Geeshsha Maxaafay Asay Laamettanaadan Oottees

“Geeshshanne ufayssiya deꞌuwaa deꞌiyoogaa doommaas.”​—VIKTORIYA TONGO

• YELETTIDO LAYTTAA: 1957

• YELETTIDO BIITTAA: AWUSTRALYIA

• KASE TAARIKIYAA: NAATETTAN BARCHCHIYAA BEꞌADA DICCIDAARO

KASE DEꞌUWAA:

Taani Niwu Sawuz Welisen, Niwukasil kataman diccaas. Taani nu son deꞌiya laappun naatuppe bayra; ta aaway kobattiya asanne ushanchcha; ta aayyiyaakka kobattiyaaro. Ta aayyiyaa tana wadhdhawusunne cayawusu. A taani iita gidiyo gishshawu merinawu taman xuugettanawu deꞌiyoogaa ubbatoo yootawusu. Hegee taani keehi yayyanaadan oottiis.

Ta aayyiyaa darotoo tana keehi wadhdhiyo gishshawu, timirtte keetti beennan aggays. Tawu layttay 11 gidiyo wode, kawotettay tana nu so asaappe shaakkidi efiis; hegaappe simmidi qassi maccaasatu gedaamiyaa efiidosona. Tawu layttay 14 gidiyo wode, gedaamiyaappe xaya kiyada baas. Nu soo simmana koyabeenna gishshawu, Sidni katamaappe gaxan deꞌiya Kings Kros giyoosan ogiyan deꞌaas.

Ogiyan deꞌiyo wode, jallissiyaabaa, ushshaa, pornograafiyaanne shaaramuxiyoogaa meezetaas. SHin issibay tana keehi yashshiis. Taani tukke keettay deꞌiyo issi bitaniyaa keettan deꞌishin, issi galla qammi naaꞌꞌu asati he bitaniyaakko yiidosona. I taani ta kifiliyaa gelanaadan yootiis; shin gelada eti haasayiyoobaa siyays. He tukke keettaa bitanee tana he asatussi bayzzanawu koyiis. He asati tana Jaappaane markkabiyan qosan efiidi tukke keettan ootissana koyidosona. Yaatiyo gishshawu, taani yayyada, maskkootiyaara guppa kiyada baqataas.

Sidni katamaa beꞌanawu yiida issi bitaniyaara gayttada, tawu amarida miishshaa immanddeeshsha gaada ta hanotaa awu yootaas. SHin I taani bollaa meecettanawunne qumaa maanawu I aqiyoosaa baanaadan shoobbiis. Taani aara deꞌiyoogaa doommaas. Issi layttappe guyyiyan I tana machchiis.

TAANI LAAMETTANAADAN GEESHSHA MAXAAFAY MAADDIIS:

Taani Yihoowa Markkatuura Geeshsha Maxaafaa xannaꞌiyoogaa doommiyo wode, hanqqettaasinne qassi woppu gaas. Tuggaa gattiyaagee Xoossaa giyoogaa ubbatoo siyiyo gishshawu, iitabawu gaasoy Seexaanaa gidiyoogaa erido wode keehi yiillootaas. Taani siꞌooliyan gelays gaada ta deꞌo laytta ubban yayyaydda deꞌido gishshawu, Xoossay asaa taman qaxxayennaagaa erido wode keehi woppu gaas.

Yihoowa Markkati ubbabaa Geeshsha Maxaafay yootiyo maaran kuuyiyoogee tana garamissiis. Eti bantta ammaniyoogaadan deꞌoosona. Ta eeshshay wayssiyaagaa gidikkonne, ta ay haasayin woy ay oottinkka eti tana siiqoosonanne bonchchoosona.

Tana keehi wayssidabay tana pattenna asadan xeelliyoogaa. Tana keehippe ixxays; hegee taani xammaqettada Yihoowa Markka gida simminkka daro wodiyawu takkiis. Taani Yihoowa siiqiyoogaa erays; shin I ta mala asa dosana danddayennabadan qoppaas.

Taani xammaqettoosappe 15 layttay aadhdhi simmin, ta qofaa laammanaadan oottiyaabay merettiis. Yihoowa Markkatu SHiiquwaa Addaraashan issi ishay haasayiiddi, Yaaqooba 1:23, 24 yootiis. Ha xiqisee Xoossaa Qaalay nuuni nuna Yihooway xeelliyoogaadan xeellanaadan oottiya herega mala gidiyoogaa yootees. Taani tanan beꞌiyoobay Yihooway tanan beꞌiyoobaappe dummatikko shin gaada qoppiyoogaa doommaas. Yihooway tana siiqana danddayees gaada ammananawu koyro koyabeykke.

Amarida gallassappe guyyiyan, ta deꞌoy laamettanaadan oottida xiqisiyaa nabbabaas. He xiqisee Isiyaasa 1:18; hegan Yihooway hagaadan giis: “Haayite; ane zorettoos. Intte nagarai baaraadan zo77ikkokka, shachchaadan booxxana; sinaadan zo77ikkokka, puuttodan booxxana.” Taani Yihooway tana, “Viki, haaya; ane zorettidi sigettoos. Taani nena erays, ne nagaraanne ne wozanaakka erays; taani nena siiqays” giyaabadan qoppaas.

He galla qammi xiskkana danddayabeykke. Yihooway tana siiqanaagaa sirikkokka, Yesuusa wozo yarshshuwaabaa qoppiyoogaa doommaas. SHin he wode, Yihooway tana siiqiyo gishshawu tabaa danddayidoogaa akeekaas. SHin taani Yihoowa siiqoy tana maaddiyaagaa keena gidenna, qassi A Naꞌaa yarshshoy ta nagaraa kammiyaagaa keena gidenna yaagaas giyoogaa mala. Hegee wozuwaa Yihoowawu guyye zaarada oliyoogaa mala. SHin haꞌꞌi wurssettan, imota gidida wozuwaa yarshshuwaabaa wotta denttada qoppiyoogan Yihooway tana siiqiyoogaa akeekiyoogaa doommaas.

TAANI GOꞌETTIDO HANOTAA:

Taani geeshshanne ufayssiya deꞌuwaa deꞌiyoogaa doommaas. Ta aqo deꞌoy kaseppe haꞌꞌi loꞌꞌo; qassi ta deꞌuwan beꞌidoban harata maaddana danddayiyo gishshawu ufayttays. Haꞌꞌi Yihoowaara keehi dabbotidabadan qoppays.