Aqo Laggee Hayqqin Ne Bolli Gakkiyaabaa

GEESHSHA MAXAAFAY azinay ‘ba maccaasiyo ba huuphedan siiqana’ koshshiyoogaa yootees. Machiyaakka hegaadan ba “azinaa bonchchanau bessees.” Eti naaꞌꞌaykka banttappe koyettiyaabaa ‘issi ashodan’ polana koshshees. (Efi. 5:33; Doo. 2:23, 24) Eti issippe daro wodiyau deꞌido peeshshan, keehi siiqettoosona; qassi eta issippetettaykka minnees. Issoy issuwaa miyyiyan deꞌiya naaꞌꞌu mittaa xaphoy dadettiyoogaadan, ufayssiya aqo deꞌuwan azinaynne machiyaa keehi siiqettoosona.

Azinay woy machiyaa hayqqikko shin? Eti issippe deꞌiyo wode duuxxenna issippetettay he wode duuxxees. Aqo laggee hayqqido uri darotoo keehi azzanees, boorasees, qassi zilꞌꞌettana woy hanqqettana danddayees. Daniyela ba azinaara deꞌido 58 layttan aqo laggee hayqqido daro asaa erausu.a SHin ba azinay hayqqi simmin a, “Hagaa taani mule kase akeekabeykke. Inttena hegaa malabay gakkana xayikko mule erana danddayekketa” yaagaasu.

QAARETTENNABA MILATIYA AZZANUWAA

Siiqiyo aqo laggee hayqqiyoogaappe aaruwan unꞌꞌissiyaabi baynnaagaa issi issi eranchati yootoosona. Aqo laggee hayqqido daroti ha qofaa maayoosona. Mili azinay daro layttappe kase hayqqiis. A, “Tana gunddi uttida uradan xeellays” yaagada, amꞌꞌe gidada deꞌiyo deꞌuwaabaa qonccissaasu. A hegaadan giidoy 25 layttau banaara deꞌida azinay hayqqin bau siyettiyaabaa qonccissanaassa.

Suuzana azini hayqqin daro layttau kayyottiya amꞌꞌeti likkiyaappe aattidi azzaniyaabadan qoppaasu. Gidikkonne, 38 layttau iira deꞌida azinay hayqqiis. Haꞌꞌi 20 layttaappe daroy aadhiis; shin a, “Taani ubba galla abaa qoppays” yaagausu. A ba azinaa keehi laamotiyo gishshau darotoo afuttaa tigausu.

Aqo laggee hayqqin azzanoy paccennaagaanne hegee keehi qohiyoogaa Geeshsha Maxaafay yootees. Saara hayqqido wode, i azinay “Abrahaami Saariyyo yeekkanaunne kayyottanau biis.” (Doo. 23:1, 2) Abrahaami dendduwaa hidootan ammaniyaaba gidikkonne, ba siiqiyaa hayqqin keehi azzaniis. (Ibr. 11:17-19) Yaaqoobi i siiqiyo machiyaa Raaheela hayqqinkka o dogibeenna. I mishettiiddi ibaa ba naatussi yootiis.—Doo. 44:27; 48:7.

Geeshsha Maxaafan qonccida ha leemisotuppe nuuni ay tamaarana koshshii? Aqo laggee hayqqidoogeeti daro layttau azzanoosona. Eta afuttaanne eta azzanuwaa nuuni laafatettadan gidennan, eti siiqiyo aqo laggee hayqqin gakkiya meeze gididabadan xeellana koshshees. Nuuni daro wodiyau etau qarettananne eta maaddana koshshennan waayi aggana.

WONTTOBAU HIRGGOPPA

Aqo laggee hayqqido uraa deꞌoy machibeenna woy gelibeenna wodiyaagaa mala gidenna. Aqo deꞌuwan issippe daro layttaa takkiyo wode, machiyaa azzaniyo wode woy hidootaa qanxxiyo wode azinay o waati minttettanaakko erees. I hayqqikko, i o siiqiyoogeenne minttettiyoogee attees. Hegaadankka, maccaasiyaa ba azinaara deꞌido peeshshan i woppu gaanaadaaninne ufayttanaadan waatanaakko akeekausu. Minttettiyaabaa haasayiyoogaaninne ufayssiyaabaa haniyoogan a siiquwaa bessiyoogaara laggetiyaabi mule baawa. Maccaasiyaa hayqqikko, i mela attidabadan qoppana danddayees. Yaatiyo gishshau, aqo laggee hayqqido issoti issoti sintta wodiyaabaa yayyoosonanne hirggoosona. Eti woppu giidi saro deꞌanaadan maaddana danddayiya Geeshsha Maxaafaa maaray awugee?

[Sinttaa 28n deʼiya misiliyaa] — Neeni wonttobau hirggennan genccanaadan Xoossay maaddana danddayees

“Wonttobau hirggoppite; aissi giikko, wonttoi bau hirggana; gallassa ubbaukka gidiya a huuphe waayee de7ees.” (Maa. 6:34) Yesuusi yootido ha qofay asatettan koshshiyaabau haniyaaba, shin siiqiyo aqo laggee hayqqin azzaniya daroti genccanaadankka maaddiis. CHarleesi ba machiyaa hayqqoosappe amarida aginay aadhi simmin hagaadan giis: “Taani haꞌꞌikka Moniko keehi laamotays; qassi issi issitoo laamotan hayqqana hanays. SHin, hegee wottin deꞌiyaaba gidiyoogaanne takkidi wurssettan seelay guuttaa irxxanaagaa akeekays.”

Ee, CHarleesi minettanau ‘takkana’ koshshiis. I waanidi minettidee? I, “Yihooway maaddiyo gishshau, wonttobau hirggikke” yaagiis. CHarleesi azzanuwan shabbirettibeenna. I azzaniyoogaa sohuwaara aggibeennaba gidikkonne, keehi qohettibeenna. Ne aqo laggee hayqqidaba gidikko, wonttobau hirggenna mala baaxeta. Wonttetta gallassan neeni waanada maadettanaakko woy minettanaakko erakka.

Hayqoy ‘xalahe halaqaa oosoppe’ attin, Yihooway koyro halchidoba gidenna. (1 Yoh. 3:8; Roo. 6:23) Seexaanay daro asay hayquwau yayyiyoogan au aylletanaadaaninne hidooti baynnaageeta gidanaadan oottees. (Ibr. 2:14, 15) Seexaanay issi uri Xoossay ehaana ooratta alamiyan ufayssaanne woppaa demmanau yeemottiyoogaa aggiyo wode ufayttees. Hegaa gishshau, aqo laggee hayqqido uri keehi azzaniyoogee Addaame nagaraynne Seexaanaa cimoy kaalettidoba. (Roo. 5:12) Yihooway Seexaanay goꞌettiyo miishsha gidida hayquwaa xayssiyoogan, Seexaanaa gaasuwan gakkida qohiyaabaa muleera xayssana. Seexaanay yashissiyoogaappe naxa kiyida daroti aqo laggee hayqqidoogeeta; neenikka etappe issuwaa gidennan aggakka.

Hayquwaappe denddiyaageetu deꞌoy ooratta alamiyan laamettana. Asaa giddon deꞌiya dabbotay laamettana. Bantta naatuuranne bantta naatu naatuura loddan loddan laamettidi polo gidiya aayyiyo aawaanne eta yelidaageeta, qassi hayquwaappe denddana hara mayzzata qoppa. Cimatettaa gaasuwan gakkiyaabay muleera xayana. Mayzzata etappe kaalliya yeletay ha wodiyaagaappe keehi dummatiya ogiyan xeellana danddayees. He laamee asaa giddon deꞌiya dabbotay minnanaadan maaddana.

Hayquwaappe denddiyaageeta xeelliyaagan, naaꞌꞌu woy hegaappe daro aqo laggee hayqqidoogeeti waananee giyaagaa mala, keehi daro oyshay denddana danddayees. Saaduqaaweti koyro azinay hayqqin, naaꞌꞌantto azinaynne hegaadankka o ayssida hara daroti hayqqido issi maccaaseebaa oychidosona. (Luq. 20:27-33) Eti hayquwaappe denddiyo wode ay mala dabbotan deꞌanee? Nuuni hegaabaa aynne erokko; qassi he erennabaa xeelliyaagan malana woy hirggana bessenna. Nuuni Xoossan ammanettana koshshees. Yihooway sinttappe ehaana ubbabay loꞌꞌoba gidiyo gishshau, hidootan naagiyoobaappe attin, yashshiyaaba gidennaagee erettidaagaa.

DENDDUWAA HIDOOTAY MINTTETTIYAABA

Nuuni siiqiyo hayqqidaageeti denddanaagee Xoossaa Qaalay tamaarissiyo qonccebaappe issuwaa. Geeshsha Maxaafay beni hayquwaappe denddidaageetubaa yootiyoobay, ‘duufuwan deꞌiyaageeti Yesuusa cenggurssaa siyidi duufuwaappe gaxi kiyanaagaa’ nuuni ammanettanaadan oottiyaaba. (Yoh. 5:28, 29) He wode deꞌiya asay hayquwaappe denddiya asaara gayttiyo wode ufayttana. Hara baggaara qassi, hayquwaappe denddiya asay ay keena ufayttanaakko qoppanakka danddayokko.

Hayqqidaageeti denddiyo wode, saꞌan awudeegaappenne aaruwan ufayssay kumana. Biilooniyan qoodettiyaageeti hayquwaappe denddidi paxa deꞌana. (Mar. 5:39-42; Ajj. 20:13) Sinttappe hanana ha maalaalissiyaabaa wotti denttidi qoppiyoogee siiqiyo uri hayqqidoogeeta ubbaa minttettees.

Hayqqidaageeti denddiyo wode issi uri azzaniyo gaasoy deꞌii? Azzaniyo gaasoy baynnaagaa Geeshsha Maxaafay yootees. Isiyaasa 25:8y yootiyoogaadan, Yihooway “haiquwaa . . . merinau mittana.” I hegaadan oottiyo issi ogee hayqoy kaalettiyo azzanuwaa muleera xayssiyoogaa; ayssi giikko, he xiqisee kaallidi, “Ubbaa Haariya GODAI aife ubbaappe afuttaa quccana” yaagees. Ne aqo laggee hayqqin haꞌꞌi azzaniyaaba gidikko, neeni ne aqo laggee denddin ufayttana.

Xoossay ooratta alamiyan oottanabaa ooninne wurssi erenna. Yihooway, “Saloti sa7aappe xoqqiyoogaadan, ta ogee intte ogiyaappe xoqqees; ta qofaikka intte qofaappe xoqqees” yaagees. (Isi. 55:9) Dendduwaa xeelliyaagan Yesuusi qaalaa gelidobay nuunikka Abrahaamaagaadan Yihoowan ammanettanaadan oottees. Ha wodiyan, ubba Kiristtaaneti Xoossay banttappe koyiyoobaa oottiyoogee keehi koshshiyaaba. Yaatikko, hayquwaappe denddiyaageetuura “sinttappe yiya wodiyan de7anau bessiya” asa gidoos.—Luq. 20:35.

HIDOOTAA WOTTANAU GAASO GIDIYAABAA

Sinttanaabau hirggiyoogaappe hidootaa wotta. Daro asau sinttanaabaa xeelliyaagan hidooti baawa. SHin Yihooway nuussi keha hidootay deꞌanaadan oottiis. Yihooway nuussi koshshiyaabaanne nuuni amottiyoobaa ubbaa waati kunttanaakko nuuni geeshshidi erana xayikkonne, i hegaa polanaagaa sirana bessenna. Kiitettida PHauloosi hagaadan giis: “Nuuni Xoossai immana giidoogaa be7ikko, yaatin, hegee ufaissan naagiyoobaa gidenna; aissi giikko, ba be7iyoobaa demmana giiddi, ufaissan naagiyai oonee? SHin nuuni be7ennaagaa demmana giidi, ufaissan naagikko, hegaa danddayidi naagoos.” (Roo. 8:24, 25) Xoossay ehaanau qaalaa gelidobaa neeni hidootan naagiyoogee genccanaadan maaddees. Neeni gencciyoogan, Yihooway “neeyyo ne wozanaa amuwaa immana” sinttappe yaana he maalaalissiya wodiyaa ne ayfiyan beꞌana. I “paxa de7iyaageeta ubbaa amuwaa” alana.—Maz. 37:4; 145:16; Luq. 21:19.

[Sinttaa 31n deʼiya misiliyaa] — Yihooway sinttappe ufayssiyaabay kumido wodiyaa ehaanaagaa ammanetta

Yesuusi hayqqiyo wodee matattin, i kiittidoogeetu wozanay shabbirettiis. Yesuusi eta, “Intte wozanai hirggoppo; Xoossaa ammanite; tanakka ammanite” yaagidi minttettiis. I etau, “Taani inttena intterkka yeggabeikke; taani simmada inttekko yaana” yaagiis. (Yoh. 14:1-4, 18, 27) I yootidobay hanno gakkanau deꞌida a kaalliya tiyettidaageeti hidootaa wottanaadaaninne genccanaadan maaddiyaaba. Siiqiyo uri hayquwaappe denddin beꞌanau amottiyaageeti hidootaa qanxxiyo gaasoy baawa. Yihoowaynne a Naꞌay eti azzanidi attanaadan yeggibayokkona. Hegan ammanana danddayaasa.

a Asatu sunttay laamettiis.

Kayyottidaageeta Minttetta

Aqo oyqqida Kiristtaanee hayqqi simmin, paxa deꞌiya aqo laggiyaa minttettanaunne dumma dummaban maaddanau daroti eta soo baana danddayoosona. Leemisuwau, issi amꞌꞌiyaa so asaynne laggeti maaddiyoogaa nashshana danddayausu. SHin azzanoy ippe eesuwan qaarettennan aggana danddayees; yaatiyo gishshau, o amarida wodiyau maaddananne minttettana koshshees. Geeshsha Maxaafay, “Laggee mule wodekka siiqees; ishaikka metuwaa wode maaddanaassi yelettees” yaagees.—Lee. 17:17.

Neeni kayyottida uraa woygada sarotana koshshii? Geeshsha Maxaafay, “Ubbai issi qofan de7ite. Issoi issuwau qarettidi, ishanttudan siiqettite; qassi issoi issuwau [kehiyaageeta] . . . gidite” yaagidi nuna zorees. (1 PHe. 3:8) Aqo laggee hayqqi simmin amarida wodiyau, issi Kiristtaanee azzanana danddayees. Hegaa gishshau, loꞌꞌobaa qoppikkonne, “Minettadii?” giyaagaa mala oyshaa oychiyoogee loꞌꞌo gidennan aggana danddayees. Azzanida uri, ‘Taayyo siyettiyaabaa neeni aynne erakka’ woy qassi, ‘Hanni keenan waana minettana danddayiyaanaa?’ giidi qoppana danddayees. Yaatiyo gishshau, “Nenaara gayttidoogan keehi ufayttaas” woy “Neeni gubaaꞌiyaa yiidoogee minttettiyaaba” giyoogaa mala keha qaalaa wozanappe haasayiyoogee maaddana danddayees.

Nenaara qumaa maanaadan woy issisaa baanaadan kayyottida uraa shoobbana danddayaasa. Machiyaa hayqqido Markoosa oychanau biida a laggeti minttettidosona. Eti haasayidobay aybee? I, “Eti ta metuwaabaa daro haasayibookkona; shin minttettiyaabaa haasayidosona” yaagiis. Nayno giyo amꞌꞌiyaa, “Ta loꞌꞌo laggeti darotoo bessiya wodiyan kehabaa haasayoosona. Issi issitoo eti aybanne haasayokkona; ta miyyiyan coo uttoosona” yaagaasu.

He uri ba aqo laggiyaa hayquwaabaa haasayanau koyikko, danddayan wozanappe ezgga. Erana koyiyoobaa ubbaa oychoppa. He uraa bolli pirddoppa. Izaawu waati azzananaakko woy ay keena wodiyau azzananaakko zorana koshshenna. He uri ba matan asi deꞌanaadan koyana xayikko lanccoppa. Hara wode simmada baana danddayaasa. Siiqiyoogaa aggoppa.—Yoh. 13:34, 35.

Sinttanaabaa Xeelliyaagan Neeni Zaaro Demmabeennabi Deꞌii?

Yihooway qaalaa gelidobay waani polettaneeshsha giidi qoppiyoogee wottin deꞌiyaaba. Abrahaami Xoossay au attuma naꞌaa immanau gelido qaalaabaa darotoo qoppiis. Yihooway i danddayan naaganaadan yootiis. He ammanettida bitanee azzanibeenna.—Doo. 15:2-5; Ibr. 6:10-15.

Yooseefi hayqqiis giidi yooti simmin, Yaaqoobi ba naꞌaa keehi laamotiis. Yaaqoobi daro layttay aadhi simminkka, i hayqqiis giidi qoppido ba naꞌaayyo azzaniyoogaa aggibeenna. Gidoppe attin, Yihooway bau ammanettida Yaaqoobau i qoppana danddayenna anjjuwaa immana. Yaaqoobi guyyeppe Yooseefaaranne a naatuura gayttidi ufayttiis. Yaaqoobi, “Taani ne som77uwaa be7ana gaada qoppabeikke; shin Xoossai hekko ne naatakka tana bessiis” yaagiis.—Doo. 37:33-35; 48:11.

Nuuni ha taariketuppe ay tamaarana danddayiyoo? Koyruwan, Ubbaa Danddayiya Xoossay ba sheniyaa polennaadan aybinne diggana danddayenna. Naaꞌꞌanttuwan, nuuni Yihoowa sheniyaara maayettiyaaba oottanau baaxetiyaabanne woossiyaaba gidikko, i ha wodiyan nuussi koshshiyaabaa kunttana; qassi nuuni amottiyoobaa sinttappe muleera polana. PHauloosi hagaadan giidi xaafiis: “Nu giddon oottiya ba wolqqaa baggaara nuuni woossiyoobaa woi qoppiyoobaa ubbaappe keehi darissi oottanau danddayiya Xoossaayyo, woosa keettaaninne Kiristtoos Yesuusan ubba wode merinaappe merinaa gakkanaassi bonchchoi gido. Amin77i.”—Efi. 3:20, 21.