Yihooway A “Ta Dabbuwaa” Giidi Xeesiis

1, 2. (a) Asay Xoossaa dabbo gidana danddayiyoogaa waati eriyoo? (b) Ha huuphe yohuwan ay beꞌanee?

NUUNI yelettoosappe doommidi hayqqana gakkanaassi hara uri nuna siiqanaadan koyoos. Asay siiqettana koyees; shin hegee attuma asinne macca asi issoy issuwawu bessiyo siiqo gidenna. Nuuni haratuura laggetananne dabbotana koyoos. SHin nuuni o siiquwaappenne aaruwan Yihoowa siiquwaa koyoos. Daroti saluwan deꞌiya, Ubbaa Danddayiya beettenna Xoossaara asi mata dabbotaa medhana danddayettennabadan qoppoosona. Nuunikka hegaadan qoppiyoo? Mule qoppokko!

² Geeshsha Maxaafay asay Xoossaa dabbo gididoogaa yootees. Nuuni eta leemisuwaappe tamaarana koshshees; ayssi giikko, Xoossaara dabbotiyoogee nuuni nu deꞌuwan halchana bessiyo waannaba. Abrahaami Xoossaara dabbotiyoogan nuussi gita leemiso. (Yaaqooba 2:23 nabbaba.) Abrahaami waanidi Yihoowayyo mata dabbo gididee? I Xoossaassi mata dabbo gidanaadan maaddiday ammanuwaa. Ubba, Geeshsha Maxaafay Abrahaami ‘ammaniya ubbawu aawa’ gidiyoogaa yootees. (Roo. 4:11) Abrahaama ammanoy, i Xoossaassi mata dabbo gidanaadan waati maaddidaakko ane beꞌoos. Qassi hegaa pilggiyo wode, ‘Taani Abrahaamaagaadan waana ammanana, qassi Yihoowaara deꞌiya dabbotaa waata minttana danddayiyaanaa?’ giidi nuna oychana koshshees.

ABRAHAAMI WAANIDI YIHOOWA DABBO GIDIDEE?

3, 4. (a) Abrahaama ammanoy keehi paacettanaadan oottidabaa yoota. (b) Abrahaami Yisaaqa yarshshana koyidoy aybissee?

³ Issi cima bitanee deriyaa kiyiyoogaa qoppa. Hegee i ba deꞌuwan keehi metootido manddara. I keehi daafuridoy layttan sugido gishshataassa gidenna. Abrahaamassi layttay 125 gidana danddayikkokka, mino asa.^[1] Issi yelagay a geeduwaa kaallees; awu layttay 25 gidennan aggenna. Hegee a naꞌaa Yisaaqa; i yarshshuwaa mittaa tookkiis. Abrahaami qassi billamaanne tamaa eettiyoobaa oyqqiis. Yihooway Abrahaami ba naꞌaa yarshshanaadan azaziis!—Doo. 22:1-8.

⁴ Hegee Abrahaama ammanoy keehi paacettanaadan oottidaba gidennan aggenna. Issoti issoti Abrahaami ba naꞌaa yarshshanaadan Xoossay azazidoogee, i meqettaa iita gidiyoogaa bessiyaabadan qoppoosona; harati qassi Abrahaami azazettidoogee i ba naꞌaa siiqennaagaa bessiyaabadan qoppoosona. Asay hegaadan qoppiyoy ammanoy baynna gishshataassanne ammanoy issi asi waananaadan denttettiyaakko erenna gishshataassa. (1 Qor. 2:14-16) Abrahaami Xoossaayyo eri baynnan coo azazettibeenna. Tumu ammanoy deꞌiyo gishshawu azazettiis. Mino ammanoy awu deꞌiyo gishshawu, saluwan deꞌiya Aaway Yihooway baassi ammanettidi oottiyaageeta qohiyaabaa aybanne oottennaagaa Abrahaami akeekiis. I Yihoowayyo azazettiyaaba gidikko, Xoossay anne a naꞌaa anjjanaagaa eriis. Abrahaamayyo hegaadan mino ammanoy deꞌanaadan maaddidabay aybee? Eraanne deꞌuwan beꞌidobaa.

5. Abrahaami Yihoowaabaa waati erideeshsha, qassi he eray awu aybi siyettanaadan oottidee?

⁵ Eraa. Abrahaami diccidoy eeqa goynoy kumido Uura katamaana gidikkokka, Yihoowaabaa erees. A aaway Taarikka eeqawu goynnishin, i waanidi hegaa erana danddayidee? (Yaas. 24:2) Geeshsha Maxaafay hegaa geeshshi yootana xayikkokka, Abrahaami Seemappe uddufuntta yeleta gidiyoogaa yootees; Seemi Nohe naatuppe issuwaa, qassi gita ammanoy deꞌiyo asa. Seemi Abrahaamayyo layttay 150 heera gidanaashin deꞌiis. Abrahaami Yihoowaabaa Seemappe tamaarennan waayi aggana. Ayssi giikko, Seemi Yihoowaabaa eridobaa ba soo asawu yootidaba milatees. Abrahaami hegaa eridoogee a wozanaa denttettennan aggenna. I abaa eridi Xoossaa siiqiis; qassi he eray awu mino ammanoy deꞌanaadan maaddiis.

6, 7. Abrahaami deꞌuwan beꞌidobati a ammanoy minnanaadan waati maaddidonaa?

⁶ Deꞌuwan beꞌidobaa. Abrahaami Yihoowa mintti ammananaadan oottiyaabaa ba deꞌuwan ay beꞌidee? Issi uri ba wozanan qoppiyoobaa koyees, qassi koyiyoobaa oottees. Abrahaami Xoossaabaa eridobay ‘Ubbaappe Xoqqiya Xoossaa, saluwaanne saꞌaa medhidaagaa’ wozanappe bonchanaadan denttettiis. (Doo. 14:22) Geeshsha Maxaafay he bonchoy ‘Xoossawu yayyiyoogaa’ gidiyoogaa yootees; qassi hegee Xoossaayyo mata dabbo gidanawu keehi koshshiyaaba. (Ibr. 5:7; Maz. 25:14) Abrahaami Xoossawu yayyidoogee oosuwawu a denttettiis.

⁷ Layttan sugida Abrahaaminne Saara Uurappe kiyidi hara biitti baanaadan Xoossay azaziis. Eti hegaappe simmin dunkkaaniyan deꞌana. Abrahaami azazettidoogee Yihooway a anjjanaadaaninne naaganaadan oottiis. Leemisuwawu, Abrahaami loꞌꞌiya ba machiyo Saaro asi wotti ekkidi bana woranaakkonne giidi yayyiis. I yayyidoogee bessiyaaba; shin hegee i Yihoowayyo azazettiyoogaa agganaadan oottibeenna. Yihooway zaari zaaridi keehi maalaalissiyaabaa oottidi Abrahaamanne Saaro naagiis. (Doo. 12:10-20; 20:2-7, 10-12, 17, 18) Abrahaami ba deꞌuwan beꞌido he hanotati a ammanoy minnanaadan oottidosona.

8. Nuuni Yihoowaara dabbotaa minttanaadan maaddiya eraanne deꞌuwan beꞌiyoobaa waati akeekana danddayiyoo?

⁸ Nuuni Yihoowayyo dabbo gidana danddayiyoo? Ee, danddayoos! Abrahaamaagaadan, nuunikka eraa demmananne deꞌuwan issi issibaa beꞌana koshshees. Geeshsha Maxaafan qonccida daro aadhida eratettaara gatti xeelliyo wode, Abrahaama eray keehi guutta. (Dane. 12:4; Roo. 11:33) Xoossaa Qaalay nuuni ‘saluwaanne saꞌaa medhidaagaa’ xeelliyaagan keehi darobaa eranaadan oottees; qassi hegee a bonchanaadaaninne siiqanaadan maaddees. He koshshay nuuni Xoossawu azazettanaadan denttettees; qassi ayyo azazettiyoogee waati maaddiyaakko nu deꞌuwan beꞌoos. A zoriyaa siyiyo wode, i nuna naagiyoogaa, anjjiyoogaanne minttettiyoogaa akeekoos. Kumetta wozanaappe Xoossaayyo oottiyoogee woppatettaa, saruwaanne ufayssaa demissiyoogaa eroos. (Maz. 34:8; Lee. 10:22) Hegaa mala eraynne nu deꞌuwan beꞌiyoobay Yihoowa mintti ammananaadaaninne dabbotettaa minttanaadan maaddees.

ABRAHAAMI XOOSSAA DABBO GIDIDI DEꞌIIS

9, 10. (a) Dabbotettay minnanaadan waatana koshshii? (b) Abrahaami Yihoowaara deꞌiya dabbotaa xoqqu ootti xeellidoogaanne minttidoogaa bessiyaabay aybee?

⁹ Dabbotettay alꞌꞌobaa mala gidana danddayees. (Leemiso 17:17 nabbaba.) SHin dabbotettay alꞌꞌuwan shammidi son wotti bayiyooba mala gidennan, diccanaadan haattaa ushshananne bulꞌꞌana koshshiyo ataakiltte mala. Abrahaami Yihoowaara deꞌiya dabbotaa xoqqu ootti xeelliis; qassi minttidi deꞌiis. I hegaadan waati oottidee?

¹⁰ Abrahaami kase Xoossaayyo yayyidoogeenne azazettidoogee gidees giidi mule qoppibeenna. I cora gidida ba soo asaara Kanaane biyo wode, gitabaakka guuttabaakka kuuyanawu Yihoowa kaaletuwaa kaalliis. Yisaaqi yelettanaappe issi laytta kasetidi, a son deꞌiya attumaageeti ubbay qaxxarettanaadan Yihooway azaziis; he wode Abrahaamayyo layttay 99. Abrahaami he azazuwaa bessennabadan xeellidee woy azazettennan agganawu gaaso shiishshidee? CHii, i Xoossan ammanettidi “he gallassankka” ba azazettidobaa poli aggiis.—Doo. 17:10, 23.

11. Sadoomanne Gamoora katamatubay Abrahaama hirggissidoy aybissee, qassi Yihooway a waati maaddidee?

¹¹ Abrahaami guuttaba milatiyaabankka Yihoowayyo azazettiyoogaa meeze oottido gishshawu, Xoossaara deꞌiya dabbotaa minttidi deꞌiis. I Yihoowaara ubbabaa yayyennan haasayees; bana metida oyshaakka zaaridi maaddana mala a oychiis. Leemisuwawu, Xoossay Sadoomanne Gamoora katamata xayssana haniyoogaa Abrahaami erido wode, xillota nagaranchatuura issippe xayssennaadan hirggiis. He wode Sadooman deꞌiya ba ishaa naꞌaa Looxessinne a soo asaassi Abrahaami hirggennan aggenna. Abrahaami ba huuphiyaa kawushshidinne Xoossan ammanettidi ‘ha saꞌaa ubbaa pirddiyaagaa’ ba oychana koyidobaa oychiis. Yihooway maariyaagaa gidiyoogaa, asa ubbaa wozanaa beꞌiyaagaanne asaa bolli pirddiyo wode xillota ashshanaagaa Abrahaama danddayan tamaarissiis.—Doo. 18:22-33.

12, 13. (a) Abrahaami eridobaynne deꞌuwan beꞌidobay a guyyeppe waati maaddidee? (b) Abrahaami Yihoowan ammanettidoogaa bessiyaabay aybee?

¹² Abrahaami erido ubbabaynne i deꞌuwan beꞌidobay Yihoowaara deꞌiya dabbotaa minttanaadan a maaddidoogee qoncce. Guyyeppe, Abrahaami ba naꞌaa Yisaaqa yarshshanaadan Yihooway azazido wode, i saluwan deꞌiya ba Dabbuwaa eeshshaabaa wotti dentti qoppiis. Mooriya pudettaa leddan kiyiya ammanettida bitaniyaabaa ane zaarettidi qoppoos. I Yihooway ba qofaa sohuwaara laammiyaagaa, meqettaa iitanne qarettennaagaa gi qoppidee? Abrahaami mulekka hegaadan qoppibeenna! Hegaa waati eriyoo?

¹³ Abrahaami banaara biida ashkkaratuppe shaahettanaappe kase eta, “Ha hariyaara hagan de7ishshite; taaninne ta na7ai yaa biidi Xoossaassi goinnidi, inttekko simmana” yaagiis. (Doo. 22:5) Abrahaami woygana koyidee? I Yisaaqa yarshshanaagaa eriiddi, aara etakko simmana giidi etawu wordduwaa yootidee? CHii. Abrahaami qoppidobay aybakko nuuni akeekanawu maaddiyaabaa Geeshsha Maxaafay yootees. (Ibraawe 11:19 nabbaba.) “Abrahaami Xoossai Yisaaqa harai atto, haiquwaappekka pattanau danddayiyoogaa eriis.” Ee, i hayqqidaageeti denddanaagaa ammanees. Inne Saara keehi cimikkokka, eti yelanaadan Yihooway oottidoogaa Abrahaami erees. (Ibr. 11:11, 12, 18) Yihooway ubbabaa danddayiyoogaa Abrahaami akeekiis. He gallassi aybi hananaakko i eribeenna; shin koshshiyaaba gidikko, Xoossay gelido qaala ubbay polettanaadan Yihooway Yisaaqa hayquwaappe denttanaagaa ammaniis. Abrahaami ‘ammaniya ubbawu aawa’ geetettidoogee bessiyaaba!

14. Neeni Yihoowayyo haggaaziyoogee deexxanaadan oottiyaabay ayba gidana danddayii, qassi Abrahaama leemisoy nena waati maaddana danddayii?

¹⁴ Nuuni shin? Nuuni hegaadan oottanaadan Xoossay azazennaagee erettidaagaa. SHin nuuni azazettanawu metiyaabaa woy i hegaa ayssi yootidaakko akeekanawu deexxiyaabaa nuuni oottanaadan azazana danddayees. Neeni oottanaadan Xoossay azazido issi issibay deexxiyaabadan qoppay? Sabbakiyoogee issotu issotuyyo deexxana danddayees. Eti dungguuxa gidiyo gishshawu, erenna asawu mishiraachuwaa yootanawu metootana danddayoosona. Issotu issotuyyo timirtte keettan woy ooso sohuwan haratuppe dummatidi deꞌiyoogee deexxana danddayees. (Kes. 23:2; 1 Tas. 2:2) Neeni Abrahaamaagaadan, issi deexxiyaabaa oottanawu Mooriya pudettaa kiyaydda deꞌiyaabadan qoppa eray? Hegaadan gidikko, xalanne mino ammanoy deꞌiyo Abrahaama leemisuwaa qoppa! Ammanettida asatu leemisuwaa wotti dentti qoppiyoogee eta milatanaadaaninne Yihoowa nu mata Dabbo oottidi akko shiiqanaadan denttettana danddayees.—Ibr. 12:1, 2.

ANJJUWAA DEMISSIYA DABBOTAA

15. Abrahaami Yihoowayyo ammanettidi azazettidoogan mule zilꞌꞌettibeennaagaa waati erana danddayiyoo?

¹⁵ Abrahaami Yihoowayyo azazettidoogan zilꞌꞌettidee? Geeshsha Maxaafay, “Abrahaami daro wodiyaa de7idi, lo77o ceeggidi haiqqiis” yaagees. (Doo. 25:8) Abrahaamayyo layttay 175 gidido wode, ayyo wolqqay wurikkokka, ba kase deꞌuwaa qoppidi zilꞌꞌettibeenna. I Xoossaa Yihoowayyo mata dabbo gididi deꞌiis. SHin nuuni Abrahaami “lo77o ceeggidi” hayqqidoogaabaa nabbabiyo wode, i sinttappe deꞌanawu koyennabadan qoppana bessenna.

16. Abrahaami Gannatiyan deꞌiyo wode aybin ufayttanee?

¹⁶ Geeshsha Maxaafay, “Abrahaami Xoossai lo77o baasuwan hayyottidi keexxido katamaa naagees” yaagees. (Ibr. 11:10) Abrahaami issi gallassi he katamay, Xoossaa Kawotettay, ha saꞌaa hariyo wode beꞌanaagaanne ikka he wode deꞌanaagaa ammaniis! Abrahaami Gannate saꞌan deꞌiyoogaaninne Yihoowaara deꞌiya dabbotaa he wodekka minttiyoogan ay keena ufayttanaakko qoppa. I hayqqi simmin, a ammanoy Yihoowa ashkkarata daro shaꞌu layttawu keehi maaddidoogaa eriyo wode ay keena ufayttaneeshsha! Yisaaqi hayquwaappe attidoogee hegaappe keehi aadhiyaabawu leemiso gididoogaakka i he wode akeekana. (Ibr. 11:19) Qassi i Yisaaqa yarshshanawu giigettiyo wode keehi mishettidoogee, Yihooway ba Naꞌaa Yesuus Kiristtoosa wozo oottidi immiyo wode keehi mishettidoogaa miilooniyan qoodettiya ammanettida asay akeekanaadan maaddidoogaakka erana. (Yoh. 3:16) Abrahaama leemisoy siiquwaa qonccissiya aybippenne aadhiya, wozuwaa loytti nashshanaadan nuna ubbaa maaddees!

17. Neeni ay oottanawu murttadii, qassi kaalliya huuphe yohuwan nuuni ay beꞌanee?

¹⁷ Nuuni ubbay Abrahaamaagaadan ammaniyaageeta gidanaadan amottoos. Nuunikka aagaadan, eraa demmananne deꞌuwan issi issibaa beꞌana koshshees; nuuni ubba wode Yihoowaabaa tamaariyaabanne ayyo azazettiyaaba gidikko, i nuna anjjiyoogaanne naagiyoogaa akeekoos. (Ibraawe 6:10-12 nabbaba.) Merinawu Yihooway nu Dabbo gido! Kaalliya huuphe yohuwan, Yihoowayyo mata dabbo gidida ammanettida heezzu asatubaa beꞌana.