Kiristtaaneti Bantta Aqo Deꞌoy Giiganaadan Oottiyoogaa

1. Darotoo aqo deꞌoy doomettan ufayssiyaaba gidikkonne, aqo oyqqiyaageeti aybi gakkana giidi naagana danddayiyoonaa? (Doomettan deꞌiya misiliyaa xeella.)

MACHIYAAGEE ba machana loꞌꞌiya maccaasiyo bullachaa gallassi koyro beꞌiyo wode, eta ufayssawu zawi baa. Eti ekkanawu woy gelanawu qoppidi issippe wodiyaa aattiyoogan keehi siiqettiyo wode, aqo deꞌuwan issoy issuwawu ammanettanawu qaalaa gelanawu giigettoosona. Eti naaꞌꞌay issippe deꞌiyoogaa doommiyo wode giigissana koshshiya issi issibay deꞌees. Aqo deꞌuwaa Doomissida siiqiyaagee aqo laggeti bantta aqo deꞌoy giiga gidin keehi ufayttidi deꞌanaadan koyiyo gishshawu, ekkanawu woy gelanawu koyiya ubbawu Xoossaa Qaalay loꞌꞌo zoriyaa yootees. (Lee. 18:22) Gidikkonne, aqo oyqqiya nagarancha asay ‘bantta bolli waayiyaa ehaanaagaa’ Geeshsha Maxaafay qoncciyan yootees. (1 Qor. 7:28) He waayee darennaadan waatana danddayiyoo? Qassi Kiristtaanetu aqo deꞌuwaa giiga oottiyaabay aybee?

2. Aqo laggeti bessana koshshiyo siiqo qommoti awugeetee?

² Geeshsha Maxaafay siiqoy keehi koshshiyoogaa yootees. Aqo deꞌuwan wozanappe siiqettiyoogee (Giriikettuwan, phi·liʹa) koshshiyaaba. Attuma asay macca asaara siiqettiyo siiqoy (eʹros) keehi ufayssees; qassi naati yelettiyo wode so asay siiqettiyo siiqoy (stor·geʹ) keehippe koshshees. SHin aqo deꞌoy giiga gidanaadan oottiyaagee Geeshsha Maxaafaa maaraa kaallidi siiqiyo siiquwaa (a·gaʹpe). Ha siiquwaa xeelliyaagan kiitettida PHawuloosi hagaadan giis: “Intte huuphiyan huuphiyan intte maccaasaa intte huuphedan siiqanau bessees; maccaasa ubbaikka bantta azinaa azinaa bonchchanau bessees.”—Efi. 5:33.

AQO LAGGETUPPE KOYETTIYAABAA

3. Aqo laggeti issoy issuwaa ay keena siiqana koshshii?

³ PHawuloosi, “Azinatoo, Kiristtoosi woosa keettaa siiqidi, ba huuphiyaa ayyo immidoogaadan, inttekka intte maccaasata siiqite” yaagiis. (Efi. 5:25) Yesuusa kaalliyaageeti a leemisuwaa kaallanawu i eta siiqidoogaadan eti issoy issuwaara siiqettana koshshees. (Yohaannisa 13:34, 35; 15:12, 13 nabbaba.) Hegaa gishshawu, koshshiyaaba gidikko issoy issuwaa gishshawu hayqqanawu eeno giyoogaa keenaa, Kiristtaaneti bantta aqo deꞌuwan keehi siiqettana bessees. Issoti issoti bantta giddon wolqqaama metoy merettiyo wode, eta siiqoy mino gidennabadan qoppana danddayoosona. Gidikkonne, Geeshsha Maxaafaa maaraa kaallidi siiqiyo siiqoy “ubbabaa danddayees. Ubbabaikka hanana giidi, ufaissan naagees. Ubbabaa genccees.” Ee, “siiqoi mulekka xayenna.” (1 Qor. 13:7, 8) Xoossawu yayyiya aqo laggeti issoy issuwaa siiqanawunne issoy issuwawu ammanettanawu gelido qaalaa hassayiyoogan bantta giddon ayba metoynne merettikko giigissanawu Yihooway kessido aybippenne aadhiya maaraadan hashetidi oottoosona.

4, 5. (a) So asawu huuphe gidiyoogaadan azinaa aawatettay aybee? (b) Machiyaa ba azinay huuphe gidiyo aawatettaa waata xeellana koshshii? (c) Issi azinaynne machiyaa aybin laamettana koshshidee?

⁴ PHawuloosi aqo laggetuppe koyettiyaabaa hagaadan giis: “Maccaasatoo, Godaayyo haarettiyoogaadan, intte azinatuyyo haarettite. Aissi giikko, Kiristtoosi qassi woosa keettaayyo huuphe gidiyoogaadan, azinaikka ba maccaaseeyyo huuphe.” (Efi. 5:22, 23) Hegee azinay macheeppe aadhanaadan oottenna. Hegee, maccaasay oottanaadan Xoossay qoppido kaallidi deꞌiyaabaa a polanaadan maaddees; Xoossay, “Bitanee [Addaamee] barkka de7iyoogee lo77o gidenna; taani ayyo injjetiyaabaanne maaddiyaabaa kessana” yaagiis. (Doo. 2:18) “Woosa keettaayyo huuphe” gidida Kiristtoosi siiqiyoogaadan, Kiristtaane azinay siiquwan ayssana bessees. I hegaadan oottiyo wode, a machiyaa woppu gawusu; qassi azinaa bonchiyoogan, maaddiyoogaaninne awu haarettiyoogan ufayttawusu.

⁵ Aqo deꞌuwan giigissana koshshiyaabi deꞌiyoogaa maayada Kaata^[1] hagaadan gaasu: “Taani aqo oyqqanaappe kase, asawu haarettennan tawu koshshiyaabaa kunttays. Aqo deꞌoy taani ta azinawu haarettiyoogaa tamaaraydda laamettanaadan oottiis. Hegee issi issitoo metiyaaba gidikkonne, Yihooway koyiyoobaa issippe oottiyoogee nuuni issoy issuwaara keehi siiqettanaadan maaddiis.” I azinay Fredi hagaadan giis: “Kuuyiyoogee tana metees. Aqo deꞌuwan naaꞌꞌu asawu qoppiyoogee he metoy yaa gujjanaadan oottees. SHin Yihooway kaalettanaadan woossiyo wodenne ta machiyaa yootiyoobaa wozanappe siyiyo wode, hegee ubba galla wayssiyoogaa aggi aggi bees. Nuuni tumuppe issuwaa gididabadan tawu siyettees!”

6. Aqo deꞌuwan metoy merettiyo wode siiqoy waati ‘issippe shiishshi qachii’?

⁶ Aqo laggeti ‘issoy issuwaabaa danddayikkonne issoy issuwawu atto yaagikko’ aqo deꞌoy minnana danddayees. Eti nagarancha gidiyo gishshawu mooranaagee qoncce. SHin, mooriyo wode, eti balaappe tamaarana, atto giyoogaa tamaarana, qassi Geeshsha Maxaafaa maaraadan siiqettana danddayoosona. He siiqoy “issippe shiishshi qachchiya” siiquwaa. (Qol. 3:13, 14) Hegaa bollikka, “siiqoi danddayanchcha. Siiqoi kehees. . . . Naaqettidobaakka paidenna.” (1 Qor. 13:4, 5) Walaqettidobaa sohuwaara giigissana koshshees. Yaatiyo gishshawu, Kiristtaane azinaynne machiyaa merettida metuwaa away wullennan giigissanawu baaxetana bessees. (Efi. 4:26, 27) “Nena naaqqido gishshawu tawu atto ga” yaagidi wozanappe oychanawu ashkkenne xala gidana koshshikkokka, hegee aqo laggeti maayettanawunne kaseegaappe aaruwan siiqettanawu keehi maaddees.

SIIQIYOOGEE KEEHI KOSHSHIYAABA

7, 8. (a) Aqo laggeti issippe zinꞌꞌiyoogaa xeelliyaagan Geeshsha Maxaafay zoriyoobay aybee? (b) Aqo laggeti issoy issuwawu siiquwaa bessana koshshiyoy aybissee?

⁷ Aqo laggeti aqo deꞌuwan issoy issuwawu oottana bessiyaabaa maara xeellanaadan Geeshsha Maxaafaa zoree maaddana danddayees. (1 Qoronttoosa 7:3-5 nabbaba.) Issi uri ba aqo laggiyawu siyettiyaabaanne koshshiyaabaa siiquwan qoppiyoogee bessiyaaba. Machiyo wozanappe siiqana xayikko, a azinaara zinꞌꞌiyoogan ufayttennan aggana danddayawusu. Azinati bantta machota ‘eratettan’ oyqqanaadan etawu odettiis. (1 PHe. 3:7) Azinaynne machiyaa naaꞌꞌaykka koyidi issippe zinꞌꞌana besseesippe attin, wolqqan gidana bessenna. Darotoo attuma asay macca asaappe eesuwan koyana danddayees; shin azinaykka machiyaakka koyiyo wodiyan gidana koshshees.

⁸ Azinay ba macheera gayttanawu eti kaaꞌana koshshiyaabaanne koshshennabaa Geeshsha Maxaafay yootana xayikkonne, siiquwaa qonccissiyo hanotaa yootees. (Sii. 1:2; 2:6) Kiristtaane aqo laggeti issoy issuwaa siiquwan oyqqana bessees.

9. Issi uri ba aqo lagge gidenna uraa qaaqqatiyoogee bessennabaa gididoy aybissee?

⁹ Xoossaanne shooruwaa loytti siiqiyoogee ooninne woy aybinne aqo laggetu issippetettaa moorennaadan oottees. Issotu issotu aqo laggiyawu pokkobaa beꞌiyoogee amale gidido gishshawu, he aqo deꞌuwan metoy merettiis; woy ubba qassi he aqo deꞌoy moorettiis. Pokkobaa beꞌanawu kajjeeliyoogaa woy shori baynna harabaa aybanne qaaqqattiyoogaa mintti eqettana koshshees. Aqo lagge gidenna uraa lambbeechiyooba milatiyaabaa oottiyoogeekka siiqiyoogaa bessenna gishshawu, hegaadan oottana koshshenna. Xoossay nuuni qoppiyoobaanne oottiyoobaa ubbaa eriyoogaa hassayiyoogee nuuni kaseegaappe aaruwan a ufayssanawunne awu ammanettanawu koyanaadan denttettana.—Maatiyoosa 5:27, 28; Ibraawe 4:13 nabbaba.

AQO DEꞌUWAN METOY MERETTIYO WODE

10, 11. (a) Paraman shaahettiyoogee ay keena daridee? (b) SHaahettiyoogaa xeelliyaagan Geeshsha Maxaafay woygii? (c) Aqo laggeti shaahettanawu dirbbennaadan aybi maaddanee?

¹⁰ Aqo deꞌuwan ubbatoo giigenna wolqqaama metoy aqo laggeti paraman woy coo shaahettanawu qoppanaadan oottana danddayees. Issi issi biittatun, aqo oyqqidaageetuppe baggaappe daroy paraman shaahettoosona. Kiristtaane gubaaꞌiyan hegaadan darenna; shin Xoossaa asaa giddon aqo deꞌuwan merettiya metoy dari daridi biyoogee qofissiyaaba.

¹¹ Geeshsha Maxaafay, “Machchiyaa ba azinaappe shaahettuppu. SHin shaahettikkonne gelennan de7u; woi ba azinaara sigettu. Azinaikka ba machchiyo yeddoppo” yaagidi azazees. (1 Qor. 7:10, 11) Aqo laggiyaappe shaahettiyoogaa xaasayidi xeellana koshshenna. Wolqqaama metoy merettiyo wode shaahettana koshshiyaaba milatana danddayikkonne, darotoo hegee hara metoy merettanaadan oottees. Issi asi ba aawaanne ba aayyiyo aggi bayidi, ba machcheera issippe deꞌiyoogaa Xoossay yootidoogaa Yesuusi odi simmidi, “Xoossai issippe gattidoogaa asi shaakkoppo” yaagiis. (Maa. 19:3-6; Doo. 2:24) Hegaa giyoogee azinaykka machiyaakka ‘Xoossay issippe gattidoogaa shaakkana’ bessenna giyoogaa. Yihooway azinaynne machiyaa shaahettennan issippe deꞌanaadan koyees. (1 Qor. 7:39) Aqo laggeti ubba asay babaa Xoossawu yootanaagaa hassayiyoogee eti bantta giddon merettida metoy wolqqaamennan deꞌishin sohuwaara giigissanawu wozanappe baaxetanaadan denttettana koshshees.

12. Aqo laggeti shaahettanawu qoppanaadan oottana danddayiyaabay aybee?

¹² Hanennabaa naagiyoogee aqo deꞌuwan merettiya metuwawu waanna gaaso gidana danddayees. Ufayssiya aqo deꞌuwaabaa amottidoogee polettana xayikko, issi uri hidootaa qanxxana, cimettidabadan qoppana, ubba qassi yiillotana danddayees. Issi issiban siyettiyaabaynne diccido hanotay dummatiyoogee palamay denddanaadan oottana danddayees, woy miishshaara, bollo keettaaranne naata dichiyoogaara gayttidaagan maayettennan aggana danddayoosona. Gidikkokka, aqo oyqqida Kiristtaanetuppe daroti Xoossaa kaaletuwaa kaalliyo gishshawu, hegaa mala metoy merettiyo wode eti maayettiyoogee galatissiyaaba.

13. SHaahettanawu bessiya gaasoti aybee?

¹³ SHaahettiyoogee issi issitoo bessiyaaba gidana danddayees. Eriiddi maaddennan ixxiyoogee, bollan wolqqaama qohuwaa gattiyoogeenne ayyaanaaban keehi qohettanaadan oottiyoogee issoti issoti shaahettanawu gaasodan xeelliyo dumma hanotata. Wolqqaama metoy aqo deꞌuwan merettiyo Kiristtaaneti, cimati maaddanaadan oychana koshshees. Aqo laggeti Xoossaa Qaalaa zoriyaa oosuwan peeshshanaadan ha kayma ishati maaddana danddayoosona. Aqo deꞌuwan merettiya metuwaa giigissanawu, Yihooway ba ayyaanaa immanaadan, qassi Geeshsha Maxaafaa maaraa oosuwan peeshshanaadaaninne ayyaanaa ayfiyaa ayfana mala maaddanaadan nuuni woossana koshshees.—Gal. 5:22, 23.^[2]

14. Yihoowawu goynnenna aqo laggeti deꞌiyo Kiristtaanetussi Geeshsha Maxaafay ay yootii?

¹⁴ Aqo laggetuppe issoy Yihoowawu goynnenna wodekka shaahettennan issippe deꞌiyoogee bessiyaaba gidiyoogaa Geeshsha Maxaafay yootees. (1 Qoronttoosa 7:12-14 nabbaba.) Ammanenna aqo laggee akeekin akeekana xayin, ba aqo laggee ammaniyaagaa gidido gishshawu i ‘geeyees’. Eti yeliyo naati ‘geeshshadan’ xeelettiyo gishshawu, Xoossay eta loꞌꞌo ayfiyan xeellees. PHawuloosi, “Ammaniya maccaasee, neeni ne azinaa ashshanaakkonne ai erai? Woi ammaniya azinau; neeni ne machchiyo ashshanaakkonne ai erai?” yaagiis. (1 Qor. 7:16) Bantta aqo laggeti Yihoowa ashkkara gidanaadan maaddida daro Kiristtaaneti deꞌoosona.

15, 16. (a) Eta azinati Xoossawu haggaazenna machota Geeshsha Maxaafay woygidi zorii? (b) ‘Ammanennaagee shaahettanawu koyikko’ issi Kiristtaanee waatana koshshii?

¹⁵ Kiitettida PHeexiroosi Kiristtaane maccaasati bantta azinatuppe ‘Xoossaa qaalawu azazettenna issooti issooti deꞌikko, maccaasati palamettennan, bantta yashshatettaanne bantta geeshsha deꞌuwaa beꞌidi azinati ammanana mala’ etawu haarettanaadan zoriis. Machiyaa ba Kiristtaane ammanuwaabaa ubbatoo yootiyoogaappe ‘Xoossaa sinttan daro alꞌꞌo gidida xayenna ashkkenne woppu giida ayyaanay’ deꞌiyooro gidiyoogee i azinay tumu goynuwaa goynnanaadan keehi maaddana danddayees.—1 PHe. 3:1-4.

¹⁶ Ammanenna aqo laggee shaahettanawu doorikko shin? Geeshsha Maxaafay, “Ammanennaagee ammaniyaagaappe shaahettana koyikko shaahetto. Ammaniya machchiyo gidin, woi azinaa gidin, hagaa mala yohuwan qashettokkona, Aissi giikko, Xoossai nuna sarotettan de7anau xeesiis” yaagees. (1 Qor. 7:15) Hegaa giyoogee Kiristtaanee haraa ekkana woy gelana danddayees giyoogaa gidenna; shin shaahettennaadan ammanenna aqo laggiyaa giddana bessenna. SHaahettiyoogee amarida sarotettaa demissana danddayees. Qassi shaahettiya aqo laggee aqo deꞌoy laalettennaadan zaarettidi giigissanawu ba dosan simmananne wurssettan Yihoowa Markka gidana giidi Kiristtaanee naagana danddayees.

NUUNI AQO DEꞌUWAN KASEYIYOOBAA

17. Aqo oyqqidaageeti kaseyana bessiyaabay aybee?

¹⁷ Nuuni ‘wurssetta gallassay’ wuranawu matido wodiyan deꞌiyo gishshawu, genccanawu ‘wayssiya’ wode gidiis. (2 Xim. 3:1-5) Gidoppe attin, ayyaanaaban minnidi deꞌiyoogee ha alamiyaa qohuwaa eqettanawu keehi maaddees. PHawuloosi, “Wodee wuriis. Hagaappe sinttan machchida asati, machchibeenna asatudan hanona. . . . Ha sa7aa mehiyan maadettiyaageeti muleera maadettennabaadan hanona” yaagiis. (1 Qor. 7:29-31) PHawuloosi aqo oyqqidaageeti aqo deꞌuwan bantta aawatettaa aggibayanaadan yootibeenna. SHin eti wodee wuridoogaa akeekidi, ayyaanaabaa sinttayana bessees.—Maa. 6:33.

18. Kiristtaanetu aqo deꞌoy giiganne ufayssiyaagaa gidana danddayiyoy aybissee?

¹⁸ Ha wayssiya wodiyan daro aqo deꞌoy laalettiyoogaa beꞌoos. Nu aqo deꞌoy giiganne ufayssiyaagaa gidana danddayii? Nuuni Yihoowakkonne a asaakko shiiqikko, Geeshsha Maxaafaa maaraa oosuwan peeshshikko, qassi Yihoowa ayyaanaa kaaletuwaa kaallikko, ee danddayees. Nuuni yaatiyo wode, “Xoossai issippe gattidoogaa” bonchoos.—Mar. 10:9.