Yihoowi Nuuni Tumuppe Ufayttanaadan Maaddana

1-2. (a) Ha wodiyan daro asay waanii? (b) Nuuni ha huuphe yohuwan ay beꞌanee?

DARO asay ha wodiyan ufayttanawu oottennabi baa. Shin eti keehi baaxetikkonne ufayttokkona. Eti keehi azzanoosonanne hanotati etawu mule giigennabadan qoppoosona. Yihoowa asaappe amaridaageetussikka hegaadan siyettana danddayees. Nuuni ‘wurssetta gallassatun’ deꞌiyo gishshawu, keehi unꞌꞌettanaadan woy azzananaadan oottiya daro metoti nuna gakkana danddayoosona.—2 Xim. 3:1.

² Ha huuphe yohuwan, nuuni ufayttennaadan oottana danddayiyabata, qassi zaarettidi ufayttanaadan nuna aybi maaddana danddayiyakko beꞌana. Koyruwan, nuuni tumuppe ufayttanaadan nuna maaddana danddayiyay oonakko ane beꞌoos.

NUUNI TUMUPPE UFAYTTANAADAN MAADDANAY OONEE?

3. Yihoowi medhdhidobatuppe nuuni abaa ay tamaariyoo? (Misiliyakka xeella.)

³ Yihoowi ubbatoo ufayttees. Qassi nuunikka ufayttanaadan I koyees. Nu ufayttanaadan oottiya darobata I medhdhidoy hegaassa. Leemisuwawu, keehi loꞌꞌiya nu pilaaneetiyan deꞌiya dumma dumma meraa beꞌiyogee, mehee doꞌay kaaꞌiyogaa beꞌiyogeenne dosiyo qumaa miyogee nuna keehi ufayssees. Xoossay nuna tumuppe siiqees; qassi nuuni nu deꞌuwan ufayttanaadan koyees!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Yihoowi asay waayettiyogaa beꞌikkonne ubbatoo ufayttiyoy aybissee? (b) Yihoowi nuna waati maaddii? (Mazamure 16:11)

⁴ Yihoowi asay waayettiyogaa loytti erees. I hegaa beꞌidi tumuppe azzanees. Shin Geeshsha Maxaafay A ‘ufayttiya Xoossaa’ gees. (1 Xim. 1:11) Yihoowi ubbatoo ufayttiyoy aybissee? Issi gaasoy matan I azzanuwanne waayiya merinawu xayssanawu gallassaa keerido gishshataassa. He gallassay gakkanaashin, Yihoowi nuna gakkiiddi deꞌiyabaa akeekeesinne I nuna maaddanawu koyees. Yaatin I nuna waati maaddii? I nuuni ufayttanaadan oottiyogan maaddana danddayees. (Mazamure 16:11 nabbaba.) Yihoowi ba Naꞌay Yesuusi ufayttanaadan waati oottidaakko ane beꞌoos.

5-6. Yesuusi ufayttiyoy aybissee?

⁵ Yihoowappe kaallidi keehi ufayttiyay Yesuusa. Aybissi? Ane naaꞌꞌu gaasota beꞌoos. (1) I ba Aawaa milatiyo gishshawu keehi ufayttees. (Qol. 1:15; 1 Xim. 6:15) (2) Yesuusi hara ooppenne aaruwan ba Aawaara keehi daro wodiya deꞌido gishshawu ufayttees.

⁶ Hegaa bollikka, Yesuusi ba Aaway koyiyobaa ubbatoo oottiyo gishshawu ufayttees. (Lee. 8:30, 31; Yoh. 8:29) I ammanettidi deꞌido gishshawu, Yihoowi A sabbiis.—Mat. 3:17.

7. Tumu ufayssaa waati demmana danddayiyoo?

⁷ Ufayttiya Xoossaa Yihoowakko shiiqiyogan nuunikka tumu ufayssaa demmana danddayoos. Qassi Yihoowa qofaanne awu siyettiyabaa tamaariyogan nuuni daro wodiya aattiyogee A milatanaadan maaddana danddayees. Hegee nuuni ufayttanaadan oottana. Hegaa bollikka, nuuni Xoossay koyiyobaa oottiyogaaninne I nuna nashshiyogaa eriyogan ufayttana danddayoos.a (Maz. 33:12) Gidoppe attin, issi issitoo woy ubba qassi adussa wodiyawu nuuni ufayttennaba gidikko shin? Hegee nunan Xoossay ufayttibeenna giyogee? Chii! Nuuni nagaranchcha gidiyo gishshawu, sahettiyo, azzaniyonne unꞌꞌettiyogaa gaasuwan issi issitoo waayettana danddayoos. Yihoowi hegaa akeekees. (Maz. 103:14) Nuuni ufayttennaadan oottana danddayiyabata, qassi zaarettidi waani ufayttana danddayiyakko ane beꞌoos.

ZAARETTI UFAYTTANAWU MAADDIYABATA

8. Nuna metoy gakkiyo wode, waanana danddayiyoo?

⁸ Nuna metoy gakkiyo wode. Neeni naaquwa, meretay gattiyo daafabaa, hiyyeesatettaa, sahuwa woy ceegatettaa gaasuwan waayettaydda deꞌay? Nuuni nu hanotaa aynne laammana danddayennaba gidikko, he metoti nuuni keehi azzananaadan oottana danddayoosona. Nu ‘wozanay azzanikko,’ nuuni ufayttana danddayennaagaa Geeshsha Maxaafay yootees. (Lee. 15:13) Bebisa giyo galchchaa cimawu, ishaynne A yelidaageeti oyddu layttaa giddon hayqqidosona. I hagaadan giis: “Tarkka attidabadaaninne maaddiya uri baynnabadan tawu siyettiis. Tana yelidaageetinne ta ishay hayqqanaappe kase taani etaara daro wodiya aattanawu koyikkonne, danddayabeenna gishshawu issi issitoo keehi unꞌꞌettays.” Hegaadan, nuna gakkiya metoti nuuni keehi daafuranaadaaninne hidootaa qanxxanaadan oottana danddayoosona.

9. Nuuni zaarettidi ufayttanaadan aybi maaddana danddayii? (Ermmaasa 29:4-7, 10)

⁹ Zaarettidi ufayttanaadan nuna aybi maaddana danddayii? Nuuni laammana danddayennabatussi hirggiyogaa aggidi nuussi deꞌiyabawu galatiyageeta gidikko ufayttana danddayoos. Nu hanotay nuuni koyiyogaa mala gidana xayikkokka ufayttana danddayoos. Hegee alamiyan deꞌiya daro asay qoppiyogaappe dummatees. Leemisuwawu, omooddettidi Baabiloone biida asay yan ufayttanawu banttawu danddayettida ubbabaa oottanaadan Yihoowi yootiis. (Ermmaasa 29:4-7, 10 nabbaba.) Nuuni hegaappe ay tamaarana danddayiyoo? Ne deꞌuwan neeni demmido loꞌꞌobata akeekanawu baaxeta, qassi hegeetun ufaytta. Yihoowi nena aggennaagaanne I nena maaddanaagaa hassaya. (Maz. 63:7; 146:5) Leemisuwawu, Eefo giyo michchiya Yihoowi O maaddido gishshawu, wozanappe galatawusu. A daafaban keehi qohettido gishshawu, haꞌꞌi hemettana danddayukku. Shin A hagaadan gaasu: “Yihoowi, ta soo asay, galchchan deꞌiya ishanttinne michchontti tana maaddidosonanne minttettidosona. Eti tawu oottidobawunne haꞌꞌi oottiiddi deꞌiyobawu galatiyogaa bessanawu koyays. Yaatiyo gishshawu, taani ubbatoo ufayttanawu taassi danddayettida ubbabaa oottanawu baaxetays.”

10. Nuna metoy gakkiyo wodekka nuuni ufayttana danddayiyoy aybissee?

¹⁰ Nu hanotay nuuni koyiyogaa mala gidenna wodekka, woy nuna woykko nu soo asaa wolqqaama metoy gakkiyo wodekka nuuni ufayttana danddayoos.b (Maz. 126:5) Aybissi? Nuuni tumuppe ufayttanaadan oottiyay nu hanotata gidenna gishshataassa. Maariyo giyo aqinyiya hagaadan gaasu: “Nuna metoy gakkiyo wode, Yihoowi nuussi qaalaa gelidobaa nuuni hassayiyo gishshawu ubbatoo ufayttoos. Hegaa giyogee nuuni mule yeekkokko, woy nuussi siyettiyabaa qonccissokko giyogaa gidenna. Shin nuna gakkiya metoy ayba gidikkonne, ubbatoo ufayttanaadan nu Aaway nuna maaddana danddayees.” Haꞌꞌi nena gakkiya metoy keehi deexxiyaba gidikkonne, hegee guutta wodiyassa gidiyogaa hassaya. Nuuni waayettanaadaaninne azzananaadan oottiya ubbabaa Yihoowi matan xayssana.

11. Kiitettida Phawuloosa hanotay nena waati minttettii?

¹¹ Nuna metoy gakkiyoy Yihoowi nunan ufayttibeenna gishshataassa giidi issi issitoo qoppana danddayoos. Nuuyyo hegaadan siyettiyaba gidikko, keehi deexxiya hanotati gakkin ammanettidi genccida Yihoowa ashkkaratubaa qoppana danddayoos. Kiitettida Phawuloosa hanotaa qoppa. “Hara biittaa asawu, kawotuyyonne Israaꞌeela naatuyyo” mishiraachchuwa yootanaadan Yesuusi A dooriis. (Oos. 9:15) Hegee gita maata! Gidikkonne, Phawuloosa daro metoy gakkiis. (2 Qor. 11:23-27) Hegee Yihoowi an ufayttibeenna giyogee? Chii gidenna! I genccidoogee Yihoowi A anjjidoogaa bessees. (Rom. 5:3-5) Haꞌꞌi ne hanotaabaa qoppa. Nena metoy gakkishinkka ubbatoo Yihoowawu ammanettada haggaazaasa. Yaaniyo gishshawu, Yihoowi nenan ufayttiyogaa ammanettana danddayaasa.

12. Nuuni koyiyogaa keenaa Yihoowawu haggaazana danddayennaba gidikko waanana danddayiyoo?

¹² Nuuni koyiyogaa keenaa Yihoowawu haggaazana danddayenna wode. (Lee. 13:12) Nuuni Yihoowa siiqiyogeenne A galatiyogee awu haggaazanawu halchchuwa kessanaadan nuna denttettees. Shin nuuni oottana danddayennabaa halchchikko, hidootaa qanxxana danddayoos. (Lee. 17:22) Leemisuwawu, Haalo giyo aqinyiya hagaadan gaasu: “Taani Kawotettaa Mishiraachchuwa Yootiyageetu Timirtte Keettan tamaaranawu, hara biitti baada haggaazanawu, woy Raamapon keexuwa oosuwa maaddanawu koyaas. Shin ta hanotay laamettiis; qassi taani kessido he halchchota polana danddayabeykke. Hegee taani keehi azzananaadan oottiis.” Darotussikka hegaadan siyettees.

13. Nu hanotaa gaasuwan nuuni oottana danddayiyo amaridabati awugeetee?

¹³ Zaarettidi ufayttanaadan nuna aybi maaddana danddayii? Nuuni danddayiyogaappe aaruwa oottanaadan Yihoowi koyennaagaa hassaya. Harati oottiyobaa nuuni oottana danddayennaba gidikkokka, Yihoowi nuna xoqqu ootti xeellees. Yihoowi nuuni ashkketanne ammanettiyageeta gidanaadan koyees. (Mik. 6:8; 1 Qor. 4:2) Nuuni koyiyogaa keenaa Yihoowawu haggaazana danddayennaba gidikkonne, qoppiyoban, amottiyobaninne nu eeshshan A ufayssanawu baaxetiyo wode I keehi ufayttees. Hegaa gishshawu, nuuni oottana danddayiyobaappe aarobaa oottanawu qoppana koshshenna.c Ne hanotaa gaasuwan neeni koyiyogaa keenaa Yihoowawu oottana danddayennaba gidikko, ne oottana danddayiyobata qoppa. Leemisuwawu, issi yelagaa loohissana, woy cimida ishanttanne michchontta minttettana danddayaasa. Geella issi ura minttettanawu, A soo baana, woy awu silkkiya dawalana, woykko awu kiitaa xaafana danddayaasa. Neeni oottana danddayiyobata oottiyo wode, Yihoowi ufayttees! Qassi neeni ufayttanaadan oottiyogan Yihoowi nena woytana! Hegaa bollikka, ooratta alamiyan nuuni mule qoppi erenna ogetun Yihoowawu haggaazana danddayiyogaa qoppa. Qommoora ibaa denttido Haala hagaadan gaasu: “Taani unꞌꞌettiyogaa doommiyo wode, takki gaada merinawu deꞌanaagaa qoppays. Qassi sinttappe ooratta alamiyan, Yihoowi maaddin ta halchchotuppe amaridaageeta polana danddayays.”

14. Nuuni ufayttennaadan oottana danddayiya harabay aybee?

¹⁴ Miishshan woy harabatun ammanettiyo wode. Issoti issoti banttana ufayssiyabaa oottiyogee tumu ufayssaa demissees giyo qofaa aassanawu sooshal miidiya goꞌettoosona. Nuuni nuna loꞌꞌiyabata oottikko, nu koyiyobata shammikko, qassi dumma dumma sohota manddarikko ufayttana giidi qoppiyogaa doommana danddayoos. Shin, nuna ufayssiyabata oottiyogee bala gidenna. Loꞌꞌiyabata nashshanaadan oottidi Yihoowi nuna medhdhiis. Shin, banttana ufayssanawu baaxetiya daroti eti qoppidobati ufayttanaadan oottibeennaagaa guyyeppe akeekidosona. Evo giyo aqinyiya hagaadan gaasu: “Neeni ne deꞌuwan nena ufayssiyabaa xalaalaa ubbatoo qoppikko hegaa mule alakka.” Ubbatoo nuuni nu xalaalaa ufayssanawu baaxetikko, azzanananne hidootaa qanxxana.

15. Nuuni Kawuwa Solomonappe ay tamaarana danddayiyoo?

¹⁵ Kawuwa Solomoni bana ufayssana giidi qoppido darobata oottiis. Leemisuwawu, I maliꞌꞌya dumma dumma qumaa miis, ufayssiya muuziqa siyiis, qassi keehi alꞌꞌobata shammiis. Shin hegeeti I tumuppe ufayttanaadan oottibookkona. I hagaadan giis: “Aifee xeellidi, kalli erenna; haittaikka siyidi, tau gidiis gi erenna.” (Era. 1:8; 2:1-11) Issoti issoti banttassi miishshay deꞌikko, qassi eti koyiyo ubbabaa oottikko ufayttana giidi qoppoosona. Shin hegee worddo, hegeeti nuuni tumuppe ufayttanaadan mule oottana danddayokkona.

16. Nuuni zaaretti ufayttanawu waatana danddayiyoo? (Misiliyakka xeella.)

¹⁶ Zaarettidi ufayttanaadan nuna aybi maaddana danddayii? “Immiyogee ekkiyogaappe aaruwan [ufayssiyogaa]” Yesuusi nuna tamaarissiis. (Oos. 20:35) Elekosa giyo cimay hagaadan giis: “Taani harata maaddanawu guuttabata oottanawu baaxetays. Taani harata maaddiyo wode ta koyiyobata qoppikke, qassi hegee taani ufayttanaadan oottiis.” Harata maaddanawu neeni oottana danddayiyo amaridabati awugeetee? Issi uri azzanidoogaa neeni akeekikko, A minttettanawu baaxeta. Neeni A metuwa giigissana danddayennaba gidikkonne, I yootiyobaa loytta ezggiyogan, qarettiyogan, qassi I ba toohuwa Yihoowa bolli wottanaadan hassayissiyogan A minttettana danddayaasa. (Maz. 55:22; 68:19) Qassi Yihoowi mulekka yeggennaagaa A hassayissa. (Maz. 37:28; Isi. 59:1) Neeni A maaddiya issi issibata oottana danddayaasa. Leemisuwawu, qumaa shoobbana woy I oottanawu koyiyobaa maaddana danddayaasa. Woy aara issippe haggaazana danddayaasa. Mishiraachchuwa haratussi yootiyogee nuuni ubbatoo ufayttanaadan oottees. Harata minttettanawu Yihoowi nena goꞌettanaadan eeno ga. Nubaa gidennan, haratubaa qoppiyogee nuuni tumuppe ufayttanaadan oottana!—Lee. 11:25.

17. Nuuni tumuppe ufayttanawu koyikko waatana koshshii? (Mazamure 43:4)

¹⁷ Nuuni saluwan deꞌiya nu Aawaakko ubbatoo shiiqikko, tumuppe ufayttana danddayoos. Yihoowi nuuni tumuppe ‘ufayttanaadan’ maaddana danddayiyogaa Geeshsha Maxaafay yootees. (Mazamure 43:4 nabbaba.) Yaaniyo gishshawu, nuna ayba metoy gakkikkokka, woppu gaana danddayoos. Nuuni Yihoowara dabbotaa minttikko, merinawu ufayttanaadan I nuna maaddana!—Maz. 144:15.