Geeshsha Maxaafay Asay Laamettanaadan Oottees

“Taani Daro Layttawu, ‘Ayssi Merettidoo?’ Gaada Qoppaas”—ROZALIND JON

• YELETTIDO LAYTTAA: 1963

• YELETTIDO BIITTAA: BIRITAANIYA

• KASE TAARIKIYAA: LOꞌꞌO OOSOY DEꞌIYOORO

KASE DEꞌUWAA:

Taani Londdonen tohossa baggan Kirodon giyo sohuwan yelettaas. Nu son deꞌiya uddufun naatuppe taani usuppuntta. Ta aayyiyaanne aaway koyro Kaarivane haruuruwan Sentevishent giyoosaappe yiidosona. Ta aayyiyaa meetodiste woosa keettaa bawusu. Taani nabbabada eriyoogaa dosikkonne, Xoossaabaa eranawu koyikke. Timirtte keettaappe shemppuwawu soo biyo wode, laybireeriyaappe garxxa ekkido maxaafata abbaa doona baada nabbabays.

Taani timirttiyaa wurssa simmada metootida asata maaddanawu qofaa qachchaas. Taani keetti baynnaageeta, abbee baynnaageetanne tamaaranawu metootiyaageeta maaddanawu oottiyoogaa doommaas. Hegaappe simmin, akkamuwaara gayttidabaa yuniversitiyan tamaaraas. Yunversitiya timirttiyaa wurssa simmada loꞌꞌo oosota oottaas. Qassi alꞌꞌobaa darobaa shammaas. Taani harata maaddiyo oosuwaa oottiyo gishshawu, laptooppenne intterneete xallay tawu koshshees. Taani dumma dumma biittata baada amarida saaminttata yan takkada loꞌꞌo hooteeletun shemppada ta oosuwaa oottays. Taani ufayssiya deꞌo deꞌays gaada qoppaas. SHin he wode bantta deꞌuwan metootiyaageetubaa qoppiyoogaa mule aggabeykke.

TAANI LAAMETTANAADAN GEESHSHA MAXAAFAY MAADDIIS:

Nuuni ayssi merettido gaada daro layttawu qoppaas. SHin ta oyshatussi zaaruwaa Geeshsha Maxaafaappe demmanawu malabeykke. Issi galla 1999n, tabaa akeekanawu koyiya ta kaalo michchee Margareti laggiyaa nu soo yaasu. A Yihoowa Markka. Taani ta michchee laggeera Geeshsha Maxaafaa xannaꞌanawu maayidaba gidikkokka, tawu oosoy dariyo gishshawu eesuwan ayyaanaaban diccana danddayabeykke.

Taani 2002 bakkaa heeran, Inggilizen tohossa baggan arggokko baqqiyaasan deꞌanawu baas. Yan taani hara digiriya demmanaayyo yuniversttiyan tamaariyoogaa doommaas. Nu heeran deꞌiya Yihoowa Markkatu SHiiquwaa Addaraashaa ta guutta naꞌaara ubbatoo bays. Taani yuniversttiyaa timirttiyaa dosikkonne, Geeshsha Maxaafaa xannaꞌidoogee deꞌuwan gakkiya metuwaabaanne hegee waani qaarettanaakko loytta akeekanaadan tana maaddiis. Maatiyoosa 6:24 deꞌiya qofay tuma gidiyoogaa akeekaas. He qofay, naaꞌꞌu godatuyyo haarettana danddayettenna yaagees. Woy Xoossaassi hegee xayikko, aquwawu haarettana koshshees. Ta deꞌuwan keehi koshshiyaabaa kuuyana bessiyoogaa akeekaas.

Hegaappe kasetiya layttan, Nuussi Qoppiya Xoossi Deꞌii?a yaagiya maxaafaa Yihoowa Markkatuura issippe son citan xannaꞌaas. Nuna medhdhida Yihooway asaa metuwaa ubbaa qaarana danddayiyoogaa taani akeekaas. Gidoppe attin, yuniversttiyan nuna Xoossi nuussi koshshennaagaa tamaarissidosona. Taani keehi yiillotaas. Yaatiyo gishshawu, yuniversttiyaa timirttiyaa aggabayada Xoossaara dabbotaa minttanawu qofaa qachchaas.

Taani laamettanaadan oottida Geeshsha Maxaafaa qofay Leemiso 3:5, 6n deꞌiyaagaa. Taani Xoossaabaa tamaaridoogee ay miishshinne woy ay loꞌꞌo oosoynne demissana danddayenna ufayssaa demissiis. Yihooway saꞌawu halchchidobaanne Yesuusi ba deꞌuwaa yarshshidoogan demmido anjjuwaa eridoogee, taani tana Yihoowawu sheedhdhanaadan maaddiis. Qassi Hosppune 2003n xammaqettaas. Hegaappe simmin, Yihoowawu loytta haggaazanawu gaada daroban laamettaas.

TAANI GOꞌETTIDO HANOTAA:

Yihoowaara dabbotidoogee tawu aybippenne aadhdhiyaaba. Taani A erido gishshawu ufayttaasinne woppu gaas. Qassi Yihoowa siiqiyaageetuura laggetidoogankka ufayttaas.

Taani haꞌꞌikka tamaariyoogaa dosays, qassi Geeshsha Maxaafaappenne shiiqotun tamaariyoogee tana ufayssees. Haratuyyo ta ammanuwaabaa yootiyoogee tana keehi ufayssees. Yaaniyo gishshawu, asay haꞌꞌi ufayssiya deꞌuwaa deꞌanaadaaninne sinttappe ooratta alamiyan etawu hidootay deꞌanaadan maaddiyoogee taani aybippenne aaruwan dosiyo ooso. Hegaappe denddidaagan, Tamme 2008n ubba wode haggaaziyaaro gidaas. He oosuwan keehi ufayttays. Nuuni merettidoy aybissakko akeekaas, qassi hegawu Yihoowa wozanappe galatays.