Nabbabiyaageetu Oyshaa

Yihoowa Markkatu xuufeta issi asaba gidida websaytiyan woy soshiyal miidiyan wottana danddayettennay aybissee?

Nuuni nu xuufiyawu miishsha qanxxissenna gishshawu, issoti issoti hegeeta ekkidi hara websaytiyan woy soshiyal miidiyan (ooninne koyobaa xaafana woy oottana danddayiyoosan) wottana danddayettiyaabadan qoppoosona. SHin yaatiyoogee nu xuufeta Goꞌettiyo Wogaaa kanttiyooba, qassi hegee deexo metuwaa kaalettiis. He Wogay qonccissi yootiyoogaadan, ooninne “ha websaytiyaappe ekkidi misiliyaa, elektroonikiyan giigida xuufeta, zalꞌꞌe malaatata, muuziiqaa, pootota, biidota woy xaafettida issi yohuwaa Intterneetiyan (ay websaytiyankka, payle immiyo ay saytiyankka, biiduwaa immiyo ay saytiyankka, woy ay soshiyal networkiyankka gidin) wottana danddayenna.” Hegaadan diggana koshshidoy aybissee?

Nu websaytiyan deꞌiyaabaa ubbaa duuquwaabaa maatay nuugaa. Kaddidaageetinne eqettiya harati Yihoowa Markkata woy harata cimmanawu nu xuufeta goꞌettanawu maloosona. Nabbabiyaageeti siranaadan oottanawu giigidabay hegaa mala websaytetun kiyees. (Maz. 26:4; Lee. 22:5) Harati erissuwan, bayzzanawu giigissiyoobaaninne moobayliyaa appetun nu xuufetun kiyidabaa woy jw.org malaataa goꞌettidosona. Duuquwaabaa maataynne zalꞌꞌe malaataa naagissiyo maatay nuuyyo deꞌiyoogee asay bessenna ogiyan goꞌettennaadan higgiyan oychchanawu maaddees. (Lee. 27:12) SHin asay, haray atto nu ishanttikka nuuni elektronikiyan kessidobaa hara saytiyan wottanaadan, woy qassi issibaa bayzzanawu jw.org malaataa goꞌettanaadan nuuni eriiddi eeno giikko, eqettiyaageetanne zalꞌꞌanchchata digganawu nuuni baaxetiyoode pirdda keettati nuna kaafennan aggana danddayoosona.

Nu xuufeta jw.org gidennan hara saytiyaappe ekkiyoogee qohana danddayees. Yihooway ayyaanaa qumaa giigissiyo maataa ‘ammanettida wozannaama ashkkaraa’ xallawu immiis. (Maa. 24:45) He ‘ashkkaray’ ayyaanaa qumaa asawu gattanawu higgiyan erettida ba websaytetu—www.jw.org, tv.jw.org, qassi wol.jw.org xallaa goꞌettees. Hegaa bollikka, moobayletun goꞌettanawu giigida, higgiyan erettida heezzu appetu—JW Language^®, JW Library^®, qassi JW Library Sign Language^® xallay deꞌoosona. Hageetun erissoti woy Seexaanaa alamiyaa hambbalaashoy baynnaagaa ammanettana danddayoos. Ayyaanaa qumay hara ogiyaara kanttikko, laamettibeennaagee woy hambbalaashettibeennaagee aybinkka erettenna.—Maz. 18:26; 19:8.

Qassikka, koyidobaa xaafiyo websaytiyan nu xuufeta wottiyoogee kaddidaageetinne boriya harati Yihoowa dirijjitiyan ammanettennaadan oottiyaabaa zeranaadan oottees. Issi issi ishantti cimettidi Intterneetiyan haratuura palamettidosona, yaatiyoogan eti Yihoowa sunttaa gujjidi borissiyaabaa oottidosona. Intterneetiyan gayttiyoobay ‘ixxiyaageeta ashkketettan seerana’ bessiyoosa gidenna. (2 Xim. 2:23-25; 1 Xim. 6:3-5) Qassi soshiyal miidiyan dirijjitiyaa sunttan, Bolla Gididi Heemmiyaagaa sunttaaninne A yaratu sunttan wordduwan giigidabay deꞌiyoogaa akeekida. SHin Bolla Gididi Heemmiyaagaa yaratuppe issoynne ba sunttan goꞌettiyo websaytee baawa, woy etappe issoynne soshiyal miidiyaa goꞌettenna.

Asay jw.org saytiyaa goꞌettanaadan yootiyoogee “mishiraachchoi” darosaa gakkanaadan maaddees. (Maa. 24:14) Nuuni elekitronikiyan giigidabaa haggaazuwan goꞌettanaadan maaddiyaabati ubbatoo loꞌꞌi loꞌꞌi boosona. Nuuni asay ubbay hegeetun goꞌettanaadan koyoos. Yaatiyo gishshawu, Goꞌettiyo Wogan odettidaagaadan, elekitronikiyan giigida xuufe woy jw.org saytiyan deꞌiyaabaa kessiyo linkiyaa issi urawu imeyliyan kiittana danddayaasa. Eranawu koyiya asawu higgiyan erettida nu websayteta yootiyoogan, issi tumu pulttuwaappe, hegeekka ‘ammanettida wozannaama ashkkaraappe’ ayyaanaa qumaa demmanaadan nuuni eta maaddoos.