Giiga Xayida Aqo Deꞌuwan Loꞌꞌobaa Qoppa

“Ekkidaageetanne gelidaageeta azazais. SHin hagaa azaziyaagee Godaa gidiyoogaappe attin, tana gidikke.”—1 QOR. 7:11.

QONCCISSANA DANDDAYAY?

Xoossay aqo laggeta issippe gattidoy ayba ogiyaanee?

Aqo deꞌuwan metoy gakkiyo Kiristtaaneta cimati waatidi maaddana danddayiyoonaa?

Nuuni aqo deꞌuwaa ayba ogiyan xeellana koshshii?

1. Kiristtaaneti aqo deꞌuwaa xeelliyoy ayba ogiyaanee, aybissi?

KIRISTTAANETI aqo oyqqiyo wode, Xoossau geppoosona. Hegee gita aawatetta. (Era. 5:4-6) Aqo deꞌuwaa Doomissidaagee Yihoowa gidiyo gishshau, aqo deꞌuwaa oyqqiyaageeta ‘issippe gattiday’ a. (Mar. 10:9) Aqo laggeti eta biitta higgee aybanne gido, issippe waaxettidosona. Yihoowa ashkkarati aqo deꞌuwaa maachaa Yihooway xeelliyoogaadan xeellana koshshees. Aqo laggeti aqo oyqqiyo wode Yihoowayyo goynniyaageeta gidana xayikkokka, hegaadan xeellana bessees.

2. Ha huuphe yohuwan beꞌana oyshati awugeetee?

² Injje aqo deꞌoy daro ufayssaa demissana danddayees. Aqo deꞌoy giiga xayikko shin, ay oottana danddayettii? Giiga xayida aqo deꞌuwaa giigissana danddayettii? Aqo deꞌuwan sarotetti baynnaageeta aybi maaddana danddayii?

UFAYSSIYA AQO DEꞌO GIDANEEYYE AZZANTTIYAAGAA GIDANEE?

3, 4. Issi uri aqo laggiyaa dooriyo wode eratettan kuuyana xayikko aybi hanana danddayii?

³ Issi Kiristtaaniyaa aqo deꞌoy injjetiyo wode, hegee ufayssiyaabanne Yihoowa bonchissiyaaba. Aqo deꞌoy injjetennaba gidikko, hegee aybippenne aaruwan azzanttiyaaba. Aqo oyqqanau qoppiya issi Kiristtaanee Xoossaa kaaletuwaa kaallikko, aqo deꞌuwaa loꞌꞌo ogiyan doommana danddayees. Hara baggaara, azina woy macho dooriyo wode eratetta kuushshaa kuuyenna uri hidootaa qanxxananne azzanana danddayees. Leemisuwau, issi issi yelagati aqo deꞌuwaara gayttida aawatettau giigettennan aqo lagge koyoosona. Issoti issoti issi uraara intterneetiyan gayttidi, dirbban ufayssenna aqo deꞌuwaa doommoosona. Harati qassi giigissido uraara deexo nagaraa oottidi, issoy issuwaa bonchenna hanotan aqo oyqqoosona.

⁴ Issi issi Kiristtaaneti “Godaa ammaniya asaa wogan” ekkenna woy gelenna gishshau, so asay dumma dumma haymaanootiyaa kaalliyoogaappe denddidaagan azzanoosona. (1 Qor. 7:39) Ne hanotaykka hegaa mala gidikko, Xoossay atto gaanaadaaninne maaddanaadan woossa. Yihooway, issi uri kase oottido nagaraa gaasuwan a gakkiya metuwaa qaarennaba gidikkokka, ba nagaraappe simmida uri metuwaa genccanaadan maaddees. (Maz. 130:1-4) A ufayssanau neeni danddayiyo ubbabaa ootta, yaanikko ‘Yihoowa ufayssay neeyyo wolqqa gidana.’—Nah. 8:10.

AQO DEꞌUWAA GIIGA XAYSSIYAABI MERETTIYO WODE

5. Ufayssi baynna aqo deꞌuwan woygidi qoppana koshshennee?

⁵ Bantta aqo deꞌuwan azzaniyaageeti, ‘Ta aqo deꞌoy laalettennaadan tumuppe koyiyaanaa? Taani hara ura geliyaakko woy ekkiyaakko ufayttennan aggikke!’ giidi qoppana danddayoosona. Eti bantta aqo laggiyaappe shaahettanau koyananne hagaadan qoppana danddayoosona: ‘Taani laꞌa gidana koyays! Aybissi ta machiyo yeddikkinaa woy ta azinaappe anjjettikkinaa? Geeshsha Maxaafaa maaraadan machiyo yeddana woy azinaappe anjjettana danddayennaba gidikkonne, ta aqo laggiyaappe shaahettada aybissi ufayttada deꞌikkinaa?’ Kiristtaaneti hegaadan qoppidi, deꞌoy loꞌꞌana giidi aymottiyoogaappe, bantta aqo deꞌuwan danddayiyo ubbabaa oottanau baaxetananne Xoossaa kaaletuwaa kaallana koshshees.

6. Yesuusi Maatiyoosa 19:9n yootido qofaa birshshettay aybee?

⁶ Issi Kiristtaanee ba aqo laggiyaappe paraman shaahettikko, zaarettidi ekkanaadan woy gelanaadan Geeshsha Maxaafay paqqadana woy paqqadennan aggana danddayees. Yesuusi, “Ba machchiyo shaaramuxennan de7ishin yeddidi, haranno ekkiya ooninne shaaramuxees” yaagiis. (Maa. 19:9) Ha xiqisiyan ‘shaaramuxiyoogaa’ geetettidaagee, wodiraa laammiyoogaanne saalaa gaytotettaara gayttida hara deexo nagaraa gujjees. Aqo laggetuppe issoy shaaramuxennan deꞌishin machiyo yeddanau woy azinaappe anjjettanau koyiya uri, Yihoowa kaaletuwaa demmanau woossana koshshees.

7. Issi Kiristtaaniyaa aqo deꞌoy laalettikko hara asay woygidi qoppana danddayii?

⁷ Aqo deꞌoy laalettiyo wode, hegee issi urau Xoossaara deꞌiya dabbotay shuggidoogaa bessiyaaba gidana danddayees. Kiitettida PHauloosi, “Issi urai ba keettaa aissanau danddayennaagaa gidikko, Xoossaa woosa keettaa waati aissanau danddayii?” yaagidi oychiis. (1 Xim. 3:5) Aqo laggeti banttana Kiristtaane giishin eta aqo deꞌoy laalettiyo wode, hara asay ha asati bantta sabbakiyoobaa oosuwan peeshshokkona giidi qoppana danddayees.—Roo. 2:21-24.

8. Kiristtaane gidida aqo laggeti shaahettanau qoppikko, balay ayba gidana danddayii?

⁸ Xammaqettida aqo laggeti Geeshsha Maxaafay yootenna gaasuwan coo shaahettanau woykko paraman shaahettanau kuuyiyo wode, ayyaanaaban eti shuggidoogee qoncce. Etappe issoy woy geella naaꞌꞌaykka Geeshsha Maxaafaa baaso siraataa oosuwan peeshshokkona. Eti tumuppe ‘polo wozanan Yihoowan ammanettiyaaba’ gidikko, bantta aqo deꞌuwaa giigissana danddayoosona.—Leemiso 3:5, 6 nabbaba.

9. Danddayidi bantta aqo laggiyaara deꞌida issi issi Kiristtaaneti ayba anjjo demmidonaa?

⁹ Laalettana haniyaaba milatiya daro aqo deꞌoy takkidi giigiis. Giiga xayida aqo deꞌuwan sohuwaara hidootaa qanxxenna Kiristtaaneti darotoo loꞌꞌo anjjuwaa demmoosona. So asaa haymaanootee dumma dumma gidido keettan aybi hanana danddayiyaakko qoppa. Kiitettida PHeexiroosi hagaadan giidi xaafiis: “Maccaasatoo, intte azinatuppe Xoossaa qaalau azazettenna issooti issooti de7ikkokka, intte palamettennan, eti intte yashshatettaanne intte geeshsha de7uwaa be7idi ammanana mala, etau haarettite.” (1 PHe. 3:1, 2) Ee ammanenna uri, ba aqo laggiyaa loꞌꞌo eeshshaa gaasuwan tumaa ekkana danddayees! Hegaa mala hanotan giigida aqo deꞌoy Xoossaa bonchissees, qassi azinaayyo, macheeyyoonne etau naati deꞌikko, eta naatuyyo gita anjjuwaa demissees.

10, 11. Qoppibeenna ayba metoy aqo deꞌuwan merettana danddayii, shin issi Kiristtaanee ay ammanettana danddayii?

¹⁰ Aqo oyqqibeenna daro Kiristtaaneti Yihoowa ufayssanau koyiyo gishshau, aqo lagge gidanaadan xammaqettida Kiristtaaniyaa dooroosona. Gidikkokka, eti qoppibeennabay hanana danddayees. Leemisuwau, geelladan aqo laggee qofan keehippe unꞌꞌettana danddayees. Woy bullachaappe guutta wodiyaa takkidi, aqo laggee Kawotettaabaa aassiyoogaa aggana danddayees. Leemisuwau, mishettada aassiya Kiristtaane, qassi siiqiya aayo gidida Lindda,a xammaqettida Kiristtaane gidida i azinay Geeshsha Maxaafaa maaraara moggenna ogiyaa kaalliyoogaa aggennan ixxidi bohettin, aynne oottana danddayabeykku. Aqo deꞌoy hegaa mala hanotan keehippe moorettiyaaba gidikko, issi Kiristtaanee ay oottana koshshii?

¹¹ Neeni, ‘Aybi hanikkokka, ta aqo deꞌoy laalettennaadan baaxetana bessii?’ gaada oychana danddayaasa. Hegaa malabaa ooninne neeyyo kuuyana danddayeenna woy kuuyana koshshenna. Gidikkokka, aqo deꞌoy giiga xayiyo wode hidootaa qanxxana bessenna gaasoy deꞌees. Giiga xayida aqo deꞌuwan gakkiya metuwaa ba zoriya wozanaa gaasuwan danddayiya, Xoossau aqida uri Xoossaayyo keehippe alꞌꞌo. (1 PHeexiroosa 2:19, 20 nabbaba.) Giiga xayida aqo deꞌuwaa giigissanau wozanappe baaxetiya Kiristtaaneta Yihooway ba Qaalaanne ba ayyaanaa baggaara maaddees.

NENA MAADDANAU UFAYTTOOSONA

12. Cimata maaduwaa oychikko eti nuna ayba ogiyan xeellanee?

¹² Nena aqo deꞌuwan metoy gakkiyaaba gidikko, kaymida Kiristtaaneta maaduwaa oychanau guyye gooppa. Gubaaꞌiyaa cimati Xoossaa wudiyaa heemmiyo gishshau, Geeshsha Maxaafan deꞌiya zoriyaa neeyyo yootanau ufayttoosona. (Oos. 20:28; Yaaq. 5:14, 15) Aqo deꞌuwan wolqqaama metoy gakkiyo wode ayyaanaabaa maaduwaa koyada cimatuura tobbikko, eti nenanne ne aqo laggiyaa bonchokkona gaada qoppoppa. Neeni Xoossaa ufayssanau wozanappe koyiyoogaa beꞌiyo wode, eti kaseegaappe aaruwan nena siiqana.

13. Koyro Qoronttoosa 7:10-16n woygiya zoree deꞌii?

¹³ So asay dumma dumma haymaanootiyaa kaalliyo keettan deꞌiya Kiristtaaneti maaduwaa oychiyo wode, cimati PHauloosi xaafido, kaallidi deꞌiyaagaa mala zoriyaa yootoosona: “Machchiyaa ba azinaappe shaahettuppu. SHin shaahettikkonne gelennan de7u; woi ba azinaara sigettu. Azinaikka ba machchiyo yeddoppo yaagada, ekkidaageetanne gelidaageeta azazais. SHin hagaa azaziyaagee Godaa gidiyoogaappe attin, tana gidikke. . . . Ammaniya maccaasee, neeni ne azinaa ashshanaakkonne ai erai? Woi ammaniya azinau; neeni ne machchiyo ashshanaakkonne ai erai?” (1 Qor. 7:10-16) Ammanenna aqo laggee tumu goynuwaa kaalliyoogee gita anjjo!

14, 15. Issi Kiristtaanee aqo laggiyaappe shaahettanau qoppana danddayiyoy ayba hanotaanee, gidikkokka, woossiyoogeenne ba wozanaa qofaa qoriyoogee keehippe koshshiyoy aybissee?

¹⁴ Kiristtaane gidida machiyaa ba azinaappe ‘shaahettana’ danddayiyoy ayba hanotatuunee? Aqo laggee eriiddi maaddennan ixxiyo wode issoti issoti shaahettanau dooridosona. Issoti issoti aqo laggee bantta asatettaa keehippe qohido gishshau woykko ayyaanaaban banttana qohiyaabaa oottido gishshau, shaahettanau dooridosona.

¹⁵ SHahettanaakko woy agganaakko issi uri ba huuphe kuuyees. Gidikkokka, Kiristtaane gidida aqo laggee ha allaalliyaa xeelliyaagan woossananne ba wozanaa qofaa akeekan qorana koshshees. Leemisuwau, ayyaanaaban qohettanaadan oottiday ammanenna aqo laggiyaa xalleeyye, Kiristtaanee Geeshsha Maxaafaa xannaꞌiyoogaa sheneho gii, gubaaꞌe shiiquwaa ubbatoo shiiqennee, qassi ubbatoo haggaazennee?

16. Kiristtaaneti yuushshi qoppennan paraman shaahettanau kuuyennaadan oottiyaabi aybee?

¹⁶ Nuuyyo Xoossaara deꞌiya dabbotaa xoqqu oottidi xeelliyoogaaninne a imota gidida aqo deꞌuwaa nashshiyoogan, yuushshi qoppennan azinaappe anjjettanau woy machiyo yeddanau kuuyennaadan nuuni naagettana koshshees. Nuuni Yihoowa ashkkara gidiyoogaadan, a sunttaa geeshshatettaabay nuna qofissees. Yaatiyo gishshau, nuuni hara aqo lagge ekkanau woy gelanau qoppidi, nu aqo laggiyaa kaddanau mule koyokko.—Erm. 17:9; Mil. 2:13-16.

17. Xoossay aqo oyqqida Kiristtaaneta sarotettan deꞌanaadan xeesiis gaana danddayiyo issi hanotay aybee?

¹⁷ Ammanenna ura gelida woy ekkida Kiristtaanee ba aqo deꞌuwaa minttanau wozanappe baaxetana koshshees. SHin, ammaniya uri ba aqo deꞌuwaa minttanau baaxetishinkka ammanenna aqo laggee issippe deꞌanau koyennaba gidikko, hegaadan hanidoy ba mooruwaana giidi Kiristtaanee qoppana koshshenna. PHauloosi hagaadan giidi xaafiis: “Ammanennaagee ammaniyaagaappe shaahettana koyikko shaahetto. Ammaniya machchiyo gidin, woi azinaa gidin, hagaa mala yohuwan qashettokkona, Aissi giikko, Xoossai nuna sarotettan de7anau xeesiis.”—1 Qor. 7:15.b

YIHOOWAN HIDOOTAA WOTTA

18. Baaxetishinkka aqo deꞌoy laalettikkonne, baaxetiyoogee ay anjjo demissana danddayii?

¹⁸ Aqo deꞌuwan metoy gakkiyo wode, xala gidanau Yihoowakko woossa, qassi ubbatoo an hidootaa wotta. (Mazamure 27:14 nabbaba.) Qommoora ibay odettido Linddibaa qoppa. A ba aqo deꞌoy laalettennaadan daro layttau baaxetidaba gidikkokka, wurssettan i azinay o yeddiis. A ba wodiyaa coo xayssidabadan qoppay? A hagaadan gaasu: “Mule hegaadan qoppikke. Taani oottidobay haratuyyo loꞌꞌo markkatetta gidiis. Ta zoriya wozanay tana qumꞌꞌenna. Ubbabaappekka loꞌꞌobay, he wodee nu naꞌiyaa tuman minnada deꞌanaadan maaddiis. A ba huuphiyaa geppida, mishettada haggaaziya Yihoowa Markka gidaasu.”

19. Aqo deꞌoy laalettennaadan baaxetikko aybi hanana danddayii?

¹⁹ Merilino geetettiya Kiristtaaniyaa Xoossan ammanettada, ba aqo deꞌoy laalettennaadan minna baaxetidoogan keehippe ufayttausu. A hagaadan gaasu: “Ta azinay taayyo miishsha immenna gishshau, qassi ayyaanaaban tana qohiyaabaa oottiyo gishshau, appe shaahettanau qoppaas. SHin, ta azinay oosuwaara gayttidaagan eratetti paccidobaa oottanaappe kase gubaaꞌe cima gididi oottiis. I gubaaꞌe shiiquwaa beennan attiyoogaa doommiis, qassi issoy issuwaara haasayiyoogaa aggibayida.” SHabbiriyaageeti bantta katamaa qohin, a keehippe yayyada haratuura gayttana danddayabeennaagaa yootaasu. SHin akka moorido, eta metuwau gaaso gididabay deꞌiyoogaa akeekaasu. Anne i azinay issoy issuwaara haasayiyoogaa, so asaa xinaatiyaa xannaꞌiyoogaanne aggennan shiiquwaa shiiqiyoogaa doommidosona. Gubaaꞌe cimati etau kehidosonanne eta keehippe maaddidosona. Takkennan eta aqo deꞌoy ooratta doommidoba mala gidiis. Eti keehippe ufayttidosona. Guyyeppe, i azinay gubaaꞌiyan oottiyo maataa demmiis. A azzanttiya hanotaappe tamaaridaba gidikkonne goꞌettidoogaa yootaasu.

20, 21. Aqo deꞌuwaara gayttidaagan nuuni ay oottanau murttana koshshii?

²⁰ Nuuni aqo oyqqidaageeta gidin gidana xayin, ubbatoo xalanne Yihoowan hidootaa wottiyaageeta gidoos. Nu aqo deꞌoy giiga xayikko, aqo laggeti “issi asa gidiyoogaappe attin, naa77u asa” gidennaagaa hassayidi, he hanotaa giigissanau wozanappe baaxetana koshshees. (Maa. 19:6) So asay dumma dumma haymaanootiyaa kaalliyo keettan metoy deꞌishinkka nuuni gencciyaaba gidikko, ammanenna aqo laggee tumu goynuwaa kaalliyoogaa beꞌidi nuuni keehippe ufayttana danddayiyoogaa hassayana koshshees.

²¹ Nu hanotay aybanne gido, Kiristtaane gidennaageetuyyo loꞌꞌo markkatetta gidiyaabaa ubbatoo oottana koshshees. Nu aqo deꞌoy giiga xayiyaaba gidikko, wozanappe woossiyaageeta, nu wozanaa qofaa akeekan qoriyaageeta, Geeshsha Maxaafaa zoriyaa wotti dentti qoppiyaageetanne ayyaanaaban maaddanaadan cimata oychiyaageeta gidoos. Ubbaappe aaruwan, ubbaban Xoossaa Yihoowa ufayssanau murttidaageeta, qassi maalaaliya a imotaa, giishin aqo deꞌuwaa tumuppe nashshiyaageeta gidoos.

[Tohossa qofata]

[Sinttaa 16n deꞌiya misiliyaa qonccissuwaa]

Giiga xayida aqo deꞌuwan sohuwaara hidootaa qanxxenna Kiristtaaneti darotoo anjjuwaa demmoosona

[Sinttaa 18n deꞌiya misiliyaa qonccissuwaa]

Ubbatoo Yihoowan hidootaa wotta, qassi xala gidanau akko woossa

[Sinttaa 15n deꞌiya misiliyaa qonccissuwaa]

Giiga xayida aqo deꞌuwaa minttanau baaxetiya Kiristtaaneta Yihooway anjjees

[Sinttaa 17n deꞌiya misiliyaa qonccissuwaa]

Kiristtaane gubaaꞌee minttettuwaanne ayyaanaaban maaduwaa demmiyo soho gidana danddayees