Yihoowa Siiqiyaageeta ‘Aybinne Xubbenna’

1. Nuuni hidootaa qanxxenna mala murttidoogaa issi wottanchee leemisoy waati qonccissana danddayii?

MEERI DEKERA naatettaappe doommada alamiyan erettida gooba wottancha. A 1984n, Olimpikiyan 3,000-meetiriyaa wottan xoonada worqqa madaaliyaa ekkana giidi daro asay qoppiis. Gidikkokka, a wurssettaa gakkanaashin woxxabeykku. A hara wottanchee gediyan xubettada gufannada kunddaasu. A deshettada yeekkishin, woxxiyoosaappe asay tookkidi efiis. SHin, Meera woxxiyoogaa aggabeykku. A issi laytta gakkennan, 1985n, hegaappe kase woxxida ay maccaasappenne eesuwan issi kilo meetirenne bagga gidiyaagaa woxxada wurssaasu.

2. Kiristtaaneti woxxiyoy ay mala wottee, qassi nuuni he wottaa ayba ogiyan woxxana koshshii?

² Nuuni Kiristtaane gidiyoogaadan, nu deꞌoy merinaa deꞌuwaa demmanau woxxiyoogaa mala. Nuna keehi qofissiyay woxxidi xooniyoogaa gidana bessees. Nu wottay xoonanau keehi eesotana koshshiyo qantta wottaa mala gidenna. Woy qassi shemppi shemppi ekkidi loddan woxxiyo wottaa malakka gidenna. SHin, nu wottay xoonanau genccana koshshiyo Maaraatone wottaa mala. Kiitettida PHauloosi, ispporttiyaa annaaciyan keehi erettiya katamaa Qoronttoosan deꞌiya Kiristtaanetuyyo xaafido dabddaabbiyan, naasiyan woxxiya wottanchaa leemisodan goꞌettiis. I, “Wottaa naasiyan woxxiya ubbai woxxees. SHin issuwaa xalaalai woituwaa ekkiyoogaa erekketiiyye? Hegaadan inttekka woituwaa ekkanau woxxite” yaagiis.—1 Qor. 9:24.

3. Merinaa deꞌuwaa demmanau woxxiya ubbay woytuwaa demmana danddayiyoy ayba ogiyaanee?

³ Geeshsha Maxaafay nuuni ha leemiso wottaa woxxanaadan yootees. (1 Qoronttoosa 9:25-27 nabbaba.) He wottaa woxxiyaageetu woytoy tiyettida Kiristtaanetussi saluwan, qassi haratussi saꞌan merinaa deꞌuwaa demmiyoogaa. Naasettiyo daro ispporttiyaappe dummatiya ogiyan, he wottaa gencci woxxidi wurssiya ubbay woytuwaa demmees. (Maa. 24:13) Woxxiyaageeti he woytuwaa demmennan attiyoy, wottaa wurssennan aggiyo, woy wottaa wogaa naagidi woxxennan aggiyo wode xallaana. Hegaa bollikka, merinaa deꞌuwaa woytuwaa demissiya wottay hagaa xalla.

4. Merinaa deꞌuwaa demmanau woxxiyo wottay nuna metanaadan oottiyaabay aybee?

⁴ He wottaa woxxidi wurssiyoogee metennaba gidenna. Hegau nu huuphiyaa naagana bessees; qassi nu halchuwaakka sirana bessenna. Issitoonne xubettennan woxxidi wurssiday Yesuus Kiristtoosa xalaala. SHin, i erissiyo ashkkaray Yaaqoobi Kiristtoosa kaalliya ‘ubbay daroban baliyoogaa’ yootiis. (Yaaq. 3:2) Hegee tuma. Nuuni woy harati polo gidennaagaappe denddidaagan, nuuni ubbay qohettana danddayoos. Yaatiyo gishshau, woxxiiddi issi issitoo xubettidi ganddigaarananne leddi gaana danddayoos. Woy ubba kunddana danddayoos; shin denddidi woxxoos. Issoti issoti kunddidi keehi qohettido gishshau, denddidi zaaretti woxxana mala eta harati maaddidosona. Hegaa gishshau, nuuni issitoo, ubba qassi darotoo xubettana woy kunddana danddayoos.—1 Kaw. 8:46.

XUBETTIKKOKKA WOXXIYOOGAA AGGOPPA

5, 6. (a) Issi Kiristtaaniyaa ‘aybinne xubbana danddayennay’ ayba ogiyaanee, qassi i denddanaadan aybi maaddii? (b) Issoti issoti xubettidi denddennay aybissee?

⁵ Ayyaanaaban issi hanotaa qonccissanau “xubettiyoogaa” giya qaalaakka “kunddiyoogaa” giya qaalaakka goꞌettennan aggakka. Geeshsha Maxaafan deꞌiya he qaalatussi ubbatoo gidana xayikkonne, birshshettay issi mala gidana danddayees. Leemisuwau, Leemiso 24:16n deꞌiya qofaa akeeka. He xiqisee, “Xillo asi laapputoo kunddikkokka denddees; shin iitati [xubettidi] metuwan xayana” yaagees.

⁶ Yihoowan ammanettiyaageeti xubettana, woy qassi moorobaa oottidi woykko metuwan kunddana danddayikkokka, eti denddana danddayenna hanotan hegee gakkanaadan Yihooway paqqadenna. Yihooway nuuni ‘denddidi,’ ubbatoo ayyo wozanappe aqana mala maaddanaagaa ammanettoos. Hegee Yihoowa wozanappe siiqiya ubbaa keehi minttettiyaaba! Iitati denddanau hegaadan koyokkona. He asati Xoossaa geeshsha ayyaanaynne a asay banttana maaddana mala koyokkona. SHin, Yihoowa ‘higgiyaa siiqiyaageeti’ deꞌuwau woxxiyo wottaa muleera agganaadan oottana danddayiya xubee baawa.—Mazamure 119:165 nabbaba.

7, 8. Issi uri ‘kunddidikka’ Xoossan nashettana danddayiyoy ayba ogiyaanee?

⁷ Issi issitoo asay nagaraa oottiyoy daafurancha gidiyo gishshataassa. Issi uri zaaretti zaarettidi issi nagaraa oottanau danddayees. SHin, i kunddidosaappe ubbatoo ‘denddikko,’ giishin ba nagaraappe wozanappe simmidi suurebaa oottanau baaxetikko, Yihooway a xillo asadan xeellees. Xoossay beni wode Israaꞌeelata oyqqido ogiyaappe hegaa akeekana danddayoos. (Isi. 41:9, 10) Qommoora beꞌido Leemiso 24:16y mintti yootiyoy nuuni mooriyoogaa gidennan, Yihooway maaddin nuuni denddiyoogaa. (Isiyaasa 55:7 nabbaba.) Xoossaa Yihoowaynne Yesuus Kiristtoosi nuuni kunddikkonne ‘denddanaagaa’ ammanettiyo gishshau, nuna kehatettan maaddoosona.—Maz. 86:5; Yoh. 5:19.

⁸ Maaraatone wottaa woxxiya uri xubettidi woy kunddidikka eesuwan denddikko, wodee wuriichennan woxxidi wurssana danddayees. Nuuni merinaa deꞌuwaa demmanau woxxiyo wottay wurana ‘gallassaynne saatee’ awudekko erokko. (Maa. 24:36) SHin, nuuni xubettenna mala baaxetikko, aggennan woxxananne woxxidi wurssana danddayoos. Yaatin, nuuni xubettennan aggana danddayiyoy ayba ogiyaanee?

SINTTAU BEENNAADAN DIGGIYA XUBIYAA

9. Nuuni tobbana ichashubati aybee?

⁹ Kaallidi deꞌiya ichashubati, giishin nuuni daafurancha gidiyoogee, ashuwaa amoy, gubaaꞌiyan deꞌiyaageeti naaqqiyoogee, waayee woy yedetaynne harati polo asa gidennaagee nuna waati xubbana danddayiyaakko ane beꞌoos. Nuuni xubettikko, Yihooway keehi danddayancha gidiyoogaanne nu hanotan i sohuwaara hidootaa qanxxennaagaa hassaya.

10, 11. Daawiti daafurancha gidiyoogaa bessiyaabaa ay oottidee?

¹⁰ Nuuni daafurancha gidiyoogaa woxxiyo ogiyan deꞌiya qelꞌꞌiqelꞌꞌiya shuchaara geeddarssana danddayoos. Kawuwaa Daawitanne kiitettida PHeexiroosa deꞌuwan hanidabaa qoppiyoogan, nuuni daafurancha gidiyoogaa bessiya naaꞌꞌubaa akeekana danddayoos; hegeetikka ba huuphiyaa naagennaagaanne asau yayyiyoogaa.

¹¹ Kawuwaa Daawiti issi issitoo ba huuphiyaa naagibeenna. Hegaappe denddidaagan, i Berssaabiira shaaramuxiis. Daawiti bana Naabaali cayido wode, eesuwan haluwaa kiyiichidi attiis. Ee, i ba huuphiyaa naagibeenna; shin Yihoowa ufayssanau baaxetiyoogaa mule aggibeenna. Harati maaddin, i zaarettidi ayyaanaaban tishsha gidiis.—1 Sam. 25:5-13, 32, 33; 2 Sam. 12:1-13.

12. PHeexiroosi xubettikkokka, wottaa aggennan woxxidoy ayba ogiyaanee?

¹² PHeexiroosi asau yayyidi issi issitoo keehi xubettiis; shin i Yesuusaunne Yihoowau ammanettidi deꞌiis. Leemisuwau, i ba Godaa issitoo xalla gidennan, heezzutoo kaddiis. (Luq. 22:54-62) Guyyeppe, PHeexiroosi Ayhuda gidenna Kiristtaaneta qaxxarettida, Ayhuda Kiristtaanetuugaadan oyqqennan aggiyoogan Kiristtaanetussi bessennabaa oottiis. SHin, hegaa xeelliyaagan kiitettida PHauloosa qofay suure; gubaaꞌiyan asa asappe shaakkana bessenna. PHeexiroosa qofay bala. PHeexiroosi oottidoban ishantti qohettennan deꞌishin, PHauloosi a qoncciyan zoriis. (Gal. 2:11-14) Yaatin, PHeexiroosi otorettidi merinaa deꞌuwaa demmanau woxxiyoogaa aggidee? CHii. PHauloosi zoridobaa i loytti qoppiis, he zoriyaa oosuwan peeshshiis, qassi deꞌuwaa wottaa aggennan woxxiis.

13. Sahoy nuuni xubettanaadan oottana danddayiyoy aybissee?

¹³ Issi issitoo sahoy nuna keehi metana danddayees. Hegee nuuni ayyaanaaban leddan woxxanaadaaninne ubba woxxiyoogaa agganaadan oottana danddayees. Leemisuwau, Jaappaane biittan deꞌiya issi michiyaa xammaqettoosappe 17 layttay aadhi simmin, keehi sahettaasu. A ba payyatettaabaa keehi qoppiyoogaappe denddidaagan, ayyaanaaban shuggaasu. Guyyeppe, a Kawotettaabaa aassiyoogaanne shiiquwan uttiyoogaa aggaasu. Naaꞌꞌu cimati o oychin, eti kehatettan yootidoban a minettada zaarettada shiiquwaa biyoogaa doommaasu. A zaarettada shiiquwaa biido wode, ishantti o siiqiyoogaa bessiya ogiyan sarotido gishshau yeekkaasu. Nu michiyaa haꞌꞌi deꞌuwaa wottaa woxxaydda deꞌawusu.

14, 15. Nuuni iitabaa amottiyo wode danddayettida ubban ay oottana koshshii? Leemisuwan yoota.

¹⁴ Ashuwaa amuwan daroti xubettidosona. Hegaadan paacettiyo wode, qofan, kandduwaaninne ayyaanaaban geeshsha gidanau nuuni danddayiyo ubbabaa oottana koshshees. Nu ayfiyaa woy nu kushiyaa gidin, nuna xubbana danddayiya aybanne leemiso hanotan ‘oli bayanaadan’ Yesuusi zoridoogaa hassaya. Nuuni deꞌuwau woxxiyoogaa agganaadan oottana danddayiya shori baynnabaa qoppananne oottana bessenna.—Maatiyoosa 5:29, 30 nabbaba.

¹⁵ Kiristtaane keettan diccida issi ishay, attuma asaara asho gaytotettaa polanau amottiyoogaa agganau keehi daro wodiyau baaxetidoogaa xaafiis. I ubbatoo haratuppe dummatiyaabadan qoppiyoogaanne haratuura gayttiyo wode ufayttennaagaa yootiis. Au layttay 20 gidiyo wode, kumetta wode aqinye, qassi gubaaꞌiyau oottiyaagaa gidiis. Hegaappe simmin, i keehi xubettin gubaaꞌe cimati Geeshsha Maxaafaappe ayyo seeraa yootidosonanne a maaddidosona. Woossiyoogan, Xoossaa Qaalaa xannaꞌiyoogaaninne harata maaddiyoogan i kunddidosaappe loddan denddidi, ayyaanaaban kaseegaadan oottiyoogaa doommiis. Daro layttappe guyyiyan i hagaadan giis: “Hanno gakkanau he iita amuwaa issi issitoo amottays; shin hegee tana xoonanaadan paqqadikke. Yihooway issi uri danddayiyoogaappe aadhiya paacee a gakkana mala paqqadennaagaa akeekaas. Hegaa gishshau, Xoossay qoppiyoy taani he paaciyaa xoonana danddayiyoogaa gidiyoogaa ammanays.” He ishay wurssettan hagaadan giis: “Taani he ubba baaxiyan genccidoogee ooratta alamiyan woytuwaa demissana. Taani hegaa keehi koyays! He wode gakkanaassi, taani baaxetiyoogaa aggikke.” I ubbatoo woxxanau murttiis.

16, 17. (a) Naaqettidabadan qoppida issi ishaa maaddiday aybee? (b) Xubettenna mala, nuuni ay hassayana bessii?

¹⁶ Gubaaꞌiyan deꞌiyaageeti naaqqiyoogee xubbiyaaba gidana danddayees. Paransaaye biittan deꞌiya, kase gubaaꞌe cima gididi oottida ishay naaqettidabadan qoppidi keehi yiillotiis. Hegaa gaasuwan, gubaaꞌiyaa biyoogaanne haggaaziyoogaa aggi bayiis. Naaꞌꞌu cimati a oychanau biidi, i haniis giidi qoppiyoobaa yootiyo wode kehatettan ezggidosona. Eti i ba toohuwaa Yihoowan wottanaadan minttettidosona; qassi keehippe koshshiyaabay Xoossaa ufayssiyoogaa gidiyoogaa mintti yootidosona. I eta zoriyaa siyidi, takkennan deꞌuwaa wottaa zaarettidi woxxiyoogaanne gubaaꞌiyan minnidi oottiyoogaa doommiis.

¹⁷ Nuuni ubbay Xoossay gubaaꞌiyau Huuphe oottidi sunttidoy Yesuus Kiristtoosa gidiyoogaa hassayana koshshees; qassi polo gidenna asaa naati oottiyoobaa qoppiyoogan sheekkana bessenna. A ayfee “tama laco” milatiyo Yesuusi ubbabaa geeshshidi beꞌiyo gishshau, nuuni beꞌana danddayenna darobaa beꞌees. (Ajj. 1:13-16) Leemisuwau, nuuyyo naaqo milatiyaabay nuuni akeekibeennaba woy bala ogiyan qoppidoba gidana danddayiyoogaa i erees. Yesuusi gubaaꞌiyan merettiya metuwaa bessiya wodiyan, qassi suure ogiyan giigissana. Hegaa gishshau, issi Kiristtaanee oottiyoobay nuuyyo xube gidana mala paqqadana koshshenna.

18. Paaciyan woy metuwan waati genccana danddayiyoo?

¹⁸ Xube gidiya hara naaꞌꞌubati deꞌoosona; issoy waayiyaa woy yedetaa, haray qassi harati polo asa gidennaagaa. Yesuusi zerettaa zeriyaagaabaa yootido leemisuwan, qaalaa gaasuwan gakkiya “waayee woi yedetai” issotu issotuyyo xube gidanaagaa odiis. Yedettiyay so asaa, shoorota woy sunttata gidin, hegee “aani xaphoi” baynna, ayyaanaaban kaymibeenna ura qohana danddayees. (Maa. 13:21) Gidoppe attin, nu wozanay ubbatoo suure gidikko, Kawotettaa zerettay nuuni ammanuwaa xaphuwaa axxaa gattanau yeddanaadan maaddees. Yaatiyo gishshau, metoy gakkiyo wode “galatissiyaabaa” wotta denttada qoppa. (Piliphphisiyuusa 4:6-9 nabbaba.) Yihooway immiyo wolqqan, metiyaabay nuna xubbana mala paqqadennan aggiyoogan paaciyan genccoos.

19. Hara uri nuna lanccissiyaabaa oottikko, nuuni xubettennaadan ay oottana danddayiyoo?

¹⁹ Harati polo gidennaagaa gaasuwan issoti issoti woxxiyoogaa aggidoogee azzanttiyaaba. Issi uri ba kahan kuuyiyoobaa xeelliyaagan dumma dumma qofay deꞌiyoogee etau xube gidiis. (1 Qor. 8:12, 13) Issi uri nuuni lanccanaadan oottikko, hegan keehi yiillotiyoo? Geeshsha Maxaafay nuuni harati nuna naaqqidabadan qoppiyo wodekka, eta bolli pirddiyoogaa agganaadaaninne etassi atto gaanaadan zorees. (Luq. 6:37) Xubbana danddayiyaabay gakkiyo wode, nena hagaadan gaada oycha: ‘Tau malatidaagaadan haratu bolli coo pirddiyaanaa? Ta ishantti polo gidennaagaa eraydda, issi uri polo gidenna gishshau oottiyoobaa gaasuwan deꞌuwaa wottaa woxxiyoogaa aggiyaanaa?’ Harati oottiyo aybiininne xubettidi wottaa wurssennan aggennaadan murttanau, Yihoowa siiqiyoogee nuna maaddees.

GENCCADA WOXXA—XUBBIYAABAA DIGGA

20, 21. Merinaa deꞌuwaa wottan ay oottanau murttadii?

²⁰ Ne ‘wottaa woxxada wurssanau’ murttadii? (2 Xim. 4:7, 8) Yaatikko, Geeshsha Maxaafaanne nu xuufeta xannaꞌanne pilgga, qassi nena xubbana danddayiyaabaa shaakka eranau wotta denttada qoppa. Ayyaanaaban neeni koshshiyaagaa keenaa minnanaadan geeshsha ayyaanaa demmanau Yihoowakko woossa. Issi uri issi issitoo xubettiyo woy kunddiyo gishsha xallau deꞌuwau woxxiyo wottaa wurssennan aggennaagaa hassaya. I denddidi woxxana danddayees. I ubba kaseegaappe loytti woxxanau ba balaappe tamaarana danddayees.

²¹ Nuuni merinaa deꞌuwaa woytuwaa demmanau koyikko, wottaa wurssettaa gakkanaashin woxxana koshshiyoogaa Geeshsha Maxaafay yootees. Nuuni woxxiyo wode, Yihooway nuussi ‘kumetta sarotettaa’ immana. (Maz. 119:165) I wottaa wurssiyaageeta ha wodiyan muletoo anjjanaagaanne sinttappe etassi wurenna anjjuwaa immanaagaa ammanettoos.—Yaaq. 1:12.