Intte Goꞌꞌiyaaban Allaxxeetii?
“Godaa ufaissiyaabai aibakko tamaarite.”—EFI. 5:10.
1, 2. (a) Yihooway nuuni deꞌuwan ufayttanaadan koyiyoogaa Xoossaa Qaalay waatidi qonccissii? (b) Allaxxiyoogaa ‘Xoossaappe imettida imotadan’ xeelliyoogee nuuni ay oottanaadan denttettii?
YIHOOWAY nuuni deꞌanaadan xalla gidennan, deꞌuwan ufayttanaadankka koyiyoogaa Geeshsha Maxaafay loytti qonccissees. Leemisuwau, Mazamure 104: 14, 15y, Yihooway “biittaappe kattaa, asaa wozanaa ufaissiya woiniyaa, som77uwaa shicissiya zaitiyaanne wolqqaa kunttiya qumaa” mokissiyoogaa yootees. Yihooway nuuni zerobay woy tokkobay diccidi nu deꞌuwau koshshiya ayfiyaa, zaytiyaanne woyniyaa immanaadan oottees. SHin woynee ‘wozanaakka ufayssees.’ Woynee nu deꞌuwau koshshiyaaba gidiyoogaa xalla gidennan, nuuni ufayttanaadankka oottees. (Era. 9:7; 10:19) Ee, Yihooway nuuni ‘ufayttanaadan’ koyees.—Oos. 14:16, 17.
2 Yaatiyo gishshau, nuuni “paalliya kafota,” qassi ‘dembban deꞌiya ciishshata’ xeellanau, woykko nuna ufayssiyaanne gazddissiya hara oosuwaa oottanau issi issitoo wodiyaa bazziyoogee bala gidenna. (Maa. 6:26, 28; Maz. 8:3, 4) Ufayssiya deꞌoy “Xoossaappe imettida imota.” (Era. 3:12, 13) Allaxxiyo wodiyaa he imotaappe issuwaadan xeelliyoogee, nuuni he imotaa Immidaagaa ufayssiya ogiyan goꞌettanaadan denttettees.a
Allaxxiyo Dumma Dummabatanne Hegau Zawaa Wottiyoogaa
3. Allaxxanau dumma dummabaa dooriyoogee bessiyaaba gididoy aybissee?
3 Allaxxiyoobaa bessiyaagaadan xeelliyaageeti dumma dummabatun allaxxana danddayikkokka, hegau zawaa wottana koshshiyoogaa eroosona. Hegaadan oottiyoy aybissee? Ha oyshaa zaaranau, allaxxiyoobaa qumaara ane geeddarssoos. Asay dosiyo qumay biittaappe biittan dumma dumma. Issi heeran deꞌiya asay dosiyo qumaa hara heeran deꞌiya asay dosennan aggana danddayees. Hegaara issi mala hanotan, issi biittan deꞌiya Kiristtaaneti ufayssiyaabaadan xeelliyo allaxxiyoobay hara biittan deꞌiya Kiristtaaneta ufayssennan aggana danddayees. Issi biittan deꞌiya Kiristtaanetuppekka, issoy ufayssiyaabadan xeelliyoobaa (geella loꞌꞌo maxaafaa nabbabiyoogaa) haray salettiyaabadan xeellana danddayees; issoy gazddissiyaabadan xeelliyoobaa (geella bishkkilitiyaa toggi biidi issi heeraa beꞌiyoogaa) haray xalalissiyaabadan xeellana danddayees. SHin, qumaanne allaxxiyoobaa malaban asay dooriyooban dummatettay deꞌiyoogaa akeekoos.—Roo. 14:2-4.
4. Nuuni allaxxanau dooriyooban zawaa wottana koshshiyoy aybissee? Leemisuwan qonccissa.
4 Gidikkokka, allaxxanau dumma dummabaa doorana danddayiyoogee, nuuni koyiyo ubbabaa oottoos giyoogaa gidennaagaakka akeekoos. Hegaa leemisuwan qonccissanau, zaarettidikka qumaa leemisuwaa qoppite. Nuuni dumma dumma qumaa maanau doorana danddayikkokka, moorettida qumaa eriiddi mookko. Hegaa mala qumaa miyoogee nu payyatettaa qohana danddayees. Hegaadankka, nuuni loꞌꞌo gidida dumma dummabatun allaxxana danddayiyaaba gidikkokka, daafan yeggana danddayiyaaban, danoban woy kandduwaa mooriyaaban wodiyaa aattanau koyokko. Hegaa malabaa oottiyoogee Geeshsha Maxaafaa baaso siraataara moggennaba; qassi nuna asatettaaninne ayyaanaaban qohiyaaba. Nuuni bessiya zawaa kanttennaagaa eranau, nuna ufayssiya issi issi allaxxiyoobati goꞌꞌiyaakko goꞌꞌennaakko kasetidi shaakki erana koshshees. (Efi. 5:10) Hegaadan oottana danddayiyoy ayba ogiyaanee?
5. Nuuni allaxxiyoobay Xoossay kessido maaraara moggiyaakkonne waatidi shaakki erana danddayiyoo?
5 Allaxxiyoobay nuna maaddiyaagaanne Yihoowa ufayssiyaagaa gidanaadan, Xoossaa Qaalan deꞌiya maaraara moggiyaagaa gidana koshshees. (Maz. 86:11) Allaxxanau intte dosiyoobaa xeelliyaagan hanotay hegaa malakkonne shaakki eranau, kaalli xeellanau maaddiyaabaa xaafi wottana danddayeeta. Hegee aybaa, awude, qassi oona giya qaalatun qonccissana danddayiyo, heezzu oyshata oyqqiis. Ane hegeeta huuphiyan huuphiyan beꞌoos.
Hegee Aybaa Gujjii?
6. Nuuni haakkana koshshiya allaxxiyoobay awugee, aybissi?
6 Issiban allaxxanaappe kase, inttena oychana koshshiya koyro oyshay, aybee?—giishin, ‘Tana ufayssiya, wodiyaa aattiyooban aybi aybi deꞌii?’ yaagiyaagaa. Ha oyshaa zaaruwaa koyiyo wode, allaxxiyo naaꞌꞌu qommobay deꞌiyoogaa intte hassayiyoogee goꞌꞌees. Koyroogee nuuni koyennaba; naaꞌꞌanttoogee koyana danddayiyooba. Koyroogee aybee? Ha iita alamiyan allaxxiyo darobay Geeshsha Maxaafaa baaso siraataa kanttiyoogaa woykko Xoossaa higgiyaa menttiyoogaa bessiya oosuwaa gujjees. (1 Yoh. 5:19) Tumu Kiristtaaneti hegaa mala allaxxiyoobaa ubbaa koyokkona. Hegee, asa qohiyoogan ufayttiyoogaa, iita ayyaana oosuwaa, issi mala mattumay deꞌiyoogeeti asho gaytotettaa poliyoogaa, pornograafiyaa, woykko makkalaa, woykko hara iitanne shori baynna oosuwaa minttettiyaabaara gayttida allaxxiyoobaa gujjees. (1 Qor. 6:9, 10; Ajjuutaa 21:8 nabbaba.) Nuuni awan deꞌiyaaba gidikkokka, hegaa mala allaxxiyoobaappe haakkiyoogan, ‘iitabaa ixxiyoogaa’ Yihooway beꞌanaadan oottoos.—Roo. 12:9; 1 Yoh. 1:5, 6.
7, 8. Issi allaxxiyoobay loꞌꞌokko iitakko waatidi qorana danddayiyoo? Leemisuwan yoota.
7 Naaꞌꞌantto qommo allaxxiyoobay Xoossaa Qaalay qoncciyan diggiyo oosuwaara gayttidaba gidenna. Hegaa mala hanotan, he allaxxiyoobaa dooranaappe kase, Geeshsha Maxaafaa baaso siraataa maaraadan, Yihoowa xeelan loꞌꞌo gididabaara hegaa akeekan geeddarssana koshshees. (Lee. 4:10, 11) Yaatidi, nu zoriyaa wozanaa moorenna kuushshaa kuuyana bessees. (Gal. 6:5; 1 Xim. 1:19) Nuuni hegaadan oottana danddayiyoy ayba ogiyaanee? Hagaa qoppite: Mi erenna qumaa maanaappe kase he quman aybi aybi deꞌiyaakko eranau koyoos. Hegaadankka, issiban allaxxanaappe kase, hegan aybi aybi deꞌiyaakko erana koshshees.—Efi. 5:17.
8 Leemisuwau, intte ispporttiyaa dosana danddayeeta; hegaadan dosiyoogaa ooninne erana danddayees. Ispporttee ufayssana danddayees. Issi ispporttiyaa intte dosiyoy, qohuwaa gattiya hanotan keesettiyo, eriiddi wolqqaama daafan geliyo, wolqqaama qohuwaa gattiyo, makkalabaa oottiyo baalaa bonchiyo, ba yelettido biittaa siiqiyo woy hegaa malabay deꞌiyo gishshataassa gidikkoshin? Hegee ay ay gujjiyaakko qori simmidi, Yihoowa qofaara, qassi nuuni haratuyyo yootiyo, sarotettaanne siiquwaa kiitaara intte qofay mogganaadan oottanau metiyoogaa akeekana danddayeeta. (Isi. 61:1; Gal. 5:19-21) Hara baggaara, issi allaxxiyoobay Yihoowa xeelan loꞌꞌobay deꞌiyoogaa gidikko, hegee inttena goꞌꞌiyaagaanne gazddissiyaagaa gidana danddayees.—Gal. 5:22, 23; Piliphphisiyuusa 4:8 nabbaba.
Taani Allaxxiyoy Awudee?
9. ‘Taani allaxxiyoy awudee?’ giya oyshau nuuni zaariyoobay ay qonccissii?
9 Inttena oychana koshshiya naaꞌꞌantto oyshay, awudee?—giishin, ‘Taani awude allaxxiyaanaa? Allaxxiyoogan woqqu wodiyaa wurssiyaanaa?’ yaagiyaagaa. Aybaa? giya oyshau nuuni zaariyo zaaroy nuuni koyiyoobaa, giishin loꞌꞌo giyoobaanne loꞌꞌo gidenna giyoobaa loytti qonccissees. Qassi awudee? giya oyshau zaariyo zaaroy nuuni kaseyiyoobaa, giishin xoqqu oottidi xeelliyoobaanne xoqqu oottidi xeellennabaa qonccissees. Yaatin, allaxxiyoobaa nu deꞌuwan ay keena xoqqu oottidi xeelliyaakko akeekanau nuna aybi maaddii?
10, 11. Nuuni ay keena wodiyau allaxxana koshshiyaakko eranau, Maatiyoosa 6:33n Yesuusi yootidobay waatidi maaddii?
10 Yesuus Kiristtoosi ba erissiyo ashkkaratuyyo, “Intte Godaa intte Xoossaa intte kumetta wozanaappe, intte kumetta shemppuwaappe, intte kumetta qofaappe, intte kumetta wolqqaappe siiqite” yaagiis. (Mar. 12:30) Yaatiyo gishshau, Yihoowa siiqiyoogaa nu deꞌuwan kaseyoos. Yesuusi, “SHin kasetidi, Xoossaa kawotettaanne a xillotettaa koyite; i intteyyo he ubbabaa immana” yaagidi zorido zoriyaa oosuwan peeshshiyoogan, hegaadan oottiyoogaa qonccissoos. (Maa. 6:33) Nuuni allaxxiyooban woqqu wodiyaa wurssiyaakko, qassi hegaa ay keena xoqqu oottidi xeelliyaakko shaakki eranau ha qofay waatidi maaddana danddayii?
11 Hagaa akeekite: Yesuusi nuuni ‘kasetidi Xoossaa Kawotettaa koyanaadan’ zoriis. I yootidoy nuuni ‘kawotettaa xallaa koyanaadaana’ gidenna. Nuuni nu deꞌuwan Kawotettaappe hara darobaa koyana bessiyoogaa Yesuusi eriyoogee qoncce. Nuuyyo keettay, qumay, maayoy, timirttee, oosoy, allaxxiyoobaynne hegaa malabay koshshees. Gidikkokka, nuuni koyiyo ubbabaappe issibaa xallay, giishin Kawotettaara gayttidabay kasetees. (1 Qor. 7:29-31) Hegee, nu deꞌuwan kaseyiyoobaa, giishin Kawotettaara gayttidabaa polanaadan danddayissiya ogiyan, allaxxiyoogaa gujjin nu deꞌuwau koshshiya harabaa oottanaadan denttettana koshshees. Nuuni hegaadan oottiyaaba gidikko, guuttaa allaxxiyoogee goꞌꞌana danddayees.
12. Luqaasa 14:28n deꞌiya baaso siraatay allaxxiyoobaara gayttidaagan oosuwan peꞌana danddayiyoy ayba ogiyaanee?
12 Yaatikko, allaxxanau wodiyaa aattiyoogaa xeelliyaagan, hegau giidi aggiyoobaa kasetidi qoppana koshshees. (Luq. 14:28) Allaxxiyoobay nu wodiyaappe ay keenaa wurssiyaakko akeekana koshshees. Yaatidi, hegan ay keena wodiyaa aattana bessiyaakko kuuyana koshshees. Allaxxiyoobay buzo xinaatiyaa, so asaa goynuwaa, Kiristtaane shiiquwan beettiyoogaa woykko haggaaziyoogaa mala keehippe koshshiya oosuwaa sheneho gaanaadan oottikko, hegan allaxxana bessenna. (Mar. 8:36) SHin issi issitoo allaxxiyoobay Kawotettaara gayttidabaa aggennan oottanaadan nuna minttettiyaaba gidikko, hegaa malaban wodiyaa aattiyoogee bessiyaaba gidiyoogaa kuuyana danddayoos.
Ta Laggeti Oonee?
13. Nuuni oonaara allaxxiyaakko akeekan qoppana koshshiyoy aybissee?
13 Inttena oychana koshshiya heezzantto oyshay, Oonee?—giishin, ‘Taani oonaara allaxxanau koyiyaanaa?’ yaagiyaagaa. Allaxxiyoogaa xeelliyaagan hegaa qoppiyoogee keehippe koshshiyaaba. Aybissi? Nu laggetu hanotay nuuni allaxxiyoobaa loyttiyo woy mooriyo gishshataassa. Qumaa loꞌꞌo laggetuura miyoogee darotoo keehippe ufayssiyoogaadan, loꞌꞌo laggetuura allaxxiyoogeekka darotoo keehippe ufayssiyaaba. Yaatiyo gishshau, nuuppe daroti, ubba qassi yelagati haratuura allaxxiyoogan ufayttiyoogee erettidaagaa. SHin, issi uri allaxxiyoobay goꞌꞌiyaagaa gidiyoogaa akeekanau, ay mala laggeta doorana koshshiyaakko, qassi ay mala laggetuppe haakkana koshshiyaakko kasetidi kuuyiyoogee eratetta.—2 Odi. 19:2; Leemiso 13:20 nabbaba; Yaaq. 4:4.
14, 15. (a) Yesuusi loꞌꞌo laggeta dooriyoogan leemiso gidiyaabaa ay oottidee? (b) Nuuni laggeta xeelliyaagan woygiya oyshata nuna oychana koshshii?
14 Laggeta dooriyoogan Yesuusa leemisuwaa kaalliyoogee keehippe maaddiyaaba. Asay merettido wodiyaappe doommidi, Yesuusi asaa naata siiqees. (Lee. 8:31) I saꞌan deꞌiyo wode, ubba asau siiquwan qoppiyoogaa bessiis. (Maa. 15:29-37) Gidikkokka, Yesuusi asaa siiqiyoogaanne mata lagge gidiyoogaa giddon dummatettay deꞌiyoogaa qonccissiis. I ubba asaa siiqiyaaba gidikkokka, koyettiya gidaa kunttiyaageetu xallau mata lagge gidiis. Ba kiittido ammanettida 11tuyyo Yesuusi, “Taani inttena azazidobaa ubbaa oottikko, intte ta laggeta” yaagiis. (Yoh. 15:14; Yohaannisa 13:27, 30kka xeella.) Yesuusi bana kaalliyaanne Yihoowayyo oottiyaageetu xalaalaa lagge oottidi dooriis.
15 Yaatiyo gishshau, intte issi ura mata lagge oottidi dooranau woy agganau qoppiyo wode, Yesuusa zoriyaa hassayiyoogee eratetta. Inttena hagaadan oychite: ‘Taani lagge oottanau koyiyo uri ba oottiyoobaaninne haasayiyooban Yihoowanne Yesuusa azazuwaa azazettiyoogaa bessii? A eeshshaynne kanddoy tanadan Geeshsha Maxaafaa maaraa kaalliyoogaa bessii? A lagge gidiyoogee ta deꞌuwan Kawotettaabaa kaseyanaadaaninne Yihoowayyo ammanettada oottanaadan minttettii? Ha oyshata ee giidi zaariyaaba gidikko, issippe allaxxanau loꞌꞌo lagge demmideta.—Mazamure 119:63 nabbaba; 2 Qor. 6:14; 2 Xim. 2:22.
Nuuni Allaxxiyoobay Paaciyaa Aadhii?
16. Nuuni allaxxiyoobaa xeelliyaagan ay erana koshshii?
16 Allaxxiyoobaa xeelliyaagan heezzubata, giishin allaxxiyoobay ay malakko, ay keenaa allaxxanaakko, qassi issippe allaxxana bessiyo laggeti oonakko qanttan beꞌida. Nuuni allaxxiyoobay goꞌꞌiyaagaa gidana mala, ha ubbaban Geeshsha Maxaafaa maaraara keehippe moggiyaagaa gidana koshshees. Yaatiyo gishshau, issiban allaxxanaappe kase hegaa paaccana koshshees. Allaxxiyoobay ay malakko qoppiyo wode, kaallidi deꞌiyaagaa erana koyoos: ‘An aybi aybi deꞌii? I loꞌꞌooyye iitee?’ (Lee. 4:20-27) Ay keenaa allaxxanaakko kaallidi deꞌiyaagaa eranau koyoos: ‘Hegan ay keena wodiyaa wurssiyaanaa? Hegaa keena wodee bessiyaabeeyye bessennabee?’ (1 Xim. 4:8) Qassi laggeta xeelliyaagan kaallidi deꞌiyaagaa shaakki erana koshshees: ‘Taani oonaara allaaxxiyaanaa? Hegaa mala laggeti loꞌꞌooyye iitee?’—Era. 9:18; 1 Qor. 15:33.
17, 18. (a) Nuuni allaxxiyoobay Geeshsha Maxaafaa maaraara moggiyaakko moggennaakko waatidi paaccana danddayiyoo? (b) Neeni allaxxiyoobaa dooriyoogaara gayttidaagan, ay oottanau murttadii?
17 Allaxxiyoobay ha heezzubatuppe issuwaaninne Geeshsha Maxaafaa maaraara moggennaba gidikko, paaciyaa aadhenna. Hara baggaara, nuuni allaxxiyoobay ha heezzubatun Geeshsha Maxaafaa maaraara moggiyaaba gidiyoogaa shaakki erikko, nuuni allaxxiyoobay Yihoowa bonchissana; qassi nunakka goꞌꞌana.—Maz. 119:33-35.
18 Yaatiyo gishshau, allaxxiyoobaa xeelliyaagan loꞌꞌoban, bessiya wodiyan, loꞌꞌo asaara allaxxanau baaxetana koshshees. Ee, Geeshsha Maxaafay, “Intte ai miikkonne, woi ai uyikkonne, woi intte ai oottikkonne, ubbabaa Xoossaa bonchchuwaassi oottite” yaagiyo zoriyaa nuuni ubbay oosuwan peeshshanau wozanappe koyiyaageeta gidoos.—1 Qor. 10:31.
[Tohossa qofaa]
a Ha huuphe yohuwan, nuuni ufayttanau giidi oottiyoobau bazziyo wodiyaa malaatanau “allaxxiyoobaanne” “wodiyaa aattiyoobaa” giya qaalata goꞌettida.
Qonccissana Danddayay?
Allaxxiyoobaa xeelliyaagan kaallidi deꞌiya xiqisetu baaso siraataa waatada oosuwan peeshshana danddayay?
• Leemiso 13:20
[Sinttaa 11n deꞌiya misiliyaa qonccissuwaa]
[Loyttada beꞌana koyikko maxeetiyaa xeella]
✔Aybaa
[Sinttaa 12n deꞌiya misiliyaa qonccissuwaa]
✔Awude
[Sinttaa 14n deꞌiya misiliyaa qonccissuwaa]
✔Oona
[Sinttaa 12n deꞌiya misiliyaa qonccissuwaa]
Laggetanne allaxxiyoobaa dooriyoogan nuuni Yesuusa leemisuwaa kaallana danddayiyoy ayba ogiyaanee?