Yihoowassa Gidiyoy A Aaro Kehatettaana

“Nuuni Yihoowassa.”—ROOME 14:8, NW.

1, 2. (a) Nuuni ayba maata demmidoo? (b) Nuuni woygiya oyshata tobbanee?

YIHOOWAY Israaꞌeele deriyaa: “Kawotetta ubbaa giddon intte taayyo buzo gidana” giido wode, keehippe gita maatay etau imettiis. (Kessaabaa 19:5) Ha wodiyan Kiristtaane gubaaꞌiyaa yame gididaageetussikka Yihoowassa gidiyo maatay deꞌees. (1 PHeexiroosa 2:9; Ajjuutaa 7:9, 14, 15) Hegee nuna merinau goꞌꞌana danddayiya maata.

² Yihoowassa gidiyoogee maata gidiyoogaa xalla gidennan aawatettaa kaalettees. Issoti issoti hagaadan qoppana danddayoosona: ‘Yihooway taappe koyiyoobaa oottana danddayiyaanaa? Taani nagaraa oottiyaaba gidikko, i tana aggibayanee? Yihoowassa gidiyoogee tana laꞌatettaa digganee?’ Hegaa mala oyshati qoppana bessiyaabata. Gidikkonne, kasetidi akeekan qoppana bessiya hara oyshay: Yihoowassa gidiyoogan demmiyo goꞌati aybee? yaagiyaagaa.

Yihoowassa Gidiyoogee Ufayssaa Demissees

3. Raꞌaaba Yihoowayyo oottanau kuuyidoogee o waati goꞌꞌidee?

³ Yihoowassa gididaageeti assa gidiyoogan goꞌettiyoonaa? Yarkko giyo kataman beni deꞌida shaaramuxa maccaasee, Raꞌaabibaa qoppa. A Kanaane biittaa eeqa xoossatuyyo goynnaydda deꞌidaaro gidiyoogee qoncce. Gidikkonne, Yihooway maaddin Isiraaꞌeeleti xoonidoogaa siyido wode, Yihooway tumu Xoossa gidiyoogaa a eraasu. Hegaa gishshau, Xoossay dooridoogeeta ashshanau ba deꞌuwaa daafan yeggiyaabaa oottaasu; hegee eti o sinttappe ashshanaadan oottiis. Geeshsha Maxaafay: “SHaaramuxiyaa Ra7aaba kiitettiyaageeta mokkada hara ogiyaara eta moissido wode, ba oosuwan xillabeikke?” yaagees. (Yaaqooba 2:25) Siiquwaanne suure pirddaa ogiyaa Xoossaa Higgiyan tamaarida Xoossaa asaa bagga gididoogan a demmido goꞌꞌaa qoppa. A ba kase deꞌuwaa aggidoogan keehippe ufayttidoogee qoncce! A Israaꞌeela bitaniyaa gelada, Booꞌeeza giyo naꞌaa yelaasu; i erettida Xoossaa asa gidiis.—Yaasa 6:25; Uruto 2:4-12; Maatiyoosa 1:5, 6.

4. Uruta Yihoowayyo oottanau kuuyidoogan waana goꞌettadee?

⁴ Mooꞌaaba biitta asa gidida Urutakka Yihoowayyo oottanau kuuyaasu. A naatettan Kamooshaunne Mooꞌaaba biitta hara eeqa xoossatussi goynnennan aggukku; shin guyyeppe tumu Xoossaa Yihoowa eraasu; qassi i deren bete gididi deꞌiya Israaꞌeela biitta asa gelaasu. (Uruto 1:1-6 nabbaba.) Guyyeppe, Urutanne i azinaa ishaa machiyaa Orppa, bantta bollotee Naꞌoomiira Beetaliheeme baanau kiyido wode, Naꞌooma eti bantta soo simmanaadan zoraasu. Israaꞌeelen deꞌanaagee etau metiyaaba. Orppa “ba asaakkonne ba xoossatukkonne simmaasu”; shin Uruta simmabeykku. A ba ammaniyoobaa oottaasu; qassi a oossi gidana koyiyaakko erausu. A Naꞌoomiyyo: “Taani neeppe shaahettanaadan woikko nena aggada guyye simmanaadan tana waayissoppa. Neeni biyoosaa awanne taani baana; neeni de7⁠iyoosan awaaninne taani de7ana. Ne asai ta asaa gidana; ne Xoossai ta Xoossaa gidana” yaagada yootaasu. (Uruto 1:15, 16) Uruta Yihoowayyo oottanau doorido gishshau, amꞌꞌetuyyo, hiyyeesatuyyoonne gadee baynnaageetuyyo loꞌꞌo giigissoy deꞌanaadan oottiya Xoossaa Higgiyan goꞌettaasu. Yihoowa qefiyaa garssan a ufayssaa, naaguwaanne woppaa demmaasu.

5. Yihoowayyo ammanettidi oottiya asata xeelliyaagan ay akeekadii?

⁵ Banttana Yihoowayyo geppi simmidi, daro layttau ammanettidi ayyo oottida issi issi asata erennan aggakka. Eti ayyo oottiyoogan waani goꞌettidaakko oycha. Metoy gakkenna uri baynnaba gidikkonne, mazamuraawee: “Eta Xoossay Yihoowa gidiyo asati ufayttiyaageeta” yaagido qaalay tuma gidiyoogaa, deꞌiya naqaashay loytti qonccissees.—Mazamure 144:15, NW.

Yihooway Nuuppe Koyiyoy Nuuni Oottana Danddayiyoobaa

6. Yihooway nuuppe koyiyoobaa oottana danddayokko giidi yayyana koshshennay aybissee?

⁶ Yihooway taappe koyiyoobaa oottana danddayiyaanaashsha gaada qoppennan aggakka. Xoossau oottiyaagaa, a higgiyaadan deꞌiyaagaanne a sunttan haasayiyaagaa gidanau issi uri yayyiyoogee qoncce. Leemisuwau, Israaꞌeelatuyyoonne Gibxxe kawuwau yootanaadan Xoossay kiittido wode, Muusee danddayennabadan qoppiis. SHin Xoossay Muuseppe koyidoy i oottana danddayiyoobaa. Yihooway ‘i oottanabaa a tamaarissiis.’ (Kessaabaa 3:11; 4:1, 10, 13-15 nabbaba.) Muusee Xoossaa maaduwaa eeno giidi ekkido gishshau, Xoossaa sheniyaa poliyoogan ufayttiis. Hegaadan, Yihooway nuuppe koyiyoobay nuuni oottanau danddayiyoobaa. I nuuni polo gidennaagaa akeekees; qassi nuna maaddanau koyees. (Mazamure 103:14) Yesuusa kaalliyaagaa gidiyoogan Yihoowayyo oottiyoogee unꞌꞌissiyaaba gidennan woppissiyaaba. Aybissi giikko, hegaa mala deꞌoy harata goꞌꞌees; qassi Yihoowa ufayssees. Yesuusi: “Haa yiite; taani inttena shemppissana. Taani ashkkenne wozanappe kauyyiyaagaa gidido gishshau, ta qambbaran waaxettite; taappe tamaarite” yaagiis.—Maatiyoosa 11:28, 29.

7. Yihooway koyiyoobaa oottanaadan i nena maaddanaagaa ammanettana danddayiyoy aybissee?

⁷ Yihooway nuuyyo minotettaa immanaadan an ammanettiyaaba gidikko, i nuuyyo koshshiya minttettuwaa ubbatoo immana. Leemisuwau, Ermmaasi xalan haasayiya asa gidenna. Yaatiyo gishshau, Yihooway ba sunttan hananabaa yootanaadan a doorido wode, Ermmaasi: “Hai Ubbaa Haariya GODAU, taani na7a. Taani waati haasayiyaakko erikke” yaagiis. Guyyeppe ubba i: “A sunttan naa77antto yootikke” yaagiis. (Ermmaasa 1:6; 20:9) Gidikkonne, Yihooway minttettin Ermmaasi asay ixxiyo kiitaa 40⁠u layttau yootiis. Yihooway: “Taani GODAI nena ashshanaunne wotta ekkanau nenaara de7ais” yaagidi, a darotoo minttettiis.—Ermmaasa 1:8, 19; 15:20.

8. Nuuni Yihoowan ammanettiyoogaa ayba ogiyan bessiyoo?

⁸ Yihooway Muusanne Ermmaasa minttettidoogaadan, ha wodiyan Kiristtaaneti i koyiyoobaa oottanaadan maaddana danddayees. Waannabay Xoossan ammanettiyoogaa. Geeshsha Maxaafay: “Ne polo wozanan GODAA ammanetta; ne akeekan zemppoppa. Neeni oottiyo ooso ubban a sinttaya; i nena likke ogiyaa kaalettana” yaagees. (Leemiso 3:5, 6) Yihooway ba Qaalaa baggaaranne gubaaꞌiyaa baggaara immiyo maaduwaa goꞌettiyo wode, an ammanettiyoogaa bessoos. Yihooway nu deꞌuwan kaalettanaadan paqqadiyaaba gidikko, nuuni ayyo ammanettennaadan aybinne diggenna.

Yihooway Ba Asaassi Huuphiyan Huuphiyan Qoppees

9, 10. Mazamure 91 ay mala naaguwaabaa yootii?

⁹ Issoti issoti bantta huuphiyaa Yihoowassi geppanau qoppiyo wode, nagaraa oottin Yihooway tana ixxanaakkonne giidi hirggana danddayoosona. Nuuni Yihoowaara deꞌiya alꞌꞌo dabbotaa naaganaadan koshshiya ubbabaa i giigissidoogee ufayssiyaaba. Hegee Mazamure 91n waanidi qonccidaakko ane beꞌoos.

¹⁰ He mazamuree doomettan hagaadan gees: “Ubbaappe Xoqqiya Xoossan naagettidi de7⁠iyaanne Ubbaappe Wolqqaama Xoossaa kuwaa giddon aqiya asi GODAASSI yaagana, ‘Neeni taayyo qatonne baqata attiyo soho; neeni taani ammanettiyo ta Xoossaa’ yaagana. I nena shankkanchchatu gitiyaappekka . . . ashshana.” (Mazamure 91:1-3) Xoossay bana siiqiyaageetanne banan ammanettiyaageeta naaganau qaalaa gelidoogaa akeeka. (Mazamure 91:9, 14 nabbaba.) I ay mala naaguwaabaa yootidee? Yihooway qaalaa gelido Masee yelettana zerettay xayennaadan, beni issi issi hanotan ba ashkkaratuppe issota issota asatettan naagiis. Gidikkonne, ammanettida hara daro asati qashettidosona, barchetidosonanne iita hanotan hayqqidosona; hegaa malabay eta bolli gakkidoy eti Xoossaayyo ammanettennaadan oottanaassa. (Ibraawe 11:34-39) Eti bantta suuretettaa naagennaadan oottiyaabaappe Yihooway eta ayyaanaaban naagido gishshau, genccanau koshshiya xalatettaa demmidosona. Hegaa gishshau, 91⁠tta Mazamuriyaa, Xoossay nuna ayyaanaaban naaganau qaalaa gelidobadan akeekana danddayeettees.

11. “Ubbaappe Xoqqiya Xoossan naagettidi” deꞌiyoosay aybee? Xoossay yan naagiyoogeeti oonee?

¹¹ Mazamuraawee ‘Ubbaappe Xoqqiya Xoossan naagettidi deꞌiyoosa’ giidoy, ayyaanaaban naaguwaa demmiyo leemiso sohuwaa malaatanaassa. He sohuwan, Xoossay mokki ekkiyoogeeti bantta ammanuwaa mooriyaanne Xoossaa siiqiyoogee irxxanaadan oottiya aybippenne woykko ooppenne naagettoosona. (Mazamure 15:1, 2; 121:5) Ammanenna asati nuuni naaguwaa demmiyo he sohuwaabaa erokkona. Yihoowa: “Neeni taani ammanettiyo ta Xoossaa” giyoogaa malabaa oottiya asata i yan naagees. Nuuni he baqati attiyoosan ubbatoo deꞌiyaaba gidikko, Seexaanaa woykko ‘shankkanchaa gitiyan’ gelidi Xoossaa azzanttoos giidi hirggokko.

12. Xoossaara deꞌiya nu dabbotaa mooriyaabati aybee?

¹² Xoossaara deꞌiya nu alꞌꞌo dabbotaa mooriyaabati aybee? Mazamuraawee hegeetuppe amaridaageeta yootiis; eta giddon, ‘xuman oyqqiya harggeenne gallassa seetan wurssiya boshay’ deꞌoosona. (Mazamure 91:5, 6) ‘SHankkanchay,’ daroti bantta huuphiyaa siiqiyoonne banttanan ammanettiyo gitiyan gelanaadan oottiis. (2 Qoronttoosa 11:3) Harata qassi yaaretanaadan, otorettanaadaaninne aquwaabau bichaaranaadan oottiis. Qassi harata lodda laamiyaa, yelettido biittaa siiqiyoogaanne worddo haymaanootiyaa malabatun balettiis. (Qolasiyaasa 2:8) Daroti qassi shori baynna asho gaytotettaa piriyan gelidosona. Hagaa mala eeshshati wurssiya harggiyaa mala. He eeshshati miilooniyan qoodettiyaageeti Xoossaa siiqiyoogaa agganaadan oottidosona.—Mazamure 91:7-10 nabbaba; Maatiyoosa 24:12.

Xoossaa Siiqiyoogaa Naagiyo Ogiyaa

13. Ayyaanaaban qohiyaabatuppe Yihooway nuna waatidi naagii?

¹³ Ayyaanaaban qohiya ha hanotatuppe Yihooway ba asaa waatidi naagii? He mazamuree: “Ne ogiyan ubban nena naagana mala, Xoossai ba kiitanchchata azazana” yaagees. (Mazamure 91:11) Saluwaa kiitanchati nuuni mishiraachuwaa sabbakanaadan kaalettoosonanne naagoosona. (Ajjuutaa 14:6) Kiitanchatuugaappe haray, gubaaꞌiyaa cimati tamaarissanau Geeshsha Maxaafaa loyttidi goꞌettiyoogan, worddo timirttiyan nuuni cimettennaadan naagoosona. Alamiyaa xeelaa xoonanau baaxetiya ubbaa huuphe xekkan eti maaddana danddayoosona. (Tiitu 1:9; 1 PHeexiroosa 5:2) ‘Ammanettida wozannaama ashkkaraykka’ lodda laamiyaa timirttiyaappe, shori baynna kandduwaa qaaqqaappe, duretanaunne hayttatanau koyiyoogaappe, qassi hara qohiya daro amuwaappenne sugettaappe naagettanaadan maaddiya ayyaanaabaa qumaa giigissees. (Maatiyoosa 24:45) Neeni hegaa mala qohiyaabatuppe issota issota eqettanaadan aybi maaddidee?

14. Xoossay giigissiyo naaguwan nuuni waanidi goꞌettana danddayiyoo?

¹⁴ Xoossaa ‘naaguwaa’ demmiyoosan ubbatoo deꞌanau nuuni ay oottana bessii? Nu asatettan qohuwaa gattiya, daafaa, danuwaa, harggiyaanne hegaa malabatuppe nuuni ubbatoo naagettana koshshiyoogaadan, ayyaanaaban nuna qohiyaabaappe ubbatoo naageettana bessees. Yaatiyo gishshau, Yihooway xuufetun, gubaaꞌiyaa shiiqotuuninne gita shiiqotun immiyo kaaletuwaa nuuni ubbatoo goꞌettana koshshees. Nuuyyo gubaaꞌiyaa cimatu zoree koshshees. Qassi nu Kiristtaane ishatuyyoonne michotuyyo deꞌiya dumma dumma eeshshatun goꞌettokkoo? Nuuni gubaaꞌiyaa yametuura laggetiyoogee aadhida erancha gidanaadan maaddiyoogee qoncce.—Leemiso 13:20; 1 PHeexiroosa 4:10 nabbaba.

15. Yihoowan nashettennaadan oottana danddayiya aybippenne i naagana danddayiyoogaa neeni ammanettiyoy aybissee?

¹⁵ Yihoowan nashettennaadan oottana danddayiya aybippenne i nuna naagana danddayiyoogaa sirokko. (Roome 8:38, 39) Darotoo, woranau gidennan, geeshsha Xoossaappe nuna shaakkanau koyiya, wolqqaama morkke gidida haymaanootenne polotika dirijjitetuppe i gubaaꞌiyaa naagiis. “Nena qohanau oottido ai miishshinne nena qohidi kantti kiyenna” yaagidi Yihooway yootidobay tumattiis.—Isiyaasa 54:17.

Nuna Laꞌa Kessiyay Oonee?

16. Ha alamee nuuyyo laꞌatetta immana danddayennay aybissee?

¹⁶ Yihoowassa gidiyoogee nuna laꞌatetta diggii? Hegaappe dumma ogiyan, alamiyaassa gidiyoogee nuna laꞌatetta diggees. Alamee Yihoowappe haakkidi, asaa aylle oottiya, meqetti baynna xoossau haarettees. (Yohaannisa 14:30) Leemisuwau, Seexaanaa alamee asaa laꞌatetta digganau ikkonoomiyaara gayttidaagan hirgganaadan oottees. (Ajjuutaa 13:16, 17⁠ra gatta xeella.) Nagaraukka asaa balettidi aylle kessiyo wolqqay deꞌees. (Yohaannisa 8:34; Ibraawe 3:13) Yaatiyo gishshau, ammanenna asati Yihoowa timirttiyaara palqqettiya deꞌo ogiyaa aassiyoogan laꞌatettay beettees giyaaba gidikkonne, hegaadan deꞌiya ooninne nagaraunne shori baynna deꞌuwau sohuwaara aylle gidees.—Roome 1:24-32.

17. Yihooway nuuyyo ayba laꞌatetta immidee?

¹⁷ Hara baggaara, nuuni nu huuphiyaa Yihoowayyo immiyaaba gidikko, nuna qohana danddayiya aybippenne i laꞌa kessees. Woriya harggiyaappe bana pattana danddayiya, shukkiyoogan gooba gidida dottoriyaa kushiyan ba shemppuwaa attidi immiya uraa hanotaara issi issi ogiyan nu hanotay issi mala. Nuuni ubbay woriya hargge malaban oyqettida; hegeekka laattido nagaraa. Nuuni nagaray kaalettiyoobaappe attanaunne merinau deꞌanau danddayiyoy, Kiristtoosa yarshshuwaa baggaara nu huuphiyaa Yihoowassi immiyoogaa xallaana. (Yohaannisa 3:36) SHukkiya dottoree gooba gidiyoogaa eriyo wode nuuni an keehippe ammanettiyoogaadan, Yihoowakka loyttidi eriyoode an keehippe ammanettoos. Hegaa gishshau, nuuni Xoossaa Qaalaa ubbatoo mintti xannaꞌana bessees; hegaadan oottiyoogee, assa gidennaadan yashshiyaabaa aybanne xayssanaadan oottiya hanotan a siiqanaadan nuna maaddees.—1 Yohaannisa 4:18.

18. Yihoowassa gidiyaageeti demmanabay aybee?

¹⁸ Yihooway asa ubbau ba koyidobaa dooriyo laꞌatettaa immiis. A Qaalay: “Inttenne intte zaree de7⁠uwan de7ana mala, de7⁠uwaa doorite. GODAA intte Xoossaa siiqite” yaagees. (Zaarettido Wogaa 30:19, 20) Nu dosan ayyo oottiyoogan a siiqiyoogaa bessanaadan Yihooway koyees. Nuuni siiqiyo Xoossaassa gidiyoogee, nu laꞌatettaa diggiyaaba gidennan, nuuni ubbatoo ufayttanaadan oottiyaaba.

19. Yihoowassa gidiyoogee a aaro kehatettaana gididoy aybissee?

¹⁹ Nuuni nagarancha gidiyoogaadan, polo Xoossaassa gidiyoogee nuussi bessiyaaba gidenna. Hegee hanana danddayiyoy Xoossaa aaro kehatettaa xallaana. (2 Ximootiyoosa 1:9) Yaatiyo gishshau, PHauloosi: “Nuuni paxa de7⁠ikko, Godau de7⁠oos; qassi haiqqikkokka, Godau haiqqoos. Simmi nuuni paxa de7⁠in woi haiqqin Godaassa” yaagidi xaafiis. (Roome 14:8) Nuuni Yihoowassa gidanau dooridoogan mule zilꞌꞌettennaagee erettidaagaa.

Woygada Zaaruutii?

• Yihoowassa gidiyoogan demmiyo goꞌati aybee?

• Xoossay nuuppe koyiyoobaa nuuni oottana danddayiyoy aybissee?

• Yihooway baassi oottiyaageeta waatidi naagii?

[Sinttaa 16n deꞌiya misiliyaa]

Yihoowassa gididoogan harati waanidi goꞌettidaakko oycha

[Sinttaa 18n deꞌiya misiliyaa]

Yihooway nuna naaganau giigissido issi issibati aybee?