Oyshaa 2: Taani Hayqqiyo Wode Waaniyaanaa?
KAAMIYAN daafabay gakkin a mata laggee hayqqiyo wode, Roomani guutta naꞌa. I, “Ta laggee hayqqin taani keehi mishettaas. He daafabay gakki simmin, nuuni hayqqiyo wode waaniyaakko daro layttau qoppaas” yaagiis.
He oyshaa oychiyoogee bessiyaaba gididoy aybissee?
Asay hayqqiyoogee meretan deꞌiyaabaa milatenna. Nu layttay ay keena gidikkokka, hayqqanau koyokko. Daroti hayqqi simmidi waananaakko hirggoosona.
Issoti issoti he oyshaa zaaruwaa woygiyoonaa?
Daroti issi uri hayqqiyo wode, appe shaahettidi paxa deꞌiyaabi deꞌees giidi ammanoosona. Eti loꞌꞌo asati saluwan woytuwaa demmoosona, qassi iita asati bantta nagaraa gishshau merinau qaxxayettoosona giidi ammanoosona. Harati qassi issi uri hayqqiyo wode paxa deꞌenna, qassi wurssettan i muleera dogettees yaagidi qoppoosona.
He zaaroy ay qonccissii?
Koyro zaaroy issi uri hayqqiyo wode i tumuppe hayqqennaagaa qonccissees. Naaꞌꞌanttoogee qassi deꞌuwau halchidobi baynnaagaa bessees. Deꞌuwau halchidobi baawa giidi qoppiya asay, “Simmi moosinne uyoos; aissi giikko, nuuni wontto haiqqana” giidi qoppana danddayees.—1 Qor. 15:32.
Geeshsha Maxaafay ay tamaarissii?
Geeshsha Maxaafay issi uri hayqqiyo wode, appe shaahettidi paxa deꞌiyaabi deꞌees giidi tamaarissenna. Kawuwaa Solomoni, “Paxa de7iya asati issitoo haiqqanau de7iyoogaa eroosona; shin haiqqidaageeti aibanne erokkona” yaagidi xaafanaadan Xoossay ba ayyaanan denttettiis. (Era. 9:5) ‘Aybanne erennaageeti’ bantta yuushuwan hanettiyaabaa mule akeekokkona. Eti aynne qoppana woy oottana danddayokkona. Yaatiyo gishshau, hayqqidaageeti paxa deꞌiyaageeta maaddana woy qohana danddayokkona.
Daroti qoppiyoogaappe dumma hanotan, Xoossay asaa naati hayqqanaadan halchibeenna. I koyro bitanee Addaamee saꞌan merinau deꞌanaadan medhiis. Azazettennan ixxikko qaxxayanabaa Addaameyyo odido wode xallan, Xoossay hayquwaabaa yootiis. I Addaamee issi mittaa ayfiyaa meenna mala odiis; qassi hegaappe miyaaba gidikko, neeni “tumu haiqqana yaagidi” Addaameyyo yootiis. (Doo. 2:17) Addaameenne Hewaana Xoossau azazettidi deꞌiyaakko, etinne Xoossau ammanettida eta zeretta ubbay saꞌan merinau deꞌana shin.
Addaamee Xoossay yootidobaa siyibeenna. I Xoossau azazettennan ixxido wode nagaraa oottiis; yaatidi hayqqiis. (Roo. 6:23) Addaamee hayqqido wode appe shaahettidi paxa deꞌiyaabi baynna gishshau, i mule deꞌuwan deꞌenna. Xoossay Addaamessi hagaadan giis: “Neeni biittau simmana gakkanaassi, daafuran ne som77oi cawattin oottido ne qumaa maana; aissi giikko, neeni biittaappe ekettadasa; neeni baana; neeni baanau simmana.” (Doo. 3:19) Asaa naati ubbay Addaame gulbbataappe yelettido gishshau, nuuni nagaraanne hayquwaa appe laattida.—Roo. 5:12.
Addaamee azazettennan ixxikkonne, a zareti saꞌaa kumanaadan Xoossay halchido ba halchuwaa polana. (Doo. 1:28; Isi. 55:11) Mata wode, Yihooway hayqqida asaappe daruwaa hayquwaappe denttana. He wodiyaabaa, kiitettida PHauloosi, “Asai ubbai, worddoikka xilloikka haiquwaappe denddana” yaagiis.—Oos. 24:15.
Qommoora abay odettido Roomani, Geeshsha Maxaafaa xannaꞌiis; qassi hayquwaabaanne Yihoowabaa Geeshsha Maxaafay tamaarissiyoobaa eriis. I eridobay a keehi maaddiis.