Xoossaa Kawotettaabaa Erana Koshshiyoy Aybissee?

Kumetta saꞌan deꞌiya miilooniyan qoodettiya asay sinttanaabaa hidootan naaganaadan oottiyay Xoossaa Kawotettaa gidiyoogaa ammanees. Eti, “Ne kawotettai yo; ne shenee saluwan hanidoogaadan, sa7ankka hano” yaagidi woossanaadan bana kaalliyaageeta tamaarissida, Yesuusa leemisuwaa kaalloosona.—Maatiyoosa 6:10.

Daro asay Xoossaa Kawotettaabaa loyttidi eranawu koyikkokka, daro haymaanooteti hegaabaa tamaarissennaagee garamissiyaaba. Hagaa xeelliyaagan taarikiyaa eranchay Herbert Jorj Welsi Yesuusi “i Saluwaa Kawotettaa giido timirttiyaa . . . keehi xoqqu oottidi xeellikkokka,” he timirttiyaa “Kiristtaane woosa keettati . . . hara timirttiyaappe xaasayidi xeelliyoogee” garamissiyaaba gidiyoogaa yootiis.

He woosa keettatuugaappe dumma ogiyan, Yihoowa Markkati Xoossaa Kawotettaa xoqqu oottidi xeelloosona. Ane hagaa qoppa: Neeni nabbabaydda deꞌiyo nu waanna maxeetee 220 qaalan giigees. Aginan aginan 46 miiloone gidiyaagee attamettiyo gishshawu, ha maxeetee hara ubbaappe aaruwan kumetta saꞌan asawu imettees. Ha maxeetee yootiyo waanna qofay aybee? Yihoowa Kawotettaa Erissiya Wochiyo Keelaa giya kumetta huuphe yohuwaa akeeka.a

Yihoowa Markkati Xoossaa Kawotettaa erissanawu keehi baaxetiyoy aybissee? Koyruwan, kumetta saꞌan deꞌiya maxaafa ubbaappe aadhiya Geeshsha Maxaafay yootiyo waannabay Xoossaa Kawotettaabaa gidiyoogaa nuuni ammanoos. Hegaa bollikka, ha wodiyan asaa naata gakkiya metuwaa qaarana danddayiyay Xoossaa Kawotettaa xalla gidiyoogaa ammanoos.

Yihoowa Markkati Xoossaa Kawotettaabaa loytti tamaarissiyoogan, Yesuusa leemisuwaa kaallanawu baaxetoosona. Yesuusi saꞌan deꞌiyo wode, ba deꞌuwankka ba haggaazuwankka Xoossaa Kawotettaa kaseyiis. (Luqaasa 4:43) Yesuusi he Kawotettaa keehi xoqqu oottidi xeelliyoy aybissee? Qassi he Kawotettay nena waati maaddanee? He oyshata Geeshsha Maxaafay woygi zaariyaakko kaalliya huuphe yohotun neeni beꞌanaadan shoobboos.