Abrahaami Oonee?

ALAMIYAA haymaanootetun aagaappe aaro sohoy deꞌiyoogeeti amaridaageeta. Ayhudati, Isilaamatinne Kiristtaaneti bonchiyo Abrahaamee,a “Geeshsha Maxaafan keehi erettidaagaa,” qassi “ammanuwan gita leemiso” geetettiis. Geeshsha Maxaafay Abrahaama ‘Xoossaa ammaniya ubbatuyyo aawa’ yaagees.—Roo. 4:11.

Asay Abrahaama hegaadan keehippe bonchiyoy aybissee? Issibay, Geeshsha Maxaafan Xoossaa dabbo geetettiday Abrahaama xalla.—Isi. 41:8; Yaaq. 2:23.

SHin hara bagaara, Abrahaami nu mala asa. Nuna gakkiya metuwaappe daroy a gakkidaba gidikkokka, i he metuwan gencciis. I genccidoy ayba ogiyaanakko erana koyay? Ha keehippe erettida bitaniyaabaa Geeshsha Maxaafay ay qonccissiyaakko akeeka.

I Kase Deꞌido Hanotaa

Abrahaami 2018n K.K. yelettidi, Uura kataman dicciis. (Doo. 11:27-31) Uuri keehi gitanne dure katama. He katamay eeqa goynoy kumido katama. Abrahaama aawaa Taari dumma dumma eeqatuyyo goynniyaageetuppe issuwaa gidennan aggenna. (Yaas. 24:2) Gidikkokka, Abrahaami deꞌoy baynna eeqa xoossatuyyo goynniyoogaappe Yihoowab xallau goynnanau dooriis.

Abrahaami hegaadan kuuyanaadan denttettiday aybee? I Nohe naꞌaa Seemi hayqqanaappe 150 layttaa kasetidi yelettiis. I hegaa keena layttaa baappe bayratiya uraara matattidi deꞌidaba gidikko, hegee a ayba ogiyan maaddana danddayii? Abrahaami eti Bashsha Haattaappe attido hanotaabaa Seemappe siyennan aggenna. Seemanne eta soo asaa he Bashshaappe ashshida Xoossaa, Yihoowayyo goynniyoogee keehippe koshshiyoogaakka Abrahaami siyennan aggenna.

Abrahaami Seemappe siyidaba gidin woy hara baggaara eridaba gidin, tumu Xoossaabaa siyidobaara moggiyaabaa oottiis. ‘Wozanaa paacciya’ Yihooway Abrahaama wozanan issi loꞌꞌobaa beꞌidi, i kaseegaappe loꞌꞌo asa gidanaadan maaddiis.—Lee. 17:3; 2 Odi. 16:9.

A Deꞌuwaa

Abrahaami darotoo ba deꞌuwan metootidaba gidikkokka, hada deꞌo gidennan, oosoy darido ufayssiya deꞌo deꞌiis. A gakkidabatuppe amaridaageetu xallaa ane beꞌoos.

▪ Abrahaami Uuran deꞌiyo wode, ba yelettido biittaa aggidi, I bessiyo hara biitta baanaadan Xoossay ayyo yootiis. Abrahaaminne Saara ubbabaa, giishin eti awa baanaakko woy eti baanaadan Xoossay aybissi azazidaakko erennaba gidikkokka, ayyo azazettidosona. Guyyeppe Abrahaaminne Saara Kanaane biitta bi dunkkaanidi, hayqqana gakkanaashin yan imattadan deꞌidosona.—Oos. 7:2, 3; Ibr. 11:8, 9, 13.

▪ Abrahaameenne Saara naꞌa yelennan deꞌishin, Yihooway Abrahaamappe gita kawotettaa kessanau qaalaa geliis. I saꞌaa asay ubbay Abrahaama baggaara anjjettanaagaakka yootiis. (Doo. 11:30; 12:1-3) Yihooway he gelido qaalaa polanaagaa guyyeppe minttidi yootiis. I a zerettay saluwaa xoolinttiyaadan corattanaagaa Abrahaamayyo yootiis.—Doo. 15:5, 6.

▪ Layttay Abrahaamayyo 99, qassi Saariyyo 90 heera gidido wode, eti attuma naꞌa yelanaagaa Yihooway qaalaa geliis. Hegee asa xeelan danddayettiyaaba milatenna, shin Abrahaaminne Saara Yihoowayyo “danddayettennabi” baynnaagaa sohuwaara akeekidosona. (Doo. 18:14) Issi layttappe guyyiyan, Abrahaamayyo layttay 100 gidido wode, i Yisaaqa giidi sunttido naꞌaa yelliis. (Doo. 17:21; 21:1-5) Yisaaqa baggaara asaa naatuyyo gita anjjoy yaanaagaa Xoossay qaalaa geliis.

▪ Daro layttappe guyyiyan issi meeze gidennabaa Abrahaami oottanaadan Yihooway oychiis. Yisaaqi machibeennabanne naꞌa yelibeennaba gidikkokka, Yihooway Abrahaami ba siiqiyo naꞌaa yarshshanaadan oychiis. Ba naꞌay hayqqanaagaa qoppiyoogee a unꞌꞌissidaba gidikkokka, Abrahaami Yihoowau azazettidi ba naꞌaa yarshshanau giigiis. Xoossay ba gelido qaalaa polanau, koshshiyaaba gidikko, Yisaaqa hayquwaappe denttanau ayyo wolqqay deꞌiyoogaa Abrahaami minttidi ammaniis. (Ibr. 11:19) Abrahaami ba naꞌaa yarshshana hanishin, Xoossay kelttiyaa gelidi Yisaaqa ashshiis. I Abrahaami wozanappe azazettido gishshau nashshiis. Yaatidi Yihooway, Abrahaamayyo kase gelido qaalaa zaarettidi yootiis.—Doo. 22:1-18.

▪ Abrahaami 175 laytta deꞌidi hayqqiis. Geeshsha Maxaafay i “daro wodiyaa de7idi, lo77o ceeggidi” hayqqidoogaa yootees. (Doo. 25:7, 8) Yaatiyo gishshau, Xoossay Abrahaamayyo qaalaa gelido harabay, giishin i ceeggidi saro hayqqanaagaa yootidoogee polettiis.—Doo. 15:15.

I Laatissidobaa

Abrahaami beni wode deꞌida, haymaanootiyan woy taarikiyan erettida asa xalla gidenna. A taarikee, ha wodiyan nu ubbaayyo keehippe koshshiya loꞌꞌo leemiso. (Ibr. 11:8-10, 17-19) Abrahaami ba deꞌuwan qonccissido loꞌꞌo eeshshatuppe oyddata ane beꞌoos. I keehippe erettiyo eeshshan, giishin ammanuwan doommana.

[Tohossa qofata]

[Sinttaa 4n deꞌiya saaxiniyaa]

Geeshsha Maxaafaa Taarikiyan Xoqqa Sohoy Imettido Bitaniyaa

Doomettaabaa maxaafay koyro tammu shemppotun, Aabeela, Heenookanne Noha gujjin ammanettida amarida asatu taarikiyaa yootees. SHin kaalliya 15 shemppoti daro baggi issi ura, giishin Abrahaama deꞌuwaara gayttidabaa yootoosona.

Hegaa bollikka, Geeshsha Maxaafan keehippe koshshiya qofatuppe daroti koyro xaafettidoy Abrahaameera gayttidaagaana. Leemisuwau, Abrahaama deꞌuwaabaa yootiya taarikiyan . . .

▪ Xoossay ba ashkkaratuyyo Gonddalle woykko Naagiyaagaa gidiyoogee koyro odettidoogaa akeekoos.—Doo. 15:1; qassi Zaarettido Wogaa 33:29, Mazamure 115:9nne Leemiso 30:5 xeella.

▪ Xoossan ammaniyoogaa xeelliyaagan koyro odettidoogaa akeekoos.—Doo. 15:6.

▪ hananabaa yootiyaagaa giya qaalay koyro odettidoogaa akeekoos.—Doo. 20:7.

▪ issi uri ba naꞌaa siiqiyo siiquwaabay koyro odettidoogaa akeekoos.—Doo. 22:2.