Yesuus Kiristtoosa—I Tamaarissidobay Nena Waatidi Goꞌꞌii?

“Taani etau de7⁠oi de7ana malanne kumidi palahana mala yaas.” —YOHAANNISA 10:10.

YESUUSI saꞌaa yiidoy immanaassappe attin ekkanaassa gidenna. Ba haggaazuwan i alꞌꞌo imotaa asaa naatussi immiis; hegee, Xoossaabaanne A sheniyaabaa tumaa qonccissiya timirttiyaa. Miilooniyan qoodettiya tumu Kiristtaaneti markkattana danddayiyoogaadan, he timirttiyaa ekkiyaageeti ha wodiyan loꞌꞌo deꞌuwaa deꞌana danddayoosona.a SHin Yesuusi yootido kiitau waanna yohoy, imota ubbaappe aadhiya—i nu gishshau immido polo deꞌuwaa gujjees. Nuuni merinaa deꞌuwaa demmiyoogee i tamaarissido ubbaappe keehi koshshiya ha allaalliyau immiyo zaaruwan baasettidaba.

Xoossaynne Kiristtoosi immidobaa Yesuusi ba morkketi barchiyaa bessidi bana woranaagaa erees. (Maatiyoosa 20:17-19) Gidikkokka, Yohaannisa 3:16n deꞌiya, keehippe erettiya xiqisiyan: “Xoossaa Na7aa ammaniya ubbai merinaa de7⁠uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis” yaagiis. Yesuusi “asaa wozanau [ba] shemppuwaa [woykko deꞌuwaa] immanau” yiidoogaakka yootiis. (Maatiyoosa 20:28) I ba shemppuwaa immanaagaa yootidoy aybissee?

Xoossay zawi baynna siiqoy denttettin, asaa naati laattido nagaraappenne hegee kaalettidobaappe, giishin polotettaa pacaappenne hayquwaappe naxa kiyiyo ogiyaa giigissiis. Xoossay hegaadan oottidoy, ba mexi issi Naꞌay yarshsho gididi hayqqanaadan saꞌaa kiittiyoogaana. Yesuusi ba polo deꞌuwaa nu gishshau immiyoogan eeno giidi azazettiis. Wozuwaa geetettiya ha giigissoy, Xoossay asaa naatussi immido imota ubbaappe aadhiyaagaa.b Hegee merinaa deꞌuwaa demissana danddayiya imota.

Neeni oottana koshshiyaabaa Wozoy huuphe xekkan neessi imettida imotee? Hegee ne hanotaadaana. Leemisuwau: Issi uri neessi immanau imotaa kushiyan oyqqidabadan qoppa. Neeni ekkana gakkanaashin he imotay nebaa gidennaagee tuma. Hegaara issi mala hanotan, Yihooway wozuwaa neessi immees; shin neeni he imotaa ekkanau baaxetana xayikko nebaa gidana danddayenna. Neeni waana baaxetada he imotaa ekkana danddayay?

Yesuusi merinaa deꞌuwaa demmiyay banan “ammaniya” ura gidiyoogaa yootiis. Ammaniyoogee neeni ne deꞌuwan oottiyoobaa gujjees. (Yaaqooba 2:26) Yesuusan ammaniyoogee i tamaarissidobaaranne oottidobaara moggottiya ogiyan deꞌiyoogaa giyoogaa. Hegaa oottanau neeni Yesuusanne a Aawaa loyttada eranau koshshees. Yesuusi: “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7⁠o” yaagiis.—Yohaannisa 17:3.

Kumetta alamiyan deꞌiya miilooniyan qoodettiya asaa deꞌuwaa laammida timirttiyaa, Yesuus Kiristtoosi 2,000 gidiya layttappe kase tamaarissiis. He timirttiyaabaa, qassi neeninne ne siiqiyoogeeti ha wodiyaa xallan gidennan merinau appe waani goꞌettana danddayiyaakko gujjada eranau koyay? Yihoowa Markkati nena ufayssan maaddana.

[Tohossa qofata]