Geeshsha Maxaafay Asay Laamettanaadan Oottees
CEERIYAA kaaꞌiyaanne asa keettaa mentti geli wuuqqiya issi bitanee ba iita amaliyaa agganaadaaninne ba deꞌuwan laamettanaadan aybi maaddidee? I yootidobaa nabbaba.
“Paraa togan annaacettiyoogaa dosays.”—RICHARD ISTIWARTA
YELETTIDO LAYTTAA: 1965
YELETTIDO BIITTAA: JAMAYKA
KASE TAARIKIYAA: CEERIYAA KAASSANCHCHANNE DANOBAA OOTTIYAAGAA
KASE DEꞌUWAA: Taani Jamayka waanna kataman Kingisttenen, hiyyeesa asay corattidi deꞌiyo heeran diccaas. Daro asawu oosoy baynna gishshawu, daroti danobaa oottoosona. Bonqqiyaageeti asay hirggiiddi deꞌanaadan oottidosona. Asay shugguxiyaa xuussishin ubba gallassi siyays gaana danddayays.
Mino oosanchcha gidida taayyiyaa taassi, ta kaalo ishaassinne michcheessi hanennabi baawa. A nuuni loꞌꞌo timirtte keettan tamaaranaadan oottaasu. Taani timirttiyaa darin dosikke, shin paraanne paraa togan annaacettiyoogaa dosays. Yaatiyo gishshawu, timirttiyaa aggada, annaacettiyo sohuwaa bays. Paraakka toggays.
Taani takkennan paraa annaaciyan keesettiyoogan daro miishshaa wurssiyoogaa doommaas. Qassi daro maccaasaara shaaramuxaas. Maruwaana cuwayays; qassi hegawu koshshiya miishshaa demmanawu asaappe bonqqays. Tawu daro shugguxee deꞌees; shin taani darotoo asaappe bonqqishin, ooninne hayqqibeenna gishshawu haꞌꞌi ufayttays.
Guyyeppe, taani daro danobaa oottidoogaa gaasuwan poliseti tana oyqqidi qasho keetti gelissidosona. Birshshetta simmada, kaseegaadankka deꞌiyoogaa doommaas. Ubba taani kaseegaappe yaa iitaas. Taani suure asa milatikkokka, morgge zozza, hanqqettiyaanne meqettaa iita asa. Taappe attin hara oossinne qoppikke.
TAANI LAAMETTANAADAN GEESHSHA MAXAAFAY MAADDIIS: Taani hegaadan iita deꞌuwaa deꞌishin, taayyiyaa Geeshsha Maxaafaa xannaꞌada Yihoowa Markka gidaasu. I eeshshay kaseegaappe loꞌꞌidoogaa beꞌada aybissakko eranawu koyaas. Taayyiyaa laamettanaadan oottidabaa eranawu koyido gishshawu, Yihoowa Markkatuura Geeshsha Maxaafaa xannaꞌiyoogaa doommaas.
Yihoowa Markkatu timirttee hara haymaanootetuugaappe dummatiyoogaa eraas; qassi eti tamaarissiyo ubbabaa Geeshsha Maxaafaappe yootiyoogaa akeekaas. Qassi beni Kiristtaaneti oottidoogaadan, sooppe soo biidi sabbakiyaageeti eta xalla gidiyoogaa eraas. (Maatiyoosa 28:19; Oosuwaa 20:20) Eti issoy issuwaara tumuppe siiqettiyoogaa beꞌada, taani tumu haymaanootiyaa demmidoogaa akeekaas.—Yohaannisa 13:35.
Geeshsha Maxaafaappe tamaaridobay taani ta deꞌuwan daro laamettana koshshiyoogaa akeekanaadan oottiis. Xoossaa Yihooway shaaramuxiyaageeta ixxiyoogaanne taani A ufayssana koyikko, ta asatettaa tunissiyaabaa oottiyoogaa aggana bessiyoogaa akeekaas. (2 Qoronttoosa 7:1; Ibraawe 13:4) Ta haniyoobay Yihoowa azzanttana woy ufayssana danddayiyoogaa eridoogee taani laamettanaadan denttettiis. (Leemiso 27:11) Hegaa gishshawu, maruwaana cuwayiyoogaanne shugguxiyaa oyqqiyoogaa agganawu, qassi tawu loꞌꞌo eeshshay deꞌanaadan murttaas. SHin shaaramuxiyoogaanne ceeriyaa kaaꞌiyoogaa agganaagee tana keehi metiis.
Taani Yihoowa Markkatuura Geeshsha Maxaafaa xannaꞌiyoogaa ta laggeti eranaadan koyro koyabeykke. SHin Yesuusi, “Asa sinttan tana kaddiya oonanne taanikka qassi saluwan de7iya ta Aawaa sinttan a kaddana” giidoogaa, Maatiyoosa 10:33n nabbabada, laamettana bessiyoogaa akeekaas. Hagee taani Yihoowa Markkatuura xannaꞌaydda deꞌiyoogaa ta laggetussi yootanaadan denttettiis. Eti hegaa siyidi dagammidosona. Ta mala asi Kiristtaane gidanawu koyidoogaa eti ammanana danddayibookkona. SHin taani kaseegaa mala deꞌuwaa mule deꞌana koyennaagaa etawu yootaas.
TAANI GOꞌETTIDO HANOTAA: Taani Geeshsha Maxaafaa maaraadan deꞌiyoogaa doommidoogaa taayyiyaa beꞌada keehi ufayttaasu. Hegaappe guyyiyan, tana iitabaa oottees gaada hirggiyoogaa aggaasu. Nuuni Yihoowa siiqiyo gishshawu, haꞌꞌi issoy issuwaara keehi siiqettoos. Issi issitoo, taani kase ay mala asakko qoppada, Xoossay maaddin haꞌꞌi laamettido hanotaa hassayiyo wode maalaalettays. Taani shaaramuxayddanne miishshaa siiqaydda deꞌido kase deꞌuwaa haꞌꞌi mule amottikke.
Taani Geeshsha Maxaafaa zoriyaa siyennaakko, hannoode hayqqaas woy qasho keettan deꞌays. Haꞌꞌi ta so asaara ufayssiya deꞌo deꞌays. Tana kaafiya machcheeranne azazettiya naꞌeera Xoossaa Yihoowawu haggaaziyoogee tana keehi ufayssees. Taani siiqettiya nu ishanttu maabaraa yara gidanaadan Yihooway oottido gishshawu keehi galatays. Issi uri tana Geeshsha Maxaafaa tamaarissanawu daafurido gishshawu keehi galatays. Harata Geeshsha Maxaafaa tamaarissiyo maataakka xoqqu oottada xeellays. Ubbaappe aaruwan, Yihooway ba aaro kehatettan tana baakko shiishshido gishshawu A keehippe galatays.
[Qonccissuwaa]
“Ta haniyoobay Yihoowa azzanttana woy ufayssana danddayiyoogaa eridoogee taani laamettanaadan denttettiis”
[Misiliyaa]
Ta machcheeranne ta naꞌeera
[Misiliyaa]
Taayee eeshshay kaseegaappe loꞌꞌidoogaa akeekaas