Kiristtaane Gubaaꞌiyan Neeyyo Deꞌiya Sohuwaa Xoqqu Oottada Xeella
“Xoossai ba koyidoogaadan, bollaa qommota issuwaa issuwaa bollan wottiis.”—1 QORONTTOOSA 12:18.
1, 2. (a) Gubaaꞌiyan deꞌiya ubbay huuphiyan huuphiyan nashshiyo sohoy deꞌana danddayiyoogaa nuna akeekissiyay aybee? (b) Ha huuphe yohuwan pilggana oyshati awugeetee?
BENI Israaꞌeeletu wodeppe doommidi, gubaaꞌee Yihooway ba asaassi koshshiyaabaa kunttanaunne eta kaalettanau goꞌettiyo oge gididi takkiis. Leemisuwau, Israaꞌeeleti Aaya katamaa olan xooni simmin, “Higgiyaa Maxaafan xaafidoogaadan, Yaasu higgiyaa qaalaa ubbaa, anjjuwaakka qanggettaakka . . . kumetta Israa7eela yaa7aassi . . . nabbabiis.”—Yaasa 8:34, 35.
2 Koyro xeetu laytta M.Ln, kiitettida PHauloosi Kiristtaane cimaa Ximootiyoosassi, Kiristtaane gubaaꞌee ‘Xoossaa keettanne’ “tumatettau tuussanne tuuqe” gidiyoogaa yootiis. (1 Ximootiyoosa 3:15) Xoossaa ‘keettay’ ha wodiyan saꞌaa yuushuwan deꞌiya tumu Kiristtaanetu ishatetta maabaraa. PHauloosi Qoronttoosa gubaaꞌiyau ayyaanaa kaaletuwan xaafido koyro dabddaabbiyan, shemppo 12n, gubaaꞌiyaa issi asa bollan leemisiis. Bollaa qommotu oosoy dumma dumma gidikkonne, ubbaykka koshshiyaaba gidiyoogaa i yootiis. PHauloosi, “Xoossai ba koyidoogaadan, bollaa qommota issuwaa issuwaa bollan wottiis” yaagidi xaafiis. I ubba, “bollaa qommotuppe bonchchettennabaa nuussi milatiyaageeta nuuni daro bonchcheettees” yaagiis. (1 Qoronttoosa 12:18, 23) Yaatiyo gishshau, issi Kiristtaanee Xoossaa keettan oottiyoobay hara ammanettida Kiristtaaniyaagaappe aadhiyaaba woy guuxxiyaaba giyoogaa gidenna. Issuwaagee haraagaappe dumma. Yaatin, nuuni Xoossaa giigissuwan nuuyyo deꞌiya sohuwaa waatidi nashshana woykko xoqqu ootti xeellana danddayiyoo? Kiristtaane gubaaꞌiyan nuuyyo deꞌiya sohoy dummatanaadan oottiyaabati aybee? ‘Asa ubbau nu dichay qonccanaadan’ waati oottana danddayiyoo?—1 Ximootiyoosa 4:15.
Nuuyyo Deꞌiya Sohuwaa Nashshiyoogaa—Waatidi?
3. Gubaaꞌiyan nuuyyo deꞌiya sohuwaa akeekiyoonne hegaa nashshiyoogaa bessiyo issi ogee aybee?
3 Kiristtaane gubaaꞌiyan nuuyyo deꞌiya sohuwaa akeekiyoonne hegaa nashshiyoogaa bessiyo issi ogee, ‘ammanettida wozannaama ashkkaraaranne’ a kalꞌꞌatiya Bollaara Heemmiyaagaara wozanappe hashetiyoogaa. (Maatiyoosa 24:45-47 nabbaba.) Ammanettida wozannaama ashkkaray immiyo kaaletuwaa loytti kaalliyaakkonne nu hanotaa akeekana koshshees. Leemisuwau, maayiyoobaanne alleeqettiyoobaa, wodiyaa aattiyoobaanne Intternneetiyaa bessenna ogiyan goꞌettiyoogaa xeelliyaagan daro layttau zoree imettiis. Nuuni ayyaanaaban naagettanau ha loꞌꞌo zoriyaa akeekan siyiyoo? So asaa goynuwau aggennan shiiqanaadan imettida zoriyaa shin? He zoriyaa wozanan wottidi hegau issi omarssaa bazzidetii? Nuuni ekkibeenna woy gelibeennaba gidikko, Geeshsha Maxaafaa buzo xannaꞌanau prograamiyaa kessidoo? Ammanettida wozannaama ashkkaraa kaaletuwaa kaalliyaaba gidikko, Yihooway nuna huuphe xekkaaninne so asa xekkan anjjana.
4. Buzo allaalle giyooban nuuni kuuyiyo wode qoppana koshshiyoy aybee?
4 Issoti issoti wodiyaa aattiyoobay, maayiyoobaynne alleeqettiyoobay buzo allaalle gaana danddayoosona. Gidikkokka, gubaaꞌiyan bau deꞌiya sohuwaa nashshiya, ba huuphiyaa geppida Kiristtaanee kuushsha kuuyiyo wode ba dooro xallan kuuyana koshshenna. Yihoowa Qaalan, Geeshsha Maxaafan qonccida A xeelaa loytti akeekana bessees. Geeshsha Maxaafan deꞌiya qofay ‘nu gediyaassi xomppe, nu ogiyaassikka pooꞌo’ gidana koshshees. (Mazamure 119:105) Nuuni buzo allaalle gididaban kuuyiyoobay nu haggaazuwaa, gubaaꞌiyan deꞌiya asatanne hara asata bochana danddayiyoogaa qoppiyoogeekka eratetta.—2 Qoronttoosa 6:3, 4 nabbaba.
5. Nu huuphiyan ammanettiyo koshshay deꞌennaadan naagettana koshshiyoy aybissee?
5 “Xoossaayyo azazettenna asaa ha77i haariya” ayyaanay carkkodan ubbasaa gakkidaba. (Efisoona 2:2) He ayyaanay nuussi Yihoowa dirijjitiyaa kaaletoy koshshenna giidi qoppanaadan oottana danddayees. Nuuni, ‘kiitettida Yohaannisi giyoogaa ekkenna’ Diyotirefeesa mala gidana koyennaagee qoncce. (3 Yohaannisa 9, 10) Nu huuphiyan ammanettiyo koshshay deꞌennaadan naagettana koshshees. Yihooway ha wodiyan ba kiitaa yootanau goꞌettiyo ogiyaa nuuni bonchennaagaa haasayan woykko oosuwan mule qonccissana bessenna. (Qoodaabaa 16:1-3) Hegaadan oottiyoogaappe, nuuni ammanettida wozannaama ashkkaraara hashetiyo maataa nashshana koshshees. Nu gubaaꞌiyan sintta xeera gididi oottiyaageetuyyo azazettanaunne haarettanau baaxetana koshshennee?—Ibraawe 13:7, 17 nabbaba.
6. Nu hanotaa akeekana koshshiyoy aybissee?
6 Gubaaꞌiyan nuuyyo deꞌiya sohuwaa nashshiyoogaa bessiyo hara ogee, nu hanotaa loytti akeekidi ‘nu haggaazuwaa sabbanaunne’ Yihoowa bonchissanau nuuyyo danddayettida ubbaa oottiyoogaa. (Roome 11:13) Issoti issoti kumetta wodiyaa aqinye gididosona. Harati qassi misoonaawe, woradaanne awuraajjaa bollaara geeddiyaageetanne alame yuushuwan deꞌiya Beeteele keettaa asa gididi oottoosona. Daro ishatinne michoti Kawotettaa Addaraashshaa keexxiyo oosuwan maaddoosona. Yihoowa asaappe dariya baggay ba keettaa asau ayyaanaaban koshshiyaabaa kunttanaunne saaminttan saaminttan haggaazuwan shaahettanau minnidi oottees. (Qolasiyaasa 3:23, 24 nabbaba.) Xoossaa oosuwaa oottanau wozanappe koyiyaabanne nuuyyo danddayettida ubban kumetta shemppuwaappe ayyo oottiyaaba gidikko, ubba wode a giigissuwan nuuyyo sohoy deꞌiyoogaa ammanettana danddayoos.
Gubaaꞌiyan Nuuyyo Deꞌiya Sohuwan Dummatettaa Medhiyaabata
7. Gubaaꞌiyan nuuyyo deꞌiya sohuwaa nu hanotay waatidi bochana danddayiyaakko qonccissa.
7 Nuuni nu hanotaa akeekiyoogee koshshiyaabaa; aybissi giikko, nuuni gubaaꞌiyan oottana danddiyoobaa amarida ogiyan bochiyo gishshataassa. Leemisuwau, gubaaꞌiyan ishatuyyo deꞌiya sohoy issi issiban michotuugaappe dummatees. Layttay, payyatettaynne harabaykka nuuni Yihoowayyo oottiyo oosuwan dummatettay deꞌanaadan oottees. Leemiso 20:29y: “Yelagatu bonchchoi eta wolqqaa; cimatuyyookka eta puulunttai etau bonchcho” yaagees. Gubaaꞌiyan deꞌiya yelagati wolqqa koshshiya daro oosuwaa oottana danddayoosona; shin gasttati aadhida eratettaaninne deꞌuwan demmidoban gubaaꞌiyaa keehippe maaddoosona. Yihoowa dirijjitiyan oottana danddayiyo ubbabay Xoossaa aaro kehatettan oottiyooba gidiyoogaakka hassayana koshshees.—Oosuwaa 14:26; Roome 12:6-8.
8. Nuuni gubaaꞌiyan oottiyoobaa likkiyaa nu koshshay waati bochii?
8 Michontta gidida naaꞌꞌu yelagatu leemisoy Kiristtaane gubaaꞌiyan nuuyyo deꞌiya sohuwaa bochiya harabaa qonccissees. Naaꞌꞌaykka naaꞌꞌantto xekka timirttiyaa wurssidosona. Eta hanotay issi mala. Eti timirttiyaa wurssidi kumetta wodiyaa haggaaziya aqinye gidanaadan minttettiyoogan, yelidaageeti banttau danddayettiyaabaa oottidosona. Timirttiyaa wurssa simmada, issinniyaa kumetta wode aqinye gidaasu; hankkoriyaa kumetta gallassaa oottiyo oosuwaa oyqqaasu. Eti dumma dummabaa dooridoy aybissee? Eta koshshay dumma dumma gidiyo gishshataassa. Wurssettan, naaꞌꞌaykka bantta dosiyoobaa dooridosona. Nu giddoppe darotu hanotay hegaa mala gidennee? Xoossaa oosuwan nuuni ay oottana koyiyaakko loytti qoppana koshshees. Nu hanotaa giigissana koshshiyaaba gidikkokka, Xoossaa oosuwaa kaseegaappe gujjidi oottana danddayiyoo?—2 Qoronttoosa 9:7.
9, 10. Nuuni Yihoowa oosuwaa kaseegaappe gujjidi oottanau qoppennaba gidikko, ay oottana koshshii?
9 Yihoowa oosuwaa kaseegaappe gujjidi oottanau nuuni qoppennabanne gubaaꞌiyau oottiyo amaridabay gidees giidi qoppiyaaba gidikkoshin? PHauloosi Piliphisiyuusa gubaaꞌiyau xaafido dabddaabbiyan: “Xoossai inttena bau eeno giissanaadaaninne qassi i qoppidobaa intte oottanaadan intte giddon ubba wode oottees” yaagiis. Ee, Yihooway nu giddon woykko nu garssan oottanaunne nu koshshaa laammanau danddayees.—Piliphphisiyuusa 2:13; 4:13.
10 Yaatiyo gishshau, nuuni a sheniyaa oottanau koyanaadan Yihoowa oychana koshshennee? Beni Israaꞌeele Kawuwaa Daawiti hegaadan oottiis. I: “Abeet GODAU, tana ne ogiyaa bessa; ne ogiyaa tana tamaarissa. Neeni tana ashshiya Xoossaa gidiyo gishshau, ne tumatettan tana kaalettanne tamaarissa. Gallassa kumettan taani nenan ufaissaa oottais” yaagidi woossiis. (Mazamure 25:4, 5) Nuunikka Yihoowa ufayssiyaabaa oottanau koyanaadan woossiyoogan hegaadan oottana danddayoos. Nuuni etassi oottiyooban Xoossaa Yihoowaunne a Naꞌau aybi siyettiyaakko wotti denttidi qoppiyo wode, eta wozanappe nashshoos. (Maatiyoosa 26:6-10; Luqaasa 21:1-4) Hegaadan nashshiyoogee nuuni ayyaanaaban diccanau koyana mala Yihoowa woossanaadan denttettana danddayees. Nuuyyo deꞌana koshshiya xeelaa bessiyoogan hananabaa yootiya Isiyaasi loꞌꞌo leemiso gidees. Yihooway: “Oona kiittoo? Nuuyyo oonee baanai?” yaagiyoogaa Isiyaasi siyidi: “Hekko, tana kiitta” yaagiis.—Isiyaasa 6:8.
Dichaa Bessiyoogaa —Ayba Ogiyan
11. (a) Ishati Yihoowa dirijjitiyan aawatetta maataa demmanau baaxetiyoogaa koshshidoy aybissee? (b) Issi ishay Kiristtaane gubaaꞌiyan maataa demmanau waani baaxetana danddayii?
11 Saꞌa yuushuwan, haggaazo laytta 2008n, 289,678 asay xammaqettiis; hegee sintta xeera gididi kaalettiya ishati keehi koshshiyoogaa bessees. Issi ishay hegau waatidi zaaro immana koshshii? Geeshsha Maxaafay yootiyo, gubaaꞌiyau oottiyaageetuppenne cimatuppe koyettiya gidaa kunttanau baaxetiyoogaana. (1 Ximootiyoosa 3:1-10, 12, 13; Tiitu 1:5-9) Issi ishay Geeshsha Maxaafay yootiyo he gidaa kunttanau waani baaxetana danddayii? Haggaazuwan, qassi gubaaꞌiyan oottanaadan imettida oosuwaa minnidi oottiyoogan, Kiristtaane shiiqotun immiyo qofaa kaseegaappe murutissiyoogaaninne ba mala Kiristtaanetuyyo qoppiyoogan hegaa bessana danddayees. I hegaadan oottiyoogan, Kiristtaane gubaaꞌiyan bau deꞌiya sohuwaa xoqqu ootti xeelliyoogaa bessees.
12. Yelagati tumau mishettiyoogaa waati bessana danddayiyoonaa?
12 Yelaga ishati, ubba qassi panttatettaa wodiyan deꞌiyaageeti gubaaꞌiyan dichaa bessanau ay oottana danddayiyoonaa? Eti Geeshsha Maxaafaa eraa demmiyoogan, ‘Xoossaa ayyaanay immiyo aadhida eratettaaninne akeekan’ diccanau baaxetana danddayoosona. (Qolasiyaasa 1:9) Xoossaa Qaalaa minnidi xannaꞌiyoogeenne gubaaꞌiyaa shiiqotun wozanappe shaahettiyoogee hegau maaddiyoogee qoncce. Yelagati dumma dumma qommo gidida kumetta wode haggaazuwan oottiyo ‘oosoy kumido aaho penggiyaara’ gelanaassi gidaa kunttanau baaxetana danddayoosona. (1 Qoronttoosa 16:9) Nu deꞌuwan Yihoowa oosuwaa oottiyoogee keehippe ufayssiyaanne daro anjjo demmiyo deꞌo oge.—Eranchchaa 12:1 nabbaba.
13, 14. Gubaaꞌiyan banttau deꞌiya sohuwaa nashshiyoogaa michoti ayba ogiyan bessana danddayiyoonaa?
13 Michotikka Mazamure 68:11 polettanaadan oottiyo maataa xoqqu oottidi xeelliyoogaa bessana danddayoosona. He xiqisee: “Godai kiitaa kiittiis; he kiitaa efiida maccaasati daro” yaagees. Michoti gubaaꞌiyan banttau deꞌiya sohuwaa nashshiyoogaa bessana danddayiyo ogetuppe erettida issi ogee, erissiyo ashkkarata oottiyo oosuwan shaahettiyoogaa. (Maatiyoosa 28:19, 20) Yaatiyo gishshau, michoti haggaazuwan kumetta hanotan shaahettiyoogaaninne he oosuwau bantta goꞌꞌaa yarshshiyoogan, gubaaꞌiyan banttau deꞌiya sohuwaa nashshiyoogaa bessoosona.
14 PHauloosi Tiituyyo hagaadan giidi xaafiis: “Cima maccaasai geeshsha de7o de7iya maccaasatudan haniyaagaa, . . . lo77obaa tamaarissiyaagaa gidanau bessees. Eti Xoossaa qaalai borettenna mala, bantta keettaawatanne bantta naata siiqiyaageeta, banttanakka naagiyaageeta, geeshshata, bantta keettan oottiyaageeta, kehatanne bantta keettaawatussikka azazettiyaageeta gidana mala, yelaga maccaasaa tamaarissona.” (Tiitu 2:3-5) Gastta michoti gubaaꞌiyaa keehippe goꞌꞌana danddayoosona! Gubaaꞌiyan sintta xeera gididi oottiya ishata bonchiyoogaaninne maayiyoobaa, alleeqettiyoobaanne wodiyaa aattiyoobaa milatiyaabata xeelliyaagan eratetta kuushshaa kuuyiyoogan, eti haratuyyo loꞌꞌo leemiso gidoosonanne gubaaꞌiyan banttau deꞌiya sohuwaa xoqqu oottidi xeelliyoogaa bessoosona.
15. Baddotettay siyettiyo gelabeenna issi michiyaa hegaa waata xoona kiyana danddayay?
15 Gelabeenna michiyaa gubaaꞌiyan bau deꞌiya sohuwaa akeekanau issi issitoo metootana danddayausu. Hegaadan siyettido issi michiyaa: “Gelennan deꞌiyoogee, issi issitoo baddotettay siyettanaadan oottana danddayees” yaagaasu. A he hanotaa waata xoona kiyidaakko odaydda: “Woossiyoogeenne xannaꞌiyoogee taani ta sohuwaa akeekanaadan maaddiis. Yihooway tana waatidi xeelliyaakko xannaꞌaas. Yaatada gubaaꞌiyan deꞌiya harata maaddanau baaxetaas. Hegee taani tabaa xallaa qoppiyoogaa agganaadan maaddiis” yaagaasu. Mazamure 32:8y yootiyoogaadan, Yihooway Daawitayyo: “Taani nena zorananne naagana” yaagiis. Ee, Yihooway gelibeenna michota gujjin, ba ashkkara ubbatuyyo qoppees; qassi eti ubbay gubaaꞌiyan banttau deꞌiya sohuwaa akeekanaadan maaddees.
Ne Sohuwaa Naaga!
16, 17. (a) Ba dirijjitiyaa yame gidanaadan Yihooway shoobbido shoobiyaa ekkiyoogee, nuuni kuuyido kuushsha ubbaappe aadhiyaaba gididoy aybissee? (b) Yihoowa dirijjitiyan nuuni nu sohuwaa waatidi naagana danddayiyoo?
16 Yihooway ba ashkkarata ubbaa banaara dabbotanaadan siiquwan baakko ehees. Yesuusi: “Ta Aawai taakko ehiido asappe attin, taakko yaanau danddayiya asi baawa” yaagiis. (Yohaannisa 6:44) Saꞌan deꞌiya, biilooniyan qoodettiya asa ubbaappe Yihooway ha wodiyan nuna ba soo shoobbiis. Nuuni kuuyido hara ubbabaappe he shoobiyaa ekkidoogee aadhiyaaba. He shoobiyaa ekkidoogee nu deꞌuwau halchoy deꞌanaadan oottiis. Kiristtaane gubaaꞌiyan nuuyyo sohoy deꞌiyo gishshau, keehippe ufayttoos!
17 Mazamuraawee: “Abeet GODAU, neeni de7iyo keettaa . . . taani dosais” yaagiis. I: “Ta tohoi lo77o sohuwan eqqiis; taani kunttida yaa7an GODAA galatana” yaagidikka yexxiis. (Mazamure 26:8, 12) Tumu Xoossay nu ubbau ba dirijjitiyan sohoy deꞌanaadan oottiis. Xoossaa kaaletuwaa ubbatoo kaalliyoogaaninne Xoossaa oosoy daridoogeeta gidiyoogan, Yihoowa giigissuwan nuuyyo deꞌiya alꞌꞌo sohuwaa naagana danddayoos.
Hassayay?
• Ubba Kiristtaanetuyyo gubaaꞌiyan sohoy deꞌees giyoogee bessiyaaba gididoy aybissee?
• Xoossaa dirijjitiyan nuuyyo deꞌiya sohuwaa nashshiyoogaa waati bessiyoo?
• Nuuyyo gubaaꞌiyan deꞌiya sohuwan dummatettaa medhiyaabati aybee?
• Yelaga Kiristtaanetinne gasttati Xoossaa giigissuwan banttau deꞌiya sohuwaa nashshiyoogaa waatidi bessana danddayiyoonaa?
[Sinttaa 22n deꞌiya misiliyaa]
Ishati Kiristtaane gubaaꞌiyan maataa demmanau ayba ogiyan baaxetana danddayiyoonaa?
[Sinttaa 23n deꞌiya misiliyaa]
Michoti gubaaꞌiyan banttau deꞌiya sohuwaa nashshiyoogaa waatidi bessana danddayiyoonaa?