Kiristtoosa Ishantta Ammanettidi Maaddiyoogaa

1, 2. (a) Yesuusi ba mata laggetuyyo yootido leemisoti awugeetee? (Ha huuphe yohuwaa doomettan deꞌiya misiliyaa xeella.) (b) Dorssaanne deeshshaa leemisuwaabaa nuuni ay erana koshshii?

YESUUSI ba mata laggetussi, PHeexiroosawu, Inddiraasawu, Yaaqoobawunne Yohaannisawu keehi ufayssiyaabaa yootiis. Eti ammanettida wozannaama ashkkaraabaa, tammu geelaꞌotubaanne biraabaa leemisuwaa i yootiyoogaa siyidosona. Yesuusi ba haasayaa wurssettan issi leemisuwaa yootiis. I ‘saꞌan deꞌiya asa ubbawu’ “Asa Na7ai” pirddaa immana wodiyaa yootiis. He leemisoy i erissiyo ashkkarata keehi garamissennan aggenna! He leemisuwan, Yesuusi dorssaanne deeshshaa geetetti shaahettida naaꞌꞌu citaabaa yootiis. I ‘Kawuwaa’ ‘ishantta’ yaagido dumma heezzantto citaabaa keehi qonccissiis.—Maatiyoosa 25:31-46 nabbaba.

² Yesuusi he leemisuwan asay ekkana pirddaabaa yootido gishshawu, Yihoowa asay daro wodiyawu hegaa eranawu keehi koyiis; qassi yaatidoogee bessiyaaba. I amaridaageeti merinawu deꞌanay, qassi harati merinawu xayanay aybissakko qonccissiis. Nuuni deꞌuwaa demmanay Yesuusi yootido tumaa akeekiyoogaananne hegaara maayettidi deꞌiyoogaana. Daroti xayiyo gishshawu, nuuni hagaadan oychana koshshees: Yihooway ha leemisuwaa nuussi loddan loddan waati qonccissidee? Sabbakiyo oosoy keehi koshshiyoogaa ha leemisoy qonccissees nuuni gaana danddayiyoy aybissee? Sabbakiyo maatay oossi imettidee? Ha wodee ‘Kawuwaayyoonne’ i ‘ta ishantta’ giyoogeetuyyo ammanettiyo wode gididoy aybissee?

NUUNI HA LEEMISUWAA AKEEKANAADAN YIHOOWAY WAATI MAADDIDEE?

3, 4. (a) Ha leemisuwaa akeekanawu nuuni erana koshshiyaabay aybee? (b) Xiyoone Wochiyo Keelay 1881n ha leemisuwaa waati qonccissidee?

³ Nuuni dorssaabaanne deeshshaabaa leemisuwaa loytti akeekanawu, he leemisuwan heezzu ayfe qofaa akeekana koshshees; hegeetikka, odettidaageetu oonatettaa, pirddaa wodiyaanne dorssa woy deeshsha giidi pirddanaadan oottiyaabaa.

⁴ Xiyoone Wochiyo Keelay 1881n, ‘Kawuwaa’ geetettida “Asa Na7ai” Yesuusa gidiyoogaa qonccissiis. He Wochiyo Keelay Kawuwaa ‘ishantti’ saluwan Yesuusaara haaranaageetu xalla gidennan, wottiyoobi baynnaageeta gididi saꞌan deꞌana ubba asaa gidiyoogaakka qonccissiis. He Wochiyo Keelay Kiristtoosa SHaꞌu Layttaa Haaruwaa wode asay shaahettanaagaanne bantta oottiyo ubbaban Xoossaagaadan siiqiyaageeti dorssa geetettanaagaa yootiis.

5. Xoossaa asay 1920 heeran dorssaabaanne deeshshaabaa leemisuwaa waati loyttidi akeekidee?

⁵ Yihooway 1920 heeran ba asay he leemisuwaa loytti akeekanaadan maaddiis. Xiqimita 15, 1923 Wochiyo Keelay, “Asa Na7ai” Yesuusa gidiyoogaa qonccissiis. SHin he maxeetee Kiristtoosaara saluwan haaranaageetu xallay a ishantta gidiyoogaa Geeshsha Maxaafaappe yootidi, Kiristtoosa ishantti oonakko loytti qonccissiis; qassi dorssati Kiristtoosa Kawotettan saꞌana deꞌanawu hidootiyaageeta gidiyoogaa yootiis. Dorssata deeshshatuppe shaakkiyo wodiyaabaa shin? SHaꞌu Layttaa Haaruwaa wode Kirsttoosa ishati saluwan uttidi aara haariyo gishshawu, saꞌan deꞌiyaageeti eta maaddana woy maaddennan aggana danddayennaagaa he huuphe yohoy qonccissiis. Hegaa gishshawu, SHaꞌu Layttaa Haaroy doommanaappe kase dorssati deeshshatuppe shaahettana. Issi ura dorssa oottiyaabay Yesuusa ba Goda oottidi ekkiyoogaanne Xoossaa Kawotettay loꞌꞌobaa ehanaadan koyiyoogaa gidiyoogaa he huuphe yohoy yootiis.

6. Nuuni 1995 heeran he leemisuwaa waatidi kaseegaappe loytti akeekidoo?

⁶ Issi uri wodiyaa wurssettan Kawotettaa mishiraachuwaa siyiyoogan woy siyennan ixxiyoogan dorssa woy deeshsha geetettidi pirddaa ekkanaagaa, laamettida ha qofaappe Yihoowa asay akeekiis. SHin 1995 heeran he qofay laamettiis. Xiqimita 15, 1995, Wochiyo Keelay naaꞌꞌu huuphe yohotun, Yesuusi yootido Maatiyoosa 24:29-31⁠ninne Maatiyoosa 25:31, 32n deꞌiya issi mala qofaa qonccissiis. (Nabbaba.)a He Wochiyo Keelay woygidi kuuyidee? Hagaadan giis: “Asay dorssa woy deeshsha geetettidi sinttappe pirddaa ekkana.” Hegee awude gidanee? “Maatiyoosa 24:29, 30n odettida ‘waayiyaappe’ guyyiyan asa naꞌay ba ‘bonchuwan yiyo wode’ hanana. . . . Hegaappe simmin iita alamee muleera xayiyo wode Yesuusi pirddaa immana.”

7. Nuuni haꞌꞌi loytti akeekidobay aybee?

⁷ Dorssaabaanne deeshshaabaa leemisuwaa ha wodiyan loytti akeekida. Leemisuwan odettidaageetu oonatettaa xeelliyaagan, “Asa Na7ai” Kawuwaa, Yesuusa. Qassi, ‘ta ishata’ geetettidaageeti Kiristtoosaara saluwan uttidi haarana ayyaanan tiyettida attumaageetanne maccaageeta. (Roo. 8:16, 17) ‘Dorssatinne’ ‘deeshshati’ ubba biittaa asatu leemiso. Hegeeti geeshsha ayyaanan tiyettibookkona. Pirddaa wodiyaabaa shin? He pirddaa wodee iita waayiyaa wurssettaa heeraana. Qassi asay dorssa woy deeshsha geetetti pirddaa ekkanaadan oottiyaabaa shin? Asay saꞌana deꞌiya tiyettidaageeta maaddiyo woy maaddennan aggiyo gishshawu, Yesuusi asawu pirddaa immanaagaa eroos. Ha alamiyaa wurssettay keehi matido ha wodiyan, Yihooway ha leemisuwaanne Maatiyoosa shemppo 24⁠ninne 25n deꞌiya hegaara gayttida leemisota nuuni loddan loddan akeekanaadan maaddido gishshawu keehi galatoos!

HA LEEMISOY SABBAKIYOOGAA WAATI LOYTTI QONCCISSII?

8, 9. Dorssati ‘xillo’ geetettidoy aybissee?

⁸ Dorssaabaanne deeshshaabaa leemisuwan, Yesuusi sabbakiyo oosuwaabaa yootibeenna. Yaatin, hegee sabbakiyoogee keehi koshshiyoogaa qonccissees giyoy aybissee?

⁹ Koyruwan, Yesuusi leemisuwan tamaarissidoogaa akeeka. I tumu dorssaabaanne tumu deeshshaabaa yootibeennaagee qoncce. Hegaadan, dorssa giidi pirddiyo ubbay ba ishata tumuppe mizana, mayzzana, mokkana, woy qashettin beꞌana bessees gibeenna. SHin, dorssan leemisettidaageeti ba ishatussi oottanabaa Yesuusi yootiis. He dorssata i ‘xillo’ yaagiis; ayssi giikko, dorssati Kiristtoosawu tiyettida ishati saꞌan deꞌiyoogaa eroosona, qassi ha wayssiya wodiyan eta maaddoosona.—Maa. 10:40-42; 25:40, 46; 2 Xim. 3:1-5.

10. Dorssati Kiristtoosa ishanttussi kehiyoogaa waati bessana danddayiyoonaa?

¹⁰ Naaꞌꞌanttuwan, ha qofaa yuushuwan Yesuusi yootidobaa akeeka. I he wode ba yuussaabaanne wodiyaa wurssettaabaa yootiiddi deꞌees. (Maa. 24:3) Yesuusi ba haasayaa doomettaa heeran, Kawotettaa mishiraachoy ‘saꞌa ubban odettiyoogee’ he malaataa shaaho gidiyoogaa yootiis. (Maa. 24:14) I dorssaabaanne deeshshaabaa leemisuwaa yootanaappe guuttaa kasetidi, biraabaa leemisuwaa yootiis. Hagaappe kasetiya huuphe yohuwan beꞌidoogaadan, Yesuusi ayyaanan tiyettida ba erissiyo ashkkarati woy ba ‘ishantti’ mishettidi sabbakana bessiyoogaa qonccissanawu he leemisuwaa yootiis. SHin, tiyettidaageetuppe saꞌan attidaageeti guutta; qassi eti oottana bessiya daro oosoy deꞌees. Wurssettay gakkanaappe kase “asa ubbau” markkattanaadan etawu odettiis. Dorssaabaanne deeshshaabaa leemisoy bessiyoogaadan, ‘dorssati’ Yesuusa ishantta maaddana. Yaatiyo gishshawu, dorssa geetettidi pirddaa ekkiyaageeti Kiristtoosa ishanttussi kehiyoogaa bessiyo waanna ogetuppe issoy sabbakiyo oosuwan eta maaddiyoogaa. SHin, eta maaddanawu ay oottana koshshii? Eta miishshan maaddiyoogaa xallay woy sabbakanaadan eta minttettiyoogaa xallay gidii?

SABBAKANA BESSIYAY OONEE?

11. Issoti issoti woygidi oychana danddayiyoonaa, qassi aybissi?

¹¹ Ha wodiyan, Yesuusa kaalliya hosppun miiloonetuppe dariya baggay ayyaanan tiyettibookkona. Eti tiyettida ba ashkkaratussi Yesuusi immido biraa ekkibookkona. (Maa. 25:14-18) Yaatin, ‘Sabbakanaadan azazido azazuwaa geeshsha ayyaanan tiyettibeennaageetikka azazettana bessii?’ giidi issoti issoti oychana danddayoosona. Ee, bessees gaanaadan oottiya amarida qofaa ane beꞌoos.

12. Yesuusi Maatiyoosa 28:19, 20n yootido qofaappe nuuni ay tamaariyoo?

¹² Yesuusi ba erissiyo ashkkarati ubbay sabbakanaadan azaziis. Yesuusi hayquwaappe denddidi bana kaalliyaageeti asay i “azazidobaa ubbaa” naagana mala tamaarissidi, erissiyo ashkkara oottanaadan yootiis. Sabbakanaadan imettida azazoy hegaappe issuwaa. (Maatiyoosa 28:19, 20 nabbaba.) Hegaa gishshawu, Kiristtoosaa kaalliyaageeti ubbay, saluwan haarana hidootay deꞌiyoogeetikka saꞌaa laattiyo hidootay deꞌiyoogeetikka sabbakana bessees.—Oos. 10:42.

13. Yohaannisi beꞌido ajjuutaappe nuuni ay tamaariyoo?

¹³ Ajjuutaa maxaafay tiyettidaageetikka haratikka sabbakanaagaa yootees. Kiristtoosaara saluwan haarana “bullashettiyaara,” woykko tiyettida 144,000ti asay ‘deꞌo haattaa coo ekkanaadan’ shoobbiyoogaa Yesuusi ajjuutan Yohaannisawu bessiis. (Ajj. 14:1, 3; 22:17) Yihooway Kiristtoosa wozuwaa yarshshuwaa baggaara asaa naata nagaraappenne hayquwaappe ashshanawu giigissidobawu he haattay leemiso. (Maa. 20:28; Yoh. 3:16; 1 Yoh. 4:9, 10) Wozoy nuuni sabbakiyo qofaappe waannatiyaagaa; qassi tiyettidaageeti asay wozuwaabaa eranaadaaninne an goꞌettanaadan sintta xeera gididi maaddoosona. (1 Qor. 1:23) SHin Yohaannisi bullashettiyaari yara gidennaageeta he ajjuutan beꞌiis. Etikka “Haaya” gaanaadan odettiis. Eti deꞌo haattaa haratikka ekkanaadan eeno giidi shoobboosona. Ha naaꞌꞌantto citan deꞌiyaageeti saꞌaa laattiyo hidootay deꞌiyoogeeta. Hegaa gishshawu, “Haaya” gin eeno giya ubbay haratussi sabbakana bessiyoogaa he ajjuutay qonccissi yootees.

14. “Kiristtoosa higgiyau” azazettanawu ay oottana koshshii?

¹⁴ “Kiristtoosa higgiyau” azazettiya ubbay sabbakana bessees. (Gal. 6:2) Yihooway baayyo goynniya ubbay issi mala higgiyawu azazettanaadan koyees. Leemisuwawu, i Israaꞌeelatuyyo, “Intte biittan yelettidaagaukka intte giddon bete gididi de7iyaagaukka he wogai issuwaa” yaagiis. (Kes. 12:49; Wog. 24:22) Israaꞌeelatussi imettida higgiyaa ubbaa ha wodiyan nuuni azazettana bessennaagee qoncce. SHin tiyettidaageeta gidin aggin, nuuni ubbay “Kiristtoosa higgiyau” azazettana bessees. Yesuusi tamaarissido ubbabay he higgiyan deꞌees. Yesuusi tamaarissido ubbaappe aadhiya timirttiyaappe issoy siiquwaa. (Yoh. 13:35; Yaaq. 2:8) Nuuni Xoossaa, Kiristtoosanne nu shoorota siiqiyoogaa bessiyo keehi loꞌꞌo ogee Kawotettaa mishiraachuwaa yootiyoogaa.—Yoh. 15:10; Oos. 1:8.

15. Yesuusi yootidobay i erissiyo ashkkaratu ubbaassi hanees gaana danddayiyoy aybissee?

¹⁵ Yesuusi ba erissiyo ashkkaratuppe amaridaageetussi yootidobay a kaalliya darotussikka hanees. Leemisuwawu, Yesuusi ba erissiyo ashkkaratuppe 11tu xallaara Kawotettaa maachaa maacettiis, shin he maachay 144,000tu ubbaassi hanees. (Luq. 22:29, 30; Ajj. 5:10; 7:4-8) Hegaadan, Yesuusi hayquwaappe denddi simmidi, bana kaalliya amaridaageetussi qonccidi eti sabbakanaadan azaziis. (Oos. 10:40-42; 1 Qor. 15:6) Gidoppe attin, koyro xeetu layttan deꞌida ammanettida erissiyo ashkkarati ubbay he azazuwaa Yesuusi yootishin siyana xayikkokka azazettidosona. (Oos. 8:4; 1 PHe. 1:8) Ha wodiyankka hegaadan, Yesuusi Kawotettaabaa sabbakiya hosppun miiloonetuppe issuwaanne haasayissibeenna. SHin eti ubbay Kiristtoosan ammanana bessiyoogaanne haggaaziyoogan he ammanuwaa oosuwan bessana koshshiyoogaa akeekoosona.—Yaaq. 2:18.

HA WODEE AMMANETTIYAAGEETA GIDANA KOSHSHIYO WODE

16-18. Dorssa geetetti pirddaa ekkana daroti Kiristtoosa ishantta waati maaddana danddayiyoonaa, qassi ha wodee eti hegaadan oottana koshshiyo wode gididoy aybissee?

¹⁶ Seexaanay ayyaanan tiyettida Kirsttoosa ishanttuppe attidaageetuura olettiiddi deꞌees; qassi bawu deꞌiya “guutta wodee” wurana haniyo wode, i kaseegaappe aaruwan eta qohana. (Ajj. 12:9, 12, 17) Tiyettidaageeti keehi paacciyaabay deꞌishinkka, awudeegaappenne aakkida sabbakiyo oosuwaa sintta xeera gididi kaalettoosona. Yesuusi etaara deꞌiyoogeenne eta maaddiyoogee qoncce.—Maa. 28:20.

¹⁷ Dorssa geetetti pirddaa ekkana daroti sabbakiyoogaa xallan gidennan, harabaa oottiyoogankka Kiristtoosa ishantta maaddiyoogaa gita maatadan xeelloosona. Leemisuwawu, eti miishshaa immiyoogan, Kawotettaa Addaraashaa, Gita SHiiquwaa Addaraashaanne macara biiruwaa keexxiyoogan maaddoosona; qassi kaalettanaadan ‘ammanettida wozannaama ashkkaray’ sunttidoogeetussi ammanettidi azazettoosona.—Maa. 24:45-47; Ibr. 13:17.

¹⁸ Kiitanchati teqqido carkkuwaa matan gita waayiyaa wode yeddana. Kiristtoosa ishanttuppe saꞌan attida ubbaa bolli wurssetta maatafay wodhi simmin hegee hanana. (Ajj. 7:1-3) Armmageedoona olay doommanaappe kase, tiyettidaageeti saluwaa baana. (Maa. 13:41-43) Hegaa gishshawu, ha wodee dorssa geetetti pirddaa ekkanaageeti Kirsttoosa ishantta ammanettidi maaddan koshshiyo wode.