Ufayssiya Issippetettaanne Godaa Kahuwaa

1, 2. Asawu issippetettay deꞌanaadan oottiya 2018n hanana aybippenne aadhdhiyaabay aybee, qassi aybissi? (Doomettan deꞌiya misiliyaa xeella.)

LAAPPUNE 31, 2018n, kumetta saꞌan deꞌiya miilooniyan qoodettiya asay layttan issitoo bonchchettiya baalaa sohuwaa baana. Away wulli simmi, Yihoowa Markkatinne hara daro asay Yesuusi nuussi yarshshettidoogaa hassayanawu shiiqana. Layttan layttan, he baalay kumetta saꞌan keehi maalaalissiya issippetettay deꞌanaadan oottees!

² Kumetta saꞌan deꞌiya daro miiloone asay he gallassay wurana gakkanaashin dumma dumma saatiyan he baalaa bonchchishin beꞌidi, Yihoowaynne Yesuusi keehi ufayttanaagee qoncce. “Zare ubbaappe, qommo ubbaappe, yara ubbaappenne dumma dumma biitta qaala ubbaappe ooninne qoodanau danddayenna zawai bainna daro [asay]” bantta qaalaa xoqqu oottidi, “Nu atotettaikka kawotaa araatan uttida nu Xoossaappenne Dorssaappe yees” yaaganaagaa Geeshsha Maxaafay odees. (Ajj. 7:9, 10) Layttan layttan bonchchiyo Godaa Kahuwaa baalan, Yihoowaynne Yesuusi hegaa mala ogiyan bonchchettiyoogee keehi ufayssiyaaba!

3. Ha huuphe yohuwan zaaruwaa demmana oyshati awugeetee?

³ Ha huuphe yohuwan neeni kaallidi deꞌiya oyddu oyshatuyyo zaaruwaa demmana. (1) Taani Godaa Kahuwaappe loytta goꞌettanawu waana giigettana danddayiyaanaa? (2) Godaa Kahoy Xoossaa asawu ubbawu issippetettay deꞌanaadan waati maaddii? (3) Xoossaa asaa giddon deꞌiya issippetettay minnanaadan taani ay oottana danddayiyaanaa? (4) Wurssetta Godaa Kahuwaa baalay bonchchettanee? Yaanikko, awude bonchchettanee?

GODAA KAHUWAWU WAANI GIIGETTANEE, QASSI BONCHCHIYOOGAN WAANI GOꞌETTANEE?

4. Nuuni danddayettida ubban Godaa Kahuwaa bonchchana koshshiyoy aybissee?

⁴ Godaa Kahuwaa bonchchiyoogaa goꞌꞌaa wotta dentta qoppa. Gubaaꞌe shiiqoy nu goynuwaa shaaho gidiyoogaa hassaya. Layttaa giddon awugaappenne aadhdhiya he shiiquwaa shiiqanawu baaxetiya ura Yihoowaynne Yesuusi akeekiyoogee erettidaagaa. Nuuni danddayennaba gidana xayikko Godaa Kahuwaa mule attokko; hegaa Yihoowaynne Yesuusi beꞌanaadan koyoos. SHiiqoy nuuyyo keehi koshshiyaaba gidiyoogaa nuuni oottiyooban bessiyoogee, merinaa deꞌuwaa demmanaageetu sunttay xaafettido ba ‘hassayissiya maxaafan’ woy “de7o maxaafan” Yihooway nu sunttaa wotti bayanaadan oottiya hara gaaso.—Mil. 3:16; Ajj. 20:15.

5. Godaa Kahuwaappe kasetiya saaminttatun, ‘nuuni ammanuwan deꞌiyaakkonne’ nuna waati qorana danddayiyoo?

⁵ Godaa Kahuwaappe kasetiya saaminttatun, nuuyyo Yihoowaara nu dabbotay ay malakko woosaaninne akeekan qoranawu wodiyaa bazzana danddayoos. (2 Qoronttoosa 13:5 nabbaba.) Hegaa waati oottana danddayiyoo? ‘Nuuni ammanuwan deꞌiyaakkonne nuna qoriyoogaana.’ Yaatanawu, nuna hagaadan giidi oychchana koshshees: ‘Taani Yihooway ba sheniyaa polanaadan doorido mexi issi dirijjitiyaa yara gidiyoogaa ammaniyaanaa? Taani Kawotettaa mishiraachchuwaa sabbakanawunne tamaarissanawu tawu danddayettida ubbaa oottiyaanaa? Taani oottiyoobay ha wodee wurssetta gallassa gidiyoogaanne Seexaanaa haaroy xayanawu matidoogaa ammaniyoogaa bessiyaabee? Taani ta deꞌuwaa Xoossaa Yihoowawu geppido wodeegaadan haꞌꞌikka Yihoowaninne Yesuusan ammanettiyaanaa?’ (Maa. 24:14; 2 Xim. 3:1; Ibr. 3:14) Ha oyshatu zaaruwaa wotti dentti qoppiyoogee nu hanotay ay malakko shaakki eranaadan maaddana.

6. (a) Deꞌuwaa demissiya mexi issi ogee awugee? (b) Issi cimay layttan layttan Godaa Kahuwawu waani giigettii, qassi neeni hegaadan waata oottana danddayay?

⁶ Godaa Kahuwaa goꞌꞌaa qonccissiya huuphe yohota nabbabanne wotta dentta qoppa. (Yohaannisa 3:16; 17:3 nabbaba.) Nuuni merinaa deꞌuwaa demmana danddayiyoy Yihoowa ‘eriyoogaananne’ A mexi issi Naꞌaa Yesuusa ‘ammaniyoogaa’ xallaana. Godaa Kahuwawu giigettanawu Yihoowakkonne Yesuusakko shiiqanaadan maaddiya amaridabaa xannaꞌiyoogee loꞌꞌo. Daro wodiyawu gubaaꞌe cima gidida ishay oottiyoobaa qoppa. I Wochiyo Keelan kiyida, Godaa Kahuwaabaanne Yihoowaynne Yesuusi nuussi bessido siiquwaabaa qonccissiya huuphe yohota daro layttawu shiishshiis. Godaa Kahuwaappe kasetiya saaminttatun, I ha huuphe yohota zaarettidi nabbabees, qassi he baalaa goꞌꞌaa wotti dentti qoppees. Issi issitoo, issi woy naaꞌꞌu huuphe yohota I shiishshidoban gujjees. Ha cimay he huuphe yohota zaarettidi nabbabiyoogan, qassi Godaa Kahuwaa wodiyan nabbabiyo Geeshsha Maxaafaa xiqiseta nabbabidi wotti dentti qoppiyoogan layttan layttan oorattabaa akeekees. Ubbaappe aaruwan, I xannaꞌiyoobay Yihoowanne Yesuusa kaseegaappe aaruwan siiqanaadan A maaddiis. Hegaadan xannaꞌiyoogee neeni Yihoowanne Yesuusa keehi siiqanaadaaninne nashshanaadan, qassi Godaa Kahuwaappe loytta goꞌettanaadan maaddana danddayees.

GODAA KAHOY NUUNI ISSIPPETETTAN DEꞌANAADAN MAADDEES

7. (a) Godaa Kahuwaa koyro doommido qammi Yesuusi woossidobay aybee? (b) Yihooway Yesuusa woosaa zaaridoogaa bessiyaabay aybee?

⁷ Godaa Kahuwaa koyro doommido qammi, Yesuusi ba Aawaynne I issuwaa gididoogaadan A kaalliyaageeti ubbay issuwaa gidanaadan woossiis. (Yohaannisa 17:20, 21 nabbaba.) Yihooway ba siiqiyo Naꞌay woossido he woosaa zaaridoogee qoncce; qassi ha wodiyan miilooniyan qoodettiyaageeti Yihooway ba Naꞌaa kiittidoogaa ammanoosona. Hara ayba shiiqoppenne aaruwan Godaa Kahoy Yihoowa Markkatu issippetettaa loytti qonccissees. Dumma dumma biittanne zare asay kumetta saꞌan shiiqees. Issi issi heeran, haymaanoote shiiquwawu dumma dumma zare asay shiiqiyoogee oorattaba woy qassi harati kariyooba. SHin hegaa mala issippetettay Yihoowanne Yesuusa keehi ufayssees!

8. Issippetettaabaa Yihooway Hizqqeelayyo ay yootidee?

⁸ Hegaa mala issippetettay deꞌidoogee Yihoowa asaa garamissenna. Yihooway hegaa kaseti yootiis. I hananabaa yootiya Hizqqeelayyo naaꞌꞌu gatimata, hegeetikka “Yihudaagaanne” ‘Yooseefaagaa’ issippe gattiyoogaa xeelliyaagan yootidobaa qoppa. (Hizqqeela 37:15-17 nabbaba.) Wochiyo Keelaa, Isiine 2016n kiyida, “Nabbabiyaageetu Oyshaa” qofay hagaadan gees: “Israaꞌeelati Hidootaa Biittaa zaaretti guyye simmidi issippetettan deꞌanaagaa qonccissiya ufayssiya hidootaa Yihooway Hizqqeelawu yootiis. He hiraagay wurssetta gallassatun Xoossaa asaa giddonkka issippetettay deꞌanaagaa bessiyaaba.”

9. Layttan layyttan bonchchiyo Godaa Kahuwan Hizqqeela hiraagay waani polettii?

⁹ Yihooway koyro 1919⁠ppe doommidi, ‘Yihudaa’ gatiman leemisettida tiyettidaageeta leddan leddan zaarettidi daraajjayiisinne issuwaa oottiis. Hegaappe simmin, saꞌan merinawu deꞌanawu hidootiya daroti ‘Yooseefa’ gatimaa leemisuwaa hanotaadan tiyettidaageetuura issuwaa gididi, naaꞌꞌay ‘issi wude’ gididosona. (Yoh. 10:16; Zak. 8:23) Yihooway he naaꞌꞌu gatimata issippe gattidi ba kushiyan issuwaa oottanaagaa yootiis. (Hiz. 37:19) Hizqqeela hiraagan Xoossaa ‘ashkkaraa Daawita’ geetettida Kawoy, bonchchettida Yesuus Kiristtoosi kaalettin ha wodiyan he naaꞌꞌu citati issippetettan oottoosona. (Hiz. 37:24, 25) Tiyetidaageetuppe attidageetinne ‘hara dorssati’ Kiristtoosa hayquwaa hassayanawu issippe shiiqiyo wode, Hizqqeela maxaafan odettida maalaalissiya issippetettay qonccees. SHin, nuuni he issippetettay minnidi deꞌanaadan ay oottana danddayiyoo?

ISSIPPETETTAN DEꞌANAWU NUUNI UBBAY AY OOTTANA DANDDAYIYOO?

10. Xoossaa asaa giddon deꞌiya issippetettay minnanaadan waatana danddayiyoo?

¹⁰ Xoossaa asaa giddon deꞌiya issippetettay minnanaadan nuuni maaddana danddayiyo issi ogee nu huuphiyaa kawushshiyoogaa. Yesuusi saꞌan deꞌiyo wode, I erissiyo ashkkarati bantta huuphiyaa kawushshanaadan zoriis. (Maa. 23:12) Nuuni nu huuphiyaa kawushshikko, alamiyaa asaagaadan nuna xoqqu xoqqu oottokko. SHin, nuuni nu huuphiyaa kawushshiyoogee aawatettay deꞌiyoogeetuyyo haarettanaadan maaddana, qassi hegaadan azazettiyoogee gubaaꞌiyaa issippetettawu keehi koshshees. Ubbaappe aaruwan, nuuni nu huuphiyaa kawushshiyoogee Xoossaa ufayssana; ayssi giikko, “Xoossai otorettiyaageeta ixxees; shin banttana kaushshiyaageetuyyo aaro kehatettaa immees.”—1 PHe. 5:5.

11. Godaa Kahuwaa wode goꞌettiyo oyttaynne woynee aybawu leemisokko wotti dentti qoppiyoogee nu issippetettay minnanaadan waati maaddii?

¹¹ Nu issippetettay minnanaadan nuuni oottana danddayiyo naaꞌꞌantto ogee Godaa Kahuwaa wode goꞌettiyo oyttaynne woynee aybawu leemisokko wotti dentti qoppiyoogaa. Irshshoy baynna oyttaynne woynee ay qonccissiyaabakko, he qammaappe kasetidi, ubba qassi he qamman nuuni loytti qoppana koshshees. (1 Qor. 11:23-25) Oyttay yarshsho gidida, nagari baynna Yesuusa ashuwaa bessees; qassi woynee gukkida A suuttaa bessees. Gidoppe attin, nuuni ha oyttaynne woynee aybawu leemisokko eriyoogaa xallay gidenna. Kiristtoosa wozo yarshshoy Yihooway nu gishshawu ba naꞌaa immiyoogan bessidonne Yesuusi ba dosan nu gishshawu ba shemppuwaa atti immiyoogan bessido, laggetiyaabi baynna naaꞌꞌu gita siiquwaa bessiyaaba gidiyoogaa hassaya. Eta siiquwaa wotti dentti qoppiyoogee nuunikka eta siiqanaadan denttettana bessees. Qassi nuuninne nu mala ishantti Yihoowa siiqiyo siiqoy nu issippetettaa minttiya issippe gatti qachchiya wodoruwaa mala.

12. Kawuwaanne A ashkkaratubaa yootiya taarikiyan Yihooway nuuni ay oottanaadan koyiyaakko Yesuusi waati qonccissidee?

¹² Nu issippetettay minnanaadan nuuni oottana danddayiyo heezzantto ogee haratuyyo coo atto giyoogaa. Nuna naaqqida urawu atto giyo wode Yesuusa wozuwaa yarshshuwaa baggaara nu nagaray atto geetettidoogaa nashshiyoogaa bessoos. Yesuusi yootido leemisotuppe issoy Maatiyoosa 18:23-34n deꞌiyaagaa ane qoppa. Nena hagaadan oychcha: ‘Yesuusi tamaarissidobaa taani oosuwan peeshshiyaanaa? Ta ishanttunne michchonttu hanotaa akeekada eta danddayiyaanaa? Tana naaqqida urawu atto giyaanaa?’ Nagaranchcha asay atto gaanawu metootiyo issi issi gita naaqoy deꞌiyoogee qoncce. SHin, Yihooway nuuni ay oottanaadan koyiyaakko he leemisuwaappe akeekoos. (Maatiyoosa 18:35 nabbaba.) Nuuni atto gaana bessishin nu ishanttussi atto geennaba gidikko, Yihooway nuuyyo atto geennaagaa Yesuusi geeshshidi yootiis. Hegee nuuni loytti qoppana bessiyaaba! Yesuusi nuna tamaarissidoogaadan haratuyyo atto giyo wode nu issippetettaa naagoosinne minttoos.

13. Nuuni sarotettaa medhdhiyoogee issippetettay minnanaadan waati maaddii?

¹³ Nuuni haratuyyo atto giyo wode, sarotettaa medhdhiyaageeta gidiyoogaa bessoos. ‘Nuuni issippe gatti qachchiya sarotettan, geeshsha ayyaanay nuuyyo immiyo issippetettaa naaganawu’ minnana koshshiyoogaa PHawuloosi yootidoogaa hassaya. (Efi. 4:3) Godaa Kahoy bonchchettiyo wodiyaa heeraaninne ubba qassi he qammi, neeni harata waata oyqqiyaakko loytta qoppa. Nena hagaadan oychcha: ‘Taani lanccenna ura gidiyoogan erettiyaanaa? Sarotettaa medhdhada issippetettaa minttanawu baaxetiyoogan erettiyaanaa?’ Hageeti ha wodiyan loytti qoppana koshshiya oyshata.

14. Nuuni “issoi issuwaa maaddiyoogan” woy danddayiyoogan siiquwaa waati bessana danddayiyoo?

¹⁴ Nu issippetettaa minttana danddayiyo oyddantto ogee siiqo Xoossaa Yihoowa milatiyoogan harata siiqiyoogaa. (1 Yoh. 4:8) Nu mala Kiristtaaneta xeelliyaagan, “Taani eta siiqana koshshikkonne eta dosana koshshenna” gaanawu mule koyokko! Hegaadan qoppiyoogee “issoi issuwaa maaddiyoogan” woy danddayiyoogan ‘nu siiquwaa bessanaadan’ PHawuloosi zorido zoriyaappe dummatiyaaba. (Efi. 4:2) I nuuni ‘issoy issuwaa maaddana’ woy danddayana bessiyoogaa xallaa yootibeennaagaa akeeka. I nuuni hegaa ‘siiquwan’ oottanaadan yootiis. Hegee coo danddayiyoogaappe dummatees. Nu gubaaꞌiyan Yihooway baakko ehiido dumma dumma asay deꞌees. (Yoh. 6:44) Yihooway eta baakko ehiido gishshawu i eta siiqanaadan oottiyaabi deꞌiyoogee qoncce. Yihooway nu ishanttanne michchontta siiqanaadan oottiyaabi etassi deꞌikko, nuuni waanidi eta siiqana bessenna gaana danddayiyoo? Yihooway azazido siiquwaa nuuni bessennan aggana koshshenna.—1 Yoh. 4:20, 21.

WURSSETTA GODAA KAHUWAA AWUDE BONCHCHANEE?

15. Nuuni wurssetta Godaa Kahoy bonchchettanaagaa waati eriyoo?

¹⁵ Issi gallassi wurssetta Godaa Kahuwaa baalay bonchchettana. Hegaa aybin eriyoo? PHawuloosi ayyaanay denttettin Qoronttoosan deꞌiya tiyettida Kiristtaanetuyyo xaafido koyro dabddaabbiyan Yesuusa hayquwaa hassayiyoogan eti “Godai yaana gakkanaassikka, A haiquwaa” ubbatoo yootanaagaa odiis. (1 Qor. 11:26) Yesuusikka wurssettaabaa yootido hiraagan ba ‘yuussaabaa’ odiis. Mati yaana gita waayiyaa xeelliyaagan I hagaadan giis: “Asa Na7aa malaatai, saluwan beettana; sa7an he wode de7iya asa zare ubbai yeekkana. Qassi taani, Asa Na7ai, wolqqaaranne gita bonchchuwaara saluwaa shaara giddoora yiishin, eti be7ana. [Yesuusi] ba kiitanchchata gita malkkataara kiittana; kiittin kiitanchchati sa7au ha gaxaappe ya gaxaa gakkanaashin, qassi sa7an oiddu zooziyaappe au doorettida asaa shiishshana.” (Maa. 24:29-31) ‘Doorettida asaa shiishshiyoogee’ he wode saꞌan deꞌiya tiyettidaageetuppe attidaageeti ubbay saluwan bantta woytuwaa ekkanaagaa bessiyaaba. Hegee gita waayiyaa doomettaa heerappe biidi Armmageedoona olay denddana gakkanaashin hanana. Yaatin 144,000 ubbati Yesuusaara issippe saꞌaa kawota xoonana. (Ajj. 17:12-14) Yesuusi tiyettidaageeta shiishshanawu ‘yaanaappe’ kase bonchchettana Godaa Kahoy wurssettaagaa.

16. Neeni ha laytti Godaa Kahuwaa bonchchanawu murttidoy aybissee?

¹⁶ Godaa Kahuwaa Laappune 31, 2018n bonchchidi goꞌettanawu simmi ane murttoos. Yihooway ba asaa issippetettaa minttiyaabaa oottanaadan nuna maaddana mala woossoos! (Mazamure 133:1 nabbaba.) Issi galla nuuni wurssetta Godaa Kahuwaa bonchchanaagaa hassaya. Hegee gakkanaashin, he baalaa bonchchanawu nuuyyo danddayettida ubbaa oottoos; qassi Godaa Kahuwaa bonchchiyoogee demissiyo ufayssiya issippetettaa nashshoos.