Deꞌiyaabay Gidana Gaanau Danddayay?

“Deꞌiyaabay gidana giyoogee manqquwaa dureyees; deꞌiyaabay gidenna giyoogee duriyaa manqqettees.” —Benjjaamin Frankkilin.

HA LEEMISUWAARA moggiya ogiyan, deꞌiyaabay gidana giyoogaa issibadan shammi ekkana danddayennaagaa daroti eridosona. Daro aquwaa demmanau, deꞌiyaabaa bolli gujjanau woykko haratu deꞌuwaa amottiyoogaa minttettiya alamiyan, deꞌiyaabay gidana gi ufayttidi deꞌiyoogee danddayettennaba milatiyoogee garamissenna! Kaallidi deꞌiyaabatuppe nena qohidabi deꞌii?

• SHammiyoobaa erissiyaageeti issibaa gujjada shammikko ufayttaasa giidi bolli bollan odoosona.

• Ooso sohuwan woykko timirtte keettan annaacettiyoogee, neeni harati oottiyoobaa ubbaa oottiyo wode xallan gooba gidays gaada qoppanaadan minttettees.

• Neeni etassi oottiyoobau asay galata xayees.

• Ne laggeti banttau deꞌiyaabaa neeni qaaqqatanaadan oottoosona.

• Deꞌuwaa xeelliyaagan neeni oychiyo keehi koshshiya oyshatussi zaaro demmakka.

Ha xubbiya ubbabay deꞌishinkka, tumuppe ufayttidi deꞌana danddayettii? Kiitettida PHauloosi ‘deꞌiyaabay gidana’ gaanau maaddiyaabaa yootiis. Issi issi wode deꞌoy au palahiis, hara wode qassi pacciis. A laggeti a nashshidosona; shin harati baceessidosona. Gidikkonne, i “awan gidinkka aude gidinkka” bau deꞌiyaabay gidana giyoogaa tamaaridoogaa yootiis.—Pili. 4:11, 12.

Bau deꞌiyaabay gidana giyoogee, hegau ayba tanggonne ekkibeennaageeti eriyooba gidenna; shin PHauloosi yootidoogaadan, hegee tamaarana danddayiyooba. Deꞌiyaabay gidana gaanau maaddiya, Xoossaa Qaalaa, Geeshsha Maxaafan deꞌiya ichashu qofata pilgganaadan nena shoobboos.