xallau deꞌiyoogaa yootees. (Roome 16:27) Salo gufanttoynne saꞌa micettay merettidobaanne eta taarikiyaa xeelliyaagan ubbabaa i erees. Asaa naati pilggiyo oosuwau ammanettiyo mereta higgee ubbay Yihooway giigissidoogaa. Hegaa gishshau, i asay demmiyo oorattabaaninne asay xoqqu oottidi xeelliyo alamiyaa eran garamettenna. “Ha sa7aa aadhdhida eratettai Xoossaa sinttan eeyyatetta.”—1 Qoronttoosa 3:19.

³ Yihooway ba ashkkaratussi ‘aadhida eratettaa immiyoogaa’ Geeshsha Maxaafay yootees. (Leemiso 2:6) Alamiyaa aadhida eratettaappe dumma gidida ogiyan, Xoossay immiyo aadhida eratettay qoncce. Ubba hegee iitaa kehaa shaakkanau maaddees; qassi tumu eraaninne akeekan baasettiis. (Yaaqooba 3:17 nabbaba.) Kiitettida PHauloosi Yihoowa aadhida eratettan maalaalettiis. I: “Xoossaa duretettai ai keena daroo? A hayyoinne a eratettai ai keena xoqqee? A pirddaa yootanai oonee? I ba oottiyoogaa i aissi oottiyaakko, oonee akeekiyai?” yaagidi xaafiis. (Roome 11:33) Aadhida erancha ubbaappe Yihooway aadhiyo gishshau, a higgeti nuuni loꞌꞌo deꞌuwaa deꞌanaadan kaalettanaagaa ammanettoos. Hegaa bollankka, Yihooway nuuni ufayttanaadan koshshiyaabaa ooppenne aaruwan erees.—Leemiso 3:5, 6.

“Waanna Oosanchcha” Gidida Yesuusa

4. Nuuni Yihoowa aadhida eratettaa akeekana danddayiyo issi ogee aybee?

⁴ Yihoowa aadhida eratettaynne hara maalaalissiya a eeshshati merettidaban qonccoosona. (Roome 1:20 nabbaba.) Yihoowa oosoti, guuttatikka gitatikka a eeshshaa qonccissoosona. Nuuni awankka beꞌiyo meretati, aadhida erancha ubbaappe aadhiya, siiqiya Medhidaagee deꞌiyoogau daro naqaasha gidoosona. I medhidobaa qoppiyoogan abaa darobaa tamaarana danddayoos.—Mazamure 19:1; Isiyaasa 40:26.

5, 6. (a) Yihooway medhiyo wode aara oottiday oonee? (b) Nuuni ay beꞌanau deꞌiyoo? Aybissi?

⁵ Yihooway “salotanne sa7aa” medhiyo wode barkka deꞌenna. (Doomettaabaa 1:1) Salo gufanttoynne saꞌa micettay merettanaappe daro wodiyaa kasetidi, “ubbabaikka” a baggaara merettido, issi ayyaana meretaa i medhidoogaa Geeshsha Maxaafay yootees. He ayyaana meretay Xoossaassi mexi issi Naꞌaa—“merettidabaa ubbaappe aadhdhiya baira Na7a”—guyyeppe saꞌan asa gididi deꞌida Yesuusa. (Qolasiyaasa 1:15-17) Yihoowagaadan, Yesuusaukka aadhida eratettay deꞌees. Leemiso shemppo 8n, i asadan qonccida aadhida eratettan leemisettiis. He shemppuwan Yesuusi Xoossau “waanna oosanchcha” geetettidikka qoncciis.—Leemiso 8:12, 22-31.

⁶ Hegaa gishshau, salo gufanttoynne saꞌa micettay Yihoowanne a Waanna Oosanchaa, Yesuusa aadhida eratettaa qonccissees. Salo gufanttuwaanne saꞌa micettaa giddon deꞌiyaabaappe nuuni keehi goꞌꞌiyaabaa tamaaroos. Merettidabatuppe Leemiso 30:24-28n “keehi aadhdhida eranchcha” geetettida oyddu leemisota ane beꞌoos.a

Minnidi Oottanau Demmiyo Timirttiyaa

7, 8. Qaacuwaa xeelliyaagan nena aybi garamissii?

⁷ Saꞌan deꞌiya ‘guutta meretata’ giyoogeetikka merettido hanotaanne oottiyo hanotaa nuuni akeekiyo wode timirttiyaa demmoos. Leemisuwau, qaacoy meretan demmido aadhida eratettaa qoppa.—Leemiso 30:24, 25 nabbaba.

⁸ Pilggiya issoti issoti qoppiyoogaadan asaa ubbau huuphiyan huuphiyan 200,000 keena gakkiya, minnidi oottiya qaacoti biittaa bollinne biittaa giddon deꞌoosona. Qaacoti citan issippe deꞌoosona; daro citatun heezzu qommo qaacoti deꞌoosona; hegeetikka kawota, attumaageetanne oosanchata. Ubbaykka huuphiyan huuphiyan qaacuwaa citau koshshiyaabaa kunttanau dumma dummabaa oottoosona. Tohossa Amerkkan deꞌiya, bonccuwaa duuttiya qaacuwaa qommoy cincca goshshancha geetettana danddayees. Ha guutta meretay fangas giyo ba kattaa murutay daranaadan issisaappe harasan tokkees, kareesinne gadiyaa araddissees. Ha cincca goshshanchay ba citau koshshiyaagaa keena qumay deꞌanaadan koshshiyaagaa keenaa oottees.b

9, 10. Minnidi oottiyoogan qaacotu leemisuwaa waati kaallana danddayiyoo?

⁹ Nuuni qaacotuppe tamaarana danddayoos. Nuuni loꞌꞌo ayfe demmanau koyiyaaba gidikko, minnidi oottana koshshiyoogaa etappe tamaaroos. Geeshsha Maxaafay: “Inttenoo azallatoo, qaacotukko biite; biidi etappe tamaarite. Yaatidi aadhdhida eranchcha gidite. Qaacota ootissanau azaziyaabi, halaqi woikko eta haariyaabi baawa; shin banttau maanabaa bone minjjoosona; kattaa cakkiyo wodekka banttau koshshiya kattaa shiishshoosona” yaagidi yootees. (Leemiso 6:6-8) Yihoowaynne a Waanna Oosanchay, Yesuusi minnidi oottoosona. Yesuusi: “Ta Aawai ubba wode oottees; taanikka oottanau bessees” yaagiis.—Yohaannisa 5:17.

¹⁰ Xoossaanne Kiristtoosa leemisuwaa kaalliyaageeta gidiyoogaadan, nuunikka minnidi oottana koshshees. Xoossaa dirijjitiyan nuuni oottiyo oosoy ayba gidikkonne, nuuni ubbay ‘Godaa oosoy’ daridoogeeta gidana bessees. (1 Qoronttoosa 15:58) Yaatiyo gishshau, PHauloosi Roome Kiristtaanetuyyo: “Minni oottite; azalloppite; intte kumetta wozanaappe Godau oottite” yaagido zoriyaa nuuni kaallana koshshees. (Roome 12:11) Geeshsha Maxaafay: “Intte oottido oosuwaanne . . . Xoossaa siiqido siiquwaa Xoossai doganau worddanchcha gidenna” yaagiyo gishshau, Yihooway koyiyoobaa nuuni oottiyoogee mela gidenna.—Ibraawe 6:10.

Ayyaanaaban Qohettennaadan Naagettiyoogaa

11. Guppalletuura gayttida issi issi hanotata qonccissa.

¹¹ Nuuni appe maaddiyaabaa tamaarana danddayiyo, guutta mereta geetettana danddayiya haray guppalliyaa. (Leemiso 30:26 nabbaba.) I harbbaynnuwaa mala gididi, guutta hayttaynne qantta tohoy deꞌiyoogaa. Ha guutta doꞌay keratiya heeran deꞌees. Guppallee haahuwan deꞌiyaabaa beꞌanau danddayiyoogeenne i deꞌiyo keran deꞌiya ollatinne kooppoti qohiyaabaappe naagettanaadan a maaddoosona. Guppalleti issippe deꞌanaadan merettidoogee, qohiyaabaappenne balgguwan meeguwaappe naagettanaadan maaddees.c

12, 13. Guppalliyaappe ay tamaarana danddayiyoo?

¹² Guppalliyaappe nuuni ay tamaarana danddayiyoo? Koyruwan, ha doꞌay qohiyaabaappe bana naagiyoogaa akeeka. Bana qohiyaabaa haahuwan beꞌanau loytti xeelliya ba ayfiyaa goꞌettees; qassi baqati attiyo ba ollaappenne kooppuwaappe haakkennan deꞌees. Hegaadan, Seexaanaa alamiyan deꞌiya, daafaa gattiya geemabata akeekanau, ayyaanaaban nuuni tishshi ootti xeelliyaageeta gidana bessees. Kiitettida PHeexiroosi Kiristtaaneta: “Xalahe halaqai, intte morkkee, mittiyo uraa koyidi, gudiya gaammuwaadan gudiiddi, intte lanqqiyan yuuyiyo gishshau naagettitenne beegottite” yaagidi zoriis. (1 PHeexiroosa 5:8) Yesuusi saꞌan deꞌiyo wode, Seexaanay I suuretetta equwaa naagennaadan oottiyo ubbabaa teqqanau tishshi giidi deꞌiis. (Maatiyoosa 4:1-11) Yesuusi bana kaalliyaageetuyyo loꞌꞌo leemiso gidiis.

¹³ Nuuni tishshi giidi deꞌana danddayiyo issi ogee, Yihooway nuna ayyaanaaban naaganaadan giigissidoban goꞌettiyoogaana. Xoossaa Qaalaa xannaꞌiyoogaanne Kiristtaane shiiqotun beettiyoogaa xaasayidi xeellana bessenna. (Luqaasa 4:4; Ibraawe 10:24, 25) Hegaa bollikka, guppalleti issippe deꞌiyoogan goꞌettiyoogaadan, nuuni issoy issuwaara ‘minettanau’ nu mala Kiristtaanetuura matattidi deꞌana koshshees. (Roome 1:12) Yihoowa naaguwaa demmanau koshshiyaabaa oottiyoogan: “GODAI tau wogga zaallaa; taani olaappe naagettiyo miixaa; i tana ashshiyaagaa. Ta Xoossai taani akko baqatiyo ta wogga zaallaa. . . . I taani qosetta attiyo soho” yaagidi xaafida Daawitaara maayiyoogaa bessoos.—Mazamure 18:2.

Yedetay Gakkishinkka Gencciyoogaa

14. Issi boolee maalaalissennaba gidikkonne, booliyaa wudiyaabaa woygana danddayettii?

¹⁴ Nuuni booliyaappekka tamaarana danddayoos. Ichashu santtimeetire gidiya issi boolee maalaalissennaba gidana danddayees; shin booliyaa wudee maalaalissiyaaba. (Leemiso 30:27 nabbaba.) Miidi kallennaagan erettiya, shemppoy baynna booliyaa wudee, cahau matida kattaa sohuwaara dippi oottana danddayees. Geeshsha Maxaafay booliyaa wudiyaa gujjin, hara paalliya guutta meretati matattiyo wode siyettiya cenggurssaa para gaaretu giirettaaninne mela gattaa miya tamaa lacuwaa cenggurssan leemisees. (Yuu7eela 2:3, 5) Asay booliyaa wudee kanttennaadan teqqanau tamaa goꞌettees; shin hegee darotoo teqqenna. Aybissi? Hayqqida booleti tamaa toyssin, attidaageeti teqqiyaabi baynnan boosona. Booletussi kawoy woy kaalettiyaabi baynnaba gidikkonne, eti ayba xubiyaanne gidin xooniya, keehippe giigettida olanchatudan zattoosona.d—Yuu7eela 2:25.

15, 16. Ha wodiyan Kawotettaabaa yootiyaageeti booliyaa wudiyaa malatiyoy ayba ogiyaanee?

¹⁵ Hananabaa yootiya Yuuꞌeeli, Yihoowa ashkkaratu oosoy booletuugaa mala gidiyoogaa yootiis. I yaagidi xaafiis: “Eti wolqqaama asatudan woxxoosona; olanchchatudan dirssaa gimbbiyaakka gi77oosona. Eti ubbaikka maaran salppoosona; bantta salppiyaappe gaxi kiyokkona. Eti issoi issuwaara sugettokkona; ubbaikka ba salppiyan salppiyan sitti giidi, sinttau hemettoosona. Eti banttanaara olettiyaageetu gidduwaara [“amaridaageeti zubbiyan hayqqiyaaba gidikkonne,” NW] xuussidi kanttoosona; he wode eta teqqiyaabi baawa.”—Yuu7eela 2:7, 8.

¹⁶ Ha wodiyan Xoossaa Kawotettaabaa sabbakiyaageeta ha hiraagay loytti qonccissees! Eti sabbakennaadan teqqanau goꞌettido ‘dirssaa gimbbe’ malabi aybinne teqqana danddayibeenna. Hegaappe ubba, daroti karishinkka Xoossaa sheniyaa oottiyoogan genccida Yesuusa leemisuwaa kaalloosona. (Isiyaasa 53:3) Amarida Kiristtaaneti eta ammanuwaa gaasuwan asay “zubbiyan” worin hayqqidosona. Gidikkonne, sabbako oosoy oosettiiddi deꞌeesinne Kawotettaabaa yootiyaageetu qooday dariiddi deꞌees. Yedetay darotoo hara ogiyan Kawotettaabaa siyana danddayenna asati mishiraachuwaa siyanaadan oottees. (Oosuwaa 8:1, 4) Asay siyanau sheneho giyaabanne yedetay gakkiyaaba gidikkonne, haggaazuwan neeni booletuugaadan genccay?—Ibraawe 10:39.

“Lo77obaa Minttidi Oyqqite”

17. Geeko gedee herega malabata baqqi oyqqiyoy aybissee?

¹⁷ Geeko giyo guutta zaree dafo higgiyau haarettiyaaba milatenna. (Leemiso 30:28 nabbaba.) Ha guutta meretay godaa bolli pudenne, ubba qassi meeshettida korniisiyan bonggottidi kunddennan eesuwan woxxana danddayiyoogan saynttistteti garamettoosona. Geekoy waanidi hegaadan oottana danddayidee? A tohuwan shida malabay deꞌiyo gishshataassa gidenna. Hegaappe, geekoyyo tohuwaa yacha ubban deꞌiya zirimo malatiyaabatun shaꞌan qoodettiya binnaana milatiyaabati deꞌoosona. Ha binnaana malatiyaabatu ubban qassi xeeray pidda gidido xeetan qoodettiya suuppa binnaana milatiyaabati deꞌooosona. Ha suuppa binnaana milatiyaabatu ubbaa giddon deꞌiya moolokiyule wolqqay geekoppekka deexxiyaabaa tookkana danddayissees—ubba herega milatiyaabatun bonggottidi woxxanaadankka danddayissees. Saynttistteti geeko hanotan garamettidi, geeko gediyaadan oottidi medhiyoobay keehi baqqi oyqqiyaaba gididi goꞌꞌana danddayees goosona.e

18. Nuuni ubba wode ‘loꞌꞌobaa minttidi oyqqidoogaa’ waatidi akeekana danddayiyoo?

¹⁸ Geekoppe ay tamaarana danddayiyoo? Geeshsha Maxaafay: “Iitabaa ixxite; lo77obaa minttidi oiqqite” yaagidi nuna zorees. (Roome 12:9) Seexaanaa alamiyan kumida qohiyaabay nuuni Xoossaa ufayssiya baaso siraatata mintti oyqqennaadan oottana danddayees. Leemisuwau, timirtte keettan woy ooso sohuwan woy wodiyaa aattiyooba gididi Xoossay ufayttennaban, Xoossaa higgiyaara moggidi deꞌennaageetuura zuppetiyoogee loꞌꞌobaa oottanau murttido nu murttiyaa shugissana danddayees. Hegaa malabay ne bolli gakkanaadan paqqadoppa! Xoossaa Qaalay: “Nena ne huuphen aadhdhida eranchcha kessoppa” yaagidi zorees. (Leemiso 3:7) Hegaappe, Muusee beni wode Xoossaa asaa aadhida eratettan: “GODAAYYO intte Xoossaayyo, yayyite; ayyo oottite; aara ohettite” yaagidi zorido zoriyaa kaalla. (Zaarettido Wogaa 10:20) Yihoowaara ohettiyoogan: “Neeni xillotettaa siiqadasa; naaquwaa ixxadasa” geetettida Yesuusa leemisuwaa kaalloos.—Ibraawe 1:9.

Meretaappe Tamaariyoobaa

19. (a) Merettidabaappe neeni akeekido Yihoowa eeshshati awugeetee? (b) Xoossaa aadhida eratettay nuna waati goꞌꞌii?

¹⁹ Nuuni beꞌidoogaadan, Yihoowa eeshshay i medhidoban qonccidi beettees; qassi i medhidobaappe keehippe goꞌꞌiya timirttiyaa demmoos. Yihoowa oosuwaa loyttidi pilggido payduwan, a aadhida eratettan keehippe maalaalettoos. Xoossaa aadhida eratettaa loytti akeekiyoogee ha wodiyan ufayttanaadan ootteesinne sinttappekka naaguwaa demmanaadan oottees. (Eranchchaa 7:12) Ee, Leemiso 3:13, 18n: “Aadhdhida eratettaa demmiya urai, akeekaakka babaa oottiya urai anjjettidaagaa. [Aadhida eratettay] bana oiqqiyaageetussi de7o mitta; a mintti oiqqiya ubbatikka anjjettidaageeta” yaagiya qaalay tuma gidiyoogaa nu huuphe akeekana danddayoos.

[Footnotes]

Hassayay?

Nuuni . . .

• qaacuwaappe

• guppalliyaappe

• booliyaappe

• geekoppe ay tamaariyoo?

[Sinttaa 20n deꞌiya misiliyaa]

Bonccuwaa duuttiya qaacuwaadan minnada oottay?

[Sinttaa 21n deꞌiya misiliyaa]

Guppalleti issippe deꞌiyoogan qohiyaabaappe naagettoosona. Neenikka hegaadan oottay?

[Sinttaa 22n deꞌiya misiliyaa]

Booliyaagaadan, Kiristtaaneti genccoosona

[Sinttaa 22n deꞌiya misiliyaa]

Geekoy issibaa minttidi oyqqiyoogaadan, Kiristtaanetikka loꞌꞌobaa minttidi oyqqoosona

[Misilee Ekettidosaa]

Stockbyte/Getty Images