Zaarettidi 2013n Giigissido Ooratta Alamiyaa Birshshettaa

DARO layttaa giddon Ooratta Alamiyaa Geeshsha Maxaafaa Birshshettaa darotoo zaaretti giigissikkokka, 2013n awudeegaappenne aaruwan darobaa zaarettidi giigissida. Leemisuwawu, ha birshshettan haꞌꞌi xeetaappe 10u kushe gidiyaagaa kaseegaappe guuxxiya Inggilizetto qaalay deꞌees. Geeshsha Maxaafan deꞌiya waannatiya amarida qaalati laamettidosona. Issi issi shemppoti danttuwawu laamettidosona, qassi qonccissanawu tohossa qofay gujettiis. Laamettida ubbabaa ha huuphe yohuwan qonccissana danddayettenna, shin laamettidabaappe waannatiyaageeta ane beꞌoos.

Geeshsha Maxaafan deꞌiya waannatiya qaalatuppe laamettidaageeti awugeetee? Hagaappe kasetiya huuphe yohuwan qonccidaagaadan, “SHiꞌol,” “Heydis,” qassi “shemppuwaa” giyo qaalata zaarettidi giigissida. SHin hara daro qaalatakka giigissida.

Leemisuwawu, Yesuusa waati woridaakko asay balabaa qoppennaadan oottanawu kase “mittan cadettiis” geetettida qaalay “mitta bolli kaqettiis” geetettidi birshshettiis. (Maa. 20:19; 27:31) Kase “iita eeshsha” geetettidaagee Giriiketto qaalay qonccissiyoogaadan pokkiyaabaa gidana mala “pokko eeshsha” geetetti birshshettiis. Kase “waayettiiddi takkiyoogaa” geetettida qaalay daro wodiyawu waayettiyoogaa milatana danddayees; “danddayaa” giya qaalay qofaa loytti qonccissees. (Gal. 5:19) Kase “siiqo-kehatettaa” giya qaalaa gishshaa “aggenna siiquwaa” geetettidi suure birshshettiis. Geeshsha Maxaafan ‘ammanettiyoogaa’ giya qaalaara darotoo geeddarssiyo he qaalaa qofaa hegee loytti qonccissees.—Maz. 36:5; 89:1.

Ubba sohuwan issi mala gididi birshshettida amarida qaalati haꞌꞌi yuushuwan deꞌiya qofaadan birshshettidosona. Leemisuwawu, ʽoh·lamʹ giya Ibraawetto qaalaa kase “ay keenakko erettenna wodiyaa” giidi birshshidoogaa “merinaa” gaanakka danddayettees. Mazamure 90:2⁠nne Mikiyaasa 5:2 mala xiqisetu birshshetta hegee waati laammiyaakko geeddarssa.

“Zerettaa” geetettidi birshshettida Ibraawettonne Giriiketto qaalati goshshaara gayttidabankka “zariyawu” leemiso gididikka Geeshsha Maxaafan daro sohuwan deꞌoosona. Kase attamettida Ooratta Alamiyaa Birshshettan Doomettaabaa 3:15 gujjin, ubbasan “zerettaa” geetettiis. SHin, “zariyaa” gaanawu Inggilizetto qaalan haꞌꞌi darotoo “zerettaa” geetettenna; yaatiyo gishshawu, zaaretti giigissidoogan Doomettaabaa 3:15⁠ninne hegaa mala hara xiqisetun “zariyaa” geetettiis. (Doo. 22:17, 18; Ajj. 12:17) Hara sohotun yuushuwan deꞌiya qofaadan birshshettiis.—Doo. 1:11; Maz. 22:30; Isi. 57:3.

Daro qaalata bixe qaalan birshshidoogaa laammidoy aybissee? Loꞌꞌo Geeshsha Maxaafaa birshshettay “bixe qaalan birshshiyoogee qofaa laammiyo woy genttiyo wode, issi qaalaa woy qofaa suure qonccissiyoogaa,” zaarettidi 2013n giigissidoogan Gujo Qofaa A1y yootees. Geeshsha Maxaafay koyro xaafettido qaalaa leemisoti hara qaalan geliyaaba gidikko, bixe qaalan birshshettidosona. He maaraa kaalliyo wode, Ajjuutaa 2:23n ‘wozanaa qoriyaagaa’ giya qofay daro qaalan geliyaaba. SHin he xiqisiyan ‘kilahuwaa qoriyaagaa’ giya qofaa akeekanawu metana danddayiyo gishshawu, koyro xaafettida qofaara maayettana mala, “kilahuwaa” giya qaalay zaarettidi giigissidoogan “wozanaa qofaa” geetettiis. Hegaadankka, Zaarettido Wogaa 32:14n “gisttiyaa kilahuwaa modhuwaa” giya leemisoy “loꞌꞌo gisttiyaa” geetettidi geliya ogiyan birshshettiis. “Ta menttershshay qaxxarettibeenna” giya qofay “haasayanawu metootays” giyoogaa keena daro qaalan qoncce gidennay hegaa mala gaasuwaana.—Kes. 6:12.

“Israaꞌeela attuma naata,’’ qassi “aawi baynna guutta attuma naata” giya qaalati haꞌꞌi “Israaꞌeelata,” qassi “aawi baynna naata” geetettidi birshshettidoy aybissee? Yootiyoobay attuma asaabaakko woy macca asaabaakko darotoo Ibraawettuwan qonccees. SHin, attuman odettiya qaalati issi issitoo attuma asawukka macca asawukka odettiyaaba gidana danddayoosona. Leemisuwawu, “Israaꞌeela attuma naata” geetettidaageeti attumaageetakka maccaageetakka gidiyoogaa issi issi xiqisetu yuushuwan deꞌiya qofay bessiyo gishshawu, haꞌꞌi daro sohuwan hegee “Israaꞌeelata” geetettiis.—Kes. 1:7; 35:29; 2 Kaw. 8:12.

Hegaadan, Doomettaabaa 3:16n Ibraawettuwan “attuma naata” giya qaalay kase attamettida Ooratta Alamiyaa Birshshettan “naata” geetettiis. SHin, he qaalay Kessaabaa 22:24n, “Intte naati [Ibraawettuwan, “attuma naati”] aawu baynnaageeta gidana” geetettidi, haꞌꞌi zaarettidi giigiis. Hara xiqisetunkka hegaa maaran “aawi baynna guutta attuma naꞌa” giyo qaalay “aawi baynna naꞌa” geetettidi laamettiis. (Zaa. 10:18; Iyy. 6:27) Giriiketto Sepitujenttiyankka hegaadan birshshettiis. Hegaappe denddidaagan, Eranchchaa 12:1nkka “neeni yelaga attuma asa gidiyo layttan” giidoogaa laammidi, “ne yelagatettaa layttan” giida.

Ibraawetto peesho qaalati daroti geliya ogiyan birshshettidoy aybissee? Waannatiya Ibraawetto peesho qaalati naaꞌꞌu qommo; hegeetikka polettiiddi deꞌiyaabaanne polettiichidabaa qonccissiyaageeta. Kase attamettida Ooratta Alamiyaa Birshshettan polettiiddi deꞌiyaabaa woy zaaretti zaarettidi polettiyaabaa qonccissiya Ibraawetto peesho qaalatu qofaa ubbasan peesho qaalaanne hara gujo qaalaa goꞌettidi qonccissida.a Polettidabaa qonccissiya peesho qaalatussi “tumuppe” giyo, “bessees” giyoonne hegaa mala qaalata goꞌettiyoogan hanidaba gidiyoogaa qonccissida.

Zaarettidi 2013n giigissidoogan qofaa qonccissanawu koshshana xayikko, hegaa mala gujo qaalata goꞌettibookko. Leemisuwawu, Xoossay zaari zaaridi “Pooꞌoy hano” giidobadan qonccissana koshshenna; yaatiyo gishshawu, “yaagiis” giya peesho qaalaa zaarettidi giigissidoogan polettiiddi deꞌiyaabadan birshshibookko. (Doo. 1:3) SHin, Yihooway Addaama darotoo xeesidoogee tuma; hegaa gishshawu, hegaa qonccissanawu haꞌꞌikka Doomettaabaa 3:9n “aggennan xeesiis” geetettiis. Darotoo, Ibraawetto peesho qaalaa polettichibeenna woy polettida hanotaa qonccissiyoogaappe geliya ogiyan qonccissida. Ibraawetto qaalay qanttan qofaa qonccissiyoogaa akeekanawukka hegee maaddees.

Kaseegaappe daro shemppoti haꞌꞌi dantto gididoy aybissee? Geeshsha Maxaafan deꞌiya daro qofay koyro danttuwan xaafettiis. Ha wodiyaa qaalatun danttuwaa wurssettan darotoo cenggurssay issi mala; shin Ibraawetto danttuwan keehi koshshiyaabay misatiya qofaanne issoy issuwaappe dummatiya qofaa qonccissiyoogaa. Ibraawetto danttuwan kaalliya qofaa wurssetta qaalay appe kasetiyaagaara cenggurssan issi mala gidana xayikkonne, he qofaara gaytti uttidaba.

Kase attamettida Ooratta Alamiyaa Birshshettan Iyyooba maxaafaynne Mazamure maxaafay danttuwan xaafettiis; hegee yexxanaadan woy zaarettanaadan giigidoogaa bessees. Hegaadan xaafiyoogee qofaa minttiya danttuwaa shaahota qonccissees, qassi hassayanaadan maaddees. Zaarettidi 2013n giigissidoogan Leemiso maxaafay, Siiquwaa Sabaa maxaafaynne hiraagaa maxaafatun daro shemppotikka kase dantto gidiyoogaa bessanawu, qassi misatiya qofaanne issoy issuwaappe dummatiya qofaa qonccissanawu danttuwan xaafettidosona. Hegawu issi leemisoy maara ubban issoy issuwaappe dummatiya qofay deꞌiyoonne Xoossaa pirddaappe ooninne attennaagaa qonccissanawu gaytti uttida qofay ubba maaran xaafettido Isiyaasa 24:2. Nabbabiya uri hegaa mala qofay dantto gidiyoogaa akeekiyoogee Geeshsha Maxaafaa xaafidaagee Xoossaa Qaalaa minttidi yootanawu danttuwaa goꞌettidoogaappe attin, coo zaarettidoba gidennaagaa eranaadan oottees.

Ibraawetto xuufee danttokko dantto gidennaakko shaakki eranawu issi issitoo metana danddayiyo gishshawu, danttuwan xaafettidabay Geeshsha Maxaafaa issi birshshettaappe haran dummatees. Danttuwan xaafettiya xiqisee awugaakko birshshiya uri qoppidi kuuyana koshshees. Danttuwan xaafettibeenna issi issi qofay keehi qoncce gidana mala leemisuwan, misatiya qofaa yootiyoogaaninne hegaa mala ogiyan xaafettiis.

Maxaafaa gidduwaa qonccissiya ooratti giigidabay, beni danttuwan xaafettida Siiquwaa Sabaa maxaafan haasayiyaageeti darotoo laamettiyo wode akeekanaadan keehi maaddees.

Koyro qaalan kushiyan xaafettidaagaa xannaꞌiyoogee zaarettidi giigissiyo wode waati maaddidee? Koyro Ooratta Alamiyaa Birshshettay Masoretike xuufiyaappe, qassi Weskotinne Horti Giriikettuwan giigissido xuufiyaappe birshshettiis. Beni kushiyan xaafettida Geeshsha Maxaafaa kaseegaappe aaruwan xannaꞌiyoogee amarida Geeshsha Maxaafaa xiqiseta loytti akeekanaadan maaddiis. Maxine Abbaa matan beettida xaaxettida maxaafaa duuqqidoogaa haꞌꞌi demmana danddayettees. Xannaꞌiyaageeti kushiyan xaafetida Giriiketto xuufeta haratakka pilggidosona. Kushiyan xaafettidaagaa mata wode xannaꞌido darobay kompputeriyan giigiis; hegee Ibraawetto woy Giriiketto xuufiyaa waati birshshin loꞌꞌokko kuuyanawu kushiyan xaafettidaageetu giddon deꞌiya dummatettaa akeekanawu metootennaadan oottiis. Ooratta Alamiyaa Geeshsha Maxaafaa Birshshettaa Konttee issi issi xiqiseta pilgganawu hegaa goꞌettidi, amaridabaa laammiis.

Leemisuwawu, Giriiketto Septujenttee 2 Sameela 13:21n, “SHin i ba naꞌaa Amnoona azzanttanawu koyibeenna; ayssi giikko, awu bayra naꞌa gidiyo gishshawu a siiqees” yaagees. Masoretike xuufiyan hegee baynna gishshawu, beni Ooratta Alamiyaa Birshshettankka hegee baawa. SHin, Maxine Abbaa matan beettida xaaxettida maxaafatun hegee deꞌiyo gishshawu, zaarettidi 2013n giigissidoogankka deꞌees. Koyro Sameela maxaafan Xoossaa sunttay ichashu sohuwan gujettanaadan oottidaykka hegaa. Giriiketto xuufiyaa xannaꞌidoogee Maatiyoosa 21:29-31n deꞌiya qofay xaafettido maaraakka laammanaadan oottiis. Yaatiyo gishshawu, Giriiketto xuufiyaa issuwaa mintti kaalliyoogan gidennan, kushiyan xaafettidabaa yiggi xeelliyoogan issi issibaa laammida.

Ooratta Alamiyaa Birshshettaa asaara haasayiya Xoossay immido imotadan xeelliya daroti ufayttidi nabbabanaadaaninne loytti akeekanaadan maaddida laamettida darobaappe hageeti amaridaageetu xalla.