Seeray Xoossaa Siiquwaa Bessiyaaba

1. Geeshsha Maxaafay seeraa darotoo waati qonccissii?

“SEERAA” giyo qaalaa neeni siyiyo wode ay qoppay? Neeni sohuwaara qixaatiyaabaa qoppennan aggakka; shin hegaa xalla gidenna. Geeshsha Maxaafay seeray nuussi loꞌꞌo gidiyoogaa yootees; qassi hegaa issi issitoo eratettaara, aadhdhida eratettaara, siiquwaaranne deꞌuwaara issippe qonccissees. (Lee. 1:2-7; 4:11-13) Xoossaa seeray I nuna siiqiyoogaanne nuuni merinaa deꞌuwaa demmanaadan I koyiyoogaa qonccissiyaaba. (Ibr. 12:6) A seeran qixaatee gujettana danddayikkonne, hegee qohiyaaba woy meqettaa iita gidiyoogaa bessiyaaba mule gidenna. ‘Seerawu’ waanna birshshettay aaway woy aayyiyaa ba siiqiyo naꞌa tamaarissiyoogaa mala, tamaarissiyoogaara gayttidaba.

2, 3. Seeray tamaarissiyoogaaranne qaxxayiyoogaara waani gayttana danddayii? (Doomettan deꞌiya misiliyaa xeella.)

² Ha leemisuwaa qoppa: Jooni giyo guutta naꞌay kuwaasiyaa son kaaꞌees. A aayyiyaa hagaadan gaawusu: “Joonaa, neeni son kuwaasiyaa kaaꞌana bessenna! Neeni issibaa menttana danddayaasa.” SHin I ba aayee azazuwaa xaasayi xeellidi, kaaꞌiyoogaa aggibeenna; qassi ciishshaa wottiyoobaa akeekennan menttiis. A aayyiyaa A waata seeranee? I seeray tamaarissiyoogaaranne qaxxayiyoogaara gayttidaba gidana danddayees. A Joona tamaarissiyoogan, I oottidobay bala gididoy aybissakko awu yootana danddayaawusu. I yelidaageetuyyo azazettiyoogee loꞌꞌo gidiyoogaanne eta azazoy koshshiyaabanne bessiyaaba gidiyoogaa A ayyo qonccissawusu. Jooni hegaappe tamaaranaadan maaddana mala, A kuwaasiyaa guutta wodiyawu ekkiyoogan A qaxxayiyoogee bessiyaaba gaada qofaa qachchaasu. Hegee Joona ufayssiyaaba gidenna; shin hegee I bana yelidaageetuyyo azazettennaagee iitabaa kaalettiyoogaa hassayanaadan maaddees.

³ Nuuni Kiristtaane gubaaꞌiyaa yara gidiyo gishshawu, Xoossaa keettaa asa. (1 Xim. 3:15) Nu Aawaa, Yihoowayyo likke gididabaanne likke gidennabaa kuuyiyo maataynne nuuni ayyo azazettenna wode nuna siiquwan seeriyo maatay deꞌiyoy hegaassa. Hegaa bollikka, nuuni oottidobay iitabaa kaalettikko, saluwan deꞌiya nu Aaway yootiyoobaa siyiyoogee keehi koshshiyoogaa A seeray nuna hassayissees. (Gal. 6:7) Xoossay nuna keehi siiqiyo gishshawu nuuni waayettanaadan koyenna.—1 PHe. 5:6, 7.

4. (a) Waatidi loohissiyoogaa Yihooway anjjii? (b) Nuuni ha huuphe yohuwan ay pilgganee?

⁴ Geeshsha Maxaafay yootiyoogaadan seeriyoogan, nu naꞌay woy Geeshsha Maxaafaa tamaaree Kiristtoosa kaalliyaagaa gidanawu halchchidoogaa polanaadan A maaddana danddayoos. Xoossaa Qaalay harata loohissanawu nuna maaddees, qassi hegee ‘xillotettaa deꞌuwawu zoranaadankka’ maaddees. Hegaa gishshawu, ‘Yesuusi nuna azazidobaa ubbaa naaganaadaaninne’ akeekanaadan nu naꞌaa woy Geeshsha Maxaafaa tamaariyaa maaddana danddayoos. (2 Xim. 3:16; Maa. 28:19, 20) Yihooway hegaa mala loohissuwaa anjjees; hegee tamaareti hara asay Kiristtoosi erissiyo ashkkarata gidanaadan oottana mala maaddees. (Tiitu 2:11-14 nabbaba.) Keehi koshshiya heezzu oyshatu zaaruwaa ane haꞌꞌi pilggoos: (1) Xoossaa seeray I nuna siiqiyoogaa waati bessii? (2) Xoossay beni seeridoogeetuppe nuuni ay tamaarana danddayiyoo? (3) Nuuni seeriyo wode, Yihoowanne A Naꞌaa waani milatana danddayiyoo?

XOOSSAY SIIQUWAN SEEREES

5. Yihoowa seeray I nuna siiqiyoogaa bessiyoy ayba ogetuunee?

⁵ Yihooway nuna siiqiyo gishshawu, suurissees, tamaarisseesinne loohissees. Nuuni A dabbo gididi merinawu deꞌanaadan I koyees. (1 Yoh. 4:16) I nuuni hanqqettanaadan mule oottenna woy pattennabadan nuuyyo siyettanaadan oottenna. (Lee. 12:18) Yihooway nuna bonchchees, nu wozanan deꞌiya loꞌꞌoban ufayttees, qassi nuuni koyidobaa dooriyo maataa bonchchees. Xoossay ba Qaalaa baggaara, Geeshsha Maxaafaa qofay deꞌiyo xuufetu baggaara, Kiristtaane aawaanne aayee baggaara, woy gubaaꞌe cimatu baggaara seeriyoogaa nuuni waati xeelliyoo? Nuuni geella erennan ‘moorobaa oottiyo’ wode, nuna ashkketettaaninne siiquwan suurissanawu maliya cimati Yihooway nuna siiqiyoogaa bessoosona.—Gal. 6:1.

6. Issi uri ba maataappe wodhdhidaba gidikkokka, seeray Xoossaa siiquwaa waati bessii?

⁶ Seeriyoogee issi issitoo zoriyoogaa xalla gidenna. Wolqqaama nagaraa oottikko, hegee gubaaꞌiyan deꞌiya maatay ekettanaadan oottana danddayees. Hanotay hegaadaana gidikko, he seeray Xoossay nuna siiqiyoogaa bessiyaaba. Leemisuwawu, maatay ekettiyoogee, issi uri kaseegaappe aaruwan Geeshsha Maxaafaa xannaꞌiyoogee, wotti dentti qoppiyoogeenne woossiyoogee keehippe koshshiyoogaa akeekanaadan maaddana danddayees. Yaatiyoogee, I ayyaanaaban minnanaadan oottana danddayees. (Maz. 19:7) Guyyeppe, I ba maataa zaarettidi demmana danddayees. Bohiyoogee Yihoowa siiquwaa bessiyaaba gidikkokka, hegee gubaaꞌiyaa iitabaappe naagees. (1 Qor. 5:6, 7, 11) Xoossay bessiyaagaadan seeriyo gishshawu, bohiyoogee balabaa oottida uray ba nagaray gita gidiyoogaa akeekanaadaaninne ba nagaraappe simmanaadan oottana danddayees.—Oos. 3:19.

YIHOOWA SEERAAPPE I GOꞌETTIIS

7. SHeebini oonee, qassi I ay iita eeshshaa bessiyoogaa doommidee?

⁷ Seeraa goꞌꞌaa akeekanawu Yihooway seerido naaꞌꞌu asatubaa ane beꞌoos. Issoy Kawuwaa Hizqqiyaasa wode deꞌida Israaꞌeela asa gidida SHeebina; haray qassi ha wodiyan deꞌiya ishaa Giraama. SHeebini ‘kawo keettan sunttettidaagaa,’ hegee Kawuwaa Hizqqiyaasa keettaa gidennan aggenna; qassi awu daro maatay deꞌees. (Isi. 22:15) SHin, I bawu bonchchuwaa koyidi otorettidoogee azzanttiyaaba. I keehi bonchcho duufuwaa baayyo giigissiis; qassi ‘bonchcho para gaareta’ toggiis!—Isi. 22:16-18.

8. Yihooway SHeebina waati seeridee, qassi nuuni I hegaappe goꞌettennan waayi aggana giyoy aybissee?

⁸ SHeebini bawu bonchchuwaa koyido gishshawu, Xoossay ‘daannatettaappe A shaaridi’ A gishshaa Eliyaaqiima sunttiis. (Isi. 22:19-21) Hegee hanidoy Asoore Kawoy Sanaakireebi Yerusalaame olanawu halchchi uttido wodiyaana. Guyyeppe, Ayhudata yashissanawunne kawuwaa Hizqqiyaasi kushiyaa immanaadan oottanawu sunttatanne daro olanchchata Sanaakireebi kiittiis. (2 Kaw. 18:17-25) Eliyaaqiimi he sunttata haasayissanaadan kiitettiis; shin I barkka bibeenna. I naaꞌꞌu asatuura biis; issoy waanna xaafe gididi oottiya SHeebina. SHeebini hanqqettennaaninne uluwan lancciyaa oyqqennan ba huuphiyaa kawushshidi guuttabaa oottanawu eeno giidoogaa nuuni hagaappe akeekana danddayoos. Nuuni SHeebinappe tamaarana danddayiyo heezzubaa kaallidi pilggana.

9-11. (a) SHeebina gakkidabaappe nuuni ay tamaarana danddayiyoo? (b) Yihooway SHeebina seeridoogaa xeelliyaagan neeyyo aybi siyettii?

⁹ Koyruwan, SHeebini ba maataappe wodhdhiis. A gakkidabay ‘otoruwaa geeduwaa bashshay kaalliyoogaa, ayyuwaa geeduwaakka kunddettay kaalliyoogaa’ bessees. (Lee. 16:18) Neeyyo gubaaꞌiyan maatay deꞌikko, qassi harati nena keehi xoqqu ootti xeellikko, neeni ne huuphiyaa kawushshada deꞌanawu baaxetay? Neeyyo deꞌiyaaban woy neeni oottidoban bonchchettana bessiyay Yihoowa gidiyoogaa akeekay? (1 Qor. 4:7) Kiitettida PHawuloosi hagaadan giis: “Taani intteyyo yootais; intte qoppanau bessiyaagaappe aattidi, otoruwan qoppoppite; hegaa aggidi, wozannaama asadan qoppite.”—Roo. 12:3.

¹⁰ Naaꞌꞌanttuwan, Yihooway SHeebina mintti zoridoogee SHeebini laamettana danddayiyoogaa Yihooway ammanidoogaa bessiyaaba gidana danddayees. (Lee. 3:11, 12) Ha wodiyan Xoossaa gubaaꞌiyan oottiyo maataappe wodhdhidaageeti hegaappe loꞌꞌobaa tamaaroosona! Eti hanqqettiyoogaappenne uluwan lancciyaa oyqqiyoogaappe, seeray Yihoowa siiquwaa bessiyaaba gidiyoogaa qoppidi, banttawu danddayettida ubban Xoossaayyo aggennan oottana danddayoosona. Bantta huuphiyaa kawushshidi deꞌiyaageeta nu Aaway wurssettan woytanaagaa hassaya. (1 PHeexiroosa 5:6, 7 nabbaba.) Siiquwan seeriyoogee Yihooway nuna moli giigissiyo oge gidana danddayiyo gishshawu, Yihoowa kushiyan shugo urqqa gididi deꞌiyaageeta gidoos.

¹¹ Heezzanttuwan, yelidaageetanne gubaaꞌe cimata gujjin, seeriyo maatay deꞌiyoogeeti Yihooway SHeebina seeridoogaappe keehi maaddiyaabaa tamaaroosona. Yihoowa seeray I nagaraa ixxiyoogaa bessiyaaba gidana danddayikkonne, hegee nagaraa oottida uraayyo qoppiyoogaakka bessiyaaba gidana danddayees. Neeni yelidaagaa woy gubaaꞌe cima gidikko, seeriyo wode Yihoowa milatay?—Yih. 22, 23.

12-14. (a) Yihooway seeriyo wode issoti issoti waaniyoonaa? (b) Issi ishay ba qofaa laammanaadan Xoossaa Qaalay waati maaddidee, qassi hegee ay demissidee?

¹² Issoti issoti seeray imetti simmin, keehi qohettidoogee, ubba qassi Xoossaappenne A asaappe shaahettidoogee azzanttiyaaba. (Ibr. 3:12, 13) SHin hegaa giyoogee ooninne eta maaddana danddayenna giyoogee? Bohettidi guyyeppe simmida, qassi zaarettidi ayyaanaaban shuggida Giraama hanotaa qoppa. Amarida layttappe guyyiyan, I baayyo kase lagge gidida gubaaꞌe cimay bana Geeshsha Maxaafaa xannaꞌissanaadan oychchiis.

¹³ He cimay hagaadan giis: “Giraami kase otorettees. I bana bohida cimata borees. Hegaa gishshawu, kaallidi xannaꞌiyo amarida wodetun, otoruwaabaanne hegee kaalettiyoogaabaa yootiya xiqiseta xannaꞌida. Giraami herega mala gidida Xoossaa Qaalan bana xeelliyoogaa doommiis; qassi I beꞌidobaa dosibeenna! Hanidabay garamissiyaaba! Otoroy ‘tuussaadan’ a ayfiyaa goozidoogaanne awu meto gididabay boriyoogaa gidiyoogaa akeekidi, I sohuwaara laamettiyoogaa doommiis. I ubbatoo gubaaꞌe shiiquwaa shiiqiyoogaa, Xoossaa Qaalaa wozanappe xannaꞌiyoogaanne galla galla woossiyoogaa doommiis. Qassi I so asaa huuphe gidiyoogaadan, ayyaanaaban ba aawatettaa poliis, hegee A keettaayyiyoonne A macca naata keehi ufayssiis.”—Luq. 6:41, 42; Yaaq. 1:23-25.

¹⁴ He cimay gujjidi hagaadan giis: “Issi gallassi Giraami tana keehi garamissidaba yootiis. I hagaadan giis, ‘Taani tumaa eroosappe daro laytta; ubba aqinye gidadakka haggaazaas. SHin taani tumuppe Yihoowa siiqays gaana danddayiyoy haꞌꞌa.’ Daro takkennan, SHiiquwaa Addaraashan maykiraafooniyaa yuushshanaadan ayyo odettiis; he maataa I keehippe xoqqu ootti xeellees. A hanotay issi uri seeraa ekkidi Yihoowa sinttan ba huuphiyaa kawushshikko, keehi anjjettanaagaa taani tamaaranaadan oottiis!”

SEERIYO WODE, XOOSSAANNE KIRISTTOOSA MILATITE

15. Nu seeray maaddiyaagaa gidanaadan nuuni ay oottana bessii?

¹⁵ Nuuni loꞌꞌo asttamaare gidanawu, koyro loꞌꞌo tamaare gidana bessees. (1 Xim. 4:15, 16) Hegaadan, harata seeranaadan Xoossay maataa immidoogeeti ubbatoo eeno gi haarettidi, Yihoowa kaaletuwaa kaallana koshshees. Neeni ne huuphiyaa kawushshiyoogaa harati akeekiyo wode, eti nena bonchchana; qassi eti metootennan neeni yootiyo zoriyaa siyana. Ane Yesuusi leemiso gididobaa qoppa.

16. Maaddiya ogiyan seeriyoogaanne tamaarissiyoogaa xeelliyaagan Yesuusappe nuuni ay tamaarana danddayiyoo?

¹⁶ Azazettiyoogee keehi deexxiyo wodekka, Yesuusi ubbatoo ba Aawayyo azazettiis. (Maa. 26:39) I tamaarissiyoobaynne A aadhdhida eratettay ba Aawaappe yiidoogaa I yootiyoobaa siyiyaageetuyyo odiis. (Yoh. 5:19, 30) Yesuusi ba huuphiyaa kawushshiyoogeenne azazettiyoogee suure wozanay deꞌiyo asay akko yaanaadaaninne I qarettiyaanne keha asttamaare gidanaadan maaddiis. (Maatiyoosa 11:29 nabbaba.) I kehatettan haasayidobay dinccettida shombboquwaa woy toꞌana haniya muqaaddaa mala gidida asaa minttettiis. (Maa. 12:20) A danddayay paacettido wodekka, Yesuusi siiqiisinne kehiis. I ba kiittidoogeeti bantta xallaa siiqidi, maataa koyido gishshawu, eta seerido wode hegaa bessiis.—Mar. 9:33-37; Luq. 22:24-27.

17. Cimati Xoossaa dorssaa wudiyaa loytti heemmanaadan maaddiya loꞌꞌo eeshshati awugeetee?

¹⁷ Cimati Geeshsha Maxaafaa maaraadan seeriyo wode ubban, eti Kiristtoosa milatana koshshees. Yaatiyoogan, eti Xoossaynne A Naꞌay banttana kaalettanaadan koyiyoogaa bessoosona. Kiitettida PHeexiroosi hagaadan giis: “Intte giddon de7iya Xoossaa dorssaa wudiyaa Xoossai koyiyoogaadan heemmite. Dosaanappe attin, wolqqan gidenna. Qassi intte go77a xalaalaa xeellennan, lo77o qofan heemmite. Dorssaa wudiyau intte leemiso gidanaappe attin, heemmiyoogeeta wolqqan haaroppite.” (1 PHe. 5:2-4) Xoossaayyoonne gubaaꞌiyawu huuphe gidida Kiristtoosayyo ufayssan haarettiya cimati, banttanakka eti heemmiyoogeetakka maaddoosona.—Isi. 32:1, 2, 17, 18.

18. (a) Yihooway yelidaageetuppe koyiyoobay aybee? (b) Yelidaageeti aawatettan banttappe koyettiyaabaa polanaadan Xoossay waati maaddii?

¹⁸ So asaa seeriyoogaanne loohissiyoogaa xeelliyaagan shin? Yihooway so asawu huuphe gididaageetuyyo hagaadan gees: “Intte intte naata Godaa seeraaninne zoriyan dichchiteppe attin, eta hanqqetissoppite.” (Efi. 6:4) Ha yohoy ay keena koshshiyaabee? Leemiso 19:18y naata seeriyoogee keehi koshshiyaabaa gidiyoogaa bessees. Kiristtaane aawatinne aayoti naꞌaa koshshiyaagaadan seerana xayikko, Yihooway eta oychchees! (1 Sam. 3:12-14) Gidoppe attin, eti bantta huuphiyaa kawushshidi wozanappe Yihoowa woossiyo wode, qassi A Qaalaynne geeshsha ayyaanay kaalettanaadan koyiyo wode, I yelidaageetussi koshshiya aadhdhida eratettaanne wolqqaa immees.—Yaaqooba 1:5 nabbaba.

SAROTETTAN MERINAWU WAANI DEꞌANAAKKO TAMAARIYOOGAA

19, 20. (a) Xoossaa seeraa ekkiyoogee demissiyo anjjoti aybee? (b) Nuuni kaalliya huuphe yohuwan ay tamaaranee?

¹⁹ Xoossaa seeraa ekkiyoogee, qassi harata seeriyo wode Yihoowanne Yesuusa milatiyoogee keehi daro anjjuwaa demissees. So asaynne gubaaꞌee sarotettan woppu gaana. Qassi ubbay bana harati siiqiyoogaa, xoqqu ootti xeelliyoogaanne qohennaagaa akeekana; hegee sinttappe demmana anjjuwawu xeera beso. (Maz. 72:7) Yihoowa seeray I aawadan nuna kaalettin nuuni issi keettaa asaadan maayettidi sarotettan merinawu waani deꞌanaakko tamaaranaadan maaddees. (Isiyaasa 11:9 nabbaba.) Nuuni Xoossaa seeraa hegaadan xeellikko, seeraa suure xeellana danddayoos; qassi seeray Xoossay nuna keehippe siiqiyoogaa bessiyaaba.

²⁰ Kaalliya huuphe yohuwan, sonkka gubaaꞌiyankka seeriyoogaa xeelliyaagan loytti tamaarana. Nuuni nuna waati seerana danddayiyaakko pilggana. Qassi nuuyyo imettana danddayiya ayba seeraagaappekka aaruwan nuuni azzananaadan oottiyaabaappe waani naagettanaakko tamaarana.