Ha Wodiyan Nuna Kaalettiya Minuwaa
“Olaa i xooniiddinne qassikka xoonanau kiyiis.”— AJJ. 6:2.
1, 2. (a) Kiristtoosi 1914ppe doommidi kawo gididi oottiyoobaa Geeshsha Maxaafay waati qonccissii? (b) Kiristtoosi kawoti simmidi ay oottidee?
KIRISTTOOSI 1914n Yihoowa Kawotettau Mase Kawo gidiis. Nuuni haꞌꞌi a aybidan qoppiyoo? Gubaaꞌe giddon hanettiyaabaa beꞌanau wodiyaappe wodiyan saꞌaa xeelliiddi ba araatan uttidi qoppiya kawoo? Nuuni hegaadan qoppiyaaba gidikko, nu qofaa laammana koshshees. Mazamurenne Ajjuutaa maxaafan i, paraa toggidi, “xooniiddinne qassikka xoonanau” kiyidi, olaa wurssi “xoonanau” paraa piriixissiya wolqqaama kawodan qoncciis.—Ajj. 6:2; Maz. 2:6-9; 45:1-4.
2 Kiristtoosi kawoti simmidi koyro oottidobay, ‘miimminttiyaanne a kiitanchata’ xoonidoogaa. Ba kiitanchata azaziya halaqaa Mikaaꞌeela gidiyoogaadan, Kiristtoosi Seexaanaanne daydanttata geeshsha saluwaappe olidi, saꞌaa heeran deꞌanaadan oottiis. (Ajj. 12:7-9) Hegaappe simmidi, “maachchaa kiitaa ekkidi yiya” Yihoowa kiitanchaa gididi, Yesuusi ba Aawaara ayyaana beeta maqidasiyaa xomoosanau yiis. (Mil. 3:1) ‘Gita Baabilooni’ shaaho gidida, bana Kiristtaane giya tuna haymaanootiyaa suuttaa gussidoogaa gishshaunne ha alamiyaa polotikaa haaruwaara ayyaanaaban shaaramuxido gishshau o pirddiis.—Ajj. 18:2, 3, 24.
Saꞌan Deꞌiya Ba Ashkkarata Geeshshiyoogaa
3, 4. (a) Yihoowa ‘kiitancha’ gidiyoogaadan, Kiristtoosi ayba ooso oottidee? (b) Beeta maqidasiyaa xomoosiyoogee ay qonccissidee, gubaaꞌiyau Huuphe gidiyoogaadan, Yesuusi oona sunttidee?
3 Yihoowaynne a ‘kiitanchay’ xomoosido wode, banttana Kiristtaane giya woosa keettatu shaaho gidenna, ayyaana beeta maqidasiyau saꞌaa dabaaban tumu Kiristtaanetu citay deꞌiyoogee qoncciis. Gidikkokka, ayyaanan tiyettida Kiristtaanetikka, woy ‘Leewa zaretikka’ geeyana koshshiis. Hegee hananabaa yootiya Milkkiyaasi: “I [Yihooway] biraanne worqqaa geeshshiyaagaadaaninne tigiyaagaadan uttidi, Leewa zareta geeshshana; eti GODAASSI likke yarshshuwaa yarshshana gakkanaashin, i eta geeshshana” yaagidi kaseti yootidoogaara moggiyaaba. (Mil. 3:3) Yihooway he ayyaana Israaꞌeelata geeshshanau ba “maachchaa kiitaa ekkidi yiya,” Kiristtoos Yesuusa goꞌettiis.
4 Ayyaanan tiyettida, ha ammanettida Kiristtaaneti ammaniya asau koshshiya wodiyan ayyaanaa qumaa immanau banttau danddayettida ubbaa oottiyoogaa Kiristtoosi akeekiis. Injjetin injjetana xayin, eti 1879ppe doommidi, Xoossaa Kawotettaabaa yootiya Geeshsha Maxaafaa tumaa, ha maxeetiyan qonccissiiddi takkidosona. Yesuusi ba keettaa asaa xomoosanau ‘wodiyaa wurssettan’ ‘yiyo’ wode, issi ashkkaray “qumaa koshshiyo wodiyan” etau immishin demmanaagaa kasetidi yootiis. He ashkkaraa i anjjettidaagaa gaana; qassi saꞌan deꞌiya, “babaa ubbaa bolli sunttana.” (Maa. 24:3, 45-47) Kiristtaane gubaaꞌiyau Huuphe gidiyoogaadan, Kiristtoosi ha ‘ammanettida wozannaama ashkkaray’ saꞌan deꞌiya, Ba Kawotettaa oosuwaara gayttidabaa ayssanaadan oottiis. I Bollaara Heemmiyaagaa baggaara ayyaanan tiyettida “ba so asau,” qassi eta lagge gidida ‘hara dorssatuyyo’ kaaletuwaa immees.—Yoh. 10:16.
Saꞌaa Kattaa Cakkiyoogaa
5. Kiitettida Yohaannisi Mase kawoy ay oottiyoogaa ajjuutan beꞌidee?
5 Mase Kawoy 1914n kawoti simmidi, “Godaa gallassan” oottiyo harabaakka kiitettida Yohaannisi ajjuutan beꞌiis. Yohaannisi: “Qassikka taani be7aas. Be7ite. Bootta shaarai de7ees. SHaaraa bollan Asa Na7aa milatiyaagee uttiis; a huuphiyan worqqa akiliilee, qassi a kushiyan qara baacai de7ees” yaagiis. (Ajj. 1:10; 14:14) ‘Saꞌaa kattay melido’ gishshau, he Cakkiyaagee ba baacaa yeddanaadan Yihooway kiittido issi kiitanchay yootishin Yohaannisi siyiis.—Ajj. 14:15, 16.
6. Yesuusi aybi hananaagaa yootidee?
6 Ha ‘saꞌaa kattaa cahay’ Yesuusi yootido, gisttiyaanne zardduwaa leemisuwaa hassayissees. Loꞌꞌo gisttiyaa cakkanau gisttiyaa ba goshshan zeriya uran Yesuusi bana leemissiis; he gisttee ‘kawotettaa naata’ woykko aara a Kawotettan haaranau ayyaanan tiyettida tumu Kiristtaaneta malaatees. SHin morkkee, ‘xalahe halaqay,’ qammi ‘xalahe halaqaa naata,’ zardduwaa goshshan zeriis. Cakkiyo wodee, ‘wodiyaa wurssettay’ gakkanaashin gistteenne zarddoy issippe diccanaadan bochenna mala zerettaa zeridaagee ba ashkkarata azaziis. He wode, gisttiyaa zardduwaappe shaakkanaadan i ba kiitanchata kiittana.—Maa. 13:24-30, 36-41.
7. Kiristtoosi ‘saꞌaa kattaa cahaa’ waatidi poliiddi deꞌii?
7 Yohaannisi beꞌido ajjuutaa poluwaa maaraadan, Yesuusi alame yuushuwan cakkiyo oosuwaa kaalettiiddi deꞌees. ‘Saꞌaa kattaa cahay,’ Yesuusi ‘gisttiyan’ leemisido, ‘kawotettaa naatuppe,’ 144, 000ppe attidaageeta shiishshiyoogan doommiis. Tumu Kiristtaanetu giddooninne worddo Kiristtaanetu giddon deꞌiya dummatettay Koyro Alamiyaa Olaappe simmin awudeegaappenne aaruwan qoncciis; saꞌaa kattaa cahau naaꞌꞌantto shaahuwaa, giishin hara dorssata shiishshiyoogau hegee keehippe maaddiis. Hageeti ‘kawotettaa naata’ gidennan, eeno giidi Kawotettau haarettiya, “zawai bainna daro asaa” malaatoosona. Eti “zare ubbaappe, qommo ubbaappe, yara ubbaappenne dumma dumma biitta qaala ubbaappe” shiiqidosona. Eti Kiristtoos Yesuusinne aara saluwaa kawotettan haariya, 144,000 “geeshshati” ayssiyo Mase Kawotettau haarettoosona.—Ajj. 7:9, 10; Dane. 7:13, 14, 18.
Gubaaꞌeta Kalettiyoogaa
8, 9. (a) Kiristtoosi gubaaꞌetu ubbaa hanotaa xallaa gidennan, gubaaꞌiyaa yametu ubbaa eeshshaakka xeelliyoogaa aybi qonccissii? (b) Sinttaa 28n qonccidaagaadan nuuni haakkana koshshiyo ‘Seexaanaa ciimma yohoy’ aybee?
8 Koyro xeetu layttaa M.L. gubaaꞌetu ubban deꞌiya ayyaanaabaa hanotaa Kiristtoosi ay keena akeekan xeelliyaakko aadhida huuphe yohuwan beꞌida. Ha wodiyan, “maata ubbai saluwaaninne sa7an” imettido Kawo gididi, nuna Kaalettiyaagee Kiristtoosi alame yuushuwan deꞌiya gubaaꞌetanne eta cimata minnidi kaalettees. (Maa. 28:18; Qol. 1:18) Yihooway ayyaanan tiyettidaageetu gubaaꞌiyan i “ubbaban huuphe gidanaadan” oottiis. (Efi. 1:22, NW) I gubaaꞌiyau huuphe gidiyoogaadan, 100,000ppe dariya Yihoowa Markkatu gubaaꞌetun hanettiyaabi aybinne appe geemmenna.
9 Beni wode Tiyaaxiroona gubaaꞌiyau Yesuusi: “Xoossaa Na7ai, tamaa lacuwaa milatiya aifee de7iyoogee, . . . hagaadan yaagees. ‘Taani ne oosuwaa, . . . erais’” yaagidi kiittiis. (Ajjuutaa 2:18, 19) I he gubaaꞌiyaa yameta shori baynna eta deꞌuwaanne yaare duussaa gishshau: “Taani asa qofanne amo eriyaagaa gidiyoogaa erana; taani intteyyo intte oosuwaa malaa immana” yaagidi seeriis. (Ajj. 2:23) Kiristtoosi gubaaꞌetu hanotaa xeelliyoogaa xalla gidennan, gubaaꞌiyaa yametu ubbaa eeshshaakka xeelliyoogaa hegee bessees. Yesuusi Tiyaaxiroona gubaaꞌiyan deꞌiya “Seexaanaa ciimma yohuwaa” tamaaribeenna Kiristtaaneta galatiis. (Ajj. 2:24) Ha wodiyankka, Intternneetiyaa, makkalabaa bessiya biiduwaa kaassaa woy shori baynna asa qofaa baggaara gakkiya, “Seexaanaa ciimma” yohuwaappe haakkiya yelagata woy cimata i galatees. Bantta deꞌo macara ubban a kaaletuwaa kaallanau banttau danddayettida ubbabaa oottiya, ha wodiyan deꞌiya daro Kiristtaaneti baaxetiyoobaanne yarshshiyoobaa i beꞌiyo wode ay keena ufayttii!
10. Kiristtoosi gubaaꞌiya cimata kaalettiyoogee aybin leemisettidee, shin eti ay akeekana koshshii?
10 Kiristtoosi saꞌan deꞌiya ba gubaaꞌeta sunttettida cimatu bagaara siiquwan kaalettees. (Efi. 4:8, 11, 12) Koyro xeetu layttan deꞌiya gubaaꞌe cimati ubbay ayyaanan tiyettidaageeta. Ajjuutaa maxaafan, eti Kiristtoosa ushacha kushiyan deꞌiya xoolinttetudan qonccidosona. (Ajj. 1:16, 20) Ha wodiyan gubaaꞌe cimatuppe daroti hara dorssata. Eti woosaaninne geeshsha ayyaanaa kaaletuwan sunttettidosona; yaatiyo gishshau, etikka Kiristtoosa kaaletuwaa kaalliyoogaadan qoppana danddayoos. (Oos. 20:28) Gidoppe attin, Kiristtoosi saꞌan deꞌiya ba erissiyo ashkkarata kaalettanau ayyaanan tiyettida Kiristtaane attuma asatuppe amaridaageeta, Bollaara Heemmiyaagaa oottidi goꞌettiyoogaa eti akeekoosona.—Oosuwaa 15:6, 28-30 nabbaba.
“Godaa Yesuusaa, Neeni Haaya”
11. Nuna Kaalettiyaagee eesuwan yaanaadan nuuni amottiyoy aybissee?
11 Kiitettida Yohaannisi beꞌido ajjuutan, Yesuusi eesuwan yaanaagaa darotoo yootiis. (Ajj. 2:16; 3:11; 22:7, 20) I ba yuussay Gita Baabilooni bollinne attida Seexaanaa iita siraataa bolli pirddanaassa gidiyoogaa yootidoogee qoncce. (2 Tas. 1:7, 8) Kasetidi odettida maalaalissiyaabay ubbay polettiyoogaa beꞌanau amottido gishshau, cimida kiitettida Yohaannisi: “Amin77i. Godaa Yesuusaa, neeni haaya” yaagiis. Ha iita siraataa wurssettan deꞌiya nuunikka, nuna Kaalettiyaageenne nu Kawoy ba Aawaa sunttaa bonchissanaunne I ubbabaa haariyaagaa gidiyoogaa boxooxissanau Kawotettaa maatan yiyo wode beꞌanau amottoos.
12. Kiitanchati bashshaa carkkuwaa yeddanaappe kase, Kiristtoosi ayba oosuwaa polanee?
12 Yesuusi Seexaanaa siraataa xayssanau yaanaappe kase, 144,000 ayyaana Israaꞌeela yametuppe attidaageetun wurssetta maatafay wodhees. Ha 144,000tun maatafay wodhidi wuranaappe kase, Seexaanaa siraataa xayssiya carkkuwaa kiitanchati yeddennaagaa Geeshsha Maxaafay qoncciyan yootees.—Ajj. 7:1-4.
13. ‘Iita waayiyaa’ doomettaa wode Kiristtoosi ba yuussaa waatidi qonccissanee?
13 Kiristtoosi 1914n ‘yiidoogaa’ saꞌan deꞌiya daroti akeekibookkona. (2 PHe. 3:3, 4) Gidikkokka, matan i Seexaanaa siraataa dumma dumma kifiletu bolli Yihoowa pirddaa poliyo wode, ba yuussay qonccanaadan oottana. “Makkalanchchai,” giishin Kiristtaane giyo haymaanootiyaa kaalettiyaageeti xayiyoogee a ‘yuussaa’ qonccissiyaaba gidana. (2 Tasalonqqe 2:3, 8 nabbaba.) Kiristtoosi Yihooway sunttido, Pirddiyaagaa gididi oottiyoogaa doommidoogau hegee mino naqaasha gidana. (2 Ximootiyoosa 4:1 nabbaba.) Gita Baabilooni shaaho gidida, bana Kiristtaane giya tuna haymaanootiyaa muleera xayiyoogee alamiyan deꞌiya worddo haymaanootee ubbay xayiyoogau doometta gidana. Ha shaaramuxiyo xayssana mala polotikan haariyaageetu wozanan Yihooway amuwaa wottana. (Ajj. 17:15-18) Hegee ‘iita waayiyau’ koyro shaaho gidana.—Maa. 24:21.
14. (a) Iita waayiyaa koyro shaahuwaa gallassay guuxxiyoy aybissee? (b) “Asa Na7aa malaatai” Yihoowa asay waananaadan oottanee?
14 He waayiyaa gallassatu qooday “ba doorido asatu gishshau,” saꞌan attida ayyaanan tiyettida Kiristtaanetu gishshau guuxxanaagaa Yesuusi yootiis. (Maa. 24:22) Worddo haymaanootiyaa xayssiyo wode, ayyaanan tiyettida Kiristtaanetinne eta lagge gidida hara dorssati xayanaadan Yihooway paqqadenna. Yesuusi gujjidi, “he wode waayiyaappe guyyiyan” awa ayfiyaaninne aginan, xoolinttiyan malaatay beettanaagaa, qassi “Asa Na7aa malaatai, saluwan” beettanaagaa yootiis. Hegee “sa7an he wode de7iya asa zare ubbai” yeekkanaadan oottana. SHin saluwaa hidootay deꞌiyo, ayyaanan tiyettidaageetinne saꞌaa hidootay deꞌiyo, eta laggeti yeekkokkona. He wode ‘eti wozettiyo wodee matiyo gishshau, xoqqu giidi pude xeellana.’—Maa. 24:29, 30; Luq. 21:25-28.
15. Kiristtoosi yiyo wode ay oottanee?
15 Asa Naꞌay ba xoonuwaa polanaappe kase, hara ogiyankka yaana. I hagaadan giidi hananabaa yootiis: “Taani, Asa Na7ai, kiitanchcha ubbatuura bonchchuwan yiyo wode, ta bonchcho kawotaa araatan uttana. Sa7an de7iya asai ubbai ta sintti shiiqana; heemmiyaagee dorssata deeshshatuppe shaakkiyoogaadan, taani he asaa naa77u kessada shaakkana. Qassi dorssata taappe ushachcha baggaara essada, deeshshata taappe haddirssa baggaara essana.” (Maa. 25:31-33) Hegee Kiristtoosi ‘asa ubbaa’ naaꞌꞌu citan shaakkidi pirddanau yaanaagaa malaatees: ‘dorssati,’ ayyaanaaban a ishata (saꞌan deꞌiya ayyaanan tiyettida Kiristtaaneta) kaafiyaageeta, qassi ‘deeshshati,’ “nu Godaa Yesuus Kiristtoosa wonggeliyaa mishiraachchuwaayyo azazettennaageeta” malaatoosona. (2 Tas. 1:7, 8) ‘Xillo’ geetettida dorssati saꞌan ‘merinaa deꞌuwaa’ demmana; qassi deeshshati ‘merinau qaxxayettana’ woykko xayana.—Maa. 25:34, 40, 41, 45, 46.
Yesuusi Ba Xoonuwaa Polees
16. Nuna Kaalettiyaagee, Kiristtoosi ba xoonuwaa waatidi polanee?
16 Banaara kawotiyaageeti ubbay attamettoogaappenne dorssati shaahettidi, bashshaappe attanau ayyo ushacha baggan eqqoogaappe guyyiyan, Kiristtoosi wurssi “xoonanau” kiyana danddayees. (Ajj. 5:9, 10; 6:2) I wolqqaama kiitanchatanne hayquwaappe denddida ba ishata kaalettiiddi, Seexaanay essido polotika, wotaaddaranne zalꞌꞌe dirijjitiyaa ubbaa xayssana. (Ajj. 2:26, 27; 19:11-21) Kiristtoosi Seexaanaa iita siraataa xayssiyo wode, a xoonoy polettana. Hegaappe simmin, i Seexaanaanne daydanttata issi shaꞌu layttau ciimma ollan yeggana.—Ajj. 20:1-3.
17. Kiristtoosi ba SHaꞌu Layttaa Haaruwaa wode, ba hara dorssata aybaayyo kaalettanee, nu murttee ayba gidana koshshii?
17 Iita waayiyaappe attiya, hara dorssata woykko “zawai bainna daro asaa” xeelliyaagan kiitettida Yohaannisi: “Kawotaa araataayyo gidduwan uttida Dorssai eta heemmana. De7o haattaa pulttuwaakkokka eta kaalettana” yaagidi kaseti yootiis. (Ajj. 7:9, 17) Ee, Kiristtoosi ba SHaꞌu Layttaa Haaruwaa wode ubban, i giyoobaa wozanappe siyiya, hara dorssata kaalettiyoogaa aggenna; qassi merinaa deꞌuwau eta kaalettana. (Yohaannisa 10:16, 26-28 nabbaba.) Haꞌꞌi gidin Yihooway qaalaa gelido ooratta alamiyan gidin, kawo gididi nuna Kaalettiyaagaa ammanettidi kaalliyaageeta gidoos!
Zaarettanau
• Kiristtoosi kawoti simmidi ay oottidee?
• Saꞌan deꞌiya gubaaꞌiyaa kaalettanau Kiristtoosi oona goꞌettii?
• Kiristtoosi, nuna Kaalettiyaagee yaana hara ogeti awugeetee?
• Kiristtoosi nuna ooratta alamiyan kaalettanay ayba ogiyaanee?
[Sinttaa 31n deꞌiya misiliyaa]
Seexaanaa iita siraataa xayoy Kiristtoosa yuussaa qonccissana