Ufayssiya Deꞌo Deꞌiyoogee Danddayettiyaabee?

HA XIQISEE yootiyoobay tuma. Ha alamiyan deꞌoy ‘metoynne tuggay’ kumidoogaa. Geella neeni, ‘Ha wodiyan ufayssiya deꞌo deꞌiyoogee danddayettiyaabee?’ gaada qoppennan aggakka.

Leemisuwau, Maariyo giyo maccaasee hanotaa qoppa. A kase mino oosancha; shin haꞌꞌi issi layttay 84, qassi a asi maaddennan sooppe kare kiyana danddayukku. A maara qoppiyaaba gidikkokka, i bollay hitiis. A hegaa mala deꞌoy ufayssiya deꞌo gaada qoppana danddayiyoy ayba ogiyaanee?

Neeni shin? Ne deꞌoy ufayssiya ufayssennaakko issi wode qoppennan aggakka. Ne oosoy daafurssiyaagaanne salettiyaagaa gidana danddayees. Neeni ay keena minnada oottiyaakko harati akeekennan aggana danddayoosona. Neeyyo issi issibay hirattikkokka, sinttanaabaa hirggennan aggakka. Qassi neeni issi issitoo boorasana woy unꞌꞌettana danddayaasa. Ne so asaa deꞌoy ooshshi daridoogaa gidana danddayees. Woy neeni siiqiyo uri hayqqido asa gidana danddayaasa. Anddira giyo bitanee ba aawaa keehippe siiqees; shin a aaway sahettidi qoppennan hayqqi bayiis. Anddiree hegan keehi kayyottido gishshau, ba azzanuwaappe mule minettana danddayennabadan qoppiis.

Nuna gakkiya metoy ayba gidikkonne, ufayssiya deꞌo deꞌiyoogee danddayettiyaabakkonne nuuni erana koshshees. Ha saꞌan 2,000 gidiya layttappe kase deꞌida, Yesuus Kiristtoosa deꞌuwaappe hegaa erana danddayoos. Yesuusi daro metoy gakkishinkka, ufayssiya deꞌo deꞌiis. A leemisuwaa kaallikko, nuunikka ufayssiya deꞌo deꞌana danddayoos.