Biraa Leemisuwaappe Tamaara
“Issuwau ichchashu sha7u biraa, issuwau naa77u sha7u biraa, qassi issuwau issi sha7u biraa [immiis].”—MAA. 25:15.
1, 2. Yesuusi biraa leemisuwaa yootidoy aybissee?
YESUUSI biraa leemisuwan tiyettida ba ashkkarati oottana koshshiyoobaa geeshshi yootiis. Tumu Kiristtaaneta ubbaa, saluwaa biyo hidootay deꞌiyoogeetakka saꞌaa laattiyo hidootay deꞌiyoogeetakka ha leemisoy goꞌꞌiyo gishshawu, nuuni a birshshettaa akeekana koshshees.
2 Yesuusi ba “yuussaayyoonne wodiyaa wurssettaayyo malaatai” aybakko i erissiyo ashkkarati oychido oyshaa zaariiddi biraa leemisuwaa yootiis. (Maa. 24:3) Yaatiyo gishshawu, ha leemisoy nu wodiyan polettees; hegee qassi Yesuusa yuussaanne i Kawo gididi haariyoogaa bessiya malaataa shaaho.
3. Maatiyoosa shemppo 24ninne 25n deꞌiya leemisotuppe nuuni tamaariyoobay aybee?
3 Maatiyoosa 24:45ppe 25:46 gakkanaassi odettida issi mala oyddu leemisotuppe biraa leemisoy issuwaa. Ammanettida wozannaama ashkkaraabaa, tammu geelaꞌotubaanne dorssaanne deeshshaabaa yootiya hara heezzu leemisotikka Yesuusi ba yuussaabaa malaataa yootanaadan oychido oyshaa zaariiddi yootidoogeeta. Ha oyddu leemisotunkka, Yesuusi ha wurssetta gallassan tumuppe bana kaalliyaageeta shaakki eranaadan maaddiya eeshshata qonccissiis. Ashkkaratubaa, geelaꞌotubaanne biraabaa leemisoti a kaalliya tiyettidaageetubaa qonccissoosona. Yesuusi ba so asaa wurssetta gallassan miziyo maatay immettido tiyettida amaridaageeti ammanettananne wozannaama gidana koshshiyoogaa ammanettida ashkkaraabaa leemisuwan qonccissiis. Yesuusi geelaꞌotubaa yootido leemisuwan, bana kaalliya tiyettida ubbay i yaana gallassaanne saatiyaa erana xayikkonne i yaanaagaa eridi, giigi uttananne beegotti uttana koshshiyoogaa qonccissiis. Tiyettidaageeti Kiristtaane gidiyoogaadan oottiyoobaa minni oottana koshshiyoogaa, Yesuusi biraa leemisuwan qonccissiis. Yesuusi dorssaabaanne deeshshaabaa yootido wurssetta leemisuwan, saꞌaa laattiyo hidootay deꞌiyoogeetubaa odiis. I eti ammanettidi deꞌananne saꞌan deꞌiya tiyettida ba ishata wozanappe maaddana koshshiyoogaa yootiis.a Ane haꞌꞌi biraa leemisuwaa beꞌana.
GODAY BA ASHKKARATUSSI DARO MIISHSHAA IMMIIS
4, 5. Bitanee woy goday oossi leemisoo, qassi biray ay keena alꞌꞌoo?
4 Maatiyoosa 25:14-30 nabbaba. Leemisuwan odettida goday Yesuusa gidiyoogeenne i 33 M.Ln saluwaa biido wode oge biidoogee nu xuufetun daro layttawu odettiis. Yesuusi hegaappe kase yootido leemisuwan, “Baassi kawotettaa ekkidi yaanau” biis yaagidi, i oge biyoy aybissakko qonccissiis. (Luq. 19:12) Yesuusi saluwaa biidi sohuwaara Kawotettaa Kawo gidibeenna.b I “Xoossaappe ushachcha baggaara utti aggiis. Xoossai sinttappe Kiristtoosa morkketa Kiristtoosayyo tohuwan yedhdhiyoobaa oottana gakkanaassi, yaani naagees.”—Ibr. 10:12, 13.
5 Leemisuwan odettida bitaniyawu hosppun shaꞌu biray deꞌees; hegee he wode keehi daro miishsha.c I oge baanaappe kase, ba ashkkarati zalꞌꞌanaadan he miishshaa etawu shaakki immidi biis. He bitaniyaagaadan, saluwaa baanaappe kase Yesuusawu keehi alꞌꞌobay deꞌees. He alꞌꞌobay aybee? Hegaa zaaroy i ba deꞌuwan oottiyoobaara gayttidaba.
6, 7. Biray aybawu leemisoo?
6 Yesuusi sabbakiyoonne tamaarissiyo ba oosuwaa keehi xoqqu oottidi xeellees. I sabbakido gishshawu daroti a kaallidosona. (Luqaasa 4:43 nabbaba.) SHin oottana koshshiya darobay deꞌiyoogaanne daro asay mishiraachuwaa siyanaagaa i eriis. Hegaappe kase, i ba ashkkaratussi, “Goshshaa loitti xeellite; kattai cahaa bessiis” yaagiis. (Yoh. 4:35-38) I ba erissiyo ashkkara gidana, wozanaa suure asata darota shiishshanaagaa qoppiis. Loꞌꞌo goshshanchaagaadan, Yesuusi cahaa bessida kattaa coo aggibayenna. Yaatiyo gishshawu, i hayquwaappe denddi simmidi takkennan, saluwaa baanaappe kase, “Biidi, asa ubbaa tana kaalliyaageeta oottite” yaagidi, ba erissiyo ashkkaratussi gita oosuwaa immiis. (Maa. 28:18-20) Yesuusi hegaadan oottiyoogan, haggaaziyo gita oosuwaa etawu hadaraa immiis.—2 Qor. 4:7.
7 Yaatin, nuuni woygidi kuuyana danddayiyoo? Yesuusi ba ashkkarati asaa bana kaalliyaageeta oottanaadan azaziyoogan, “bau de7iyaabaa” woy ba biraa etawu immiis giyoogaa mala. (Maa. 25:14) Biray sabbakanaadaaninne asaa Kiristtoosa kaalliyaageeta oottanaadan immettida ooso.
8. Ashkkarati ubbay ekkido biray issi likke gidana xayikkonne, goday etappe koyidoy aybee?
8 Goday issuwawu ichashu shaꞌu biraa, issuwawu naaꞌꞌu shaꞌu biraa, qassi issuwawu issi shaꞌu biraa immidoogaa biraa leemisoy qonccissees. (Maa. 25:15) Ashkkarati ubbay ekkido biray issi likke gidana xayikkonne, goday eti banttawu danddayettida ubban haggaaziyoogan biran loytti zalꞌꞌanaadan koyiis. (Maa. 22:37; Qol. 3:23) Koyro xeetu layttan, PHenxxaqosxxe gallassi 33 M.Lppe doommidi Kiristtoosa kaalliyaageeti biran zalꞌꞌiyoogaa doommidosona. Eti sabbakiyoogaaninne asaa erissiyo ashkkara oottiyoogan minnidi haggaazidoogaa yootiya taarikee Geeshsha Maxaafan Oosuwaa maxaafan xaafettiis.d—Oos. 6:7; 12:24; 19:20.
WURSSETTA GALLASSI BIRAN ZALꞌꞌIYOOGAA
9. (a) Ammanettida naaꞌꞌu ashkkarati biran ay oottidonaa, qassi hegee ay bessii? (b) ‘Hara dorssati’ oottiyoobay aybee?
9 Kiristtoosa kaalliya saꞌan deꞌiya tiyettida ammanettidaageeti wurssetta gallassan, ubba qassi 1919ppe haa simmin, Godaa biran zalꞌꞌiyoogaa doommidosona. Tiyettida ishatinne michoti koyro naaꞌꞌu ashkkaratuugaadan, banttawu imettidaban danddayettida ubbabaa oottidosona. Ichashu shaꞌu biraa ooni ekkidaakkonne naaꞌꞌu shaꞌu biraa ooni ekkidaakko qoppana koshshenna. He leemisuwan, naaꞌꞌu ashkkaratikka goday etawu immidoogaa keenaa worissidosona, hegaa gishshawu naaꞌꞌaykka minnidi oottidosona. Saꞌaa laattiyo hidootay deꞌiyoogeeti shin oottiyoobay aybee? Gitabaa oottoosona! Saꞌaa laattiyo hidootay deꞌiyoogeeti, sabbakiyoonne tamaarissiyo oosuwan Yesuusa ishata tiyettidaageeta ammanettidi maaddiyo boncho maataa demmanaagaa Yesuusi dorssaabaanne deeshshaabaa yootido leemisuwaappe tamaaroos. Ha wayssiya wodiyan, asaa erissiyo ashkkara oottiyo oosuwan ha naaꞌꞌu citati ‘issi wude’ gididi issippe minnidi oottoosona.—Yoh. 10:16.
10. Yesuusi Kawo gididi haariiddi deꞌiyoogaa bessiya malaataa shaahoy aybee?
10 Goday eti worissanaadan koyiyoogee bessiyaaba. Qommoora qonccidaagaadan, koyro xeetu layttan deꞌida ammanettida a ashkkarati abay daranaadan oottidosona. Biraa leemisoy polettiyo ha wurssetta wodiyan shin? Ammanettidanne minni oottiya Yesuusa ashkkarati, awudeegaappenne aaruwan sabbakidosonanne asaa erissiyo ashkkara oottidosona. Eti issippe oottidobay layttan layttan xeetu shaꞌan qoodettiyaageeti Kawotettaabaa sabbakiya erissiyo ashkkara gidanaadan oottiis; sabbakiyoogeenne tamaarissiyoogee Yesuusi Kawo gididi haariiddi deꞌiyoogaa bessiya malaataa shaaho gidiyoogaa hegee qonccissees. Eta Goday ufayttiyoogee qoncce!
Kiristtoosi ba ashkkaratussi sabbakiyo gita maataa immiis (Mentto 10 xeella)
GODAY MIISHSHAA BA ASHKKARATUURA QOODETTANAWU AWUDE YAANEE?
11. Nuuni Yesuusi iita waayiyaa wode ba ashkkaratuura miishshaa qoodettana gaanaadan oottiyay aybee?
11 Yesuusi matan iita waayiyaa wurssettaa heeran, ba ashkkaratuura miishshaa qoodettanawu yaana. Nuuni hegaadan giyoy aybissee? Maatiyoosa shemppo 24ninne 25n odettida hiraagan Yesuusi ba yuussaabaa darotoo yootiis. I iita waayiyaa wodiyaa pirddaabaa odiiddi, “Asa Na7ai, wolqqaaranne gita bonchchuwaara saluwaa shaara giddoora yiishin” asay beꞌanaagaa yootiis. I, “Intte Godai ai gallassi yaanaakkonne intte [erekketa],” qassi “Asa Na7ai, intte qoppenna saatiyan yaana” yaagidi, wurssetta gallassan deꞌiya bana kaalliyaageeti beegotti uttanaadan zoriis. (Maa. 24:30, 42, 44) Yaatiyo gishshawu, Yesuusi “he ashkkaratu godai yiidi, ba miishshaa etaara” qoodettiyoogaa yootidoy, i alamiyaa bolli wurssettan pirddanawu yaana wodiyaa odanaassa gidiyoogee qoncce.e—Maa. 25:19.
12, 13. (a) Goday koyro naaꞌꞌu ashkkarata woygidee, qassi aybissi? (b) Tiyettidaageetu bolli wurssetta maatafay wodhiyoy awudee? (“Hayqqiyo Wode Oyshettiyoogaa” giya saaxiniyaa xeella.) (c) Dorssa giidi pirddiyoogeeti demmana woytoy aybee?
12 He leemisuwan odettidaagaadan, ichashu shaꞌu biraanne naaꞌꞌu shaꞌu biraa ekkida koyro naaꞌꞌu ashkkarati banttawu imettida biraa keenaa worissiyoogan ammanettidaageeta gididoogaa goday yiyo wode beꞌiis. Goday naaꞌꞌu ashkkaratussikka, “Hayyanaashsho! Neeni lo77onne ammanettiya ashkkara; neeni guuttaban ammanettadasa. Taani nena darobaayyo alaafe oottana” yaagiis. (Maa. 25:21, 23) Yaatin, bonchettida Goday Yesuusi sinttappe pirddanawu yiyo wode waatana giidi qoppana danddayiyoo?
13 Iita waayee doommanaappe kase, naaꞌꞌu ashkkaratun leemisettida minnidi oottiya tiyettida a kaalliyaageetu bolli wurssetta maatafay wodhana. (Ajj. 7:1-3) Armmageedoonappe kase, Yesuusi qaalaa gelido saluwaa woytuwaa etawu immana. Kiristtoosa ishata sabbakiyo oosuwan maaddida saꞌaa laattiyo hidootay deꞌiyoogeeti dorssa giidi pirddin, he Kawotettan saꞌan deꞌiyo maataa demmana.—Maa. 25:34.
IITA AZALLA ASHKKARAA
14, 15. Yesuusi tiyettida ba ishatuppe daroti iita azalla gidanaagaa yootidee? Qonccissa.
14 He leemisuwan, wurssetta ashkkaray zalꞌꞌiyoogaa woy bankkiyan wottiyoogaa aggidi miishshaa moogiis. He ashkkaray godaa sheniyaa eriiddi polennan aggido gishshawu, iitabaa qoppiyoogee qoncciis. Goday a ‘iita azallaa’ yaagidoogee bessiyaaba. Goday he miishshaa appe wotti ekkidi, tammu shaꞌu biray deꞌiyoogaayyo immiis. He iita ashkkaraa ‘kare xumaa kessi olidosona.’ “Hegan i yeekkananne ba achchaa garccana.”—Maa. 25:24-30; Luq. 19:22, 23.
15 Heezzu ashkkaratuppe issoy ba godaa biraa moogido gishshawu, Yesuusi bana kaalliya tiyettidaageeta heezzawu shaakkin issi kushee iita azalla gidanaagaa yootidee? CHii. Yuushuwan deꞌiya qofaa qoppa. Ammanettida wozannaama ashkkaraa leemisuwan, ba mala ashkkarata wadhiya iita ashkkaraabaa Yesuusi yootiis. Yesuusi he leemisuwan iita ashkkaratu citay denddanaagaa yootibeenna. SHin, i ammanettida ashkkaray he iita ashkkaraagaa mala eeshshay deꞌiyoogaa gidennaadan zoriis. Hegaadan, Yesuusi yootido tammu geelaꞌotu leemisuwan, bana kaalliya tiyettidaageetuppe baggay ichashu eeyya geelaꞌotu mala gidana gibeenna. SHin, i ayyaanaaban ba ishati beegottidi giigi uttana xayikko aybi hananaakko naagettanaadan eta zoriis.f Qommoora qonccida qofaadan, biraa leemisuwan Yesuusi tiyettida ba ishatuppe daroti wurssetta gallassan iita azalla gidana gibeenna giidi qoppiyoogee bessiyaaba. Yesuusi bana kaalliya tiyettidaageeti ubbatoo minnidi oottanaadan, woykko banttawu imettida biran ‘zalꞌꞌanaadan,’ qassi iita ashkkaraagaadan qoppennaadaaninne oottennaadan zoriis.—Maa. 25:16.
16. (a) Biraa leemisuwaappe nuuni ay tamaariyoo? (b) Ha huuphe yohoy nuuni biraa leemisuwaa kaseegaappe loytti akeekanaadan waati maaddidee? (“Biraa Leemisuwaa Akeekiyoogaa” giya saaxiniyaa xeella.)
16 Biraa leemisuwaappe nuuni tamaariyo naaꞌꞌubay aybee? Koyruwan, Godaa Kiristtoosi, tiyettida ba ashkkaratussi i alꞌꞌobadan xeelliyo sabbakiyoonne erissiyo ashkkara oottiyo oosuwaa immiis. Naaꞌꞌanttuwan, Kiristtoosi nuuni ubbay minnidi sabbakanaadan koyees. Yaatikko, nuuni ammaniyo gishshawu, beegotti uttiyo gishshawunne ammanettiyo gishshawu, Goday woytanaagaa ammanettana danddayoos.—Maa. 25:21, 23, 34.
a Wochiyo Keelaa, Isiine 15, 2013, sinttaa 21-22, mentto 8-10n ammanettida wozannaama ashkkaray oonakko qoncciis. Geelaꞌoti oonakko ha maxeetiyan hagaappe kasetiya huuphe yohuwan qoncciis. Wochiyo Keelaa, Xiqimita 15, 1995, sinttaa 23-28ninne ha maxeetiyan hagaappe kaalliya huuphe yohuwan dorssaabaanne deeshshaabaa leemisoy odettiis.
b “Biraa Leemisoy Pawunddiyaa Leemisuwaara Issi Mala Gididoy Aybiinee?” giya saaxiniyaa xeella.
c Giriikettuwan 5 taalantte, 2 taalanttenne 1 taalanttee geetettidaagaa Wolayttatto Geeshsha Maxaafay 5,000 bira, 2,000 biranne 1,000 bira gees. Yesuusa wode, issi taalanttee 6,000 gidiya dinaariyaara lagge. Issi oosanchay issi gallassi issi dinaariyaa demmees; issi taalanttiyaa demmanawu 20 layttaa oottana koshshees.
d Kiitettidaageeti hayqqi simmin, Seexaanay kaddiyoogee daranaadan oottiis; hegee daro layttawu aakkiis. He wode, asaa Kiristtoosa tumuppe kaalliyaageeta oottanaadan azazido azazoy ubbatoo polettibeenna. SHin ‘cakkiyo wode’ geetettida wurssetta gallassan he ubbabay laamettana. (Maa. 13:24-30, 36-43) Wochiyo Keelaa, Isiine 15, 2013, sinttaa 9-12 xeella.