Yihoowaara Oottiyo Maataa Xoqqu Oottada Xeella!

1. Yihooway oosuwaa waati xeellii, qassi i oosuwaara gayttidaagan oottidobay aybee?

YIHOOWAY ba oottiyooban ufayttiya oosancha. (Maz. 135:6; Yoh. 5:17) I kiitanchatinne asaa naati bantta oosuwan ufayttanaadan koyiyo gishshawu, keehi ufayssiya oosuwaa etawu immiis. Leemisuwawu, Yihooway meretata medhiyo wode ba bayra Naꞌay he oosuwan shaahettanaadan oottiis. (Qolasiyaasa 1:15, 16 nabbaba.) Yesuusi saꞌaa yaanaappe kase, saluwan Xoossaa matan “waanna oosanchcha” gididi deꞌidoogaa Geeshsha Maxaafay yootees.—Lee. 8:30.

2. Kiitanchati ubba wode keehi koshshiyaanne ufayssiya oosuwaa oottiyoogaa waati erana danddayiyoo?

² Geeshsha Maxaafay Doomettaabaappe Ajjuutaa gakkanaashin, Yihooway ubba wode kiitanchatuyyo oosuwaa immiyoogaa yootees. Addaameenne Hewaana nagaraa oottidi Gannatiyaappe yedetetti simmin, Xoossay “de7o mittaakko efiya ogiyaa naagana mala, kiruubeta giyo kiitanchchatanne aadhdhi aadhdhi wodhdhiya tama laco bisuwaa Edene Gannatiyaappe arshsho baggaara wottiis.” (Doo. 3:24) Ajjuutaa 22:6y Yihooway “matan hananau bessiyaabaa ba ashkkarata bessanau ba kiitanchchaa” kiittidoogaa yootees.

ASAWU IMETTIDA OOSUWAA

3. Yesuusi saꞌan deꞌiyo wode ba Aawaa leemisuwaa waati kaallidee?

³ Yesuusi saꞌan deꞌiyo wode, Yihooway awu immido oosuwaa ufayttidi oottiis. I ba Aawaa leemisuwaa kaallidi, ba erissiyo ashkkaratussikka keehi koshshiya oosuwaa immiis. Eti banttawu imettida oosuwaa xoqqu oottidi xeellana mala Yesuusi, “Taani intteyyo tumaa odais; tana ammaniya urai taani oottiyo oosuwaa oottana. Taani Aawaakko biyo gishshau, he urai hagaappe aadhdhiya oosuwaa oottana” yaagiis. (Yoh. 14:12) He oosoy eesuwan oosettana bessiya ooso gidiyoogaa akeekissanawu Yesuusi, “Nuuni sa7ai qammennan de7ishin, tana kiittidaagaa oosuwaa oottanau bessees. Ooninne oottanau danddayenna qammai yees” yaagiis.—Yoh. 9:4.

4-6. (a) Noheenne Muusee Yihooway etawu immido oosuwaa polido gishshawu, nuuni ufayttiyoy aybissee? (b) Xoossay asawu immiyo oosoy demissiyo naaꞌꞌubay aybee?

⁴ Yesuusi saꞌaa yaanaappe kasekka, Yihooway asaa naatussi ufayssiya oosuwaa immiis. Addaameenne Hewaana Xoossay etawu immido oosuwaa polibeennaba gidikkokka, hara asati banttawu immettida oosuwaa polidosona. (Doo. 1:28) Paxa deꞌiyaabata wolqqaama Bashshaa Haattaappe ashshanawu markkabiyaa waati keexxanaakko Noheyyo qoncce kaaletoy imettiis. Yihooway yootidobaa i akeekan poliis. Nuuni haꞌꞌi deꞌana danddayidoy i he azazuwaa akeekan polido gishshataassa!—Doo. 6:14-16, 22; 2 PHe. 2:5.

⁵ Muusee Xoossaa dunkkaaniyaa keexxanaadaaninne qeesetu oosuwaara gayttidabaa maarayanaadan Yihooway ayyo qoncce kaaletuwaa immiis. Qassi Muusee Yihooway ayyo yootidoogaadan oottiis. (Kes. 39:32; 40:12-16) I he oosuwaa ammanettidi oottido gishshawu, nuunikka ha wodiyan goꞌettoos. Waani goꞌettiyoo? Kiitettida PHawuloosi qonccissidoogaadan, Xoossaa dunkkaaneenne qeesetu oosoy sinttaappe ‘yaana loꞌꞌobawu’ leemiso.—Ibr. 9:1-5, 9; 10:1.

⁶ Xoossaa halchoy polettiyoogaara gayttidaagan i ba ashkkaratuyyo immiyo oosoy wodiyaappe wodiyan laamettiis. Gidikkokka, eti oottido oosoy ubba wode Yihoowa bonchissiis, qassi asaakka maaddiis. Yesuusi saꞌaa yaanaappe kase gidin saꞌan deꞌiyo wode gidin, i oottido oosoy he naaꞌꞌu halchuwaa polanawu maaddiis. (Yoh. 4:34; 17:4) Hegaadankka, nuuyyo ha wodiyan imettiya oosoy Yihoowa bonchissees. (Maa. 5:16; 1 Qoronttoosa 15:58 nabbaba.) Hegaadan giyoy aybissee?

NUUSSI IMETTIYA OOSUWAA BESSIYA OGIYAN XEELLIYOOGAA

7, 8. (a) Ha wodiyan Kiristtaaneti oottanaadan imettida oosuwaa yoota. (b) Nuuni Yihoowa kaaletuwaa waati xeellana koshshii?

⁷ Yihooway nagarancha gidida asawu aara issippe oottiyo maataa immidoogee gita boncho. (1 Qor. 3:9) Issi issi Kiristtaaneti Nohanne Muusedan issi issibaa keexxoosona; leemisuwawu, issoti issoti Gita SHiiquwaa Addaraashaa, Kawotettaa Addaraashaanne macara biiruwaa keexxana danddayoosona. Neeni intte Kawotettaa Addaraashaa bottokoniyoogan maaddiyaagaa gidin woy Niyoorkken, Worwiken deꞌiya waanna biiruwaa keexxiyoogan maaddiyaagaa gidin, he oosuwaa oottiyo maataa xoqqu oottada xeella. (Ha huuphe yohuwaa doomettan deꞌiya misiliyaa xeella.) Hegee boncho ooso. SHin amaridaageeti hegaa mala oosuwaa oottiyaaba gidikkokka, ubba Kiristtaaneti ayyaanaabaa keexxiyo oosuwan shaahettoosona. Hegeekka Yihoowa bonchissiyaanne azazettiya asaa naatakka maaddiya ooso. (Oos. 13:47-49) Ha oosuwaa waati oottiyoogee loꞌꞌokko Xoossaa dirijjitee koshshiya kaaletuwaa immees. Hegee, issi issitoo ooratta oosoy imettiyo wode eeno giyoogaa gidana danddayees.

⁸ Yihoowayyo ammanettida ashkkarati ubba wode a azazuwaa wozanappe azazettanawu koyoosona. (Ibraawe 13:7, 17 nabbaba.) Nuussi ooratta oosoy imettido gaasuwaa wurssidi erennan aggana danddayoos; shin he oosuwaa immidaagee Yihoowa gidiyoogaanne aara issippe oottiyoogaa akeekiyoogee loꞌꞌo ayfiyaa demissiyoogaa eriyo gishshawu azazettoos.

9. Gubaaꞌe cimati gubaaꞌiyan deꞌiyaageetuyyo leemiso gidiyaabaa ay oottiyoonaa?

⁹ Gubaaꞌe cimati Yihoowa sheniyaa polanawu wozanappe koyiyoogaa gubaaꞌiyan sintta xeera gididi oottiyooban bessoosona. (2 Qor. 1:24; 1 Tas. 5:12, 13) Eti minnidi oottanawunne imettida kaaletuwaa kaallanawu koyoosona; qassi sabbakiyo ooratta ogiyaa sohuwaara meezetoosona. Issoti issoti silkkiyan markkattiyoogaa, markkabeti eqqiyoosan markkattiyoogaa woy dabaaban markkattiyoogaa xeelliyaagan koyro heeran mammottiyaaba gidikkokka, hegee loꞌꞌo ayfiyaa demissiyoogaa takkennan akeekidosona. Leemisuwawu, Jarmanen deꞌiya oyddu aqinyeti daro wodiyawu oosetti erenna zalꞌꞌe heeran markkattanawu qofaa qachidosona. Hegaa mala moottan sabbakoosappe daro wodee aadhido gishshawu, eti keehi hirggidoogaa he ishatuppe issuwaa gidida Mikaaꞌeeli yootiis. I gujjidi hagaadan giis: “Yihooway hegaa akeekidaba milatees; ayssi giikko, nuuni wonttaara keehi ufayttanaadan oottiis. Nuuni Nu Kawotetta Haggaazuwan deꞌiya kaaletuwaa kaallido gishshawunne Yihoowa maaduwan ammanettido gishshawu keehi ufayttida!” Intte moottan haggaaziyo ooratta ogiyaa neenikka mala beꞌanawu wozanappe koyay?

10. Mata wodeppe doommidi dirijjitiyaa oosuwaara gayttidaagan giigissido issi issibay aybee?

¹⁰ Issi issitoo Beeteele oosuwaara gayttidaagan issi issibay laamettees. Leemisuwawu, issi issi guutta macara biirotun oottiyo oosoy hara gita macara biirotun oosettanaadan mata wode kuuyettiis. He macara biirotun oottiya ishatinne michoti issi issibaa giigissana koshshikkokka, eti ubbay darin takkennan hegaa goꞌꞌaa akeekidosona. (Era. 7:8) Eeno giidi hegaadan oottidaageeti Yihooway ha wodiyan oottiyooban shaahettido gishshawu keehi ufayttoosona!

11-13. Issoti issoti dirijjitee giigissido issi issibaara gayttidaagan ay oottana koshshidee?

¹¹ Hara macara biiruwan deꞌiyaageetuura walahettidi oottidaageetuppe nuuni issi issibaa tamaarana danddayoos. He ishatuppenne michotuppe daroti bantta macara biiruwan daro layttawu oottidosona. Beeteele keettaa asay guutta gididosan oottiya issi azinaynne machiyaa banttaagaappe 30 kushe dariya Beeteele keettaa asay deꞌiyo Mekisiiko Beeteele baanaadan azazettidosona. Rogeliyoy, “So asaanne laggeta aggidi biyoogee keehi deexxiis” yaagiis. Mekisiiko baanaadan azazettida Kuwan giyo hara ishay qassi, “Hegee naaꞌꞌantto yelettiyoogaa mala; ooratta asatuura laggetana bessees. Ooratta wogaanne qoppiyo ooratta ogiyaa meezetana koshshees” yaagiis.

¹² Awurooppan hara biittan deꞌiya Beeteele keettaa asay Jarmane macara biiruwaa baanaadan azazettido wode, bantta yelettido biittaa aggidi biyoogee deexxiyo gishshawu hegaadan qoppidosona. Swizerlandeppe biida issoti issoti bantta biittan deꞌiya keehi loꞌꞌiya Alppa dereta laamotoosona. Qassi Osttiriyaappe biidaageeti guutta asay deꞌiyo bantta Beeteeleppe biido gishshawu, hegaa mala deꞌuwaa laamotidosona.

¹³ Hara biittan deꞌiya macara biiruwaa biida ishatinne michoti darobaara meezetana koshshees. Eti ooratta keettaa, issippe oottiya kase etaara erettenna ishatanne michota, geella ooratta oosuwaa meezetana koshshees. Qassi ooratta gubaaꞌiyan shiiqanawunne ooratta haggaazo moottan sabbakanawu geella ooratta qaalan haasayiyoogaa meezetana koshshees. Hegaa malabaa meezetiyoogee deexxiyaaba gidana danddayees. SHin Beeteelen oottiya daroti hegaa malabaa meezetanawu eeno giidosona. Eti hegaadan oottidoy aybissee?

14, 15. (a) Ay ooso gidikkokka, Yihoowaara issippe oottiyo maataa xoqqu oottidi xeelliyoogaa daroti waati bessidonaa? (b) Eti nuuyyo loꞌꞌo leemiso gidiyoy aybiinee?

¹⁴ Gretilo giyo issi michiyaa, “Taani he shoobiyawu eeno gaas; ayssi giikko, hegee taani Yihoowa ta yelettido biittaappe, ta deꞌiyo keettaappe woy tawu deꞌiya issi issi maataappe aattada siiqiyoogaa bessiyo oge” yaagaasu. Dayisko giyo issi michiyaa qassi, “Tana shoobbiday Yihoowa gidiyoogaa akeekido wode ufayssan eeno gaas” yaagaasu. Andirenne Gabirela hagaadan giidosona: “Nuuni he shoobiyaa nu goꞌꞌaa aggidi, Yihoowayyo kaseegaappe aaruwan oottana danddayiyo injjedan xeellida.” Eti Yihoowa dirijjitee issi issibaa giigissiyo wode hegaa eqettiyoogaappe ufayssan maayiyoogee loꞌꞌo gidiyoogaa akeekidosona.

¹⁵ Macara biiroti walahettido gishshawu, Beeteelen oottiya issi issi ishatinne michoti aqinye gididi haggaazanaadan maddabettidosona. Denmarke, Norweyenne Siwidine macara biiroti Iskanddineviya macara biiro gididi walahettido wode, Beeteelen oottiya daro ishatinne michoti hegaadan maddabettidosona. Floriyananne Anjjo giyo azinaynne machiyaa hagaadan giidosona: “Nu ooratta oosoy deexxiyaaba gidikkokka, keehi ufayssiyaaba gidiyoogaa akeekida. Nuuni awan haggaaziyaaba gidikkokka, Yihooway nunan goꞌettiyoogee nuna keehi ufayssees. Nuuni keehippe anjjettidoogaa ammanettoos!” Nu giddoppe darotu hanotay hegaa mala gidana xayikkokka, Xoossaa Kawotettaara gayttidabaa kaseyanawu eeno giida he ishatunne michotu leemisuwaa kaallana koshshennee? (Isi. 6:8) Awan oottikkokka, Yihoowaara issippe oottiyo maataa xoqqu oottidi xeelliyaageeta i ubba wode anjjees.

YIHOOWAARA ISSIPPE OOTTIYO GISHSHAWU UBBA WODE UFAYTTA!

16. (a) Galaatiyaa 6:4y nuuni waatanaadan minttettii? (b) Asawu deꞌana danddayiya aybippenne aadhiya gita maatay aybee?

¹⁶ Nuuni nagarancha gidiyo gishshawu ubba wode nuna hara asaara geeddarssoos; shin Xoossaa Qaalay nuuni nu huuphe ooso xallaa xeellana bessiyoogaa yootees. (Galaatiyaa 6:4 nabbaba.) Nuuppe daroti Yihoowa dirijjitiyan aawatettay deꞌiyoogeeta gidokko. Qassi nuuni ubbay aqinye, misoonaawe woy Beeteelen oottiyaageeta gidana danddayokko. Hegee gita haggaazo maataa gidiyoogee qoncce! SHin ubba asawu deꞌiya aybippenne aadhiya gita maataa nuuni dogana bessenna. He maatay haggaazuwan Yihoowaara issippe oottiyoogaa. Hegee nuuni xoqqu oottidi xeellana bessiyo maata!

17. Ha alamiyan nuna aybi metana danddayii, shin nuuni hidootaa qanxxana bessennay aybissee?

¹⁷ Ha alamiyan, nuuni koyidoogaa keenaa Yihoowayyo haggaazennan aggana danddayoos. So asaa aawatettaa woy payyatettaa mala issi issi hanotati nu abbiyaappe bolla gidana danddayoosona. Gidikkokka, nuuni hidootaa qanxxana bessenna. Nu metoy ayba gidikkokka, Yihoowa sunttaabaanne a Kawotettaabaa ubba wode sabbakana danddayoos. Waannabay nuuyyo danddayettida keenaa Yihoowayyo oottiyoogaa, qassi nuugaappe aaruwaa assi oottana danddayiyaageeti loytti oottanaadan maaddana mala woossiyoogaa. Yihoowa sunttaa sabbiya ubbaa i xoqqu oottidi xeelliyoogaa hassaya!

18. Nuuni sinttappe ay hidootan naagana danddayiyoo, qassi nuuyyo haꞌꞌi ayba gita maatay deꞌii?

¹⁸ Nuuni nagarancha gidikkokka, Yihooway nuuni aara issippe oottanaadan gita maataa immiis. Ha wurssetta gallassatun nuuni nu Xoossaara issippe oottiyoogee ay keena gita maatee! Hegaa gishshawu, Yihooway nuuni ooratta alamiyan “tumu de7uwaa” deꞌanaadan, hegeekka merinawu ufayssaaninne sarotettan deꞌanaadan oottanaagaa eridi, nu goꞌꞌaa agganawu eeno gaana koshshees.—1 Xim. 6:18, 19.

19. Yihooway sinttappe nuuyyo ay immanawu qaala gelidee?

¹⁹ Nuuni ooratta alamiyaa gelanawu matido ha wodiyan, Israaꞌeelati Hidootaa Biittaa gelanaappe guuttaa kasetidi Muusee eta, “[Yihooway] inttena intte kushiyaa ooso ubban,  . . intte biittaa aifiyan darissidi anjjana” yaagidoogaa hassayoos. (Zaa. 30:9) Armmageedoonappe simmin, Yihooway qaalaa gelidoogaadan, banaara issippe oottidaageeti saꞌaa laattanaadan oottana. Hegaappe simmin nu oosoy saꞌay gannate gidanaadan oottiyoogaa gidana!