Nabbabiyaageetu Oyshaa

Kiitettida PHawuloosi ‘heezzantto saluwaanne’ “gannatiyaa” pude ekettidoy ayba ogiyaanee?—2 Qor. 12:2-4, NW.

PHawuloosi “heezzantto saluwaa pude ekettida” issi bitaniyaabaa 2 Qoronttoosa 12:2, 3n yootiis. He bitanee oonee? PHawuloosi bana kiitettidaagaa oottidi Xoossay goꞌettiyoogaa Qoronttoosa gubaaꞌiyawu mintti yootiis. (2 Qor. 11:5, 23) Hegaappe kaallidi I “ajjuutaabaanne Godaappe qonccidabaa” yootiis. He sohuwan PHawuloosi hara ishanttubaa yootibeenna. Yaatiyo gishshawu, ajjuutaanne qonccidabaa I beꞌidoogaa yootiis giyoogee bessiyaaba.—2 Qor. 12:1, 5.

Hegaa gishshawu, ‘heezzantto saluwaa pude ekettiday,’ qassi ‘saluwaa [“gannatiyaa,” NW] pude ekettiday’ PHawuloosa. (2 Qor. 12:2-4) I “qonccidabaa” giya qaalaa goꞌettidoogee sinttappe hananabay ayyo odettidoogaa bessees.

PHawuloosi beꞌido ‘heezzantto saloy’ aybee?

Beettiya saluwaa qonccissanawu Geeshsha Maxaafay “saluwaa” gaana danddayees. (Doo. 11:4; 27:28; Maa. 6:26) SHin, harabaa qonccissanawukka “saluwaa” giya qaalaa goꞌettees. Saloy issi issitoo asa haaruwaa bessees. (Dane. 4:20-22) Woy qassi saloy, Xoossay ba Kawotettaa baggaara haariyo haaruwaa bessiyaaba gidana danddayees.—Ajj. 21:1.

PHawuloosi “heezzantto saluwaa” beꞌiis. Hegee woygiyoogee? Geeshsha Maxaafay issi issitoo mintti yootanawu issibaa heezzutoo zaari zaari yootees. (Isi. 6:3; Hiz. 21:27; Ajj. 4:8) PHawuloosi ‘heezzantto saluwaabaa’ yootiyo wode keehi xoqqa, laggetiyaabi baynna haaruwaabaa, hegeekka Yesuus Kiristtoosinne 144,000ti issippe haariyo Mase Kawotettaabaa qonccissidaba milatees. (Geeshsha Maxaafaa Loytti Akeekiyoogaa, Paydo 2, sintta 1059, 1062 xeella.) Kiitettida PHeexiroosi yootidoogaadan, nuuni Xoossay qaalaa gelidoogaadan ‘ooratta saluwaa’ naagoos.—2 PHe. 3:13.

PHawuloosi “gannatiyaa” giidoogee shin?

“Gannatiyaa” giya qaalaykka dumma dummabaa bessiyaaba gidana danddayees: (1) Asi koyro deꞌido sohuwaa qoppiyo wode, “gannatee” mati yaana Gannate saꞌaa bessiyaaba gidana danddayees. (2) Xoossaa asay ooratta alamiyan demmana ayyaanaabaa hanotaa bessiyaabakka gidana danddayees. (3) Qassi, gannatee saluwan deꞌiya ufayssiya hanotaa, Ajjuutaa 2:7n odettida ‘Xoossaa gannatiyaa’ bessiyaaba gidana danddayees.—Wochiyo Keelaa, Isiine 15, 2015, sintta 8. mentto 8 xeella.

PHawuloosi bana gakkidabaa 2 Qoronttoosa 12:4n yootiyo wode he heezzubaakka qonccissennan aggenna.

Qanttan zaarettanawu:

Naaꞌꞌantto Qoronttoosa 12:2n odettida ‘heezzantto saloy’ Yesuus Kiristtoosinne 144,000ti haariyo Mase Kawotettaa, ‘ooratta saluwaa’ gidana danddayees.—2 PHe. 3:13.

He Kawotettay keehi xoqqa, laggetiyaabi baynna haaro gidiyo gishshawu, ‘heezzantto salo.’

PHawuloosi ajjuutan ‘pude ekettido gannatee’ (1) mati yaana Gannate saꞌaa, (2) ha wodiyan deꞌiya ayyaanaabaa gannatiyaappe keehi aaho gidida, he wode deꞌana ayyaanaabaa gannatiyaanne (3) saluwan deꞌiya ‘Xoossaa gannatiyaa’ bessiyaaba gidana danddayees; hegeeti ooratta alamiyan issi wodiyan issippe deꞌana.

Hegaa gishshawu, ooratta saloynne ooratta saꞌay issippe ooratta alame. Ooratta alamee saluwaa Kawotettaa haaroynne gannate gidida saꞌan Yihoowawu oottiya asay an deꞌiyo ooratta giigisso.