Kase taani deꞌoy cammido makkalancha asa

KASE DEꞌUWAA:

Taani Mekisiikon, Tamawulipas giyoosan keehi loꞌꞌiya Siyutat Mantta giyo kataman yelettaas. He kataman deꞌiya asati daroti kehanne haratuyyo qoppiyaageeta. SHin he heeran citan danobaa oottiyaageeti deꞌiyo gishshawu, asay keehi yayyees.

Nu son deꞌiya oyddu attuma naatuppe taani naaꞌꞌantta naꞌa. Ta aawaynne aayyiyaa taani Kaatolike Woosa Keettan xammaqissidosona; guyyeppe taani he woosa keettan mazamuriyaa yexxiyaagaa gidaas. Pirddaanne merinawu taman xuugettiyoogaa keehi yayyiyo gishshawu, taani Xoossaa ufayssana koyaas.

Tawu layttay ichasha gidiyo wode, ta aaway nuna aggidi biis. Hegee taani keehi azzananaadaaninne hidootaa qanxxanaadan oottiis. Nuuni a keehi siiqishin, i aybissi nuna aggi biidaakko taani erana danddayabeykke. Nu aayyiyaa nuussi, oyddu naatussi koshshiyaabaa kunttanawu adussa saatiyaa oottiyoogaa doommaasu.

Hegaappe denddidaagan, taani timirtte keettaappe attada taappe gitatiya naatuura zuppetiyoogaa doommaas. Eti cashshaa, sijaaraa uyiyoogaa, wuuqqiyoogaanne bokisiyoogaa tana tamaarissidosona. Taani haratuppe wolqqaamana koyiyo gishshawu, asaara warettiyo dumma dumma ogiyaanne massaariyaa tokkosiyoogaa tamaaraas. Taani makkalancha yelaga gidaas. Taani darotoo haratuura massaariyaa oyqqada warettays; hegaappe denddidaagan suuxxada keehi qohettiyo gishshawu hayqqiis giidi ogiyan olidi boosona. Darotoo hegaadan hanidaashin ta aayyiyaa tana beꞌada, keehi azzanawusu! Hegaappe eesuwan hosppitaaliyaa ekkada bawusu.

Tawu layttay 16 gidiyo wode, naatettan ta lagge gidida Jorjji nu soo yiis. I Yihoowa Markka gididoogaanne keehi koshshiya issibaa nuussi yootana koyiyoogaa odiis. I ba ammanuwaabaa Geeshsha Maxaafaappe yootiis. Taani kase Geeshsha Maxaafaa mule nabbaba erennaba gidikkokka, Xoossaa sunttaanne a halchuwaa erada keehi ufayttaas. Nuuni Geeshsha Maxaafaa xannaꞌanaadan Jorjji shoobbiis. Yaatin, eeno giida.

TAANI LAAMETTANAADAN GEESHSHA MAXAAFAY MAADDIIS:

Siꞌooliyaa tamaa giyoobay Geeshsha Maxaafaa timirtte gidennaagaa erada keehi ufayttaas. (Eranchchaa 9:5) Hegaa era simmada, Xoossaa keehi yayyiyoogaa aggada, ba naatuyyo keehi loꞌꞌobaa qoppiya siiqiya Aawadan a xeelliyoogaa doommaas.

Geeshsha Maxaafaa xannaꞌiyoogan ayyaanaaban diccada, issi issiban laamettana koshshiyoogaa akeekaas. Qassi ta huuphiyaa kawushshananne makkaliyoogaa aggana bessiyoogaa akeekaas. Koyro Qoronttoosa 15:33n deꞌiya zoree tana maaddiis. Xiqisee, “Iita laggetettai lo77o hanotettaa moorees” yaagees. Taani ta eeshshaa loyttanawu koyikko, iita asatuura laggetiyoogaa aggana koshshiyoogaa akeekaas. Hegaa gishshawu, ta kase laggetuppe haakkada, maayettennabay bantta giddon merettiyo wode warettiyoogan woy makkaliyoogan gidennan, Geeshsha Maxaafaa maaraa kaalliyoogan giigissiya tumu Kiristtaanetuura laggetaas.

Tana maaddida hara xiqisee qassi Roome 12:17-19. Xiqisee hagaadan gees: “Ooninne intteyyo iitabaa oottikko, he urau iitabaa ootti zaaroppite. . . . Asa ubbaara sarotettan de7anau, intte baggaara, intteyyo danddayettidabaa ubbaa oottite. Ta ishatoo, intte intte huuphen asau halo kessoppite. . . . Aissi giikko, Xoossaa maxaafai, ‘Godai, “Taani haluwaa kessana; taani kushiyaa zaarana” yaagees.’” Pirdda pacaa Yihooway ba keerido wodiyan giigissanaagaa akeekaas. Taani loddan loddan makkaliyoogaa aggaas.

Issi galla omarssi taani soo simmishin hanidabaa mule dogikke. Kase tanaara eqettiya citan deꞌiya yelagati tana qohidosona; qassi eta halaqay ta zokkuwaa shociiddi, “Ane nena ashsha!” yaagiis. He wode, he hanotaa genccanaadan Yihooway tana maaddana mala qantta woosaa woossaas. Taani haluwaa kessanawu paacettikkokka, aggada baas. Wonttetta gallassi he halaqaara gayttaas. Keehi yiillotada haluwaa kiyana koyaas; shin ta huuphiyaa naaganaadan Yihooway maaddana mala zaarettadakka ta wozanan woossaas. I taakko yiidi hagaadan gin garamettaas: “Zine omarssi oottidobawu tawu atto ga. Tumaa yootanawu, taanikka ne mala gidana koyays. Geeshsha Maxaafaa xannaꞌana koyays.” He wode taani ta hanqquwaa mittido gishshawu keehi ufayttaas! Hegaappe denddidaagan, ikka Geeshsha Maxaafaa xannaꞌiyoogaa doommiis.

Nu soo asay he wode Geeshsha Maxaafaa xannaꞌiyoogaa aggidoogan azzanaas. Gidikkokka, taani xannaꞌanawu murttaas; qassi oonakka woy aybakka gidin taani xannaꞌiyoogaa diggenna mala qofaa qachaas. Xoossaa asaara laggetiyoogee woppaanne taani koyiyoogaa mala so asaa siiquwaa demmanaadan maaddanaagaa eraas. Taani ayyaanaaban diccada, 1991n xammaqettada Yihoowa Markka gidaas.

TAANI GOꞌETTIDO HANOTAA:

Kase taani deꞌoy cammido, haratuppe wolqqaamana koyiya makkalancha asa. SHin Xoossaa Qaalay taani muleera laamettanaadan maaddiis. Haꞌꞌi siyiya ubbawu Geeshsha Maxaafay yootiyo sarotettaabaa odays. Aadhida 23 layttawu kumetta wodiyaa Xoossawu oottiyo maataa demmaas.

Amarida wodiyawu, Mekisiikon deꞌiya Yihoowa Markkatu macara biiruwan oottaas. Yan oottaydda, Klawudiyo giyo keehi gooba yelaga micheera erettada, 1999n o ekkaas. Ha ammanettida aqo laggiyo immidi anjjido gishshawu, taani Yihoowa keehi galatays!

Nuuni hayttay siyennaageeti Yihoowabaa eranaadan maaddiiddi, Mekisiiko malaata qaalaa gubaaꞌiyan issippe haggaazida. Guyyeppe, Beelize biitti biidi yan deꞌiya asaa Geeshsha Maxaafaa tamaarissanaadan shoobettida. Nu kaseegaadan ishalo deꞌuwaa deꞌennaba gidikkokka, ufayttidi deꞌoos. Nuuni harabawu giidi hegaa mule aggana koyokko.

Ta aayyiyaa Geeshsha Maxaafaa zaarettada xannaꞌiyoogaa doommada xammaqettaasu. Qassi ta bayra ishay, a machiyaanne eta naati haꞌꞌi Yihoowa Markka. Taani Xoossaa Kawotettaabaa yootido, ta kase laggetuppe amaridaageetikka haꞌꞌi Yihoowayyo haggaaziiddi deꞌoosona.

Nu soo asaappe issoti issoti bantta iita eeshshaa aggibeenna gishshawu hayqqidoogee azzanttiyaaba. Taanikka etaagaadan haniyoogaa aggennaakko, hayqqana danddayays. Yihooway tana baakkonne Geeshsha Maxaafaa maaraa kaallanaadan tana danddayaaninne kehatettan tamaarissida ba asaakko shiishshido gishshawu a galatays.