Neeni Ay Mala Asa Gidana Bessiyaakko Qoppa

1, 2. Nuuni Xoossay nashshiyoogeeta gidanau ‘ay mala asa gidana bessii?’

HARA asay nubaa qoppiyoobay nuna qofissiyoogee erettidaba. SHin, nuuni Kiristtaane gidiyoogaadan, Yihooway nuna xeelliyo ogee hegaappe aaruwan qofissana koshshees. Ayssi giikko, i Ubbaappe Gita Xoossa; qassi “de7uwaa pulttoi” a.—Maz. 36:9.

² Kiitettida PHeexiroosi, Yihoowa xeelan ‘nuuni ay mala asa gidana bessiyaakko’ qonccissiiddi, nu “de7oi geeshshanne Xoossaa milatiyaagaa” gidana koshshiyoogaa odiis. (2 PHeexiroosa 3:11 nabbaba.) Nu “de7oi” geeshsha gidana danddayiyoy, nuuni ubbaban geeshsha gididi deꞌiyoogaana. Hegee nuuni qoppiyoobaa, oottiyoobaanne Xoossau goynniyoogaakka gujjees. Qassi, nuuni ‘Xoossaa milatiyaageeta gidanau’ Xoossaa wozanappe siiqananne bonchana koshshees. Yaatiyo gishshau, nuuni oottiyoobaa xalla gidennan, nuussi siyettiyaabaakka Xoossay qoppees. Yihooway “wozanaa” paacciyaagaa gidiyo gishshau, nu deꞌoy geeshsha gidiyoogaa woy gidennaagaa, qassi nuuni assi aqidoogaa woy aqibeennaagaa erees.—1 Odiya 29:17.

3. Nuussi Xoossaara deꞌiya dabbotaa xeelliyaagan, nuuni qoppana koshshiya oyshati awugeetee?

³ Seexaanaa Dabloosi nuuni Xoossan nashettanaadan koyenna. Nuussi Yihoowaara deꞌiya dabbotaa mooranau i danddayiyo ubbabaa oottees. Seexaanay wordduwaanne cimuwaa goꞌettidi nuuni ayyo goynniyo Xoossaappe nuna haassanau guyye geenna. (Yoh. 8:44; 2 Qor. 11:13-15) Hegaa gishshau, ‘Seexaanay asaa cimmiyoy ayba ogiyaanee? Yihoowaara tau deꞌiya dabbotay moorettennaadan ay oottana danddayiyaanaa?’ giidi nuna oychiyoogee loꞌꞌo.

SEEXAANAY ASAA CIMMIYOY AYBA OGIYAANEE?

4. Seexaanay nuussi Xoossaara deꞌiya dabbotay duuxxana mala qohanau koyiyoobay aybee, qassi aybissi?

⁴ Yesuusi erissiyo ashkkaraa Yaaqoobi hagaadan giis: “Asi huuphiyan huuphiyan ba huuphe iita amuwan gooshettiyo wodenne cimettiyo wode paacettees. Hegaappe guyyiyan, amoi shahaaridi, nagaraa yelees; qassi nagarai diccidi, haiquwaa yelees.” (Yaaq. 1:14, 15) Seexaanay nuussi Xoossaara deꞌiya dabbotay duuxxanaadan oottanau nu amuwau pultto gidida nu wozanaa qohanau koyees.

5, 6. (a) Seexaanay nuna qohiyoy ayba ogiyaanee? (b) Seexaanay nu wozanay iitabaa amottanaadan goꞌettiyo pireti awugeetee, qassi i hegeeta goꞌettiyoogan ay keena goobee?

⁵ Seexaanay nu wozanaa qohiyoy ayba ogiyaanee? Geeshsha Maxaafay “ha mule sa7aikka xalahe halaqan haarettidoogaa” yootees. (1 Yoh. 5:19) Seexaanay goꞌettiyo ola miishshay ‘saꞌan deꞌiyaabaa’ gujjees. (1 Yohaannisa 2:15, 16 nabbaba.) SHaꞌan qoodettiya layttau, Dabloosi asaa cimmanau ha alamiyaa hiillan giigissiis. Nuuni ha alamiyan deꞌiyo gishshau, a geema cimuwan qohettennaadan naagettana koshshees.—Yoh. 17:15.

⁶ Seexaanay nu wozanay iitabaa amottanaadan dumma dummabaa giigissiis. Kiitettida Yohaannisi Seexaanay hegau goꞌettiyo heezzu cimuwaa yootiis: (1) ‘asatettaa amuwaa,’ (2) ‘ayfen xeellidi qaaqqatiyoogaanne’ (3) ‘miishshan ceeqettiyoogaa’ woy ba aquwaa asa bessanau koyiyoogaa. Seexaanay Yesuusa bazzon paaccanau hageeta goꞌettiis. Seexaanay ha pireta daro layttau goꞌettido gishshau, i eta waati goꞌettanaakko loytti erees; qassi asaa huuphiyan huuphiyan oyqqanau awugaa goꞌettanaakko erees. Hagaappe naagettanau nuuni ay oottana danddayiyaakko beꞌanaappe kase, Dabloosi Xoossaa Naꞌaa cimmana xayikkonne, Hewaano waatidi cimmidaakko ane beꞌoos.

‘ASATETTAA AMUWAA’

7. Seexaanay Hewaano paaccanau ‘asatettaa amuwaa’ goꞌettidoy ayba ogiyaanee?

⁷ Paxa deꞌanau asa ubbay qumaa maana koshshees. Xoossay saꞌaa keehi daro kattaa mokkanaadan oottidi medhiis. Qumaa maanau nuussi deꞌiya koshshaa goꞌettidi, Seexaanay nuuni Xoossaa ufayssennabaa oottanaadan paaccanau malana danddayees. Hewaaniira gayttidaagan i waatidi hegaadan oottidaakko ane beꞌoos. (Doomettaabaa 3:1-6 nabbaba.) Seexaanay Hewaana “lo77uwaanne iitaa erissiya mittaa” maada hayqqennaagaa yootiis. I he mittaappe a miikko Xoossaa mala gidanaagaakka odiis. (Doo. 2:9) Yaatiyo gishshau, hegee Dabloosi Hewaana paxa deꞌanau Xoossau azazettana koshshenna giis giyoogaa mala. Hegee bulla worddo! Hewaana he qofaa ba wozanan wottikko, naaꞌꞌubaa doorana danddayausu: A he qofaa maayennan aggana danddayausu; woy qassi hegaa wotta denttada qoppada, he mittaa teeraa keehi amottana danddayausu. A ataakiltte sohuwan deꞌiya ubba mittaa teeraa maana danddayiyaaba gidikkonne, ataakiltte sohuwau gidduwan deꞌiya mittaabaa Seexaanay yootidoogaa wotta denttada qoppaasu; yaatada, a “he mittaa teeraappe ekkada maasu.” Seexaanay hegaadan oottiyoogan, Hewaana bana Medhidaagee mooppa giidobaa maanau amottanaadan oottiis.

8. Seexaanay ‘asatettaa amuwaa’ goꞌettidi Yesuusa paaccanau malidoy ayba ogiyaanee, qassi Seexaanay he paaciyan aybissi xoonibeennee?

⁸ Seexaanay Yesuusa bazzon paaccanau malido wode goꞌettidobay hegaara issi mala. Yesuusi bazzuwan oytamu gallassinne oytamu qammi qumaa mibeenna; Seexaanay he wode qumaa koshshaa goꞌettidi a paaccanau maliis. Seexaanay, “Neeni Xoossaa Na7aa gidikko ha shuchchaa, ‘Oitta gida’ gaada azaza” yaagiis. (Luq. 4:1-3) Yesuusi naaꞌꞌubaa doorana danddayees: I maalaalissiyaabaa oottiyo wolqqaa ba namisaa zaarana mala goꞌettana woy goꞌettennan aggana danddayees. Yesuusi hegaa mala wolqqaa bana siiqiyoogaa bessiyaabaa oottanau goꞌettana koshshennaagaa erees. I namisettikkonne, Yihoowa dabbo gididi deꞌiyoogaappe namisaa zaariyoogaa kaseyibeenna. Yesuusi, “Xoossaa maxaafai, ‘Asi Xoossaa qaalaa ubban de7anaappe attin, oitta xalaalan de7enna’ yaagees” yaagiis.—Luq. 4:4.

‘AYFEN XEELLIDI QAAQQATIYOOGAA’

9. ‘Ayfen xeellidi qaaqqatiyoogaa’ giyo qofay ay qonccissii, qassi Seexaanay Hewaano cimmanau ha amuwaa goꞌettidoy ayba ogiyaanee?

⁹ Yohaannisi ‘ayfen xeellidi qaaqqatiyoogeekka’ pire gidiyoogaa yootiis. He qofay issi uri issibaa xeellidi amottana danddayiyoogaa bessees. Seexaanay Hewaano cimmanau he amuwaa goꞌettiis. I, ‘Ne ayfee dooyettana’ yaagiis. Hewaana he mittaa teeraa keehi xeellin, mooppa giido mittaa teeray o keehi amoyiis. Hewaana he mittaa teeray “xeellanau lo77iyaagaa” gidiyoogaa beꞌaasu.

10. Seexaanay Yesuusa paaccanau ‘ayfen xeellidi qaaqqatiyoogaa’ goꞌettidoy ayba ogiyaanee, qassi Yesuusi zaaridoy ayba ogiyaanee?

¹⁰ ‘Ayfen xeellidi qaaqqatiyoogaa’ Yesuusa paaccanau Seexaanay goꞌettidoy ayba ogiyaanee? Seexaanay Yesuusa, “Sa7aa kawotettaa ubbaa issi kuttan bessiis. Xalahe halaqai, Ha wolqqa ubbainne bonchchoi taassi imettido gishshau, . . . neessikka immana” yaagiis. (Luq. 4:5, 6) Yesuusi beꞌidoy saꞌaa kawotetta ubbaa gidennan, he kawotettatu bonchuwaa bessiya ajjuutaa. Seexaanay Yesuusi beꞌidoban paacettees giidi qoppennan aggenna. Seexaanay yeella xayidi, “Neeni taassi goinnikko, ha ubbai neessi gidana” yaagiis. (Luq. 4:7) Yesuusi Seexaanay giidoogaadan oottanau koyibeenna. I sohuwaara zaariis. I, “Xoossaa maxaafai, ‘Godau, ne Xoossau goinna; a xalaalau ootta’ yaagees” yaagiis.—Luq. 4:8.

BA AQUWAA ASA BESSANAU KOYIYOOGA

11. Hewaana Seexaanan cimettidoy ayba ogiyaanee?

¹¹ Yohaannisi wurssettan yootidobay, ‘miishshan ceeqettiyoogaa’ woy ba aquwaa asa bessanau koyiyoogaa. Addaamenne Hewaani xallay saꞌan banttarkka deꞌiyo wode, eti ‘miishshan ceeqettana’ woy bantta aquwaa asa bessanau koyana danddayokkona. SHin, eti otorettidosona. Seexaanay Hewaano paaccido wode yootidobay, Xoossay o loꞌꞌobaa diggiis yaagiyoogaa mala. “Lo77uwaanne iitaa erissiya mittaa teeraappe” a miido gallassi “lo77uwaanne iitaa Xoossaadan” a eranaagaa Dabloosi issi yootiis. (Doo. 2:17; 3:5) Seexaanay Hewaana Yihoowappe shaahettada deꞌana danddayays gaada qoppanaadan koyiis. A otorettiyoogee he wordduwaa ammananaadan oottennan waayi aggana. A tumu hayqqikke gaada qoppada, mooppa giido mittaa teeraappe maasu. A keehi balabaa oottaasu!

12. Seexaanay Yesuusa paaccanau malido hara ogee aybee, qassi Yesuusi zaaridoy ayba ogiyaanee?

¹² Hewaaniigaappe dumma ogiyan, ba huuphiyaa kawushshiyoogan Yesuusi loꞌꞌo leemiso gidees. Yesuusi harata maalaalissiyaabaanne Xoossaa paacciyoobaa oottanaadan Seexaanay a paaccanau maliis. SHin, yaatiyoogee otorettiyoogaa bessiyaaba gidiyo gishshau, Yesuusi hegaadan oottanau mule koyibeenna. Yesuusi, “Xoossaa maxaafai, ‘Godaa ne Xoossaa paaccoppa’ yaagees” yaagidi, qoncce zaaro zaariis.—Luqaasa 4:9-12 nabbaba.

YIHOOWARAA NUUSSI DEꞌIYA DABBOTAA WAATI NAAGANA DANDDAYIYOO?

13, 14. Seexaanay ha wodiyan issi issi piriyaa waatidi goꞌettiyaakko qonccissa.

¹³ Seexaanay ha wodiyankka, Hewaanonne Yesuusa cimmanau goꞌettidoogaa mala piriyaa goꞌettees. I asay shori baynnabaa oottanaadan woy likkiyaappe aattidi maanaadaaninne uyanaadan paaccanau ‘asatettaa amuwaa’ goꞌettees. I asay Intternneetiyan pornograafiyaa beꞌanaadan paaccanau ‘ayfen xeellidi qaaqqatiyoogaa’ goꞌettees. Hegaa bollikka, asay otorettanaadan, sunttettanaunne hayttatanau koyanaadan, qassi daro aquwaa amottanaadan oottanau ‘miishshan ceeqettiyoogaa’ woy ba aquwaa asa bessanau koyiyoogaa goꞌettees.

¹⁴ ‘Ha saꞌan deꞌiyaabay’ moliyaa oyqqiyaageeti piriyaa xeeran wottiyo katta mala. Hegee keehi qaaqqayiyaaba, shin piriyaara gaytti uttiis. Seexaanay asay Xoossaa higgiyaa phalqqiyaabaa oottanaadan denttettanau eti ubba gallassi koshshiyaaba giidi qoppiyoobaa goꞌettees. SHin, hegaa mala geema paacee nuuni iitabaa amottanaadan oottanaunne nu wozanaa qohanau giigiis. He piree, nuuni nuussi koshshiyaabaa kunttiyoogeenne injje deꞌo deꞌiyoogee Xoossaa sheniyaa oottiyoogaappe aadhees giidi qoppanaadan oottanau giigidaba. Seexaanay nena cimmanaadan koyay?

15. Seexaanaa paaciyaa eqettiyoogan nuuni Yesuusa leemisuwaa kaallana danddayiyoy ayba ogiyaanee?

¹⁵ Hewaana Seexaanaa paaciyan kunddikkokka, Yesuusi he paaciyaa eqettiis. I paacettido paace ubban, “Xoossaa Maxaafai, . . . yaagees” giidi zaariis. Nuuni Geeshsha Maxaafaa minni xannaꞌikko, an deꞌiya qofaa loyttidi eroos; qassi paacee gakkiyo wode suure qofaa qoppanaadan maaddana danddayiya xiqiseta hassayana danddayoos. (Maz. 1:1, 2) Geeshsha Maxaafan etabay odettido, Xoossau ammanettida Kiristtaaneta hassayiyoogee nuuni eta leemisuwaa kaallanaadan maaddees. (Roo. 15:4) Yihoowa wozanappe bonchiyoogee, i siiqiyoobaa siiqiyoogeenne i ixxiyoobaa ixxiyoogee nuna iitabaappe naagees.—Maz. 97:10.

16, 17. Nuuni ‘qoppiyo abbee’ nuna waatidi maaddana woy qohana danddayii?

¹⁶ Kiitettida PHauloosi nuuni ha alamiyaagaa gidennan, Xoossaa qofaa kaallanau nu “qoppiyo abbiyaa” goꞌettanaadan minttettiis. (Roo. 12:1, 2, NW) Nuuni qoppiyoobaa xeelliyaagan nu huuphiyaa naagana koshshiyoogaa qonccissanau PHauloosi hagaadan giis: “Nuuni asa qofa xaissoos; qassi Xoossaa eratettaa bolli denddidi xubbiya otoro qofa ubbaa laaloos. He qofa ubbai Kiristtoosayyo azazettana mala omooddoos.” (2 Qor. 10:5) Nuuni qoppiyoobay nuna maaddana woy qohana danddayees; yaatiyo gishshau, nuuni ubbatoo loꞌꞌobaa ‘qoppana’ koshshees.—Pili. 4:8.

¹⁷ Nuuni geeshsha gidanau koyikko, iitabaa qoppananne amottana koshshenna. Nuuni Yihoowa “geeshsha wozanaappe” siiqana bessees. (1 Xim. 1:5) SHin, nu wozanay cimmiyaagaa gidiyo gishshau, ‘ha saꞌan deꞌiyaabay’ nuna ay keena qohiyaakko akeekennan aggana danddayoos. (Erm. 17:9) Yaatiyo gishshau, nuuni Geeshsha Maxaafaappe tamaaridobaa maaran, ‘ammanuwan deꞌiyaakkonne nuna qoridi pirddana’ koshshennee?—2 Qor. 13:5.

18, 19. Nuuni Yihooway koyiyoogaa mala asa gidanau murttana koshshiyoy aybissee?

¹⁸ ‘Ha saꞌan deꞌiyaabaa’ eqettanaadan nuna maaddiya harabay Yohaannisi geeshsha ayyaanay denttettin yootidobaa hassayiyoogaa. I, “Ha sa7ainne ha sa7an asi amottiyo ubbabai aadhdhana. SHin Xoossai giidoogaa oottiya urai merinau de7ana” yaagiis. (1 Yoh. 2:17) Seexaanaa alamee merinau deꞌiyaaba malatees. SHin, ha alamee issi galla xayana. Seexaanaa alamee nuussi immiyoobi aybinne merinau deꞌenna. Hegaa hassayiyoogee nuuni Dabloosan cimettennaadan maaddees.

¹⁹ Kiitettida PHeexiroosi nuuni Xoossan nashettiyaageeta gidana bessiyoogaa yootiis. I hagaadan giis: “Intte Xoossaa gallassaa naagishin, he gallassai eesuwan gakkanaadan, intteyyo danddayettiyaabaa oottite; he gallassi saloti xuugettidi xayananne saluwaa meretatikka wolqqaama mishuwan seerana.” (2 PHe. 3:12) He gallassay yaana wodee keehi matattiis; qassi Yihooway Seexaanaa alamiyaa muleera xayssana. He wodee gakkanaassi, Seexaanay Hewaanonne Yesuusa paaccidoogaadan, nuna paaccanau ‘ha saꞌan deꞌiyaabaa’ ubbatoo goꞌettana. Hewaaniigaadan nu iita amuwaa poliyoogee Seexaanay nu xoossaa gidanaadan koyiyoogaa mala gidiyo gishshau, nuuni hegaadan oottana koshshenna. Seexaanay hegaa mala paaciyaa keehi amoyiyaaba oottidi shiishshikkonne, nuuni Yesuusaagaadan paaciyaa eqettana koshshees. Nuuni ubbaykka Yihooway koyiyoogaa mala asa gidanau murttidaageeta gidoos.