Gubaaꞌiyaa Loꞌꞌo Ayyaanaa Ubbatoo Naaga
“Nu Godaa Yesuus Kiristtoosa aaro kehatettai inttenaara [“intte qonccissiyo ayyaanaara,” NW] gido.”—PILI. 4:23.
NUUNI GUBAAꞌIYAN LOꞌꞌO AYYAANAY AAKKANAADAN OOTTANA DANDDAYIYOY AYBA OGIYAANEE?
Nu ishatuura wodiyaa aattiyoode
Mishettidi haggaaziyoogan
Issi uri gita nagaraa oottiyo wode cimatuyyo yootiyoogan
1. PHauloosi Piliphisiyuusa gubaaꞌiyaa, Yesuusi qassi Tiyaaxiroona gubaaꞌiyaa galatidoy aybissee?
KOYRO xeetu layttan Piliphisiyuusan deꞌiya Kiristtaaneti aquwaaban hiyyeesa. Gidikkokka, eti keha, qassi leemiso gidiya siiquwaa bantta mala Kiristtaanetuyyo bessidosona. (Pili. 1:3-5, 9; 4:15, 16) Kiitettida PHauloosi ayyaanay denttettin etayyo xaafido dabddaabbiyaa wurssettan, “Nu Godaa Yesuus Kiristtoosa aaro kehatettai inttenaara [“intte qonccissiyo ayyaanaara,” NW] gido” yaagidoy hegaassa. (Pili. 4:23) Tiyaaxiroonan deꞌiya Kiristtaanetikka hegaa mala eeshshaa qonccissido gishshau, Yihooway xoqqu xoqqu oottido Yesuus Kiristtoosi hagaadan giis: “Taani ne oosuwaa, ne siiquwaa, ne ammanuwaa, ne maaduwaanne ne genccaa erais; neeni koiro oottiyoogaappe ha77i darissada oottiyoogaa taani erais.”—Ajj. 2: 19.
2. Nu eeshshay gubaaꞌiyaa ayyaanay loꞌꞌo woy iita gidanaadan oottiyoy ayba ogiyaanee?
2 Hegaadankka, ha wodiyan deꞌiya Yihoowa Markkatu gubaaꞌee huuphiyan huuphiyan erettiyo eeshshay deꞌees. Issi issi gubaaꞌee siiquwan erettees. Hara gubaaꞌeti qassi, Kawotettaabaa sabbakiyo oosuwaanne kumetta wodiyaa haggaazuwaa mishettidi kaafiyoogan erettoosona. Nuuni huuphe xekkan loꞌꞌo eeshshaa qonccissiyo wode, gubaaꞌiyan issippetettay deꞌanaadaaninne gubaaꞌee ayyaanaaban diccanaadan maaddoos. (1 Qor. 1:10) Hara baggaara qassi, nu iita eeshshay gubaaꞌiyan deꞌiyaageeti Xoossaa oosuwaa kumetta wozanan oottennaadan, mishettidi haggaazennaadaaninne ubba wolqqaama nagaraa sheneho gaanaadan oottana danddayees. (1 Qor. 5:1; Ajj. 3:15, 16) Ne gubaaꞌiyaa ayyaanay ay malee? Gubaaꞌiyaa ayyaanay loꞌꞌo gidanaadan neeni ay oottana danddayay?
LOꞌꞌO AYYAANAY DEꞌANAADAN MINTTETTA
3, 4. Nuuni ‘kunttida yaaꞌan Yihoowa galatana’ danddayiyoy ayba ogiyaanee?
3 Mazamuraawee, “Kunttida yaa7an taani [Yihoowayyo] galataa immana; cora asaa shiiquwan taani nena galatana” yaagiis. (Maz. 35:18) Mazamuraawee Xoossaayyo goynniya haratuura deꞌiyo wode, Yihoowa galatanau guyye gibeenna. Wochiyo Keelaa Xinaatiyaa gujjin, saaminttan saaminttan shiiqiyo gubaaꞌe shiiqotun nu qofaa yootidi nu ammanuwaa qonccissiyoogan mishettiyaageeta gidiyoogaa bessiyo injje hanotay deꞌees. Nuuni ubbay nuna kaallidi deꞌiyaagaadan oychana danddayoos: ‘Taani danddayido keenan shiiqotun ta qofaa yootiyaanaa? SHiiqotuyyo loytta giigettada loꞌꞌo qofaa yootiyaanaa? So asau huuphe gidiyoogaadan, ta naati bantta qofaa yootanau kaseti giigettanaadan maaddiyaanaa, qassi nabbabennan zaaranaadan tamaarissiyaanaa?’
4 Mazamuraawee Daawiti nu wozanay minni deꞌiyoogee yexxiyoogaara gayttidaba gidiyoogaa yootiis. I, “Ta wozanai minnidi de7ees; abeet Xoossau, ta wozanai minnidi de7ees. Taani neeyyo yexxananne nena sabbana” yaagiis. (Maz. 57:7) Kiristtaane shiiqotun yexxiyo mazamureti wozanan minnidi Yihoowayyo ‘yexxanaunne a sabbanau’ nuna maaddoosona. Nuuni mazamuretuppe issota issota loytti erennaba gidikko, So Asaa Goynuwaa omarssan hegeeta aybissi meezetokkoo? ‘Nuuni nu deꞌo ubban Yihoowayyo yexxanau, qassi paxa deꞌido keenan ubban nu Xoossaa sabbanau’ murttidaageeta gidoos.—Maz. 104:33.
5, 6. Nuuni harata imatuwaa giigissidi mokkananne etau kehana danddayiyoy ayba ogiyaanee, yaatiyoogee gubaaꞌiyan aybi aakkanaadan oottii?
5 Imatuwaa makkidi nu ishatanne michota mokkiyoogee gubaaꞌiyan siiqoy aakkanaadan oottiyo hara oge. PHauloosi Ibraawetuyyo xaafido dabddaabbiyaa wurssetta shemppuwan, “Intte ishata siiqiyoogaa aggoppite. Imatta mokkiyoogaakka dogoppite” yaagidi zoriis. (Ibr. 13:1, 2) Bollaara geeddiyaageetanne eta machota woykko gubaaꞌiyan deꞌiya kumetta wodiyaa haggaaziyaageeta nu son shoobbiyoogee imattaa mokkiyoogaa bessiyo keehi loꞌꞌo oge. Amꞌꞌeta, aaway woykko aayee xallay deꞌiyo keettaa asaa woy issi issitoo nuuni imatuwaa giigissidi mokkiyoogan woy nu soo asaa goynuwau shoobbiyoogan goꞌettana danddayiya haratakka qoppite.
6 PHauloosi harati kaallidi deꞌiyaagaadan oottana mala zoranaadan Ximootiyoosau yootiis: “Eti lo77obaa oottanaadan, lo77o oosuwan duretanaadan, kehiyaageetanne haratuura shaakki ekkiyaageeta gidanaadan azaza. Hegaa yaatiyoogan eti sinttanau banttau mino baaso gidiya miishshaa banttau shiishshoosona. Hegaappe guyyiyan, eti tumu de7uwaa ekkana.” (1 Xim. 6:17-19) Hegaadan giyoogan, PHauloosi ba mala Kiristtaaneti kehiyaageeta gidanaadan minttettiis. Ikkonoomiyaara gayttidaagan metiyaabay deꞌishinkka kehiyaageeta gidana danddayoos. Hegaadan oottana danddayiyo issi loꞌꞌo ogee, awuraajjaa shiiquwaa baanaunne yaappe simmanau gidiya miishshay baynnaageeta maaddiyoogaa. Hegaa mala kehatettaa bessido asati shin waatana danddayiyoonaa? Etikka nashshiyoogaa bessanau banttau danddayettida keena guutta miishshaa hegau kessikko, gubaaꞌiyaa ayyaanay loꞌꞌo gididi deꞌanaadan minttettoosona. Hegaa bollikka, nu ishatuuranne michotuura kaseegaappe daro wodiyaa aattiyoogee nuuni eta siiqiyoogaanne etau qoppiyoogaa eti akeekanaadan oottennee? Nuuni “nunaara ammanuwan de7iyaageetuyyo” loꞌꞌobaa oottiyaaba, qassi nu wodiyaanne nu aquwaa etaara shaakkanau giigidaageeta gidikko, eta loytti siiqiyoogaa xalla gidennan, gubaaꞌiyaa ayyaanay loꞌꞌo gididi deꞌanaadan maaddoos.—Gal. 6:10.
7. Haraatu xuuraa genttiyoogee, gubaaꞌiyaa ayyaanay loꞌꞌo gididi deꞌanaadan maaddiyoy ayba ogiyaanee?
7 Ane haꞌꞌi qassi nu mala Kiristtaanetuura loytti siiqettanaadan maaddiya harabaa qoppa: laggetettaa, qassi asa xuuraa genttiyoogaa. (Leemiso 18:24 nabbaba.) Tumu laggeti bantta laggiyaa xuuraa genttoosona. Nu ishantti bantta wozanaabaa nuuyyo yootiyoonne nuuni hegaa asau yootennaagaa ammanettiyo wode, nu siiqoy kaseegaappe yaa minnees. Xuuraa genttiya, ammanettiya lagge gidiyoogan nu gubaaꞌiyan so asaagaa mala siiqoy deꞌanaadan maaddiyaageeta gidoos.—Lee. 20:19.
MISHETTADA HAGGAAZA
8. Yesuusi Lodooqiyan deꞌiya Kiristtaaneti ay oottanaadan zoridee, aybissi?
8 Yesuusi Lodooqiyaa gubaaꞌiyau hagaadan giis: “Taani ne oosuwaa erais. Neeni irxxa gidakka; woi misho gidakka; irxxa woi misho gidarkkiishsha. Neeni irxxa woi misho gidennan, bol77o gidiyo gishshau, taani nena ta doonaappe cuchchana hanais.” (Ajj. 3:15, 16) Lodooqiyaa gubaaꞌiyan deꞌiya Kiristtaaneti mishettidi haggaazibookkona. Hegee eti gubaaꞌiyan issoy issuwaa xeelliyo hanotaa moorennan aggenna. Hegaa gishshau, Yesuusi eta hagaadan giidi siiquwan zoriis: “Taani siiqiyo ubbaa seeraisinne qaxxayais; simmi keehi mishetta; ne nagaraappekka simma.”—Ajj. 3:19.
9. Nuuni mishettidi haggaaziyoogee gubaaꞌiyaa maaddiyoy ayba ogiyaanee?
9 Gubaaꞌiyaa ayyaanay loꞌꞌo gidanaadan, nuuni mishettidi haggaazana bessees. Gubaaꞌee eqqidoy, nu moottan deꞌiya, dorssa mala asata demmidi ayyaanaaban minttanaassa. Hegaa gishshau, nuuni erissiyo ashkkara oottiyo oosuwaa Yesuusaagaadan mishettidi oottana koshshees. (Maa. 28:19, 20; Luq. 4:43) Nuuni kaseegaappe aaruwan mishettidi haggaaziyaaba gidikko, ‘Xoossaara issippe oottiyaageeta’ gidiyoogaadan nu issippetettay minnees. (1 Qor. 3:9) Harati haggaazuwan bantta ammanuwau exatiyoogaanne ayyaanaabaa nashshiyoogaa nuuni akeekiyo wode, eta kaseegaappe aaruwan siiqoosinne bonchoos. Qassi nu haggaazuwan hashetidi “issippe” oottiyoogee gubaaꞌiyan issippetettay deꞌanaadan maaddees.—Sofonaasa 3:9 nabbaba.
10. Nuuni kaseegaappe loytti haggaazanau baaxetiyoogee gubaaꞌiyan deꞌiya harata maaddiyoy ayba ogiyaanee?
10 Nuuni kaseegaappe loytti haggaazanau baaxetiyoogee harati loꞌꞌobaa oottanaadankka denttettees. Nuuni haggaazuwan demmiyo asau wozanappe qoppiyoonne eta wozanaa denttettiya ogiyan tamaarissanau baaxetiyo wode, kaseegaappe aaruwan mishettidi haggaaziyaageeta gidoos. (Maa. 9:36, 37) Nuuni mishettidi haggaaziyaaba gidikko, nunaara haggaaziyaageetikka hegaadan oottoosona. Yesuusi issi erissiyo ashkkaray barkka gidennan, erissiyo ashkkarati naaꞌꞌay naaꞌꞌay sabbakanaadan kiittiis. (Luq. 10:1) Hegee eti loohanaadaaninne issoy issuwaa minttettanaadan maaddiyoogaa xalla gidennan, eti keehi mishettidi haggaazanaadankka maaddiis. Nuuni Kawotettaabaa mishettidi sabbakiyaageetuura oottiyoogan ufayttiyoogee qonccee! Eti mishettidi sabbakiyoogee nuna minttetteesinne etaagaadan mishettidi sabbakanaadan denttettees.—Roo. 1:12.
ZUUZUMMENNAADAANINNE NAGARAA OOTTENNAADAN NAAGETTA
11. Muuse wode issi issi Israaꞌeelati ay mala xeelay deꞌiyoogeeta gididonaa, hegee eti waananaadan oottidee?
11 Israaꞌeelati ooratta dere gidoosappe guutta saaminttay aadhi simmin zuuzummiyoogaa woy amassaliyoogaa doomidosona. Hegee eti Yihoowa bollinne a kalꞌꞌatiyaageetu bolli makkalanaadan oottiis. (Kes. 16:1, 2) Gibxxeppe kiyida Israaꞌeelatuppe Hidoota Biittaa gelidaageeti keehi guutta. Israaꞌeela deriyaa iita eeshshaappe denddidaagan i oottidobaa gaasuwan, ubba Muuseekka Hidoota Biittaa gelibeenna. (Zaa. 32:48-52) Iita eeshshay deꞌiyoogeeta gidennaadan ha wodiyan nuuni ay oottana danddayiyoo?
12. Nuuni zuuzummiyoogaappe naagettana danddayiyoy ayba ogiyaanee?
12 Nuuni zuuzummennaadan naagettana bessees. Hegau bana kawushshiyoogeenne aawatetta maataa bonchiyoogee nuna maaddiyaaba gidikkonne, oonaara peꞌiyaakko qoppana koshshees. Nuuni wodiyaa aattanau iitabaa dooriyoogee woy xillotettaa maaraa xaasayi xeelliya, nunaara oottiyaageetuura woy tamaariyaageetuura daro wodiyaa aattiyoogee keehippe qohiyaaba. Iita eeshshay deꞌiyo woy koyidobaa oottanaadan minttettiya asatuura wodiyaa aattennaagee eratetta.—Lee. 13:20.
13. Zuuzummiyoogan kanddoy moorettiyoogee merettanaadan oottana danddayiyo, gubaaꞌiyaa ayyaanaaban qohiya harabay aybee?
13 Zuuzummiyoogan kanddoy moorettiyoogee ayyaanaaban qohiya harabaykka merettanaadan oottana danddayees. Leemisuwau, zuuzummiyoogee gubaaꞌiyaa sarotettaanne issippetettaa moorana danddayees. Nu Kiristtaane laggeta amassaliyoogee eta azzanttiyoogaa xalla gidennan, eta sunttaa mooriyoonne eta boriyo nagaran yeggana danddayees. (Wog. 19:16; 1 Qor. 5:11) Koyro xeetu laytta gubaaꞌiyan zuuzummiya issoti issoti “godatettaa karoosona; bonchcho meretatakka cayoosona.” (Yih 8, 16) Gubaaꞌiyan aawatettay deꞌiyoogeetu bolli hegaadan zuuzummiyoogee Xoossaa ufayssennaba gidiyoogee qoncce.
14, 15. (a) Wolqqaama nagaraa coꞌꞌu gi xeelliyoogee gubaaꞌiyaa bolli ay kaalettii? (b) Issi uri geeman nagaraa oottidoogaa nuuni eriyaaba gidikko ay oottana bessii?
14 Gubaaꞌiyan deꞌiya issi uri geella likkiyaappe aattidi uyiyoogan, pornograafiyaa beꞌiyoogan woy shori baynna deꞌuwaa deꞌiyoogan geeman nagaraa oottiyoogaa nuuni erikko shin? (Efi. 5:11, 12) Wolqqaama nagaraa oottida uri deꞌiyoogaa eriiddi coꞌꞌu giyoogee, gubaaꞌiyan Yihoowa ayyaanay deꞌennaadan oottana danddayees; hegee gubaaꞌiyaa sarotettay moorettanaadan oottees. (Gal. 5:19-23) Beni Qoronttoosan deꞌida Kiristtaaneti iitabaa bantta giddoppe diggana koshshidoogaadan, ha wodiyan gubaaꞌiyaa ayyaanay loꞌꞌo gididi deꞌanaadan, gubaaꞌiyaa mooriya aybanne nuunikka diggana bessees. Gubaaꞌiyaa sarotettau neeni ay oottana danddayay?
15 Kasetidi beꞌidoogaadan, issi issiban xuuraa genttiyoogee keehippe koshshees; ubba qassi harati banttau siyettiyaabaanne bantta qoppidobaa nuussi yootiyo wode hegaadan oottiyoogee keehi koshshiyaaba. Issi ura xuuraa asau yootiyoogee gita nagara, qassi hegee a keehi qohiyaabaa. Gidikkokka, issi uri gita nagara oottiyo wode, hegaa xeelliyaagan Geeshsha Maxaafay aawatettaa immiyoogeetussi, giishin gubaaꞌe cimatussi nuuni yootana koshshees. (Wogaabaa 5:1 nabbaba.) Hegaa gishshau, issi ishay woy michiyaa hegaa mala nagaraa oottidoogaa nuuni eriyaaba gidikko, he uri gubaaꞌe cimati bana maaddanaadan oychana mala minttettana bessees. (Yaaq. 5:13-15) SHin he uri amarida wodiyan hegaadan oottana xayikko, nuuni gubaaꞌe cimatussi yootana koshshees.
16. Issi uri oottido wolqqaama nagaraa nuuni cimatussi yootiyoogee gubaaꞌiyaa loꞌꞌo ayyaana naaganau maaddiyoy ayba ogiyaanee?
16 Kiristtaane gubaaꞌee asay ayyaanaaban woppaa demmiyo soho; issi uri wolqqaama nagaraa oottiyo wode, nuuni hegaa gubaaꞌe cimatussi yootiyoogan gubaaꞌiyaa qohiyaabaappe naagana bessees. Nagaraa oottida uri cimatu zoriyaa siyidi, qassi eta seeraa ekkidi ba nagaraappe simmikko, i hegaappe simmin gubaaꞌiyaa ayyaanaa moorenna. Gidoppe attin, wolqqaama nagaraa oottida uri ba nagaraappe simmennaba, qassi cimati siiquwan zoriyo zoriyaa siyennaba gidikko shin? I gubaaꞌiyaappe bohettiyoogee gubaaꞌiyaa mooriyaabay ‘bayanaadan’ woy xayanaadan oottees; qassi hegee gubaaꞌiyaa loꞌꞌo ayyaanaa ubbatoo naaganaadan maaddees. (1 Qoronttoosa 5:5 nabbaba.) Ee, gubaaꞌiyaa loꞌꞌo ayyaanaa ubbatoo naaganau, nuuni ubbay suurebaa oottana, cimatuura hashetananne nu mala Kiristtaanetu sarotettaa naagana bessees.
‘AYYAANAA ISSIPPETETTAA’ NAAGANAU BAAXETA
17, 18. ‘Ayyaanaa issippetettaa’ naaganau nuna aybi maaddii?
17 Beni wode deꞌida, Yesuusi erissiyo ashkkarati, “Yesuusi kiittidoogeetu [timirttiyaa]” mintti kaalliyoogan gubaaꞌiyaa issippetettau maaddidosona. (Oos. 2:42) Eti cimati Geeshsha Maxaafaappe zoriyo zoriyaanne immiyo kaaletuwaa xoqqu ootti xeellidosona. Ha wodiyan deꞌiya cimatikka ammanettida wozannaama ashkkaraa kaaletuwaa kaalliyo gishshau, gubaaꞌiyan deꞌiya ubbay minetteesinne issippetettan deꞌees. (1 Qor. 1:10) Nuuni Yihoowa dirijjitee Geeshsha Maxaafaappe tamaarissiyoobaa azazettiyoonne cimatu kaaletuwaa kaalliyo wode, ‘issippe gatti qachiya sarotettan ayyaanaa issippetettaa naaganau’ wozanappe baaxetiyoogaa bessoos.—Efi. 4:3.
18 Yaatiyo gishshau, gubaaꞌiyaa loꞌꞌo ayyaanaa ubbatoo naaganau nuuyyo danddayettida ubbabaa oottiyaageeta gidoos. Hegaadan oottiyaaba gidikko, ‘nu Godaa Yesuus Kiristtoosa aaro kehatettay nu qonccissiyo ayyaanaara gidanaagaa’ ammanettoos.—Pili. 4:23, NW.
[Sinttaa 24n deꞌiya misiliyaa qonccissuwaa]
SHiiqotuyyo giigettada loꞌꞌo qofaa yootiyoogan gubaaꞌiyaa loꞌꞌo ayyaanay aakkanaadan maadday?
[Sinttaa 25n deꞌiya misiliyaa qonccissuwaa]
Nu mazamureta meezetiyoogan gubaaꞌiyaa loꞌꞌo ayyaanay aakkanaadan ootta