Geeshsha Maxaafaa Xannaꞌiyoogan Waatada Loytta Goꞌettananne Ufayttana Danddayay?

Yaasu Higgiyaa nabbabees; Yarkko gimbbee kunddin Raˈaabi keettay kunddibeenna; Yaasu ba kushiyaa pude xoqqu oottidi woossees

YAASA gita metoy gakkiis. I wolqqaama xubiyaa kanttidi Israaꞌeelata Hidootaa Biittaa kaalettana bessees. SHin Yihooway ayyo injjetanaagaa yootiis, qassi A minttettiis. Hagaadan giis: ‘Minna, xala. Ta Higgiyaa naaga. An xaafettidabaa ubbaa minttada naaganawu, gallassinne qammi A nabbaba. Yaatikko, neeyyo injjetananne giigana.’—Yaas. 1:7, 8.

Ha ‘wayssiya wodiyan’ nunakka wolqqaama metoy gakkees. (2 Xim. 3:1) Yihooway Yaasa zoridobaa kaallikko, nuuyyookka Yaasuugaadan injjetana danddayees. Geeshsha Maxaafaa ubbatoo nabbabananne nuna gakkiya paaciyawu an deꞌiya maaraa akeekan oosuwan peeshshana danddayoos.

Gidoppe attin, nuuppe daroti gooba tamaare gidennaagaanne xannaꞌanawu metootiyoogaa akeekoos. SHin Geeshsha Maxaafaa xannaꞌiyoogee keehi koshshiyaaba gidiyo gishshawu, xannaꞌiyooban loytta goꞌettananne ufayttana mala maaddiya “Ha Qofaa Mala Beꞌa” giya saaxiniyaa zaaretta.

Mazamuraawee, “Ne azazuwaa ogiyan tana kaaletta; aissi giikko, taani an ufaittais” yaagiis. (Maz. 119:35) Neeni Xoossaa Qaalaa xannaꞌiyoogan keehi ufayttana danddayaasa. Neeni ayyaanaabaa buquraa pilggaydda demmana danddayiyo maaddiya alꞌꞌobay dees.

Neeni Yaasudan deriyaa kaalettana xayikkonne, nena gakkiya ne huuphe metoy deꞌees. Yaatiyo gishshawu, nena maaddanawu xaafettidabaa Yaasudan nabbabanne naaga. Yaatiyo wode, neeyyookka injjetananne giigana.

HA QOFAA MALA BEꞌA

Xannaꞌanaappe kase woossa. Ubbaa danddayiya Xoossay ne goꞌꞌaassi xaafissido A qofay Geeshsha Maxaafan deꞌees. Yaatiyo gishshawu, neeni Geeshsha Maxaafaa nabbabiyo wode, hegaa akeekanawu, wozanan wottanawunne ne deꞌuwan oosuwan peeshshanawu Yihooway maaddanaadan oychcha.—Izi. 7:10.
Geeshsha Maxaafaanne A qofay deꞌiyo xuufeta nabbabiyo wode dumma dummabaa nena oychcha. ‘Ha qofay Yihoowabaa taassi ay qonccissii? Hagee A Qaalaa waanna qofaara waani gayttii? Harata maaddanawu ha qofaa waatada goꞌettana danddayiyaanaa?’
Xannaꞌidobaa wotta dentta qoppa. Nabbabiyoogaa aggashshada hagaadan qoppa. ‘Ha yohoy tawu aybi siyettanaadan oottii? I tawu hegaadan siyettanaadan oottiyoy aybissee? Tana kase gakkidabaara, haꞌꞌi gakkiyaabaara, woy sinttappe gakkana danddayiyaabaara hegee waani gayttii? Ha Geeshsha Maxaafaa maaratanne ha zoriyaa ta deꞌuwan waatada oosuwan peeshshana danddayiyaanaa?’ (Iyy. 23:5; Maz. 49:3) Yihooway ba asay issi issibaa oottennaadan diggido gaasuwaa, woy hegaappe dummatiyaabaa oottiyoogee kaalettana danddayiyoobaa neeni qonccissana danddayiyaakkonne akeeka.—Zaa. 32:28, 29.
Hanidabaa qonccissiya qofaa nabbabaydda beꞌaydda deꞌiyaabadan qoppa. Leemisuwawu, Yooseefa ishantti Isimaaꞌeelatussi A bayzzishin hanidabaa qoppa? (Doo. 37:18-28) Neeni beꞌiyoobay, siyiyoobaynne singgiyoobay aybee? Neeni odettida asata gididabadan qoppa. Eti qoppiyoobaynne etawu siyettiyaabay aybee? Hegaadan qoppiyoogee neeni xannaꞌiyoobay keehi qonccenne goꞌꞌiyaaba gidanaadan oottees.
Neeni loytta pilgganaadan giigida, xannaꞌanawu maaddiyaabata goꞌetta. Ne qaalan intterneetiyankka xuufiyankka deꞌiya miishshata loytta era. Hegeeta waata loytta goꞌettanaakko eranaadan harati maaddana mala oychchanawu mammottoppa. Leemisuwawu, Wachtawer Pabilikeshin Indekisee woy qassi Yihoowa Markkati Geeshsha Maxaafaa Xannaꞌanawu Maaddiya Xuufee daro yohuwaabay xaafettidabaanne daro xiqiseta qonccissidobaa demmanaadan nena maaddana. Neeni eriyo qaalan deꞌikko, Ooratta Alamiyaa Geeshsha Maxaafaa Birshshettaa gujo qofaa goꞌetta. Hegeetun biittaa hanotay, layttaabay, deexuwaanne harabaa likkiyoobaynne hegaa malabay deꞌees.
Neeni xannaꞌidobaa hassayanawu maaddana mala, xannaꞌidobawu ayfettiya qofaa qanttan zaaretta. Hegaa haratussi yootiyoogeekka loꞌꞌoba. Haggaazuwan neeni goꞌettana danddayiyoobay deꞌii? Hageeta oottiyoogan, neeni ayfettiya yohota hassayiyoogaa xalla gidennan, harata maaddanawukka xannaꞌidobaa goꞌettaasa.