‘Xillo Asi Yihoowan Ufayttana’

DAYAANIYYO layttay 80⁠ppe daro. I azinaa Alzzaymer giyo harggee daro sakkiis; qassi I hayqqanaappe kase, cimida asaa xeelliyo sohuwan amarida layttaa takkiis. Iyyo naaꞌꞌu attuma naatikka hayqqidosona; qassi O xanttaa kansseree sakkees. SHin, Dayaani gubaaꞌiyaa yameti O SHiiquwaa Addaraashan woy haggaazuwan beꞌiyo wode, eti A muletoo ufayttiyoogaa akeekoosona.

Jooni 43⁠ppe dariya layttawu yuuyidi xomoosiyaagaa gididi haggaaziis. I he oosuwaa keehi dosees; qassi harabaa oottanawu qoppi erenna! Gidoppe attin, I sahettiya dabbuwaa xeellanawu yuuyidi xomoosiyoogaa aggiis; I haꞌꞌi ba heeran deꞌiya gubaaꞌiyan haggaazees. Joona kase eriyaageeti aara gita shiiquwan gayttiyo wode, I mule laamettibeennaba milatees. I haꞌꞌikka keehi ufayttees.

Dayaananne Jooni waani ufayttana danddayiyoonaa? Qofaaninne asatettan waayettiya uri waani ufayttana danddayii? Qassi ba dosiyo haggaazo maataa aggida uri waani ufayttana danddayii? Geeshsha Maxaafay nuuyyo zaaruwaa yootees. I, ‘Xilloti Yihoowan ufayttana’ yaagees. (Maz. 64:10) Nuuni ufayttanaadaaninne ufayttennaadan oottiyaabi aybakko akeekikko, he keehi koshshiya tumaa nuuni loytti erana danddayoos.

GUUTTA WODIYAWU UFAYTTIYOOGAA

Issi issibay muletoo ufayssiyoogaa neeni eriyoogee qoncce. Siiqettidi biron aqo oyqqiya issi naꞌaanne issi naꞌiyo qoppa. Woy qassi aawa woy aayo gidida woykko Yihoowawu haggaaziyoogan ooratta aawatettaa ekkida ura shin? Hegeeti ufayttanaadan oottiyaabata; ayssi giikko, he ubbaykka Yihoowa imota. I aqo deꞌuwaa doomissiis, naata yelanaadan oottiis, qassi Kiristtaane gubaaꞌiyankka aawatettaa immees.—Doo. 2:18, 22; Maz. 127:3; 1 Xim. 3:1.

SHin, issi issibati nuuni guutta wodiyawu ufayttanaadan oottana danddayoosona. Aqo laggee ammanettennan aggin woy hayqqin azzanana danddayoos. (Hiz. 24:18; Hoo. 3:1) Issi issi naati banttana yelidaageetussinne Xoossawu azazettokkona; qassi bohettana danddayoosona. Sameela attuma naati Yihooway koyiyo ogiyan ayyo haggaazibookkona; qassi Daawiti oottidobay A keettan metoy merettanaadan oottiis. (1 Sam. 8:1-3; 2 Sam. 12:11) Hegaa mala hanotati azzananaadaaninne unꞌꞌettanaadan oottoosona. Eti nuuni ufayttanaadan oottennaagee qoncce.

Hegaadan, nuuni sahuwaa gaasuwan woy nu soo asawu koshshiyaabaa kunttiyoogaa gaasuwan, woy dirijjitiyan laamettiyaabaa gaasuwan Yihoowawu haggaaziyoogan demmido maataa aggana danddayoos. Bantta haggaazo maataa aggida daroti he keehi ufayssiyaabaa laamotiyoogaa yootoosona.

Hegaa malaban ufayttiyoogee gamꞌꞌennan aggana danddayiyoogaa nuuni akeekana danddayoos. Hegaa gishshawu, hanotay giigenna wodekka mule xayenna ufayssi deꞌii? Ee deꞌees; ayssi giikko, Sameeli, Daawitinne harati metoy deꞌishinkka, ufayttidi deꞌidosona.

DARO WODIYAWU UFAYTTIYOOGAA

Ufayssay aybakko Yesuusi erees. I saꞌaa yaanaappe kase, ‘ubba gallassi Yihoowa sinttan ufayttiyoogaa’ Geeshsha Maxaafay yootees. (Lee. 8:30) SHin, I saꞌan deꞌiyo wode, A issi issitoo wolqqaama metoy gakkiis. Gidikkonne, Yesuusi ba Aawaa sheniyaa oottiyoogan ufayttiis. (Yoh. 4:34) I keehi waayettido wurssetta saatiyaabaa shin? Geeshsha Maxaafay ‘Yesuusi wodeppe awu deꞌiya ufayssaa gishshawu mittaa bolli misimaariyan xishettidi hayqqiyoogaa genccidoogaa’ yootees. (Ibr. 12:2) Yaatiyo gishshawu, Yesuusi tumu ufayssaabaa yootido naaꞌꞌubaappe nuuni darobaa tamaarana danddayoos.

Issi wode, 70 erissiyo ashkkarati sabbaki simmidi Yesuusakko yiidosona. Eti maalaalissiyaabaa oottido gishshawu, ubba daydanttata kessido gishshawu ufayttidosona. He wode Yesuusi etawu hagaadan giis: “Tuna ayyaanai inttessi azazettiyo gishshau ufaittoppite; shin intte sunttai saluwan xaafettido gishshau ufaittite.” (Luq. 10:1-9, 17, 20) Ee, Yihooway nashshiyoogee dumma maataa demmiyoogaappe keehi aadhdhees. I ammanettida erissiyo ashkkarata nashshidi hassayiyoogee eti keehi ufayttanaadan oottees.

Haroode, Yesuusi daro asawu haasayishin, issi Ayhuda maccaasiyaa I tamaarissiyooban keehi garamettada, A aayyiyaa keehi ufayttana bessiyoogaa yootaasu. SHin Yesuusi O hagaadan giidi seeriis: “Anjjettidaageeti [woy ufayttiyaageeti] Xoossaa qaalaa siyidi, he qaalai azaziyoogaadan oottiyaageeta.” (Luq. 11:27, 28) Nu naatun ceeqettiyoogee nuuni ufayttanaadan oottana danddayees. SHin Yihoowawu azazettiyoogan aara dabbotiyoogee nuuni awudenne ufayttanaadan oottees.

Yihooway nashshiyoogaa eriyoogee nuuni ufayttanaadan keehi koshshiyaaba. Metoy ufayssiyaaba gidana xayikkonne, he ufayssay xayanaadan oottenna. Metoy gakkishin nuuni ammanettidi deꞌiyo wode, kaseegaappe aaruwan ufayttoos. (Roo. 5:3-5) Hegaa bollikka, Yihooway banan ammanettiyaageetuyyo ba ayyaanaa immees; qassi ufayssay ayyaanaa ayfiyaa macaratuppe issuwaa. (Gal. 5:22) Hegee Mazamure 64:10y ‘Xilloti Yihoowan ufayttana’ giyoy aybissakko nuuni akeekanaadan maaddees.

Doomettan etabaa denttido Dayaananne Jooni metiyaabay deꞌishinkka ufayttiiddi deꞌidoy aybissakko hagee qonccissees. Dayaana, “Issi naꞌi qohiyaabaappe attanawu bana yelidaagaakko shiiqiyoogaadan, taanikka Yihoowakko shiiqays” yaagaasu. Xoossay O nashshiyoogaa A waata akeekadee? “Taani ubba wode ufayttaydda aggennan sabbakanaadan oottiyoogan I tana anjjidabadan tawu siyettees.” Yuuyidi xomoosiyo ba dosiyo oosuwaa aggi simmidi, minnidi haggaaziiddi takkida Jooni bana keehi maaddidabaa hagaadan yootiis: “Taani Gubaaꞌiyan Oottiyaageeti Loohiyo Timirtte Keettan tamaarissanaadan maddabettido 1998⁠ppe haa simmin, awudeegaappe aaruwan buzo xinaatiyaa xannaꞌaas.” Inne A machchiyaa Yihooway etawu immido ayba oosonne oottanawu ubbatoo eeno giyo gishshawu, naaꞌꞌaykka issi issibaa laammanawu metootibeennaagaa I yootiis. I, “Nuuni zilꞌꞌettennan hegaa oottida” yaagidi gujji yootiis.

Mazamure 64:10y tuma gidiyoogaa hara darotikka beꞌidosona. Amarkkaa Beeteelen 30⁠ppe dariya layttaa haggaazida issi azinaanne machchee hanotaa beꞌa. Eti guyyeppe dumma aqinye gididi maddabettidosona. Eti hagaadan giidosona: “Neeni siiqiyoobay neeppe haliyo wode azzaniyoogee wottin deꞌiyaaba,” gidikkonne eti gujjidi, “Neeni merinawu azzanana danddayakka” yaagidosona. Eti gubaaꞌiyaara haggaaziyoogaa sohuwaara doommidosona. Qassi eti hagaadan giidosona: “Nuuni issi issibaa dummayidi woossida. Qassi woosaa zaaruwaa akeekidoogee nuna minttettiisinne ufayssiis. Nuuni yaa bosaara, gubaaꞌiyan deꞌiya harati aqinye gididi haggaaziyoogaa doommidosona; qassi nuuni naaꞌꞌu mino xinaateta Geeshsha Maxaafaa xannaꞌissiyoogan anjjettida.”

‘MERINAWU UFAYTTA’

Ufayttiyoogee issi issitoo metana danddayees; qassi nuuni azzaniyo wodee deꞌana. SHin, Mazamure 64:10n deꞌiya qofan Yihooway nuna minttettees. Nuuni hidootaa qanxxiyo wodetunkka, nuna aybi gakkinkka ammanettidi deꞌikko, nuuni ‘Yihoowan ufayttana.’ Qassi, “ooratta salotanne ooratta sa7aa” ehaanawu Yihooway gelido qaalay polettiyoogaa yeemuwan naagana danddayoos. He wode nagaray muleera xayana. Xoossaa asay ubbay I oottiyo ubbaban ‘merinawu ufayttananne hashshu gaana.’—Isi. 65:17, 18.

Hegaa giyoogee woygiyoogaakko qoppa. Nuuni payya gidana; qassi ubba gallassi xiskkuwaappe daafurennan denddana. Nuuni kase qofan keehi qohettanaadan oottidabi ayba gidikkonne, hegeeta hassayiyoogan qohettokko. “Kasebai ubbai hassayettennanne qofettenna” giidi Yihooway nuna minttettees. Nu siiqiyo hayqqidaageeti denddin etaara gayttana. Tammanne naaꞌꞌu laytta naꞌiyo Yesuusi denttin O yelidaageeti ‘keehi daro garamettidoogaadan’ woy ufayttidoogaadan, miilooniyan qoodettiyaageetussi siyettana. (Mar. 5:42) Wurssettan, saꞌan deꞌiya ubba asay kumetta hanotan ‘xillo’ gidana; qassi merinawu ‘Yihoowan ufayttana.’