Naaꞌꞌu Godatuyyo Oottana Danddayiyay Baawa

1-3. (a) Ha wodiyan darota miishshaara gayttidaagan ayba metoy gakkii, qassi issoti issoti he metuwaappe shemppanau ay oottiyoonaa? (Ha huuphe yohuwaa doomettan deꞌiya misiliyaa xeella.) (b) Naata dichiyoogaara gayttidaagan qoppana bessiyaabay aybee?

MARILINOa giyo maccaasiyaa hagaadan gaasu: “Ta azinay Jemsi oosuwaappe ubba wode daafuridi yees; shin a damoozay nuuyyo galla galla koshshiyaabaappe harabau palahenna. Hegaa gishshau, taani amarida miishshaa demmanaunne nu naꞌaa Jiimayyo aara issippe tamaariya naatuugaa mala issi issi loꞌꞌobaa shammanau koyaas.” Marilina ba dabbota maaddanaunne miishshaa minjjanaukka koyaasu. I laggetuppe daroti miishshaa demmanau hara biitti biidosona. SHin a baanau qoppiyo wode, o darobay qofissiis. Aybissi?

² Ba siiqiyo so asaanne ayyaanaaban ubbabaa issippe oottiyoogaa aggidi baanaagee Marilino hirggissiis. SHin a, ‘Harati amarida wodiyau kare biitti biidaba gidikkokka eta so asay ayyaanaaban qohettidaba milatenna’ gaada qoppaasu. Gidoppe attin, a haaho biittan uttada ba naꞌaa Jiima waata dichanaakko hirggaasu. A ba naꞌaa Intternneetiyaa goꞌettada haasayissiyoogan Yihoowa “seeraaninne zoriyan” suure dichana danddayay?—Efi. 6:4.

³ Marilina he wode zoriyaa koyaasu. I azinay o teqqanau malennaagaa yootikkokka, a baanaadan koyibeenna. Cimatinne gubaaꞌiyan deꞌiya harati a beenna mala zoridosona; shin amarida michoti a baanaadan minttettidosona. Eti, “Neeni ne soo asaa dosikko baasa. Qassi yan Yihoowayyo haggaazana danddayaasa” yaagidosona. Marilina hirggidaba gidikkokka, Jemsanne Jiima saro deꞌite ga yerada oosuwaa koyanau kare biitti baasu. A, “Taani yan daro wodiyaa takkikke” yaagaasu.

SO ASAU KUNTTANA BESSIYAABAANNE GEESHSHA MAXAAFAA MAARAA

4. Daroti kare biitti biyoy aybissee, shin eta naata dichiyay oonee?

⁴ Yihooway ba ashkkarati koshatanaadan koyenna. Qassi benippe doommidi, Yihoowa asay hiyyeesidi deꞌiyoogaappe hara biitti biidi deꞌiis. (Maz. 37:25; Lee. 30:8) Koshshaappe attanau, kattaa shammanaadan Yaaqoobi ba naata Gibxxe kiittiis.b (Doo. 42:1, 2) SHin ha wodiyan daroti kare biitti biyoy bantta soo asay namisettiyo gishshataassa gidenna. Eti biyoy acuwaa qanxxanaassa gidana danddayees. Harati qassi bantta soo asay injje duussa deꞌanaadan koyidi baana danddayoosona. Hegaa gishshau, eti bantta soo asaa aggidi daro miishshaa demmana danddayiyo haahosaa woy kare biitti boosona. Eti bantta aqo laggee, bantta naatu giddon gasttati, bantta aayyiyaa woy aaway, hara dabboti woy laggeti bantta guutta naata xeellanaadan immoosona. Daroti bantta aqo laggiyaa woy naata aggidi kare biitti biyo wode azzaniyaaba gidikkokka, baana koshshees giidi qoppoosona.

5, 6. (a) Ufayssaanne woppaa xeelliyaagan Yesuusi ay tamaarissidee? (b) Yesuusi bana kaalliyaageeti banttau koshshiya aybiyyo woossanaadan tamaarissidee? (c) Yihooway nuna anjjiyoy aybiinee?

⁵ Yesuusi saꞌan deꞌiyo wodekka daro asay hiyyeesa; qassi eti daro miishshay banttau deꞌiyaakko ufayssiyaanne woppa deꞌuwaa deꞌana danddayiyaabadan qoppennan aggokkona. (Mar. 14:7) SHin Yesuusi asay haraban hidootaa wottanaadan koyiis. I asay merinau anjjiya Yihoowan ammanettanaadan koyiis. Yesuusi Deriyaa Bolla Timirttiyan, tumuppe ufayttidi woppa deꞌuwaa deꞌana danddayiyoy aquwaa dagayiyoogaana woy baaxetidi oottiyoogaana gidennan, saluwan deꞌiya nu Aawaara dabbotiyoogaana gidiyoogaa qonccissiis.

⁶ Yesuusi tamaarissido leemiso gidiya woosan nuuni ishalo deꞌuwaa deꞌanau gidennan, “hachchi hachchi koshshiya qumaa” demmanau woossana mala tamaarissiis. I yootiyoobaa ezggiyaageetuyyo, “Sa7an intte huuphessi miishsha dagayoppite. SHin . . . intte huuphessi saluwan miishsha dagayite” yaagidi mintti yootiis. (Maa. 6:9, 11, 19, 20) Yihooway qaalaa gelidoogaadan nuna anjjanaagaa ammanettana danddayoos. Xoossay nunan ufayttiyoogaa xallan gidennan, nuussi koshshiya ubbabaa kunttiyoogan nuna anjjees. Ee, ufayttidi woppa deꞌuwaa deꞌana danddayiyoy miishshan ammanettiyoogaana gidennan, nuussi qoppiya Aawan ammanettiyoogaana.—Maatiyoosa 6:24, 25, 31-34 nabbaba.

7. (a) Naata dichiyo aawatettaa Yihooway oossi immidee? (b) Aawaynne aayyiyaa naata issippe dichana koshshiyoy aybissee?

⁷ ‘Kasetidi Xoossaa xillotettaa koyiyo’ issi ogee so asaara gayttidaagan oottana bessiyaabaa Yihoowagaadan xeelliyoogaa. Muuse Higgee aawaynne aayyiyaa bantta naata ayyaanaabaa tamaarissana koshshiyoogaa yootees; hegee Kiristtaanetikka kaallana bessiyo maara. (Zaarettido Wogaa 6:6, 7 nabbaba.) Yihooway he aawatettaa aawaassinne aayeessi immiisippe attin, aawaa aawaassi woy aayee aayeessi woy hara urassi immibeenna. Kawuwaa Solomoni, “Ta na7au, ne aawaa zoriyaa ezgga; ne aayyiyaa tamaarissiyoogaakka karoppa” yaagiis. (Lee. 1:8) Yihooway naata yelidaageeti naaꞌꞌaykka bantta naata kaalettanaadaaninne tamaarissanaadan koyees. (Lee. 31:10, 27, 28) Naati bantta aawaaranne aayeera haasayiyoogan, eti yootiyoobaa siyiyoogaaninne eti oottiyoobaa beꞌiyoogan Yihoowabaa galla galla darobaa tamaaroosona.

QOPPENNAN GUYEPPE GAKKIYAABAA

8, 9. (a) Aaway woy aayyiyaa sooppe haakkidi deꞌikko darotoo aybi merettii? (b) SHaahettidi deꞌiyoogee qofaaninne kandduwan waati qohii?

⁸ Kare biitti biya daroti baanaappe kase hegee ay meto kaalettiyaakko qoppanau maloosona; shin so asaa aggidi biyoogee ay kaalettiyaakko daroti qoppokkona. (Lee. 22:3)c Marilina kare bitti baada takkennan ba soo asaa laamotiyoogaa doommaasu. I azinaynne i naꞌaykka o laamotiyoogaa doommidosona. Eta naꞌay Jiimi ubba wode o, “Neeni tana ayssi aggada baadii?” yaagidi oychees. Marilina guutta aginaa takkanau biidaba gidikkokka, amarida layttaa takkada, i soo asaa hanotay loꞌꞌo gidennaagaa akeekaasu. Jiimi ippe shaahettidi diccido gishshau qofan qohettiis. Marilina azzanaydda, “I tana siiqiyoogaa aggiis” yaagaasu.

⁹ Aaway, aayyiyaanne naati issippe deꞌennaba gidikko, so asay qofaaninne kandduwan moorettana danddayees.d Naati keehi guutta, qassi shaahettidi takkiyo wodee keehi daro gidikko, qohoy wolqqaama. Marilina Jiima maaddanau koyada hegaadan oottidoogaa au yootaasu. SHin Jiimi ba aayyiyaa bana ola bayidabadan qoppiis. I koyro a biido gishshau yiillotiis. SHin a guyyeppe laamotada beꞌanau yiido gishshaukka i yillotiis. Aggi biido hara naatuugaadan, Jiimikka ba aayeessi azazettananne o siiqana koshshennabadan qoppiis.—Leemiso 29:15 nabbaba.

10. (a) Aaway woy aayyiyaa naatuppe shaahettidi deꞌiyo gishshau eta ufayssanau imotaa kiittiyoogee naata waati qohii? (b) Aaway woy aayyiyaa kare biittan uttidi naata dichanau baaxetiyo wode ay oottana danddayokkonaa?

¹⁰ Marilina ba naꞌaa ufayssanau miishshaanne imotaa au yeddiyaaba gidikkokka, naꞌay baappe haakkanaadan, qassi so asaappenne Yihoowappe aattidi miishshaa siiqanaadan oottaasu. (Lee. 22:6) Ubba Jiimi o, “Imotaa kiittappe attin yooppa” yaagiis. Marilina dabddaabbiyaa xaafiyoogan, silkkiyaa dawaliyoogan, woy Intternneetiyaa goꞌettada haasayissiyoogan ba naꞌaa dichana danddayennaagaa guyyeppe akeekaasu. A, “Intternneetiyaa goꞌettidi intte naꞌaa qoommana woy yeri ekkana danddayekketa” yaagaasu.

11. (a) Oosuwau giidi aqo laggiyaappe shaahettiyoogee aqo deꞌuwaa waati qohii? (b) Issi michiyaa zaarettada ba soo asaara deꞌana koshshiyoogaa waata akeekadee?

¹¹ Mariliniyyo Yihoowaaranne i azinaa Jemsaara deꞌiya dabbotaykka moorettana haniis. A gubaaꞌiyaa biyoynne haggaaziyoy saaminttan issi gallassa; ubba issi issitoo hegaukka wode demmukku; qassi i alaafee iira asho gaytotettaa polanau oychiyo wode a eqettaydda deꞌaasu. Jemsinne Marilina issippe deꞌennaagaappe denddidaagan bantta metuwaa issoy issuwau yootana danddayenna gishshau, haratuyyo yootoosona; qassi hegaappe denddidaagan wodiraa laammiichi attidosona. Eti wodiraa laammibeennaba gidikkokka, shaahettidi deꞌiyo wodiyan qofaaninne asho gaytotettaara gayttidaban issoy issuwau koshshiyaabaa oottanaadan Geeshsha Maxaafay yootiyoobaa kaallibeennaagaa Marilina akeekaasu. Jemsinne Marilina issoy issuwaappe keehi haakkidi deꞌiyo gishshau, issippe ulobaa haasayanaunne aqo laggessi ‘oottana bessiyaabaa’ oottanau danddayibookkona. (Sii. 1:2; 1 Qor. 7:3, 5) Eti bantta naꞌaara issippe Yihoowau goynnana danddayibookkona. Marilina hagaadan gaasu: “So asaa goynuwau ubba wode shiiqiyoogee Yihoowa gita gallassan attanau nuuyyo keehippe koshshiyaaba gidiyoogaa awuraajjaa shiiquwan siyada taani ta soo simmana koshshiyoogaa akeekaas. Taani Yihoowaaranne ta soo asaara deꞌiya dabbotaa minttana koshshiis.”

LOꞌꞌO ZORIYAANNE IITA ZORIYAA

12. So asaappe shaahettidi kare biittan deꞌiyaageeta maaddana danddayiya Geeshsha Maxaafaa zoree awugee?

¹² Marilina soo simmanau qofaa qachido wode, issoti issoti loꞌꞌo zore harati qassi iita zore zoridosona. He biittan deꞌiya gubaaꞌiyaa cimati i ammanuwaa gishshau o nashshidosona. SHin bantta aqo laggiyaanne bantta soo asaa aggidi he biittan deꞌiya issoti issoti o nashshibookkona. Eti i loꞌꞌo leemisuwaa kaalliyoogaa aggidi, i qofaa laamissanau baaxetidosona. Eti o, “Neeni sohuwaara simmada yiyoogee attenna. Soo simmiyaaba gidikko, koshshiyaabaa waata kunttuutee?” yaagidosona. Kiristtaaneti hegaadan iitabaa zoriyoogaappe, “Xoossaa qaalai borettenna mala, bantta keettaawatanne bantta naata siiqiyaageeta, . . . bantta keettan oottiyaageeta . . . gidana mala, yelaga maccaasaa” tamaarissana bessees.—Tiitu 2:3-5 nabbaba.

13, 14. Nuuni so asay koyiyoobaa eqettanau ammanoy koshshiyoy aybissee? Leemisuwaa yoota.

¹³ Kare biitti biya daroti bantta soo asau, ubba qassi bantta aawaassinne aayeessi koshshiyaabaa kunttiyoogaa daro asay ubbabaappe xoqqu oottidi xeelliyo wogan diccidosona. Issi Kiristtaanee asay meezetidobaappe dummatiyaabaa oottiyoogee woy so asaappe aattidi Yihoowa ufayssanau koyiyoogee tumuppe ammaniyoogaa bessiyaaba.

¹⁴ Ane Kaarinibaa qoppa. A hagaadan gaasu: “Ta naꞌay Dooni yelettiyo wode, taaninne ta azinay kare biittan oottoos; hegee taani Geeshsha Maxaafaa xannaꞌiyoogaa doommido wode. Nuuyyo deꞌoy injjetanaashin nu soo asay taani Doona etakko yeddanaadan koyiis.” Kaarina ba huuphe Doona dichanau qofaa qachido gishshau, i dabbotinne i azinay o cayidosonanne qilliiccidosona. Kaarina hagaadan gaasu: “Tumaa yootanau he wode, Dooni amarida layttaa nu soo asaara deꞌanaadan immiyoogee bala gidiyoogaa shaakka erabeykke. SHin nu naꞌaa dichiyo aawatettaa Yihooway a yelida nuussi immidoogaa eraas.” Kaarina hara naꞌaa shahaarido wode ammanenna i azinay a shahaaraa kesissanaadan koyiis. Kaarina kase loꞌꞌobaa kuuyido gishshau, i ammanoy minniis; a haꞌꞌikka Yihoowa ufayssiyaabaa oottanau koyaasu. A hegaadan oottabeenna gishshau, haꞌꞌi eti bantta naatuura ufayssan deꞌoosona. Kaarina ba naaꞌꞌu naata woy etappe issuwaa hara asi dichanaadan immidaba gidiyaakko, hegaappe keehi dummatiyaabi hanana danddayees.

15, 16. (a) So asau immido issi naꞌiyaa waana diccidaakko yoota. (b) A ba naꞌiyaa hegaadan diccanaadan koyabeennay aybissee?

¹⁵ Viki giyo Yihoowa Markkiyaa hagaadan gaasu: “Ta kaalo michiyo ta aawaynne ta aayyiyaa dichikkokka, amarida layttau tana ta aayee aayyiyaa dichaasu. Taani ta aawaaranne ta aayeera zaarettada deꞌiyoogaa doommido wode, eta kaseegaadan xeellikke. Ta michiyaa ba qofaa etau loytta yootausu, eta qoommausunne etaara siiqettausu. SHin taani ta aawaakkonne ta aayeekko iigaadan shiiqikke; ubba gitaa gida simmadakka ta qofaa etau yootanau yayyays. Taaninne ta michiyaa nu aawaynne aayyiyaa cimiyo wode eta xeellanau qaala gelida. Hegaa ta michiyaa eta siiqiyo gishshau oottana; shin taani oottana bessiyo gishshau oottana.”

¹⁶ Vika gujjada hagaadan gaasu: “Ta aayyiyaa tana dichanaadan ba aayeeyyo immidoogaadan, ta naꞌiyookka a dichanau koyaasu. SHin taani he qofaa maayennaagaa hiillan iyyo yootaas. Taaninne ta azinay nu naꞌiyo Yihooway koyiyoogaadan dichanau koyoos. Qassi taani ta naꞌeera deꞌiya dabbotay moorettanaadan koyikke.” Vika ufayssiya deꞌo deꞌanau miishshaanne so asay koyiyoobaa kaseyiyoogaappe Yihoowanne i kessido maaraa kaseyana bessiyoogaa akeekaasu. Yesuusi, “Naa77u godatuyyo haarettanau danddayiyai ooninne baawa; . . . Xoossaassinne miishshaassi haarettanau danddayekketa” yaagidi qoncciyan yootiis.—Maa. 6:24; Kes. 23:2.

YIHOOWAY NUUNI BAAXETIYO BAAXIYAA ANJJEES

17, 18. (a) Kiristtaaneti ubbatoo waatanau doorana danddayiyoonaa? (b) Kaalliya huuphe yohuwan beꞌana oyshati awugeetee?

¹⁷ Nu Aawaa Yihooway nuuni nu deꞌuwan a Kawotettaanne a xillotettaa kaseyiyaaba gidikko, nuuyyo tumuppe koshshiya ubbabaa kunttanau qaalaa geliis. (Maa. 6:33) Yaatiyo gishshau, tumu Kiristtaaneti ubbatoo doorana danddayoosona. Nuna keehi metiyaabay gakkiyo wodekka Geeshsha Maxaafaa maaraa kaallidi ubbatoo Yihoowa ufayssiyaabaa oottana danddayoos. Yihooway ‘kessi ekkiyo ogiyaa’ giigissanau qaalaa geliis. (1 Qoronttoosa 10:13 nabbaba.) Nuuni Yihoowa ‘danddayan naagiyaaba,’ a azazuwaanne maaraa kaalliyaaba, qassi kaaletuwaanne eratettaa demmanau woossiyoogan ‘an ammanettiyoogaa’ bessiyaaba gidikko, ‘i nuussi oottana.’ (Maz. 37:5, 7) Nuuni tumu Godaa Yihoowa xallau oottiyaaba gidikko, i nuuni baaxetiyo baaxiyaa anjjana. Nuuni a kaseyiyaaba gidikko, i nu deꞌuwaa ‘injjeyana.’—Doomettaabaa 39:3⁠ra gatta xeella.

¹⁸ So asaappe shaahettidi deꞌiyoogaa gaasuwan gakkida qohuwaa waati giigissana danddayettii? Nu soo asaappe shaahettennan etau koshshiyaabaa kunttanau ay oottana danddayiyoo? Hagaara gayttidaagan harati loꞌꞌobaa kuuyanaadan waati maaddana danddayiyoo? Kaalliya huuphe yohuwan ha oyshatu zaaruwaa beꞌana.