‘Loꞌꞌo Oosuwaa Oottanawu Baaxetay’?

FERNANDOYa issi wode keehi hirggiis. Naaꞌꞌu cimati a haasayissana koyiyoogaa yootidosona. Woradaa xomoosiya ishay eta gubaaꞌiyaa amarida wodiyawu xomoosi simmin, i gubaaꞌiyan hara maatan haggaazanawu ay oottana koshshiyaakko cimati awu yootidosona. Amarida wodiyaappe guyyiyan, Fernandoy gubaaꞌe cima gidana danddayiyaakko qoppiyoogaa doommiis. Woradaa xomoosiya ishay eta gubaaꞌiyaa mata wodekka xomoosiis. Haꞌꞌi shin cimati awu ay yootanee?

Fernandoy cimatuppe issoy yootiyoobaa ezggiis. He ishay ayyo 1 Ximootiyoosa 3:1 qofaa yootidi, i gubaaꞌe cima gididi sunttettidoogaa qonccissiya dabddaabbee gakkidoogaa yootiis. Fernandoy keehi garamettidi, “Woygadii?” yaagidi oychiis. Ishay koyro giidobaa zaarettidi yootin, Fernandoy moocu giyoogaa doommiis. Hegaappe simmin, i gubaaꞌe cima gididi sunttettidoogee gubaaꞌiyawu odettin, gubaaꞌiyan deꞌiya ubbay keehi ufayttiis.

Issi uri gubaaꞌiyan oottiyo maataa demmanawu koyiyoogee balee? Bala gidenna. Koyro Ximootiyoosa 3:1y (NW) yootiyoogaadan, “issi asi gubaaꞌe cima gidanawu baaxetikko, loꞌꞌo oosuwaa amottees.” Kiristtaane gidida daro attuma asay he minttettuwaa maaran gubaaꞌiyan oottiyo maataa demmanawu ayyaanaaban diccees. Hegaappe denddidaagan, tammu shaꞌan qoodettiya mino cimatinne gubaaꞌiyawu oottiyaageeti deꞌiyo gishshawu Xoossaa asay anjjettiis. SHin gubaaꞌetu qooday kaseegaappe gujji gujji biyo gishshawu, gubaaꞌiyan oottiyo maataa demmanawu daro ishati baaxetana koshshees. Gidoppe attin, baaxetiyaageetu qofay ayba gidana bessii? Cima gidanawu koyiyaageeti awude cima gidanaakko Fernandoogaadan ubba wode qoppana koshshii?

‘BAAXETIYOOGAA’ GIYOOGEE WOYGIYOOGEE?

‘Baaxetiyoogaa’ giya qaalay wozanappe koyiyoogaa, zaatturiyoogaa bessiya Giriiketto qaalaappe birshshettiis. Hegee issi mittaappe malꞌꞌiya ayfiyaa wottanawu zaatturiya uraabaa qoppanaadan oottana danddayees. SHin baaxetiyoogee bessenna amuwan “gubaaꞌe cima” gidanawu koyiyoogaa giyoogaa gidenna. Aybissi? Gubaaꞌe cima gidanawu wozanappe koyiyaageetu halchoy “loꞌꞌo oosuwaa” oottiyoogaappe attin, aawatetta maataa demmiyoogaa gidenna.

Hegaa mala asatuppe koyettiya, loꞌꞌo oosuwaara gayttida darobay, 1 Ximootiyoosa 3:2-7⁠ninne Tiitu 1:5-9n qoncciis. Daro wodiyawu gubaaꞌe cima gididi haggaazida Ramandi ha xoqqa maaraa xeelliyaagan hagaadan giis: “Nuuni tumuppe ay mala asakko qoppana bessees gaada qoppays. Haasayaa shiishshiyoogeenne tamaarissiyoogee koshshiyaaba; shin, hegee borettennaagaa, kiphatanchaa, bana naagiyaagaa, bessiyaabaa oottiyaagaa, imattaa mokkiyaagaanne ashkke gidiyoogaappe aadhidi koshshiyaaba gidenna.”

Wozanappe baaxetiya issi ishay ubbaban ammanettiyoogaaninne geeshsha gidiyoogan, borettenna asa gidiyoogaa bessees. I kiphatancha, bana naagiyaagaa, bessiyaabaa oottiyaagaanne ashkke gidiyo gishshawu, ishati i gubaaꞌiyan sintta xeera gididi kaalettanaagaanne banttana maaddanaagaa ammanettoosona. I imattaa mokkiyaagaa gidiyo gishshawu, yelagatanne mati tumaa ekkidaageeta keehi minttettees. I loꞌꞌobaa dosiyaagaa gidiyo gishshawu, sahettiyaageetanne layttan sugidaageeta maaddeesinne minttettees. I ha eeshshati bawu deꞌanaadan baaxetiyoy, harata maaddanaassappe attin sunttettanawu koyiyo gishshataassa gidenna.b

Cimati baaxetiya uraa ufayssan zoroosonanne minttettoosona; shin Geeshsha Maxaafaa maaraa oosuwan peeshshana bessiyay he izaawa. Daro layttawu gubaaꞌe cima gididi haggaazida Heneri, “Loꞌꞌo oosuwawu baaxetiyaaba gidikko, neeni he maatan oottana danddayiyoogaa bessiyaabaa minnada ootta” yaagiis. Qassi Eranchchaa 9:10n, “‘Ne kushee oottanau demmidobaa ubbaa ne kumetta wolqqan ootta’ yaagiyaagaa yootidi, cimati neeyyo immiyo oosoy ayba gidikkokka, hegaa loyttada ootta. Qassi addaraashaa pittiyoogaa gujjin, gubaaꞌiyan neeyyo imettiya ooso ubbaa ufayssan ootta. Takkidi, ne oosuwaanne daafuraa harati akeekiyoogee attenna” yaagiis. Issi wode cima gidada haggaazanawu koyiyaaba gidikko, geeshsha ooso ubbaa minnadanne ammanettada ootta. Neeni otorettiyoogan gidennan, ne huuphiyaa kawushshiyoogan erettana bessees.—Maa. 23:8-12.

IITABAA QOPPENNAADAANINNE OOTTENNAADAN NAAGETTA

Issoti issoti cima gidanawu koyiyoogaa haratuyyo otoruwan yootana danddayoosona woy cimata eqettana danddayoosona. Harati qassi cimati eta zoriyo wode ufayttennan aggana danddayoosona. Hegaa mala asati, ‘Taani tana ufayssiyaabaa oottana koyiyaanaayye ta huuphiyaa kawushshada Yihoowa dorssata heemmana koyiyaanaa?’ yaagidi banttana oychana koshshees.

Gubaaꞌiyan oottiyo maataa demmanawu baaxetiyaageeti cimatuppe koyettiya harabaa, hegeekka ‘dorssaa wudiyawu leemiso gidana’ bessiyoogaa dogana koshshenna. (1 PHe. 5:1-3) Gubaaꞌiyawu leemiso gidanawu koyiya uri gene qofaappenne oosuwaappe hakkees. I haꞌꞌi gubaaꞌe cima gidin aggin, danddayan naageesinne genccees. Issi uri gubaaꞌe cima gidiyoogee balabaa oottiyoogaa diggenna. (Qoo. 12:3; Maz. 106:32, 33) Qassi issi ishay babaa iitabaa ‘erennan’ aggana danddayees; shin harati abaa iitabaa qoppanaadan oottiyaabi deꞌana danddayees. (1 Qor. 4:4) Hegaa gishshawu, cimati Geeshsha Maxaafaa goꞌettidi wozanappe nena zoriyo wode yiillotoppa; ubba eti yootiyoobaa loytta ezgga. Yaatada, eta zoriyaa oosuwan peeshsha.

SUNTTETTENNAN DARO WODEE AADHIKKO SHIN?

Issi issi ishati eti sunttettennan daro wodee aadhidabadan qoppoosona. Neeni ‘gubaaꞌe cima gidanawu baaxetaydda’ daro layttaa takkidaba gidikko, issi issitoo azzanay? Azzaniyaaba gidikko, “Koyiyoobai polettennan gam77iyoogee azzanissees; shin amottidobai polettiyoogee ufaissees” yaagiyaagaa hassaya.—Lee. 13:12.

Issi uri keehi amottidobaa sohuwaara demmana xayikko, keehippe azzanana danddayees. Abrahaamikka issi wode hegaadan qoppiis. Yihooway awu attuma naꞌa immanawu qaalaa geliis; shin i Saarippe naꞌa yelennan daro layttay aadhiis. (Doo. 12:1-3, 7) Abrahaami bawu layttay sugido wode hagaadan giis: “Abeet Ubbaa Haariya GODAU, taayyo mulekka na7i bainna gishshau, neeni immiyo woitoi taayyo aissee? . . . Neeni taayyo ainne na7a immabaakka.” Yihooway naꞌa immanawu gelido qaalay polettanaagaa zaarettidikka ayyo yootiis. SHin Xoossay hegaa zaaretti yooti simminkka, hegee polettanaashin guuxxiis giishin 14 layttay aadhiis.—Doo. 15:2-4; 16:16; 21:5.

Abrahaami hegaa naagiyo wode, Yihoowayyo ufayttidi oottiyoogaa aggidee? Aggibeenna. I Xoossay ba gelido qaalaa polanaagaa mule siribeenna. I kehabay yaanaagaa hidootan naagiis. Kiitettida PHawuloosi, “Abrahaami gencci naagidi, Xoossai immana giidoogaa ekkiis” yaagiis. (Ibr. 6:15) Wurssettan, Yihooway he ammanettida bitaniyaa i demmana giidi qoppidoogaappe aaruwaa anjjiis. Abrahaamappe ay tamaarana danddayay?

Neeni gubaaꞌe cima gidada Yihoowawu oottanawu koyiyaaba gidikkokka, sunttettennan daro layttay aadhidaba gidikko Yihoowan ammanettiyoogaa aggoppa. Qassi Yihoowawu ufayttada oottiyoogaa aggoppa. Daro ishati ayyaanaaban diccanaadan maaddida, Worena giyo ishay hagaadan giis: “Issi uri cima gididi sunttettana danddayiyaakkonne eranawu amarida wodee aadhana koshshees. Wodeppe guyyiyan, issi ishawu deꞌiya eraynne eeshshay, qassi baassi imettiya oosuwaa i waati poliyaakko wodiyaappe wodiyan a hanotaappe erettees. Issoti issoti cima gididi sunttettana xayikko, Yihoowayyo bessiyaagaadan haggaazibeennabadan qoppoosona. Hegee bala qofa; qassi issi uri wonttin qammin hegaa xalla qoppanaadan oottiyaaba. Neeni sunttettidaagaa gidin aggin woy neeni ay oottiyaaba gidin, waannabay neeni ammanettada Yihoowayyo haggaaziyoogaa.”

Issi ishay cima gididi haggaazanawu tammaappe daro layttaa naagiis. I Hizqqeela shemppo 1n deꞌiya qoncce qofaa ba hanotaara gattidi hagaadan giis: “Yihooway ba gaariyan leemisettida ba dirijjitiyaa koyidoogaadan laaggees. Nuna qofissana bessiyay Yihoowa qofaappe attin nu qofaa gidenna. Gubaaꞌe cima gididi haggaaziyoogaara gayttidaagan tana qofissiyaabay tabaa woy taani amottiyoobaa gidana bessenna. Taani koyiyoobay Yihooway taassi koshshiyaaba giidi qoppiyoobaa gidennan aggana danddayees.”

Neeni sinttaappe issi wode gubaaꞌe cima gidada loꞌꞌo oosuwaa oottanawu amottiyaaba gidikko, gubaaꞌiyan deꞌiyaageeti ubbay ufayttanaadan maaddiyaaba oottanawu baaxeta. Sunttettennan daro wodiyaa takkikko, danddayan naaga; hidootaa qanxxoppa. Qommoora abaa yootido Ramandi hagaadan giis: “Issi uri aawatetta maataa demmanawu bessiyaagaappe aattidi amottiyaaba gidikko, ba oottiyooban ufayttenna. Ubba wode hegaa xalla demmanawu qoppiyaageeti Yihoowayyo haggaaziyoogan demmiyo ufayssaa akeekennan attoosona.” Xoossaa ayyaanaa ayfiyaa, ubba qassi danddayaa loyttada ayfanawu baaxeta. Geeshsha Maxaafaa xannaꞌiyoogan ayyaanaaban kaseegaappe minnanawu baaxeta. Kawotettaa mishiraachuwaa yootiyoogaaninne koyiyaageeta Geeshsha Maxaafaa xannaꞌissiyoogan harata maadda. Ne soo asaa ayyaanaabaaninne so asaa goynuwaara gayttidaagan minttetta. Ishatuuranne michetuura wodiyaa aattanawu baaxeta. Wodeppe ne halchoy polettanaashin neeni haꞌꞌi Yihoowayyo haggaaziyoogan ufayttana danddayaasa.

Gubaaꞌiyan oottiyo maataa demmanawu baaxetiyoogee Yihoowa imota; hegaadan oottanawu baaxetiyaageeti azzananaadaaninne hidootaa qanxxanaadan Yihoowaykka a dirijjiteekka koyokkona. Xoossay suure wozanaappe ayyo oottiya ubbaa maaddeesinne anjjees. A anjjo gidida hara ubbabaadan, hagankka i “meto walakkenna.”—Lee. 10:22.

Neeni gubaaꞌiyan oottiyo maataa demmanawu amarida wodiyawu baaxetikkokka, haꞌꞌikka ayyaanaaban keehi minnana danddayaasa. Neeni ne so asaa sheneho geennan, neeppe koyettiya eeshshay deꞌiyoogaa gidanawunne gubaaꞌiyan minnada oottanawu baaxetiyo wode, Yihooway neeni a ufayssanawu oottidobaa mule dogenna. Neeyyo imettiya oosoy ayba gidikkokka, Yihoowayyo haggaaziyoogan ubba wode ufayttiyaagaa gidanaadan amottoos.