Ayyaanaaban Cakkiyo Gita Oosuwan Kumetta Hanotan Shaahettite

“Godaa oosoy daridoogeeta gidite.”—1 QOR. 15:58, NW.

1. Yesuusi ba erissiyo ashkkarati ay oottanaadan shoobbidee?

YESUUSI 30 M.L. wurssettaa heeran Samaariyaara kanttiiddi, Sikaara katamaa matan deꞌiya haatta ollaa achan shemppanau uttiis. I he sohuwan ba erissiyo ashkkaratuyyo: “Goshshaa loitti xeellite; kattai cahaa bessiis” yaagiis. (Yoh. 4:35) Yesuusi yootidoy kattaa cahaabaa gidennan, bana kaallana, suure wozanay deꞌiyoogeeta ayyaanaaban shiishshiyo hanotaabaa. I bana kaalliyaageeti he cakkiyo oosuwan shaahettanaadan shoobbiis. Oottana oosoy daro; shin hegaa polanau guutta wode xallay deꞌees!

2, 3. (a) Nuuni cahaa wodiyan deꞌiyoogaa bessiyay aybee? (b) Ha huuphe yohuwan qonccanabay aybee?

² Cahaa xeelliyaagan Yesuusi yootidobau nu wodiyan dumma birshshettay deꞌees. Nuuni deꞌiyoy goshshan leemisettida alamiyaa asay ‘cahaa bessido’ wodiyaana. Layttan layttan, miilooniyan qoodettiya asay deꞌuwaa demissiya tumaa ekkiiddi deꞌees; qassi daro shaꞌan qoodettiya asay xammaqettees. Kattaa Godaa, Xoossaa Yihooway kaalettiyo, awudeegaappenne aaruwan oosettiya gita cahaa oosuwan nuuni shaahettiyoogee gita maata. He cakkiyo oosuwaara gayttidaagan neessi oosoy ‘daroo’?—1 Qor. 15:58, NW.

³ Yesuusi saꞌan haggaazido heezzu layttanne baggan, ba erissiyo ashkkarata cahaa oosuwau loohissiis. Yesuusi ba erissiyo ashkkarata tamaarissido, keehippe koshshiya daro timirttetuppe heezzata ha huuphe yohuwan beꞌana. Ha wodiyan erissiyo ashkkara oottiyo oosuwan nuuyyo danddayettidabaa oottanau baaxetiyo wode nuna keehippe maaddiya eeshshaa, he timirtteti huuphiyan huuphiyan issuwaa issuwaa qonccissoosona. He eeshshata huuphiyan huuphiyan ane beꞌoos.

Nu Huuphiyaa Kawushshiyoogaa Keehippe Koshshees

4. Nu huuphiyaa kawushshiyoogee keehippe koshshiyoogaa Yesuusi waatidi qonccissidee?

⁴ Ha hanotaa qoppite: Erissiyo ashkkarati bantta giddon ubbaappe aadhiyay oonakko palametti simmoosona. Issoy issuwaa siriyoogeenne ixxiyoogee eta hanotaappe erettennan aggenna. Hegaa gishshau, Yesuusi issi guutta naꞌaa xeesidi eta giddon essiis. I naꞌaa bessiiddi: “Ha guutta na7aadan, bana kaushshiya ooninne saluwaa kawotettan ubbaappe aadhdhiyaagaa” yaagiis. (Maatiyoosa 18:1-4 nabbaba.) Minotettan, duretettaaninne gitatettan issi ura xoqqu oottidi xeelliya alamiyaa asaappe dumma hanotan, bantta gitatettay haratu sinttan ‘banttana kawushshiyoogaara’ gayttidaba gidiyoogaa erissiyo ashkkarati akeekana koshshees. Yihooway eta anjjiyoynne etan goꞌettiyoy eti tumuppe bantta huuphiyaa kawushshiyo wode xallaana.

5, 6. Cahaa oosuwan kumetta hanotan shaahettanau ne huuphiyaa kawushshana bessiyoy aybissee? Leemisuwan yoota.

⁵ Alamiyan deꞌiya daro asay hanno gakkanaashin minotettau, duretettaunne gitatettau bichaarees. Hegaappe denddidaagan, eti ayyaanaabau wode demmokkona. (Maa. 13:22) Hegaappe dumma ogiyan, kattaa Godaa, Yihoowan anjjettanaunne nashettanau haratu sinttan ‘banttana kawushshiyoogan’ Yihoowa ashkkarati ufayttoosona.—Maa. 6:24; 2 Qor. 11:7; Pili. 3:8.

⁶ Tohossa Amarkkan gubaaꞌe cima gididi oottiya Pransiskko leemisuwaa qoppite. Aqinye gidanau yelagatettan yuniversttiyaa timirttiyaa aggibayiis. I hanidabaa hassayidi: “Guyyeppe taani machido wode, nu naaꞌꞌaayyo daro miishshaa demissiya oosuwaa demmana danddayays shin. Hegaadan oottiyoogaappe, nu deꞌuwaa sima oottanaunne kumetta wodiyaa haggaaziyoogan sinttau suganau kuuyida. Guyyeppe naati yelettin, metoy gujji gujji biis. SHin nu kuuyidoogaadan deꞌana mala Yihooway maaddiis” yaagiis. Pransiskkoy: “Taani 30⁠ppe dariya layttau dumma gidida daro haggaazo maataa demmidoogaa bolli, gubaaꞌe cima gidada oottiyo maataa demmaas. Sima deꞌuwaa deꞌiyoogan mule zilꞌꞌetti erokko” yaagidi kuuyiis.

7. Roome 12:16n deꞌiya zoriyaa waatada oosuwan peeshshadii?

⁷ Intte alamiyaa asaagaadan ‘otorettiyoogaappe intte huuphiyaa toochikko,’ inttekka cahaa oosuwan daro anjjuwaanne maataa demmana danddayeeta.—Roo. 12:16; Maa. 4:19, 20; Luq. 18:28-30.

Minnidi Oottiyoogee Anjjuwaa Demissees

8, 9. (a) Yesuusi heezzu ashkkaratubaa yootido leemisuwaa qanttan yoota. (b) Ha leemisoy keehippe minttettana danddayiyoy oonee?

⁸ Nuuni cahaa oosuwan kumetta hanotan shaahettanau koshshiya hara eeshshay minnidi oottiyoogaa. Heezzu ashkkaratubaa yootido leemisuwan Yesuusi hegaa qonccissiis.a Hegee, issi bitanee haahosaa baanaappe kase heezzu ashkkaratuyyo ba miishshaa immidoogaa yootiya leemiso. I issuwau ichashu shaꞌu biraa, issuwau naaꞌꞌu shaꞌu biraa, qassi issuwau issi shaꞌu biraa immiis. Koyroogeenne naꞌꞌanttoogee bantta goday bi simmin, sohuwaara he miishshan minni ‘zalꞌꞌidosona.’ SHin heezzantto ashkkaray “azalla.” I ba miishshaa biittaa bookkidi moogiis. He bitanee simmido wode, he naaꞌꞌu ashkkarata “darobaayyo alaafe” oottidi sunttiis. Heezzantto ashkkaraayyo immido miishshaa wotti ekkidi, a ba sooppe yedettiis.—Maa. 25:14-30.

⁹ Yesuusa leemisuwan qonccida mino ashkkaratu leemisuwaa kaallidi, erissiyo ashkkara oottiyo oosuwan intteyyo danddayettida keenan kumetta hanotan shaahettanau intte koyiyoogee qoncce. SHin intte koyiyoogaa keenaa oottennaadan intte hanotay diggikko shin? Geella ikkonoomiyaa metoy intte so asau koshshiyaabau daro saatiyaa intte oottanaadan giddana danddayees. Woykko cimatettaappe denddidaagan wolqqaynne payyatettay paccana danddayees. Hegaadaana gidikko, heezzu ashkkaratu leemisoy inttena minttettiyaabaa oyqqiis.

10. Heezzu ashkkaratu leemisuwan odettida goday, hanotaa akeekiyoogaa waati bessidee, qassi hegee nena minttettiyoy aybissee?

¹⁰ Leemisuwan odettida goday ba ashkkaratu hanotay dumma dumma gidiyoogaa akeekidoogaa hassayite. I “etau huuphiyan huuphiyan eta wolqqaa keenaa” immiyoogan hegaa bessiis. (Maa. 25:15) I qoppidoogaadan, koyro ashkkaray naaꞌꞌanttoogaappe daro woriyaa demmiis. SHin, goday eta “lo77⁠onne ammanettiya ashkkara” yaagiyoogaaninne naaꞌꞌaukka issi mala woytuwaa immiyoogan eti minnidi oottidoogaa akeekiyoogaa bessiis. (Maa. 25:21, 23) Hegaadankka, kattaa Godaa, Xoossaa Yihooway a oosuwan intte oottiyooban, intte hanotay dummatettay deꞌanaadan oottiyoogaa erees. A oosuwaa kumetta wozanaappe oottanau intte baaxetiyoogaa i dogenna; qassi bessiyaagaadan inttena woytees.—Mar. 14:3-9; Luqaasa 21:1-4 nabbaba.

11. Metiya hanotan minnidi oottiyoogee waatidi daro anjjuwaa demissiyaakko leemisuwan yoota.

¹¹ Xoossaa oosuwaa minnidi oottiyoogee deꞌoy injjetiyoogaara gayttidaba gidennaagaa Biraazilen deꞌiya, michee Selmiiri leemisoy bessees. Laatamu layttappe kase Salimiiri azinaa panggati worin, heezzu naata barkka dichaasu. A daro saatiyau asa son oottiyaaro gidishin, daro asay gurddettidi biyo kaamiyan daafurada he sohuwaa gakkausu. Hegaa mala metiya hanotay deꞌishinkka kumetta wode aqinye gidada oottanau ba hanotaa giigissaasu. I naatuppe naaꞌꞌati guyyeppe iira kumetta wode aqinye gididi oottiyoogaa doommidosona. Salimiira, “Aadhida daro layttan 20⁠ppe dariya asaa Geeshsha Maxaafaa xannaꞌissaas; eti tau ‘so asa’ gididosona. Haꞌꞌikka taani etaara deꞌiya siiquwaaninne laggetettan ufayttays. Hegee miishshan shammana danddayenna aqo” yaagaasu. Salimiira minna oottidoogau kattaa Goday o anjjidoogee tuma!

12. Sabbakiyo oosuwaa minnidi oottiyoogaa waatidi bessana danddayeetii?

¹² Intte koyidoogaa keenaa haggaazennaadan haꞌꞌi intte hanotay diggiyaaba gidikko, intte haggaazuwaa kaseegaappe murutissiyoogan cahaa oosuwaa kaseegaappe aaruwan oottanau baaxetana danddayeeta. Saaminttan saaminttan Haggaazo SHiiquwan tamaariyo goꞌꞌiyaabaa oosuwan peeshshiyo wode, sabbakiyo hiillan qarattanaunne markkattiyo hara ogiyaa koyana danddayeeta. (2 Xim. 2:15) Danddayettiyaaba gidikko, gubaaꞌee haggaazuwau giigissido prograamiyaa ubbatoo kaafanaayyo, darin koshshenna oosota agganau woykko hara wode oottanaukka danddayeeta.—Qol. 4:5.

13. Kaseegaappe aaruwan minnidi oottanaunne hegaadan deꞌanau keehippe koshshiyay aybee?

¹³ Xoossaa siiqiyoogeenne a galatiyoogee minnidi oottanau denttettiyoogaa hassayite. (Maz. 40:8) Yesuusa leemisuwan qonccida heezzantto ashkkaray, ba godaa asappe darobaa naagiya, iita asadan qoppido gishshau au yayyiis. Hegaappe denddidaagan, ba godaa miishshaa zalꞌꞌidi dichiyoogaa aggidi bookkidi moogiis. Hegaa mala bessenna qofaappe nuuni haakkanau, kattaa Godaa Yihoowaara deꞌiya dabbotaa dichanaunne hegaa minttidi deꞌanau koshshees. Ufayssiya a eeshshata, giishin siiquwaa danddayaanne maarotaa xeelliyaagan xannaꞌanaunne wotti dentti qoppanau wodiyaa immite. Yaatiyoogee, a oosuwan intteyyo danddayettida ubbaa wozanappe oottanau denttettees.—Luq. 6:45; Pili. 1:9-11.

“Geeshsha Gidite”

14. Cahaa oosuwaa oottana koyiyaageeti ayba gidaa kunttana koshshii?

¹⁴ Kiitettida PHeexiroosi Ibraysxxe Geeshsha Maxaafaa kifiliyaappe ekkido qofaa: “Inttena xeesida Xoossai geeshsha gididoogaadan, inttekka intte ooso ubban geeshsha gidite. Xoossaa maxaafan, ‘Taani geeshsha gidiyo gishshau, inttekka geeshsha gidite’ geetettidi xaafettiis” yaagidi, saꞌan deꞌiya a ashkkarata xeelliyaagan Xoossaa sheniyaa qonccissiis. (1 PHe. 1:15, 16; Wog. 19:2; Zaa. 18:13) Cahaa oosuwaa oottiyaageeti kandduwaabaaninne ayyaanaaban geeshsha gidana koshshiyoogaa hagee qonccissees. Nuuni leemiso hanotan meecettidi geeyiyoogan he koyettiya gidaa kunttana danddayoos. Hegaadan oottana danddayiyoy ayba ogiyaanee? Xoossaa Qaalaa tumaa maaduwaana.

15. Xoossaa Qaalaa tumay nuna waatiyo wolqqay deꞌii?

¹⁵ Xoossaa Qaalaa tumay geeshshiya haattan leemisettiis. Leemisuwau, kiitettida PHauloosi ayyaanan tiyettida Kiristtaanetu gubaaꞌee, Xoossaa xeelan, Kiristtoosi qaalaa baggaara “haattan meecci geeshshidi, . . . geeshshanne borettennaagaa” oottido, geeshsha gidida, au bullashettiyaaro gidiyoogaa xaafiis. (Efi. 5:25-27) Hegaappe kase, Yesuusikka ba tamaarissido Xoossaa Qaalau geeshshiyo wolqqay deꞌiyoogaa yootiis. Yesuusi ba erissiyo ashkkaratuyyo: “Taani intteyyo ha77⁠i odido qaalaa gaasuwan, intte geeshsha” yaagidi yootiis. (Yoh. 15:3) Yaatiyo gishshau, Xoossaa Qaalaa tumau kandduwaabaaninne ayyaanaaban geeshshiyo wolqqay deꞌees. Nu goynoy Xoossaa ufayssana danddayiyoy, A Qaalaa tumay nuna hegaadan geeshshanaadan paqqadiyoogaa xallaana.

16. Nuuni ayyaanaabaaninne kandduwaaban geeshsha gididi deꞌana danddayiyoy ayba ogiyaanee?

¹⁶ Hegaa gishshau, Xoossaa cahaa oosuwaa oottanau, koyrottidi kandduwaabaaninne ayyaanaaban nuna mooriya ubbabaappe haakkana koshshees. Ee, cahaa oosuwan oottiyo maatau gidaa kunttidi hegaadan deꞌanau, kandduwaabaaninne ayyaanaaban Yihooway kessido maaraa naagiyoogan leemiso gidana bessees. (1 PHeexiroosa 1:14-16 nabbaba.) Nu asatettaa geeshshatettaa ubbatoo naagiyoogaadan, geeshshiya Xoossaa Qaalaa tumau ubbatoo azazettana koshshees. Hegee Geeshsha Maxaafaa nabbabiyoogaanne Kiristtaane shiiqotun beettiyoogaa gujjees. Hegee Xoossaa hassayissuwaa nu deꞌuwan oosuwan peeshshanau wozanappe baaxetiyoogaakka gujjees. Hegaadan oottiyoogee, nagarancha gidida nu asatettaa amuwaara baaxetanaunne ha alamee nuna mooranau oottiyoobaa eqettanau maaddees. (Maz. 119:9; Yaaq. 1:21-25) Ee, Xoossaa Qaalaa tumaa maaduwan deexo nagaraappekka ‘meecettidi geeyana’ danddayiyoogaa eriyoogee ayba minttettiyaabee!—1 Qor. 6:9-11.

17. Geeshsha gididi deꞌanau, nuuni oosuwan peeshshana bessiyo Geeshsha Maxaafaa zoree awugee?

¹⁷ Geeshshiya Xoossaa Qaalaa tumaa intte deꞌuwan eeno giidi ekkeetii? Leemisuwau, alamiyan deꞌiya, wodiyaa aattiyo moorettidabay gattiyo qohuwaa xeelliyaagan akeekissoy imettiyo wode ayba zaaro immeetii? (Maz. 101:3) Inttenaara tamaariya woykko oottiya, intteegaa mala ammanoy baynnaageetuura bessenna ogiyan zuppetiyoogaappe haakkeetii? (1 Qor. 15:33) Yihoowa xeelan inttena tunissana danddayiya iita amuwaa xoonanau wozanappe baaxeteetii? (Qol. 3:5) Ha alamiyaa polotikaa ooshshaappenne annaacettiyo daro ispporttiyan qoncciya, ba biittaa siiqiyo hanotaappe haakkeetii?—Yaaq. 4:4.

18. Kandduwaabaaninne ayyaanaaban geeshsha gididi deꞌiyoogee cahaa oosuwan nuuni murutanaadan waatidi maaddii?

¹⁸ Hegaa mala allaalletun intte ammanettidi azazettiyoogee daro loꞌꞌobaa demissees. Yesuusi ayyaanan tiyettida ba erissiyo ashkkarata woyniyaa turan leemisidi: “Ta giddon de7⁠iya aife aifenna turaa mara ubbaa [ta Aaway] karees; aifiya turaa mara ubbai kaseegaappe keehi aifanaadan, he maraa xeeraa i qanxxana” yaagiis. (Yoh. 15:2) Geeshshiya haattaa, Xoossaa Qaalaa tumau intte azazettikko, ubba daro ayfiyaa ayfana.

Haꞌꞌinne Sinttappe Demmiyo Anjjota

19. Yesuusi erissiyo ashkkarati cahaa oosuwaa oottiyoogan ayba anjjo demmidonaa?

¹⁹ Yesuusa timirttiyaa oosuwan peeshshida, ammanettida erissiyo ashkkarati “sa7aa gaxaa gakkanaashinkka” markkattana mala, guyyeppe PHenxxaqosxxe galla 33 M.Ln, geeshsha ayyaanay eta bolli wodhin wolqqaa ekkidosona. (Oos. 1:8) Eti bollaara heemmiyaagaa yame, misoonaawenne yuuyidi gubaaꞌeta minttettiya cimata gididi oottidosona; qassi mishiraachuwaa “sa7an de7⁠iya mereta” ubbau sabbakiyoogan gitabaa oottidosona. (Qol. 1:23) Eti keehippe anjjettidosonanne harata keehi ufayssiyaabaa oottidosona!

20. (a) Ayyaanaabaa cahan kumetta hanotan shaahettiyoogan ayba anjjo demmadii? (b) Neeni ay oottanau murttadii?

²⁰ Ee, nu huuphiyaa kawushshiyoogan, minnidi oottiyoogaaninne Xoossaa Qaalan deꞌiya xoqqa maaraa naagiyoogan, ayyaanaaban cakkiyo, oosettiiddi deꞌiya wolqqaama oosuwan kumetta hanotan wozanappe aggennan shaahettoos. Daroti aquwaunne ufayssau bichaariyo, alamiyaa asaa deꞌuwaa ogee kaalettiyo azzanuwaaninne hidootaa qanxxiyoogan tuggatiyo wode, nuuni tumu ufayssaanne woppaa demmoos. (Maz. 126:6) He ubbaappekka aaruwan, nu “daafurai Godaa baggaara mela” gidenna. (1 Qor. 15:58) Kattaa Godaa, Xoossaa Yihooway, ‘nuuni oottido oosuwaunne a siiqido siiquwau’ nuna merinau woytana.—Ibr. 6:10-12.

[Footnotes]

Hassayay?

Neeni cahaa oosuwan kumetta hanotan shaahettanau baaxetiyo wode . . .

• ne huuphiyaa kawushshiyoogee keehippe koshshiyoy aybissee?

• kaseegaappe aaruwan waanada ubbatoo minna oottana danddayay?

• kandduwaabaaninne ayyaanaaban ubbatoo geeshsha gidiyoogee keehippe koshshiyoy aybissee?

[Sinttaa 21n deꞌiya misiliyaa]

Nu huuphiyaa kawushshiyoogee Kawotettaa oosuwan xeelaa wottidi sima deꞌuwaa deꞌanau maaddees