Ufayssiya Deꞌuwaa Ha Wodiyan Gidin Merinaukka
HA WODIYANKKA gidin ufayssiya deꞌuwaa deꞌana danddayaasa. Ayba ogiyan? Xoossaa Qaalaa, Geeshsha Maxaafan deꞌiya aadhida eratettay deꞌiyo baaso siraataa kaalliyoogaana. Hegeetuppe amaridaageeta ane beꞌoos.
GEESHSHA MAXAAFAA BAASO SIRAATAA: Kawuwaa Solomoni, “Asassi go77a gidiyaabi aibee giikko, asi ba daafuridobaappe miidinne uyidi ufaittiyoogaa” yaagidi xaafiis.—ERA. 2:24.
Xoossay nuuni loꞌꞌo oosuwaa oottiyoogan ufayttanaadan ootti medhiis. Ubba metiya hanotan deꞌiiddikka, ha wodiyan minnidinne ammanettiyaageeta gididi oottiyoogan deꞌuwan amarida ufayssaa demmana danddayoos.
GEESHSHA MAXAAFAA BAASO SIRAATAA: “Ekkiyaagaappe immiyaagee anjjettidaagaa.”—OOS. 20:35.
Daroti haratuyyo loꞌꞌobaa oottiyoogee, giishin bantta wodiyaanne wolqqaa metootidaageeta maaddanau goꞌettiyoogee, daro anjjuwaa demmanaadaaninne bantta deꞌuwan kaseegaappe aaruwan ufayttanaadan oottidoogaa akeekidosona. Solomoni, “Neeyyo wolqqai de7ishin, metootidaagau lo77obaa oottiyoogaa aggoppa” yaagidi xaafiis.—Lee. 3:27.
Ralfa leemisuwaa beꞌa. I xurataa kiyi simmidi, ba keettaayeedan kumetta wodiyaa haggaaziyaagaa gidiis. Eti naaꞌꞌaykka asaa Geeshsha Maxaafaa tamaarissiyoogan aginan aginan daro saatiyau haggaazoosona. Ralfi hagaadan giis: “Nuuni omarssan soo simmiyo wode keehippe daafuroos; hegee nuuni cimido gishsha xallaassa gidennan, nuuyyo deꞌiya wolqqaa ubbaa goꞌettidi saluwan deꞌiya nu Aawau oottiyo gishshataassa. Hegee bessiya daafura!” Inne a keettayiyaa bantta xeelaa wottidoy hara asau immiyoogaana gidiyo gishshau, keehippe ufayttoosona.
GEESHSHA MAXAAFAA BAASO SIRAATAA: “Laggee mule wodekka siiqees; ishaikka metuwaa wode maaddanaassi yelettees.”—LEE. 17:17.
Metoy gakkiyo wode miyyiyan asi deꞌikko, darin metootokko. Inggilize biittaa asa gidida xaafee, Fransis Bekeni, tumu laggee baynna urau “alamee battaale bazzo mala” yaagidi xaafiis. Nuuni tumu laggeti deꞌiyoogeeta gidiyoogeenne haratuyyo loꞌꞌo lagge gidiyoogee, deꞌuwan gakkiya metuwaa genccanaadan, ubba deꞌoy ufayssiyaagaa gidanaadan oottana danddayees.
GEESHSHA MAXAAFAA BAASO SIRAATAA: “Bantta ayyaanan hiyyeesa gididoogaa eriyaageeti anjjettidaageeta.”—MAA. 5:3.
Yaatiyo gishshau, neeni Xoossay qaalaa gelidobay polettiyo wode deꞌanau koyikko, hegau keehippe koyettiyaabaa, giishin ‘ayyaanaaban’ koshshiyaabaa erananne hegaa kunttana bessiyoogaa Yesuusi qonccissiis. Mehiyaappe dumma gidida hanotan, nuuni meretan halchoy deꞌiyoonne ufayssiya deꞌuwaa deꞌanau koyoos. He koshshaa kunttana danddayiyay Xoossaa Yihoowa xalla; i hegaadan oottiyoy ba Qaalaa, Geeshsha Maxaafaa baggaara. Kasetiya huuphe yohuwan beꞌidoogaadan, Geeshsha Maxaafay, Xoossay saꞌau halchidobaa qonccissees. Nuuni ha saꞌan deꞌiyoy, qassi metoynne tuggay deꞌiyoy aybissakko, hegaadankka, Xoossay nuuppe koyiyoy aybakko qonccissees. Geeshsha Maxaafan qonccida ha tumaa eriyoogee, nuuni ufayssiya deꞌuwaa deꞌanau keehippe koshshiyaaba. Wodiyaa bazzidi Geeshsha Maxaafaa xannaꞌiyaageetinne hegaa wotti denttidi qoppiyaageeti keehippe ufayttoosona. Aybissi giikko, eti hegaadan oottiyoogan, nuna Medhida, “ufayttiya Xoossaa,” Yihoowaara mino dabbotaa medhoosona.—1 Xim. 1:11, NW.
GEESHSHA MAXAAFAA BAASO SIRAATAA: “Nena Medhdhidaagaa qoppa. Metiya gallassati yeennan de7ishin, neeni, ‘Tana hagee ufaissenna’ giyo wodeti gakkennan de7ishin.”—ERA. 12:1.
Deꞌuwan nuna guyyeppe gakkiya metuwaa akeekibeenna yelagata, Kawuwaa Solomoni zorido zoree nuna ubbaa goꞌꞌiyaaba. Ne deꞌuwan nena Medhidaagaa xoqqu ootta xeella. Hegee, ne deꞌoy tumu halchoy deꞌiyoogaa gidanaadan oottees. “Simmi moosinne uyoos; aissi giikko, nuuni wontto haiqqana” giyo qofaappe haakka. (1 Qor. 15:32) Eranchchaa 8:12y, neeni Xoossaa kaseyiyaaba gidikko, neeyyo “sa7ai lo77anaagaa” yootees.
Wenddo giyo naꞌiyaa hegee tuma gidiyoogaa akeekaasu. Yelagatettan deꞌaydda, Geeshsha Maxaafaa mishiraachuwaa yootiyaageeti keehippe koshshiyo, Doominkkan Ripubilike baanau qoppada, ba micheera Isppeene qaalaa tamaaraasu. A hagaadan gaasu: “Mishiraachuwaa yootiyaageeti keehippe koshshiyoosaa biidi haggaazanau darobaa aggidaba gidikkokka, nu deꞌuwan daro ufayttida. Taani he usuppun aginatun oottidobaara geeddarssana danddayiyo harabi baawa! Nuuni demmido anjjuwaara gatti xeelliyo wode, aggidobay keehi guutta.”
Xoossaayyo Ammanettiyoogee Deꞌuwaa Ufayssiyaagaa Oottees
Neeni Yihoowaara mino dabbotaa medhiyoogan, issi dumma gidida hanotaara gayttidaagankka, deꞌuwan keehi ufayttana danddayaasa. Ayba ogiyan? Seexaanay, Addaameenne Hewaana Xoossaa haaruwan makkalanaadan oottiyoogaa xalla gidennan, ooninne paacettikko Xoossaayyo ammanettidi deꞌana danddayennaagaakka yootiis. (Iyy. 1:9-11; 2:4) Neeni Seexaanay worddancha gidiyoogaa qonccissana danddayaasa! Waatada? Xoossaayyo ammanettada deꞌiyoogan, i kessido baaso siraataa minttada kaalliyoogaaninne nuussi loꞌꞌonne iita gididabaa kuuyiyo, Yihoowa gita maataa akeekidoogaa bessiyoogan hegaadan oottana danddayaasa.—Ajj. 4:11.
Nuuni suuretettan deꞌanau koyikko, gakkiya metuwaa gencciyoogaa koshshana danddayees. Hegaa mala metoy nuuni deꞌuwan ufayttennaadan oottanee? Issi morkkee nu siiqiyo laggiyaa woykko nu soo asaappe issi uraa sunttaa mooriiddi deꞌiyaabadan qoppa. Nuuni siiqiyo uraa sunttau exatiyoogee, he morkkee nu bolli amarida ogiyan metuwaa gattanaadan oottiyaaba gidikkokka, hegee nuuni deꞌuwan ufayttennaadan oottanee? Akkay! Ubba nuuni he uraa sunttau exatiyoogan gakkiya metuwaa ufayssan genccoos. Xoossau ammanettiyoogeekka hegaara issi mala. Ha wodiyan metiya hanotati deꞌishinkka au ammanettiyaageeta gidiyoogee Xoossaa ufayssees.—Lee. 27:11.
Merinau Ufayssiya Deꞌuwaa
Hegaa gishshau, Xoossaanne a halchuwaabaa eranau neeni danddayiyo ubbabaa ootta. Yesuus Kiristtoosi ba huuphe “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7o” yaagiis. (Yoh 17:3) Xoossay saꞌau halchidobaa poliyo wode, ammanettida asay, Yihooway etau koyro halchidobaa, giishshin gannate gidida saꞌan ‘merinaa deꞌuwaa’ demmana. He wode deꞌoy ufayssiyaagaa gidana.—Maz. 145:16.
Yaatin, Yesuusi yootido eraa awuppe demmana danddayay? Xoossaa ayyaanaa kaaletuwan xaafettida Geeshsha Maxaafaappe demmana danddayaasa. Hegaadan oottanau maaduwaa koyiyaaba gidikko, ha maxeetiyaa giigissiyaageetuyyo xaafanau guyye gooppa. Geeshsha Maxaafay tamaarissiyoobaa neeni akeekanau, issi uri maaddanaadan eti ufayssan hanotaa giigissana.