Saꞌan Merinawu Deꞌana Danddayaasa

UFAYSSIYA HIDOOTA! Nuna Medhdhidaagee nuuyyo ha saꞌan merinaa deꞌuwaa immanawu qaalaa geliis. SHin daro asay hegaa ammananawu metootees. Eti, ‘Asa ubbay issitoo hayqqiyoogee attenna. Hegee meretan ubbawu deꞌiyaaba’ goosona. Harati qassi merinawu deꞌana danddayettikkokka, ha saꞌaana gidenna giidi qoppoosona. Eti asi merinaa deꞌuwaa demmana danddayiyoy hayqqidi saluwaa bi simmiina goosona. Neeni shin woygay?

Ha oyshaa zaaranaappe kase, kaallidi deꞌiya heezzu oyshatuyyo Geeshsha Maxaafay yootiyo zaaruwaa beꞌa: Asay merettido hanotay ay keena wodiyaa deꞌanaadan merettidoogaa bessii? Xoossay saꞌawunne asawu koyro halchchidobay aybee? Hayqoy asaa naatu bolli waani gakkidee?

ASI DUMMA MERETA

Xoossay saꞌan medhdhido ubbabaappe asi keehi dumma. Waanidi? Geeshsha Maxaafay Xoossay bana “milatissidi” ba “leemisuwan” medhdhidoy asa xalaala gidiyoogaa yootees. (Doomettaabaa 1:26, 27) Hegee woygiyoogee? Hegee siiquwaanne suure pirddaa mala Xoossawu deꞌiyaagaa mala eeshshati asawukka imettidoogaa bessees.

Hegaa bollikka, asay yuushshi qoppiyaanne akeekiya, iitaa kehaa shaakkiya, qassi Xoossaa eranawunne awu goynnanawu koyiya mereta. Nuuni saluwaaninne saꞌan deꞌiyaaban, maalaalissiya meretan, asay hiillan oottidobaaninne xaafidoban, qassi muuziqan ufayttiyoy hegaassa. Qassi, Medhdhidaagaawu goynnana koyiyay asa xalla. Ha eeshshati saꞌan deꞌiya mereta ubbaappe asi keehi dummatiyoogaa bessoosona.

Hegaa gishshawu, ane qoppa: Xoossay nuuni amarida laytta xallaa deꞌanaadan halchchidaba gidiyaakko, maalaalissiya ha eeshshatinne qoodin wurenna, dichchananne loytti goꞌettana danddayiyo hara daro loꞌꞌo eeshshati asawu deꞌanaadan oottanee? Xoossay keehi garamissiya ha eeshshati asawu deꞌanaadan oottidoy asay ha saꞌan merinawu ufayttidi deꞌanaadan halchchido gishshataassa gidiyoogee qoncce.

XOOSSAY KOYRO HALCHCHIDOBAA

SHin, issoti issoti asay ha saꞌan merinawu deꞌanaadan Xoossay mule halchchibeenna goosona. Eti asaa giddoppe saluwaa biidi Xoossaara merinawu deꞌanawu danddayiyay oonakko paaccanawu amarida wode xallawu deꞌiyo sohodan ha saꞌaa xeelloosona. SHin hegaadaana gidiyaakko, hegee ha wodiyan saꞌan kumida iitatettawu Xoossaa gaaso oottennee? SHin hegee Xoossaa eeshshaara mule maayennaba. Geeshsha Maxaafay Xoossaa xeelliyaagan hagaadan gees: “A oge ubbaikka suure. Nu Xoossai ammanettiyaagaanne iitatettai bainnaagaa; i tumanchchanne suure.”—Zaarettido Wogaa 32:4.

Xoossay saꞌaa koyro aybawu halchchidi medhdhidaakko Geeshsha Maxaafay, “Bolla xoqqa saloi Xoossaabaa; shin sa7aa i asaassi immiis” yaagidi yootees. (Mazamure 115:16) Ee, Xoossay saꞌaa medhdhidoy asay ufayttidi merinawu deꞌiyo soho gidanaadaana; qassi I nuussi merinaa deꞌuwawu koshshiya ubbabaa saꞌan giigissi wottiis.—Doomettaabaa 2:8, 9.

“Bolla xoqqa saloi Xoossaabaa; shin sa7aa i asaassi immiis.”​—Mazamure 115:16

Xoossay asawu halchchidobaakka Geeshsha Maxaafay geeshshidi yootees. I koyro azinaanne machchiyo, “Ha sa7aa kumitenne haarite; . . . biittaa bolli woxxi qaaxxiya, paxa de7iya mereta ubbaa haarite” yaagidi azaziis. (Doomettaabaa 1:28) Eti bantta deꞌiyo Gannatiyaa loyttiyoonne kumetta saꞌaakka gannate oottiyo gita maataa demmidosona! Koyrokka, Xoossay Addaameenne Hewaana, qassi eti wodeppe yelana naati merinawu deꞌanaadan qoppidoy saꞌaanappe attin saluwaana gidenna.

NUUNI HAYQQIYOY AYBISSEE?

Yaatin, nuuni hayqqiyoy aybissee? Guyyeppe Seexaanaa Dabloosa gidida issi kiitanchchay Xoossay Edenen halchchidobaa genidi mooranawu malidoogaa Geeshsha Maxaafay yootees. Waatidi?

Seexaanay Addaameenne Hewaana aagaadan Xoossaa bolli makkalanaadan denttettiis. Seexaanay Xoossay eta issi loꞌꞌobaa, hegeekka aybi loꞌꞌokko aybi iitakko banttawu kuuyiyo maataa diggidabadan yootin, eti aara hashetidi Xoossaa bolli makkalidosona. Hegee ay kaalettidee? Xoossay kasetidi giidoogaadan eti guyyeppe hayqqidosona. Saꞌan Gannatiyan merinawu deꞌiyoogee etappe haliis.—Doomettaabaa 2:17; 3:1-6; 5:5.

Addaameenne Hewaana makkalidoogee asa ubba hanno gakkanawu qohiis. Xoossaa Qaalay, “Nagarai ha sa7aa issi asa [Addaame] baggaara geliis; he nagarai banaara haiquwaa ehiis; hegaa gaasuwan, . . . haiqoi asa zare ubbaa gakkiis” yaagees. (Roome 5:12) Nuuni hayqqiyoy nu koyro aawaappenne aayeeppe nagaraanne hayquwaa laattido gishshataassappe attin, Xoossay kasetidi kuuyi wottido xuurabaa gaasuwaana gidenna.

SAꞌAN MERINAWU DEꞌANA DANDDAYAASA

Edenen denddida makkalay Xoossay asawunne saꞌawu halchchidobay polettennaadan oottenna. Laattido nagaraappe nuna laꞌa kessanawu Xoossay ba polo siiquwaappenne suure pirddaappe denddidaagan issibaa oottanawu koyiis. Kiitettida PHawuloosi, “Nagarai qanxxiyo miishshai haiquwaa. SHin Xoossai nu Godaa Kiristtoos Yesuusa baggaara immiyo imoi merinaa de7uwaa” yaagidi qonccissiis. (Roome 6:23) Xoossay nuna keehi siiqido gishshawu, “Na7aa ammaniya ubbai merinaa de7uwaa ekkanaappe attin, xayenna mala, . . . ba mexi issi Na7aa [Yesuus Kiristtoosa] immiis.” (Yohaannisa 3:16) Yesuusi wozo yarshsho gidanawu eeno giidi Addaamee moorido ubbabaa giigissiis.a

Matan, Xoossay saꞌaa gannate oottanawu halchchidobay polettana. Yesuusi yootido ha zoriyaa wozanan wottikko, neenikka hegaa demmana danddayaasa: “Un77o penggiyaara gelite. Aissi giikko, bashshau efiya penggee aaho; ogeekka woggaa. Hegaara geliya asaikka daro. Aissi giikko, de7uwau efiya penggee un77o; ogeekka xuntta. Qassi hegaara biya asatikka amaridaageeta.” (Maatiyoosa 7:13, 14) Ee, ne sinttanaabay ne dooriyoobaara gayttidaba. Yaatin neeni waatanee?