“Woituwaa Ekkanau Woxxite”

“Woituwaa ekkanau woxxite.”—1 QOR. 9:24.

1, 2. (a) PHauloosi Ibraawe Kiristtaaneta minttettanau ay goꞌettidee? (b) Xoossaa ashkkarati ay oottanaadan zoree imettidee?

KIITETTIDA PHauloosi Ibraawe Kiristtaanetuyyo xaafido dabddaabbiyan, ba mala Kiristtaaneta minttettanau loꞌꞌo leemisuwaa goꞌettiis. Deꞌuwaa wottaa eti banttarkka woxxennaagaa eta akeekissiis. Bantta wottaa loꞌꞌo hanotan wurssida, maayida shaaraa mala ‘daro markkati’ eta yuushuwan deꞌoosona. Beni wode, deꞌuwaa wottaa woxxida asati ammanettiyaageeta gididi oottidobaanne baaxetido mino baaxiyaa akeekan qoppiyoogee, Ibraawe Kiristtaaneti bantta wottaa aggennan minnidi woxxanaadan minttettees.

² Hagaappe kase deꞌiya huuphe yohuwan, maayida shaaraa mala ‘markkatuppe’ amaridaageetu deꞌuwaabaa beꞌida. Eti ubbay wottaa wurssettaa gakkanaashin woxxiyo wode, Xoossaayyo ammanettidaageeta gidanaadan maaddida mino ammanuwaa bessidosona. Eti bantta wottaa polidoogaappe nuuni timirtte demmana danddayoos. He huuphe yohuwan qonccidaagaadan, PHauloosi nuna gujjin ba mala Kiristtaaneta hagaadan zoriis: “Nuuyyo hagaa keena daro asai, shaaraadan nu matan yuuyi aadhdhidi markkattiyaagee de7ishin, nuna xubbiya ubbabaanne baqqi oiqqiya nagaraa diggoos; diggidi nu sinttan de7iya nuuni woxxana wottaa genccidi woxxoos.”—Ibr. 12:1.

3. PHauloosi beni Giriiken woxxiyaageetubaa yootiyoogan zorido zoriyau waanna qofay aybee?

³ Koyro xeetu layttan meeze gidida issi wottaa xeelliyaagan, Bakgiraunds of Erli Kiristiyaniti giyo maxaafay, “Giriiketi meezetiyo wode gidin naasettiyo wode aybanne maayennaagaa” yootees.a Hegaa mala hanotan, woxxiyaageeti wottan azallanaadan oottana danddayiya ayba toohonne bantta bollappe wottoosona. Ha wodiyan hegaadan woxxiyoogee bessennaba milatana danddayees; gidikkokka, eti hegaadan woxxiyo waanna gaasoy woytuwaa demmanaassa. Deꞌuwaa wottan woytuwaa demmanau woxxanaadan PHauloosi yootidobay, wottanchati woxxennaadan banttana teqqiya aybanne diggana bessiyoogaa qonccissees. He wode deꞌiya Kiristtaanetuyyo gidin, ha wodiyan deꞌiya nuuyyo hegee bessiya zore. Deꞌuwaa wottan nuuni woytuwaa demmennaadan oottana danddayiya toohoy aybee?

‘Xubbiya Ubbabaa Diggoos’

4. Nohe wode deꞌida asay aybin xeelaa wottidee?

⁴ PHauloosi ‘xubbiya ubbabaa digganaadan’ zoriis. Hegee, nuuni deꞌuwaa wottan nu kumetta xeelaa wottennaadan, qassi keehippe baaxetennaadan oottana danddayiya ubbabaa gujjees. He xubbiyaabati ayba gidana danddayiyoonaa? PHauloosi yootido leemiso gidiya asatuppe issuwaa gidida Nohebaa qoppiyo wode, Yesuusi, “Ta yuussai, Asa Na7aa yuussai, Nohe wodiyan hanidoogaadan, hegaadankka hanana” yaagidoogaa hassayoos. (Luq. 17:26) Yesuusi waannayidi yootidoy qoppennan yaana bashshaabaa gidennan, deꞌuwan asay kaalliyo ogiyaabaa. (Maatiyoosa 24:37-39 nabbaba.) Nohe wode deꞌida daro asay Xoossaa ufayssiyaabaa oottiyoogee atto shin, a koyikkabeenna. Eta qofaa laalidabay aybee? Miyoogaa, uyiyoogaa, ekkiyoogaa mala, asay deꞌuwan oottiyo meeze gididabaa. Yesuusi yootidoogaadan, etau meto gididabay ‘akeekibeennaagaa.’

5. Nu wottaa wurssettay gakkanaashin woxxanau aybi maaddana danddayii?

⁵ Noheegaadaaninne a soo asaagaadan nuunikka ubbatoo oottiyo darobay deꞌees. Nuuni aqossi koshshiyaabaa demmanau oottidi, nuussinne nu soo asau koshshiyaabaa kunttana bessees. Hegee, nu wodiyaappe dariya baggaanne nu wolqqaa wurssana danddayees. Ubba qassi, ikkonoomiyan metoy gakkiyo wodiyan, deꞌuwau koshshiyaabaa xeelliyaagan unꞌꞌettiyoogee meeze gididaba. Nu huuphiyaa geppida Kiristtaane gidiyoogaadan, nuussi Xoossaa oosuwan keehippe koshshiya aawatettaykka deꞌees. Haggaazoos, Kiristtaane shiiqotuyyo giigettoos, qassi he shiiqotun beettoos; ayyaanaaban minnidi deꞌanau, buzo gidin so asaarakka Geeshsha Maxaafaa xannaꞌoos. Nohee Xoossaa oosuwan oottiyo darobay deꞌikkokka, “Xoossai azazidoogaadan oottiis.” (Doo. 6:22) Nuuni deꞌuwaa wottaa wurssettay gakkanaashin woxxanau, nu toohuwaa kaushshiyoogee, qassi koshshenna tooho aybanne gujjennaadan naagettiyoogee keehippe koshshees.

6, 7. Nuuni akeekana koshshiya, Yesuusi zorido zoree awugee?

⁶ PHauloosi ‘xubbiya ubbabaa diggoos’ giido wode woyganau koyidee? Nuuyyo deꞌiya aawatettaa ubbaa kumetta hanotan kiyana danddayennaagee tuma. Hegaa xeelliyaagan, Yesuusi yootido kaallidi deꞌiyaagaa hassayite: “‘Nuuni ai maanee? Woi ai uyanee? Woi ai maayanee?’ yaagidi hirggoppite. Aissi giikko, he ubbabaa Xoossaa ammanennaageeti darissidi koyoosona; he ubbai inttena koshshiyoogaa saluwan de7iya intte Aawai erees.” (Maa. 6:31, 32) Deꞌuwau koshshiya qumaanne maayuwaa malabatikka, bessiyaagaadan xeellana xayikko, deexo tooho gidana woy xubbana danddayiyoogaa Yesuusi yootidobay bessees.

⁷ Yesuusi, “He ubbai inttena koshshiyoogaa saluwan de7iya intte Aawai erees” yaagidoogaa hassayite. Hegee, Saluwan deꞌiya nu Aawaa Yihooway, nuuyyo koshshiyaabaa kunttiyoogaa bessees. “He ubbai” nuuni dosiyoobaappe woykko koyiyoobaappe dummatana danddayiyoogee qoncce. Gidikkokka, “Xoossaa ammanennaageeti darissidi [koyiyoobatussi]” nuuni hirggennaadan odettiis. Aybissi? Yesuusi i yootiyoobaa ezggiyaageetuyyo guyyeppe hagaadan giis: “Muussan, ushshan, mattooninne aqossi hirggiyooban intte wozanai balenna mala, qassi intte qoppennan he gallassai intte bolli yeennaadan, inttena naagite.”—Luq. 21:34, 35.

8. Ha wodee ‘xubbiya ubbabaa diggiyo’ wode gididoy aybissee?

⁸ Nuuni wottaa wurssanau matido wodiyan, nuna xubbana danddayiya, koshshenna toohuwaa darissidi, deexuwaa gujjiyoogee ayba azzanttiyaabee! Yaatiyo gishshau, kiitettida PHauloosi, “Taayyo de7iyaabai tau gidana giya ura Xoossaa milatiyoogee dureyees” yaagidoogee eratetta zore. (1 Xim. 6:6) Nuuni PHauloosa zoriyaa wozanan wottiyoogee, woytuwaa demmanaagaa keehippe ammanettanaadan maaddees.

“Baqqi Oiqqiya Nagaraa”

9, 10. (a) Nuna “baqqi oiqqiya nagaraa” giya qofaa birshshettay aybee? (b) Nuuni piriyan gelana danddayiyoy ayba ogiyaanee?

⁹ PHauloosi ‘xubbiya ubbabaa’ xalla gidennan, ‘nuna baqqi oyqqiya nagaraakka’ digganaadan yootiis. Hegee aybee? “Baqqi oiqqiya” geetettidi birshshettida Giriiketto qaalay, Geeshsha Maxaafan ha sohuwaa xallan deꞌees. Haymaanootiyaa eranchaa, Albert Barnizi, “Issi wottanchay, woxxiyo wode a gediyan xaaxettiyaanne i woxxennaadan diggiya maayuwaa maayennaagaadan, bana xubbiya ubbabaa aggi bayana koshshiyo Kiristtaaneekka hegaadan oottana bessees” yaagiis. Issi Kiristtaanee ba ammanoy shugganaadan oottiya piriyan gelana danddayiyoy ayba ogiyaanee?

¹⁰ Issi Kiristtaanee ammanuwaa issi kutti aggibayenna. Hegee wodiyaappe wodiyan, ubba erettennan hanana danddayees. PHauloosi ha dabddaabbiyau koyro heeran, ‘wora biyoogeenne’ ‘ammanenna iita wozanay’ gattiyo daafaabaa akeekissiis. (Ibr. 2:1; 3:12) Issi wottanchaa gediyan a maayoy xaaxettikko, i kunddiyoogee attenna. Yaatiyo gishshau, wottanchay bessenna maayuwaa maayidi woxxiyaaba gidikko, kunddanaagaa akeekana bessees. I gakkiya daafaa xaasayi xeellanaadan oottana danddayiyay aybee? SHeneho giyoogaa woykko banan keehippe ammanettiyoogaa woykko qofaa laaliya issi issibata. PHauloosa zoriyaappe nuuni ay timirtte demmana danddayiyoo?

11. Nuuni ammaniyoogaa agganaadan oottana danddayiyay aybee?

¹¹ Ammanuwaa aggiyoogee wodiyaappe wodiyan oottiyoobay kaalettiyooba gidiyoogaa nuuni hassayana bessees. Hara eranchay, ‘nuna baqqi oyqqiya nagaraabaa’ yootiis. I, nuuni deꞌiyo hanotay, nu laggetinne nu iita amoy nuna keehippe qohana danddayiyoogaa qonccissiis. He hanotay nu ammanoy shugganaadan ubba nuuni ammaniyoogaa agganaadan oottana danddayees.—Maa. 13:3-9.

12. Nuuni ammaniyoogaa aggenna mala, akeekana koshshiya zoree awugee?

¹² Ammanettida wozannaama ashkkaray, nuuni beꞌiyoonne siyiyoobaa, giishin nu wozanaanne nu qofaa a bolli wottiyoobaa xeelliyaagan nuuni naagettanaadan darotoo akeekissiis. Miishshaunne aquwaabau bichaariyoogee kaalettiyo daafaa xeelliyaagan nuussi zoree imettiis. Ha alamiyan deꞌiya, wodiyaa aattiyoobaa nuuni siiqiyaaba woykko ooratta kiyiya ubbabay nuussi deꞌanaadan koyiyaaba gidikko, hegee nu wodiyaa wurssin, keehippe koshshiyaabau wode xayana danddayoos. Ha zoree loꞌꞌobaa diggiyaabadan woykko he daafay nuna qohennabadan qoppidi, hegee haratu xallaassi bessiyaabadan xeelliyoogee gita bala. Nuuni xubettanaadan, Seexaanaa alamee qoncce gidenna balettiyaabatanne cimmiyaabata goꞌettees. SHeneho giyoogee, ba huuphen keehippe ammanettiyoogeenne qofay laalettiyoogee xubbiyaabatuppe amaridaageeta; qassi hegaa malabati, nuuni deꞌuwaa woytuwaa demmennaadan oottana danddayoosona.—1 Yoh. 2:15-17.

13. Qohiya sugettaappe waanidi naagettana danddayiyoo?

¹³ Ha alamiyaa halchuwaa, qofaanne alamee xoqqu oottidi xeelliyoobaa kaallanaadan denttettiya asaara galla galla gayttoos. (Efisoona 2:1, 2 nabbaba.) Gidikkokka, hegee nuna qohiyo hanotay, daro baggi nuuni ekkiyo tangguwaara gayttidaba. PHauloosi yootido ‘carkkoy’ woriyaagaa. He carkkoy nuna shemppuwaa teqqidi, wottaa wurssennaadan diggenna mala ubbatoo naagettana bessees. Nuuni deꞌuwaa wottaa aggennaadan maaddiyay aybee? Yesuusa leemisuwaa. I bali baynna wottancha; a leemisuwaa kaallana danddayoos. (Ibr. 12:2) PHauloosa leemisuwaakka kaallana danddayoos; ayssi giikko, i deꞌuwaa wottaa woxxiyaageetuppe issuwaa gidiyoogaa yootiis; qassi ba mala Kiristtaaneti ba leemisuwaa kaallanaadan zoriis.—1 Qor. 11:1; Pil. 3:14.

‘Intte Woytuwaa Ekkana’ Danddayiyoy Ayba Ogiyaanee?

14. PHauloosi ba wottaa woxxiyoogaa waati xeellidee?

¹⁴ Kiitettida PHauloosi ba wottaa woxxiyoogaa waatidi xeellidee? I Efisoona gubaaꞌiyaa cimatuyyo haasayido, wurssetta haasayan, “Ta wottaa polanaunne Godaa Yesuus Kiristtoosappe taani ekkido oosuwaa Xoossaa aaro kehatettaa wonggeliyaa mishiraachchuwaa markkattiyoogaa polanau, ta shemppuwaa pattennabaadan qoodais” yaagiis. (Oos. 20:24) I ba wottaa wurssanau, ba shemppuwaa gujjin, ubbabaa yeggi bayanau koyiis. PHauloosi ba wottaa wurssana xayikko, mishiraachuwaa sabbakkiyoogaara gayttidaagan i baaxetiyoonne minnidi oottiyo ubbabay hada giidi qoppiis. Gidikkokka, i xooniyoogee attennabadan qoppidi, banan ammanettibeenna. (Piliphphisiyuusa 3:12, 13 nabbaba.) I, “Taani lo77o baaxiyaa baaxetaas; ta wottaanne woxxada wurssaas; ammanuwaakka naagaas” gaana danddayidoy, ba deꞌuwaa wurssettaa heeraana.—2 Xim. 4:7.

15. PHauloosi wottaa woxxiya ba mala Kiristtaaneta woygidi minttettidee?

¹⁵ Hegaa bollikka, PHauloosi ba mala Kiristtaaneti ogiyan attennan wottaa wurssin beꞌanau wozanappe koyiis. Leemisuwau, i Piliphisiyuusan deꞌiya Kiristtaaneti bantta atotettau minnidi oottanaadan zoriis. Eti “deꞌuwaa qaalaa minttidi” oyqqana koshshiis. I gujjidikka, “He wode ta daafurainne ta oosoi mela xayibeennaagee erettiyo gishshau, Kiristtoosa gallassi taani inttenan gitatana” yaagiis. (Pili. 2:16, NW) Hegaadankka, i Qoronttoosan deꞌiya Kiristtaaneta, “Inttekka woituwaa ekkanau woxxite” yaagidi zoriis.—1 Qor. 9:24.

16. Nuuni woytoy qoncci beettiyoogeeta gidana koshshiyoy aybissee?

¹⁶ Maaraatone wottaa mala adussa wottan, wottaa wurssiyo sohoy koyro beettenna. Gidikkokka, wottanchay woxxiyo wode ubban wurssiyo sohuwan ba xeelaa wottees. I wurssiyo sohuwau mati mati biyoogaa eriyo wode, he sohoy qoncci qoncci bees. Deꞌuwaa wottankka hanotay hegaara issi mala gidana koshshees. Nu woytoy nuuyyo qoncci beettana koshshees. Hegee nuuni woytuwaa demmanaadan maaddees.

17. Ammanoy woytuwan xeelaa wottiyoogaara gayttidaba gidiyoy ayba ogiyaanee?

¹⁷ PHauloosi, “Ammano giyoogee, demmana giidi ufaissan naagi uttidobai ammanttiyoogaanne be7anau danddayennabaa erissiyaagaa” yaagidi xaafiis. (Ibr. 11:1) Abrahaameenne Saara bantta dosan injje duussaa aggidi, “sa7an imattanne yedetettidi kiyida asata [gididi]” deꞌidosona. Hegaadan oottanau eta aybi maaddidee? Eti ‘Xoossay qaalaa gelidobay polettanaagaa haahuwan beꞌidosona.’ Muusee ‘nagaran guutta wodiyaa ufayttiyoogaanne’ “Gibxxe biittaa miishsha [ubbaa]” koyibeenna. I hegaadan oottanau ammanuwaanne minotettaa waatidi demmidee? “Wodeppe demmana woituwaa i tishshi oottidi [xeelliis].” (Ibr. 11:8-13, 24-26) PHauloosi he asatubaa huuphiyan huuphiyan yootido wode, hegaa eti oottidoy “ammanuwaana” giidoogee bessiyaaba. Ammanoy eti banttana gakkiiddi deꞌiya paaciyaaninne metuwan gidennan, eta gishshau Xoossay oottiiddi deꞌiyoobaaninne oottanaban xeelaa wottanaadan maaddiis.

18. Nuna “baqqi oiqqiya nagaraa” digganau nuuni ekkana danddayiyo tanggoti awugeetee?

¹⁸ Ibraawe shemppo 11n etabay odettido ammanettida asatubaa wotti denttidi qoppiyoogaaninne eta leemisuwaa kaalliyoogan, ammanuwaa minttananne nuna “baqqi oiqqiya nagaraa” diggana danddayoos. (Ibr. 12:1) Qassi, hegaa mala ammanoy deꞌiyoogeetuura issippe shiiqiyoogan, ‘issoy issuwaara siiqettanaunne loꞌꞌo oosuwaa oottanau issoy issuwau qoppana’ danddayoos.—Ibr. 10:24.

19. Woytuwan xeelaa wottiyoogaa xeelliyaagan neeyyo aybi siyettii?

¹⁹ Nu wottaa wurssanau matida. He hanotay wottaa wurssiyo sohuwaa beꞌana danddayiyooba mala. Nuunikka, ammanuwaaninne Yihoowa maaduwan, “nuna xubbiya ubbabaanne baqqi oiqqiya nagaraa” diggana danddayoos. Ee, nuuni woytuwaa demmanau, giishin saluwan deꞌiya nu Aawaa, Xoossaa Yihooway qaalaa gelido anjjuwaa demmanau aggennan woxxana danddayeettees.

[Tohossa qofaa]

Hassayay?

• ‘Xubbiya ubbabaa’ diggiyoogee ay ay gujjii?

• Issi Kiristtaanee ammaniyoogaa agganaadan oottana danddayiyaabay aybee?

• Nu xeelaa woytuwan wottana bessiyoy aybissee?

[Sinttaa 26n deꞌiya misiliyaa qonccissuwaa]

‘Nuna baqqi oyqqiya nagaray’ aybee, qassi hegee nuussi pire gidana danddayiyoy ayba ogiyaanee?