XANNAꞌIYO HUUPHE YOHUWAA 4
Nuuni Godaa Kahuwaa Bonchchanawu SHiiqiyoy Aybissee?
“Hagan tana hassayite.”—LUQ. 22:19.
MAZAMURE 20 Ne Alꞌꞌo Naꞌaa Immadasa
HA XINAATIYANa
1-2. (a) Nu siiqiyo hayqqida uraa loytti hassayiyoy awudee? (b) Yesuusi hayqqanaappe kase qammi waatidee?
NUUNI siiqiyo asati hayqqoosappe daro wodee aadhdhikkokka, nuuni eta hassayoos. Nuuni eti hayqqido gallassan, ubba etabaa loytti qoppoos.
2 Nuuni loytti siiqiyo Yesuus Kiristtoosi hayqqido gallassaa hassayanawu layttan layttan kumetta saꞌan deꞌiya miilooniyan qoodettiya asaara issippe shiiqoos. (1 PHe. 1:8) Nuna nagaraappenne hayquwaappe laꞌa kessanawu ba shemppuwaa wozo oottidi immidaagaa hassayanawu shiiqoos. (Maa. 20:28) Yesuusi ba hayquwaa bana kaalliyaageeti hassayanaadan koyiis. I hayqqanaappe kase qammi, dumma kahuwaa giigissidi hagaadan azaziis: “Hagan tana hassayite.”—Luq. 22:19.
3. Nuuni ha huuphe yohuwan ay beꞌanee?
3 Kiristtoosa hayquwaa hassayanawu shiiqiyaageetuppe amaridaageeti saluwaa biyo hidootay deꞌiyoogeeta. SHin saꞌan deꞌanawu hidootiya miilooniyan qoodettiyaageetikka shiiqoosona. Ha huuphe yohuwan, naaꞌꞌu citatikka layttan layttan Godaa Kahuwaa wode shiiqanawu yeemottiyoy aybissakko beꞌana. Nuuni shiiqiyoogan waani goꞌettiyaakkokka pilggana. Tiyettidaageeti shiiqiyo amarida gaasota pilggiyoogan ane doommoos.
TIYETTIDAAGEETI SHIIQIYOY AYBISSEE?
4. Tiyettidaageeti Godaa Kahuwaa wode oyttaappe miyoynne woyniyaappe uyiyoy aybissee?
4 Tiyettidaageeti layttan layttan Godaa Kahuwaa bonchchanawu shiiqiyo wode oyttaappe moosonaanne woyniyaappe uyoosona. Eti oyttaappe miyoogeenne woyniyaappe uyiyoogee bessiyaaba gidiyoy aybissee? Hegaa zaaranaayyo, Yesuusi saꞌan deꞌido wurssetta qammi hanidabaa ane beꞌoos. Paasikaa baalaappe simmin, Yesuusi Godaa Kahuwaa geetettiya baalaa essiis. Yesuusi oyttaanne woyniyaa I kiittido ammanettida 11tussi immiis, yaatidi eti maanadaaninne uyanaadan yootiis. Yesuusi etawu naaꞌꞌu maachchatubaa yootiis, hegeekka oorattaa maachchaanne Kawotettaa maachchaa.b (Luq. 22:19, 20, 28-30) Ha maachchati he kiitettidaageetinne hara amaridaageeti saluwan kawonne qeese gidanaadan oottidosona. (Ajj. 5:10; 14:1) Godaa Kahuwaa wode oyttaappe maananne woyniyaappe uyana danddayiyaageeti, ha naaꞌꞌu maachchan deꞌiya tiyettidaageetuppe attidaageetu xalla.c
5. Tiyettidaageeti banttawu imettida hidootaabaa ay eriyoonaa?
5 Tiyettidaageeti Godaa Kahuwawu shiiqanawu yeemottiyo hara gaasoy hagaa: Ha baalaa bonchchiyoogee eti bantta hidootaa wotti dentti qoppanaadan maaddees. Yihooway etawu maalaalissiya hidootaa immiis; eti saluwan hayqqennanne musenna deꞌuwaa demmana. Qassi hayquwaappe denddida Yesuus Kiristtoosaaranne eta cita gidida 144,000tuura ubba qassi Xoossaa Yihooway deꞌiyoosan awu haggaaziyo maatay etawu deꞌees! (1 Qor. 15:51-53; 1 Yoh. 3:2) Tiyettidaageeti he maalaalissiya maataa saluwan demmanawu shoobettidoogaa eroosona. SHin eti saluwaa gelanawu, hayqqana gakkanaashin ammanettidi deꞌana bessees. (2 Xim. 4:7, 8) Tiyettidaageeti saluwaa biyo bantta hidootaa wotti dentti qoppiyoogee eti keehi ufayttanaadan oottees. (Tii. 2:13) ‘Hara dorssatubaa’ shin? (Yoh. 10:16) Eti Godaa Kahuwaa bonchchanawu shiiqiyo hara gaasoti aybee?
HARA DORSSATI SHIIQIYOY AYBISSEE?
6. Hara dorssati Godaa Kahuwawu shiiqiyoy aybissee?
6 Hara dorssati Godaa Kawuwan oyttaappe maana woy woyniyaappe uyana xayikkonne, shiiqiyoogan eti ufayttoosona. Saꞌan deꞌanawu hidootiyaageeti Godaa Kahuwawu shiiqanaadan koyro shoobettidoy 1938. Laappune 1, 1938 Wochchiyo Keelay, hagaadan gees: “[Hara dorssati] he shiiquwaa shiiqiyoogeenne hegan haniyaabaa beꞌiyoogee bessiyaaba. . . . Yaatiyoogee koshshiyaaba, qassi hegee etikka ufayttiyo wode.” Issi bullachchaa shoobettida imattati issippe shiiqiyoogan ufayttiyoogaadan, hara dorssati Godaa Kawuwan oyttaappe maana woy woyniyaappe uyana xayikkonne, shiiqiyoogan ufayttoosona.
7. Hara dorssati Godaa Kahuwaa haasayaa siyanawu yeemuwan naagiyoy aybissee?
7 Hara dorssatikka bantta hidootaa wotti dentti qoppoosona. Eti Godaa Kahuwaa haasayaa yeemuwan naagoosona, ha haasayaappe dariya baggay Kiristtoosinne aara issippe haariya 144,000 ammanettida asawu SHaꞌu Layttaa Haaruwaa wode oottanabaa qonccissees. Eta Kawoy Yesuus Kiristtoosi haariyo wode, saluwan uttidi haariyaageeti saꞌaa gannate oottiyo oosuwan, qassi asay wottiyoobi baynnaagaa gidanaadan maaddana. Godaa Kahuwaa bonchchanawu shiiqiya miilooniyan qoodettiyaageeti Isiyaasa 35:5, 6; 65:21-23ninne Ajjuutaa 21:3, 4n deꞌiyaagaa mala Geeshsha Maxaafaa hiraagati polettiyo wodiyaa qoppiyoogan keehi ufayttoosona. Etinne eti siiqiyoogeeti ooratta alamiyan deꞌiyaabadan qoppiyoogan, bantta sinttana hidootaanne Yihoowayyo aggennan haggaazanawu murttido murttiyaa yaa minttoosona.—Maa. 24:13; Gal. 6:9.
8. Hara dorssati Godaa Kahuwawu shiiqiyo hara gaasoy aybee?
8 Hara dorssati Godaa Kahuwawu shiiqiyo hara gaasuwaa ane beꞌoos. Eti tiyettidaageeta siiqiyoogaanne eta maaddiyoogaa bessanawu koyosona. Tiyettidaageetinne saꞌan deꞌanawu hidootiyaageeti hashetidi issippe oottanaagaa Xoossaa Qaalay kasetidi yootiis. Waati oottiyoonaa? Ane amarida leemisota beꞌoos.
9. Zakkaariyaasa 8:23n deꞌiya hiraagay tiyettidaageeta xeelliyaagan hara dorssatuyyo siyettiyaabaa ay qonccissii?
9 Zakkaariyaasa 8:23 nabbaba. Tiyettida bantta ishanttanne michchontta xeelliyaagan hara dorssatuyyo siyettiyaabaa ha hiraagay loytti qonccissees. “Issi Aihuda” giyaageenne “inttenaara” giyaagee issi citaa qonccissees, hegeekka tiyettidaageetuppe attidaageetubaa. (Roo. 2:28, 29) ‘Dumma qaalan haasayiya kawotettatu ubbaappe yiida tammu asati’ hara dorssata qonccissoosona. Eti ‘mintti oyqqiyoogee’ tiyettidaageetuura issippe tumu goynuwaa ammanettidi goynniyoogaa bessiyaaba. Hegaa gishshawu, Godaa Kahuwaa bonchchiyo omarssi hara dorssati tiyettidaageetuura issippe shiiqiyoogan etaara hashetiyoogaa bessoosona.
10. Hizqqeela 37:15-19, 24, 25n deꞌiya hiraagay polettanaadan Yihooway waatidee?
10 Hizqqeela 37:15-19, 24, 25 nabbaba. Tiyettidaageetinne hara dorssati loytti hashetidi oottanaadan oottiyoogan Yihooway ha hiraagaa poliis. Ha hiraagay naaꞌꞌu gatimatubaa yootees. Saluwaa biyo hidootay deꞌiyoogeeti ‘Yihudaa’ gatima mala (Israaꞌeela kawoti doorettiyo yara), qassi saꞌan deꞌanawu hidootiyaageeti ‘Efireema’ gatima mala.d Eti ‘issi gatima’ gidanaadan Yihooway naaꞌꞌu citata issuwaa oottana. Hegaa giyoogee eti bantta Kawuwaa Yesuus Kirsttoosa haaruwan issippetettan haggaazana giyoogaa. Tiyettidaageetinne hara dorssati Godaa Kahuwawu naaꞌꞌu dumma dumma citadan gidennan, ‘issi heemmiyaagee’ deꞌiyo ‘issi wudedan’ layttan layttan shiiqoosona.—Yoh. 10:16.
11. Maatiyoosa 25:31-36, 40n odettida ‘dorssati’ Kirsttoosa ishantta maaddiyoogaa waati bessiyoonaa?
11 Maatiyoosa 25:31-36, 40 nabbaba. Yesuusi yootido ‘dorssati’ saꞌan deꞌanawu hidootiya wurssetta wodiyan deꞌiya xillota bessiyaaba. Kumetta saꞌan sabbakiyoonne erissiyo ashkkara oottiyo gita aawatettaa Kirsttoosa ishanttuppe attidaageeti polanaadan hara dorssati eta maaddiyoogan ammanettidi oottoosona.—Maa. 24:14; 28:19, 20.
12-13. Hara dorssati Kiristtoosa ishantta maaddiyo hara ogeti awugeetee?
12 Layttan layttan Godaa Kahuwaappe kasetiya saaminttatun, hara dorssati kumetta saꞌan asaa Godaa Kahuwawu shoobbiyo zamachchan minnidi oottiyoogan Kiristtoosa ishantta maaddoosona. (“Neeni Godaa Kahuwaa Wodiyaassi Giigettaydda Deꞌay?” giya saaxiniyaa xeella.) Eti bantta gubaaꞌiyan tiyettida uri baynnaba gidikkonne, Godaa Kahuwawu koshshiya ubbabaakka giigissoosona. Hara dorssati Kiristtoosa ishantta hegaa mala ogetun maaddiyoogan keehi ufayttoosona. Yesuusi he dorssati tiyettida ba ishanttuyyo oottiyoobaa bawu oottidobadan xeelliyoogaa eti eroosona.—Maa. 25:37-40.
13 Nu hidootay ayba gidikkonne, nuuni ubbay Godaa Kahuwawu shiiqiyo hara gaasoti aybee?
NUUNI UBBAY SHIIQIYOY AYBISSEE?
14. Yihoowaynne Yesuusi nuna keehi siiqiyoogaa waati bessidonaa?
14 Yihoowaynne Yesuusi nuuyyo bessido siiquwaa gishshawu nuuni eta galatoos. Yihooway nuna siiqiyoogaa bessido daro ogeti deꞌikkonne, I siiquwaa bessido issi ogee hara ubbaappe aadhdhees. Nu Xoossay ba alꞌꞌo Naꞌay nu gishshawu waayettanaadaaninne hayqqanaadan kiittiyoogan I nuna keehi siiqiyoogaa bessiis. (Yoh. 3:16) Yesuusikka ba deꞌuwaa nuuyyo aatti immanawu eeno giyoogan nuna keehi siiqiyoogaa bessiis. (Yoh. 15:13) Yihoowaynne Yesuusi nuussi bessido siiquwaa gishshawu nuuni mule kushe zarana danddayokko. Gidikkonne, nu galla galla deꞌuwan galatiyoogaa bessana danddayoos. (Qol. 3:15) Qassi eti nuna siiqiyo siiquwaa wotti dentti qoppanawunne nuuni eta siiqiyoogaa bessanawu koyiyo gishshawu Godaa Kahuwaa bonchchanawu shiiqoos.
15. Tiyettidaageetinne hara dorssati wozuwaa imotaa keehi nashshiyoy aybissee?
15 Wozuwaa imotaa gishshawu nuuni keehi galatoos. (Maa. 20:28) Wozoy tiyettidaageetuyyo maalaalissiya hidootay deꞌanaadan oottiyo gishshawu etawu keehi alꞌꞌoba. Eti Kiristtoosa yarshshuwan ammaniyo gishshawu, Yihooway eta xillodaaninne ba naatudan xeellees. (Roo. 5:1; 8:15-17, 23) Wozuwaa gishshawu hara dorssatikka galatoosona. Eti Kiristtoosa yarshshuwan ammaniyo gishshawu, Xoossaa sinttan geeshsha, ayyo geeshsha goynuwaa goynnana danddayoosona, qassi etawu ‘gita waayiyaappe’ paxa attiyo hidootay deꞌees. (Ajj. 7:13-15) Tiyettidaageetinne hara dorssati layttan layttan Godaa Kahuwawu shiiqiyoogee eti wozuwaa gishshawu galatiyoogaa bessiyo issi oge.
16. Nuuni Godaa Kahuwawu shiiqiyo hara gaasoy aybee?
16 Nuuni Godaa Kahuwawu shiiqiyo hara gaasoy Yesuusawu azazettanawu koyiyo gishshataassa. Nu hidootay awan gidikkonne, nuuni ubbay Yesuusi Godaa Kahuwaa essido qammi immido azazuwa azazettanawu koyoos: “Hagan tana hassayite.”—1 Qor. 11:23, 24.
SHIIQIYOOGAN NUUNI UBBAY WAANI GOꞌETTIYOO?
17. Godaa Kahoy nuuni Yihoowakko loytti shiiqanaadan waati maaddii?
17 Nuuni Yihoowakko loytti shiiqoos. (Yaaq. 4:8) Nuuni beꞌidoogaadan, Godaa Kahoy Yihooway nuuyyo immido hidootaanne I nuuyyo bessido gita siiquwaa wotti dentti qoppanaadan nuna maaddees. (Erm. 29:11; 1 Yoh. 4:8-10) Nuuni ammanttiya nu hidootaanne Xoossay nuna siiqiyo mino siiquwaa wotti dentti qoppiyo wode, nuuni Yihoowa siiqiyo siiqoynne aara dabbotido dabbotay keehi minnees.—Roo. 8:38, 39.
18. Yesuusa leemisuwaa wotti dentti qoppiyoogee ay oottanaadan nuna denttettii?
18 Nuuni Yesuusa leemisuwaa kaallanaadan maaddees. (1 PHe. 2:21) Godaa Kahuwaa wode, Yesuusi saꞌan deꞌido wurssetta saaminttabaa, A hayquwaabaanne A dendduwaabaa yootiya Geeshsha Maxaafaa taariketa nabbaboos. Qassi Godaa Kahuwaa bonchchiyo omarssi siyiyo haasayay Yesuusi nuna siiqiyo siiquwaa hassayissees. (Efi. 5:2; 1 Yoh. 3:16) Nuuni Yesuusi ba goꞌꞌaa aggibayidoogaabaa nabbabiyoogeenne hagaa wotti dentti qoppiyoogee ‘I deꞌidoogaadan deꞌanaadan’ nuna denttettees.—1 Yoh. 2:6.
19. Nuuni Xoossaa siiquwan waani deꞌana danddayiyoo?
19 Nuuni Xoossaa siiquwan deꞌanawu murttido murttiyaa yaa minttees. (Yih. 20, 21) Nuuni Xoossawu azazettanawu A sunttay geeyanaadan oottanawunne A wozanaa ufayssanawu nuuyyo danddayettida ubbabaa oottiyoogan A siiquwan deꞌoos. (Lee. 27:11; Maa. 6:9; 1 Yoh. 5:3) Nuuni Godaa Kahuwawu shiiqiyoogee Yihoowassi, ‘Taani ne siiquwan merinawu deꞌanawu koyays,’ giyoogaa bessiya ogiyan galla galla deꞌanawu kaseppe aaruwan murttanaadan nuna denttettees.
20. Nuuni Godaa Kahuwawu shiiqanaadan oottiya gaasoti aybee?
20 Nuuni merinawu deꞌanawu hidootiyoy saluwan woy saꞌan gidin, Godaa Kahuwawu shiiqanaadan oottiya gaasoti deꞌoosona. Layttan layttan he gallassi nuuni issippe shiiqiyo wode nu siiqiyo Yesuus Kiristtoosa hayquwaa hassayoos. Ubbappe aaruwan, Yihooway ba Naꞌaa wozo ootti immiyoogan nuuyyo bessido aybippenne aadhdhiya siiquwaa hassayoos. Ha laytti, Godaa Kahuwaa Arbba, Hosppune 15, 2022 omarssan bonchchana. Nuuni Yihoowanne A Naꞌaa siiqiyo gishshawu, Yesuusa hayquwaa hassayiyo baalaa bonchchanawu shiiqiyoogaappe aadhdhiya aybinne nuuyyo deꞌenna.
MAZAMURE 16 Yihooway Tiyo A Naꞌawu, A Sabbite
a Nuuni deꞌanawu hidootiyoy saluwan woy gannate gidida saꞌan gidin layttan layttan Godaa Kahuwawu shiiqanawu yeemuwan naagoos. Nuuni shiiqanaadan Geeshsha Maxaafay yootiyo gaasuwaanne yaatiyoogan nuuni waani goꞌettiyaakko ha huuphe yohoy loytti qonccissana.
b Ooratta maachchaabaanne Kawotettaa maachchaabaa gujjada eranawu, Xiqimita 15, 2014, Wochchiyo Keelaa, sinttaa 15-17n “Intte ‘Qeesetu Kawotettaa’ Gidana” giya huuphe yohuwaa xeella.
c QONCCISSIDO QAALAA: Tiyettidaageetuppe attidaageeta giya qofay tiyettidaageetuppe attida ha wodiyan saꞌan deꞌiya Kiristtaaneta qonccissees.
d Hizqqeela shemppo 37n deꞌiya, naaꞌꞌu gatimabaa yootiya hiraagaa xeelliyaagan gujjada eranawu, Isiine 2016 Wochchiyo Keelan “Nabbabiyaageetu Oyshaa” xeella.