Ayyaanaa Gannatiyaa Yallisissiyaabaa Ootta
“Taani ta tohuwaa wottiyo sohuwaa bonchchana.”—ISI. 60:13.
1, 2. ‘Yedhiyo sohuwaa’ giyo qofay Ibraawetto Geeshsha Maxaafan ay qonccissana danddayii?
XOOSSAA YIHOOWAY, “Saloi ta kawotaa araata; sa7aikka ta tohoi yedhdhiyo soho” yaagiis. (Isi. 66:1) I ba ‘yedhiyo sohuwaa’ xeelliyaagan, “Taani ta tohuwaa wottiyo sohuwaa bonchchana” yaagiis. (Isi. 60:13) I hegaa waati oottii? Nuuni Xoossay ‘yedhiyo sohuwan’ deꞌiyo gishshawu, i hegaadan oottiyoogee nuuyyo keehi koshshiyoy aybissee?
2 ‘Yedhiyo sohuwaa’ giyo qofay saꞌaa qonccissiyaaba; qassi Ibraawetto Geeshsha Maxaafan beni Israaꞌeelati goꞌettiyo beeta maqidasiyawu leemiso. (1 Odiya 28:2; Maz. 132:7) Saꞌan kase deꞌiya beeta maqidasee tumu goynuwaa humꞌꞌo. Yaatiyo gishshawu, Yihoowa xeelan hegee tumuppe loꞌꞌees; qassi, beeta maqidasee deꞌiyoogee Yihooway tohuwaa wottiyo sohoy bonchchettanaadan oottiis.
3. Xoossaa ayyaana beeta maqidasee gitay aybee, qassi hegee awude doommidee?
3 Ha wodiyan tumu goynuwaa humꞌꞌoy keexettida beeta maqidase gidenna. SHin keexxido ayba keettappenne aaruwan Yihoowa bonchissiya ayyaanaa beeta maqidasee deꞌees. He beeta maqidasee qeesetu oosuwaaninne Yesuus Kiristtoosa yarshshuwan Yihoowaara sigettanaadan giigidaba. Hegee Yesuusi 29 M.Ln xammaqettidi Yihoowa ayyaana beeta maqidasiyan gitan Qeese Ubbatu Halaqa gididi sunttettido wode doommiis.—Ibr. 9:11, 12.
4, 5. (a) Yihoowayyo tumuppe goynniyaageeti wozanappe koyiyoobaa Mazamure 99y waati qonccissii? (b) Nuuni ayba oyshaa nuna oychana koshshii?
4 Yihooway ayyaana beeta maqidasiyawu giigissidobaa nuuni nashshiyo gishshawu, a sunttaa erissiyoogan a sabboos, wozuwaa i kehatettan giigissido gishshawukka a sabboos. Ha wodiyan hosppun miilooniyaappe dariya tumu Kiristtaaneti minttidi Yihoowa sabbiyoogaa eriyoogee keehi ufayssiyaaba! Haymaanootiyaa kaalliyaanne saluwaa biidi Xoossaa sabbana giidi balan qoppiya issi issi asaagaappe dumma hanotan, Yihoowa Markkati ubbay ha wodiyan, ha saꞌan a sabbana koshshiyoogaa akeekoosona.
5 Yaatiyoogan nuuni Mazamure 99:1-3, 5n odettida, Yihoowawu ammanettida ashkkaratu leemisuwaa kaalloos. (Nabbaba.) He mazamuree yootiyoogaadan, Muusee, Aarooninne Sameeli bantta wode tumu goynuwawu kumetta wozanappe exatidosona. (Maz. 99:6, 7) Ayyaanan tiyettida Yesuusa ishatuppe attidaageeti saluwaa biidi qeese gididi haggaazanaappe kase, ha wodiyan ayyaana beeta maqidasiyawu saꞌaa dabaaban ammanettidi haggaazoosona. Miilooniyan qoodettiya ‘hara dorssati’ ammanettidi eta maaddoosona. (Yoh. 10:16) He naaꞌꞌu citan deꞌiyaageeti eta hidootay dumma dumma gidikkokka, Xoossaa tohoy yedhiyo ha saꞌan issippe Yihoowawu goynnoosona. Nuuni, ‘Yihooway tumu goynuwawu giigissidoban wozanappe hashetada oottiyaanaa?’ yaagidi nuna huuphiyan huuphiyan oychana koshshees.
XOOSSAA AYYAANA BEETA MAQIDASIYAN HAGGAAZIYAAGEETA SHAAKKI ERIYOOGAA
6, 7. Koyro xeetu laytta Kiristtaanetu giddon denddida metoy aybee, qassi daro layttappe guyyiyan hanidabay aybee?
6 Kiristtaane gubaaꞌee eqqoosappe xeetu laytta kumennan, kaseti odettidaagaadan kaddiyaageeti denddidosona. (Oos. 20:28-30; 2 Tas. 2:3, 4) Xoossaa ayyaana beeta maqidasiyan ayyo tumuppe haggaaziyaageeti oonakko shaakki eranawu hegaappe simmin keehi metiyaaba gidiis. Daro wodiyaappe guyyiyan, Yihooway baayyo ayyaana beeta maqidasiyan tumuppe haggaaziyaageeti oonakko Yesuusa baggaara qonccissiis.
7 Yihooway dooridoogeetinne a ayyaana beeta maqidasiyan ayyo haggaaziyaageeti oonakko 1919n keehi qoncciis. Eti kaseegaappe aaruwan Xoossay koyiyo ogiyan ayyo haggaazanawu ayyaanaaban geeyidosona. (Isi. 4:2, 3; Mil. 3:1-4) Kiitettida PHawuloosi daro layttappe kase ajjuutan beꞌidobay he wode amarida ogiyan polettiyoogaa doommiis.
8, 9. PHawuloosi ajjuutan beꞌido gannatiyaara gayttidaagan heezzubaa yoota.
8 PHawuloosi ajjuutan beꞌidobay 2 Qoronttoosa 12:1-4n odettiis. (Nabbaba.) PHawuloosi ajjuutan beꞌidobay qonccidaba geetettiis. Hegee a wode deꞌiyaabaara gidennan, sinttappe haniyaabaara gayttidaba. PHawuloosi ‘heezzantto saluwaa pude ekettido’ wode beꞌido gannatee aybee? Koyruwan, hegee mata wode Gannate gidana saꞌaabaa qonccissiyaaba gidana danddayees. (Luq. 23:43) Naaꞌꞌanttuwan, he gannatee ooratta alamiyan deꞌiya ayyaanaaban gannate mala hanotaa bessiyaaba gidana danddayees. Heezzanttuwan, he gannatee saluwan “Xoossaa gannatiyan” deꞌiya keehi loꞌꞌo hanotaa qonccissiyaaba gidana danddayees.—Ajj. 2:7.
9 Gido shin, PHawuloosi “asi haasayanau danddayennabaa, asa inxxarssikka haasayanau danddayennabaa” siyidoogaa yootidoy aybissee? He wodee i he ajjuutan beꞌido maalaalissiyaabaa qonccissiyo wode gidenna. SHin, ha wodiyan Xoossaa asay demmido anjjuwaabaa nuuni haꞌꞌi yootana bessees!
10. “Ayyaanaa gannateenne” “ayyaana beeta maqidasee” issi mala gidennay aybissee?
10 Nuuni darotoo ayyaanaa gannatiyaabaa haasayoos; shin hegee aybee? He gannatee nuuni Xoossaaranne nu ishanttuura sarotettan deꞌanaadan oottiya ayyaanaabaa hanotaa bessiyaaba. Nuuni ‘ayyaanaa gannateenne’ “ayyaana beeta maqidasee” issi mala giidi qoppana koshshenna. Ayyaana beeta maqidasee tumu goynuwawu Xoossay giigissidoba. Ayyaanaa gannatee Xoossay nashshiyoogeetanne ha wodiyan ayyaana beeta maqidasiyan awu haggaaziyaageeta shaakki eranawu maaddees.—Mil. 3:18.
11. Ayyaanaa gannatiyaara gayttidaagan ha wodiyan nuussi deꞌiya maatay aybee?
11 Yihooway 1919ppe doommidi ayyaanaa gannatee saꞌan giiga, minonne aaho gidanaadan nagarancha asati banaara oottana mala paqqadidoogaa eriyoogee keehi ufayssiyaaba. Ha maalaalissiya oosuwaa oottaydda deꞌay? Yihooway ‘tohuwaa wottiyo sohoy’ bonchettana mala aara issippe oottanawu wozanappe koyay?
YIHOOWAY BA DIRIJJITIYAA KASEEGAAPPE AARUWAN LOYTTIIDDI DEꞌEES
12. Isiyaasa 60:17y polettiyoogaara gayttidaagan nuuni ubbay ammaniyoy aybee? (Ha huuphe yohuwaa doomettan deꞌiya misiliyaa xeella.)
12 Yihoowa dirijjitiyawu saꞌaa baggaara gayttidaagan laamettiya maalaalissiyaabay Isiyaasa 60:17n kasetidi odettiis. (Nabbaba.) Yelagati woy tumaa mati siyidaageeti he laamettidabaa qonccissiyaabaa nabbabidosona woy haratuppe siyidosona. SHin hegaa beꞌida ishanttinne michontti gita maataa demmidosona! Yihooway ba kawoyido Kawuwaa bagaara Ba dirijjitiyaa kaalettiyoogaa eti ammaniyoogee garamissiyaaba gidenna. Eti naqaashi deꞌiyooban ammaniyoogaa eroosona; nuuni ubbaykka etaagaadan ammanoos. Eti wozanappe yootiyoobaa siyiyoogee ne ammanuwaa minttana; qassi neeni Yihoowan keehi ammanettanaadan oottana.
13. Mazamure 48:12-14 maaran nuuni ay oottana bessii?
13 Tumu Kiristtaaneti ubbay Yihoowa dirijjitiyaabaa haratussi yootana koshshees. Iita, shori baynnanne siiqoy baynna alamiyan ayyaanaa gannatee ha wodiyan deꞌiyoogee maalaalissiyaaba! Saluwan deꞌiya Xoossaa Kawotettaabaanne ha wodiyan saꞌan deꞌiya ayyaanaa gannatiyaabaa ‘yiya yeletawu yootiyoogee’ keehi ufayssiyaaba!—Mazamure 48:12-14 nabbaba.
14, 15. Dirijjitee 1970ppe simmin laammidobay aybee, qassi hegan waati maadettidee?
14 Yihoowa dirijjitiyawu saꞌaa baggay keehi loꞌꞌanaadan oottida, dirijjitiyan laamettida issi issibaa gubaaꞌiyan deꞌiya gasttati aadhida layttatun beꞌidosona. Cimata gidennan, gubaaꞌiyawu oottiyaagee gubaaꞌiyan deꞌiyo wodiyaa, Macara Biiruwaa Konttiyaa gidennan, macara biiruwawu oottiyaagee issi biittan deꞌiyo wodiyaa, qassi Yihoowa Markkata Bolla Gididi Heemmiyaagaa gidennan, Wach Tawer Soosaytiyaa pirezddanttee kaalettiyo wodiyaa eti hassayoosona. Yihoowawu aqida ha ishantta ubbaa maaddiya ammanettida asati deꞌikkokka, kase gubaaꞌiyan, macara biiruwaaninne waanna biiruwan koshshiyaabaa kuuyiyay issi ura xalla. Kase issi uri kuuyiyoogee attin, 1970ppe haa simmin amarida cimati kuuyoosona.
15 Ha laammidobay maaddidee? Ee, maaddiis. Aybissi? Geeshsha Maxaafaa loytti akeekidi laammidoba gidiyo gishshataassa. Ubbabaa issi uri kuuyiyoogaappe, Yihooway immido “imota” gidida cimatu ubbaa loꞌꞌo eeshshan dirijjitee goꞌettees.—Efi. 4:8; Lee. 24:6.
Yihooway ubbasan deꞌiya asawu keehi koshshiya kaaletuwaa immees (Mentto 16, 17 xeella)
16, 17. Mata wode laamettidabaappe nena keehi ufayssidaageeti awugeetee, qassi aybissi?
16 Nu xuufiyaa meraara, xuufiyan kiyiyaabaaranne xuufiyaa asawu immiyo ogiyaara gayttidaagan mata wode laamettidabaakka qoppa. Maaddiya, ufayssiyaanne loꞌꞌiya xuufeta haggaazuwan asawu immiyoogee keehi ufayssiyaaba! Qassi jw.org Weyb sayttiyaa mala ooratta tekinolojiyaa goꞌettidi tumaa asawu yootiyo wode, Yihoowagaadan ubbasan deꞌiya asawu keehi koshshiya kaaletuwaa immanawu koyiyoogaa bessoos.
17 So Asaa Goynuwaa omarssawu woykko buzo xinaatiyawu wodiyaa demmanaadan nu shiiquwaara gayttidaagan laamettidabaakka keehi nashshoos. Hegaadankka, gita shiiquwaa prograametun laamettidabaa nashshoos. Darotoo nuuni hegee layttan layttan yaa loꞌꞌi loꞌꞌi bees goos! Daro tiꞌokiraase timirtte keettatun kaseegaappe aaruwan loohiyoogan nuuni ufayttiyoogee qoncce. Ha laamettida ubbaban Yihooway kaalettidoogee erettidaba. I ba dirijjiteenne haꞌꞌi nuuni deꞌiyo ayyaanaa gannatee ubbatoo loꞌꞌi loꞌꞌi baanaadan oottees!
AYYAANAA GANNATEE LOꞌꞌANAADAN NEENI OOTTIYOOBAA
18, 19. Ayyaanaa gannatee yallisanaadan waati maaddana danddayiyoo?
18 Nu ayyaanaa gannatee yaa loꞌꞌanaadan nuuni maaddana mala Yihooway paqqadidoogee nuussi boncho. Nuuni Kawotettaa mishiraachuwaa mishettidi sabbakiyoogaaninne asaa erissiyo ashkkara oottiyoogan hegaadan maaddoos. Nuuni issi uri ba huuphiyaa geppidi Kiristtaane gidanaadan maaddiyo wode, ayyaanaa gannatee aakkanaadan oottoos.—Isi. 26:15; 54:2.
19 Nu eeshshay loꞌꞌi loꞌꞌi baanaadan oottiyoogankka ayyaanaa gannatee yallisanaadan oottana danddayoos. Yaatiyoogan, ayyaanaa gannatee harata keehi ufayssiyaagaa gidanaadan oottoos. Darotoo asay dirijjitiyaakko shiiqidi, Xoossaakkonne Kiristtoosakko shiiqanaadan oottiyay, nuuni Geeshsha Maxaafaa eriyoogaappekka aaruwan nu geeshshatettaanne nuuni sarotettan deꞌiyoogaa.
Neeni ayyaanaa gannatee aakkanaadan oottana danddayaasa (Mentto 18, 19 xeella)
20. Leemiso 14:35 maaran nuuni keehi koyiyoobay ayba gidana bessii?
20 Ha wodiyan keehi loꞌꞌiya ayyaanaa gannatiyaa beꞌidi Yihoowaynne Yesuusi keehi ufayttiyoogee erettidaba! Ha wodiyan ayyaanaa gannatee loꞌꞌi loꞌꞌi baanaadan oottiyoogan ufayttoos; shin saꞌay gannate gidanaadan oottiyoogan ufayttanaagawu hegee xeera beso. Leemiso 14:35y, “Kawoi eranchcha ashkkaran ufaittees” yaagiyoogaa hassayiyaageeta gidoos. Ayyaanaa gannatee loꞌꞌi loꞌꞌi baanaadan oottiyo wode ubbatoo akeekancha gidoos!