Wogaabaa Maxaafaappe Nuuni Tamaariyoobaa

1-2. Kiristtaaneti ha wodiyan Wogaabaa maxaafaabaa eranawu koyana koshshiyoy aybissee?

BA YELAGA laggiyaa Ximootiyoosa, kiitettida PHawuloosi, “Xoossaa maxaafa ubban Xoossaa Ayyaanai de7ees. Qassi he maxaafati . . . maaddoosona” giidi hassayissiis. (2 Xim. 3:16, 17) Hegaappe issoy Wogaabaa maxaafaa. He maxaafaa xeelliyaagan ne qofay aybee? Hegee ha wodiyan deꞌiya nuussi maaddenna daro higgeti deꞌiyo maxaafa giidi issi issi asay qoppees; shin Kiristtaaneti hegaadan qoppokkona.

² Wogaabaa maxaafay 3,500 gidiya layttappe kase xaafettiis; shin Yihooway “nuna tamaarissanau” he maxaafay hanno gakkanawu deꞌanaadan oottiis. (Roo. 15:4) Wogaabaa maxaafay issi issibaa xeelliyaagan Yihoowa qofaanne ayyo siyettiyaabaa akeekanaadan nuna maaddees. Hegaa gishshawu, nuuni hegaappe tamaariyoogan ufayttana koshshees. Ayyaanay denttettin xaafettida he maxaafaappe nuuni tamaariyo darobay deꞌees. Ane hegeetuppe oyddata beꞌoos.

NUUNI YIHOOWA WAATI UFAYSSANNE?

3. Layttan layttan Nagaraa Atto Giissiyo Gallassan, yarshshoy yarshshettiyoy aybissee?

³ Tamaariyo koyrobaa: Nu yarshshoy ekettanaadan nuuni Yihoowa ufayssana koshshees. Layttan layttan Nagaraa Atto Giissiyo Gallassan, Israaꞌeela deree issippe shiiqin qeese ubbatu halaqay mehiyaa yarshshees. He yarshshoy Israaꞌeelati nagaraappe geeyana koshshiyoogaa eti hassayanaadan maaddiis! SHin koyro qeese ubbatu halaqay Israaꞌeelati nagaraappe geeyanaadan yarshshettida mehiyaa suuttaappe ekkidi Ubbaappe Aadhdhiya Geeshsha Sohuwaa geliyoogaappe aaruwan keehi koshshiya issibaa oottana bessees.

4. Wogaabaa 16:12, 13n, qeese ubbatu halaqay Nagaraa Atto Giissiyo Gallassan Ubbaappe Aadhdhiya Geeshsha Sohuwaa geliyo koyro wode ay oottii? (Koyro sinttan deꞌiya misiliyaa xeella.)

⁴ Wogaabaa 16:12, 13 nabbaba. Nagaraa Atto Giissiyo Gallassan aybi haniyaakko qoppa: Qeese ubbatu halaqay Xoossaa dunkkaaniyaa gelees. He galla I Ubbaappe Aadhdhiya Geeshsha Sohuwaa gelana koshshiyo heezzaappe hagee koyroogaa. I issi kushiyan cuwayiyo ixaanay kumido miishshaa oyqqees, qassi hankko kushiyan bonqqoy kumido worqqa miishshaa oyqqees. Ubbaappe Aadhdhiya Geeshsha Sohuwaa geliyoosan deꞌiya magalashuwaa sinttan I eqqees. I Ubbaappe Aadhdhiya Geeshsha Sohuwaa gita bonchchuwan gelees; qassi maachchaa taabootaa sinttan eqqees. Leemiso hanotan, I Xoossaa Yihoowa sinttan eqqees! Haꞌꞌi qassi qeesee bonqquwaa bolli geeshsha ixaanaa yeggees, yaatin keettay sawuwaa tonggu gees.b Guyyeppe I yarshshettida mehiyaa suuttaa ekkidi Ubbaappe Aadhdhiya Geeshsha Sohuwaa haranttuwaa gelana. I nagaraa yarshshuwaa suuttaa efaanaappe kase ixaanaa cuwayiyoogaa akeeka.

5. Nagaraa Atto Giissiyo Gallassan, ixaanaa goꞌettiyo hanotaappe ay tamaarana danddayiyoo?

⁵ Nagaraa Atto Giissiyo Gallassan, ixaanaa goꞌettiyo hanotaappe ay tamaarana danddayiyoo? Ammanettidi Yihoowawu goynniyaageeti woossiyo A ufayssiya woosay ixaanaa mala gidiyoogaa Geeshsha Maxaafay yootees. (Maz. 141:2; Ajj. 5:8) Qeese ubbatu halaqay ixaanaa Yihoowa sinttan gita bonchchuwan shiishshiyoogaa hassayite. Hegaadan, nuuni Yihoowa gita bonchchuwan woossoos. Saluwaanne saꞌaa Medhdhidaagee, issi naꞌi ba aawaakko shiiqiyoogaadan nuuni akko shiiqanaadan paqqadiyoogawu keehi galatoos. (Yaaq. 4:8) I nuna ba dabbodan xeellees! (Yaaq. 2:23) Nuuni ha maataa keehi nashshiyo gishshawu A ufayssennabaa aybanne oottanawu koyokko.

6. Qesee ubbatu halaqay yarshshanaappe kase ixaanaa cuwayiyo hanotaappe nuuni ay tamaariyoo?

⁶ Qesee ubbatu halaqay yarshshanaappe kase ixaanaa cuwayiyoogaa hassayite. Ixaanaa koyro cuwayiyoogan, Xoossay an ufayttiyoogaa shaakki erees. Hegaappe nu ay tamaarana danddayiyoo? Yesuusi ba deꞌuwaa yarshsho oottidi immanaappe kase, asaa atotettaappe aaruwan koshshiya issibaa, I saꞌan deꞌiyo wode oottiis. Hegee aybee? Yihooway A yarshshuwaa ekkanaadan, I saꞌan deꞌido wode ubban Yihoowawu ammanettidi azazettiis. Yesuusi yaatiyoogan, issibaa Yihoowa ogiyan oottiyoogee deꞌanawu bessiya suure oge gidiyoogaa qonccissiis. Yesuusi ba Aaway ubbabaa haariyo woy ayssiyo ogee likkenne suure gidiyoogaa qonccissiis.

7. Yesuusa kumetta deꞌoy A Aawaa ufayssidoy aybissee?

⁷ Yesuusi saꞌan deꞌido wode ubban, wottiyoobi baynna hanotan Yihoowawu azazettiis. Paaceenne metoy Yesuusa gakkikkokka, qassi I seelliya hanotan hayqqanaagaa erikkokka, I ba aaway haariyo ogee ubbaappe aadhdhiyoogaa bessanawu murttiis. (Pili. 2:8) Yesuusi bana paacee gakkido wode, “keehi yeekkidinne afuxxidi” woossiis. (Ibr. 5:7) I wozanappe woossidoogee I Yihoowawu ammanettidoogaa bessiis, qassi kaseegaappe aaruwan awu azazettanawu murttanaadan oottiis. Yesuusa woosay, Yihoowayyo sawuwaa tonggu giya ixaanaa mala. Yesuusa kumetta deꞌoy A Aawaa ufayssiisinne I ubbabaa haariyo ogee suure gidiyoogaa bessiis.

8. Yesuusa leemisuwaa waani kaallana danddayiyoo?

⁸ Yihoowawu azazettanawunne awu ammanettanawu nuuyyo danddayettida ubbabaa oottiyoogan Yesuusa leemisuwaa kaallana danddayoos. Nuuni Yihoowa ufayssanawu koyiyo gishshawu, paacee gakkiyo wode I maaddanaadan minttidi woossoos. Yaatiyoogan, nuuni Yihoowa haaruwawu exatiyoogaa bessoos. Yihooway ixxiyobata nuuni oottikko, I nu woosaa siyennaagaa eroos. SHin Yihooway dosiyoobata oottikko, nu woosay ayyo sawuwaa tonggu giya ixaanaa mala gidanaagaa ammanettoos. Qassi nu suuretettaynne ammanettidi azazettiyoogee saluwan deꞌiya nu Aawaa ufayssiyoogaa ammanettana danddayoos.—Lee. 27:11.

NUUNI YIHOOWA GALATIYOONNE A SIIQIYO GISHSHAWU HAGGAAZOOS

9. Israaꞌeelati issippetettaa yarshshuwaa yarshshiyoy aybissee?

⁹ Tamaariyo naaꞌꞌanttobaa: Nuuni Yihoowa galatanawu ayyo haggaazoos. Nuuni Israaꞌeelati yarshshiyo issippetettaa yarshshuwaabaa pilggiyo wode hegaabaa tamaarana.c Wogaabaa maxaafan issi Israaꞌeela asi issippetettaa yarshshuwaa “galata yarshsho” oottidi shiishshana danddayiyoogaa akeekoos. (Wog. 7:11-13, 16-18) I yarshshana bessiyo gishshawu gidennan, koyiyo gishshawu yarshshees. I ba Xoossaa Yihoowa siiqiyo gishshawu, ba dosan yarshshees. Yarshshida uri, A so asaynne qeeseti yarshshettida mehiyaa ashuwaa moosona. SHin, ashuwaappe amaridaagee Yihoowa xallawu imettees. Hegee awugee?

10. Wogaabaa 3:14-16n odettida issippetettaa yarshshoy Yesuusi Yihoowawu haggaazido haggaazuwaara waani issi mala gidii?

¹⁰ Tamaariyo heezzanttobaa: Nuuni Yihoowa siiqiyo gishshawu nuussi deꞌiya keehi loꞌꞌobaa ayyo immoos. Issi mehiyaappe Yihooway handdaa loꞌꞌobadan xeellees. Qassi kilahota gujjin, mehiyaa ashuwaappe amaridaagee dumma gidiyoogaa I yootiis. (Wogaabaa 3:6, 12, 14-16 nabbaba.) Hegaa gishshawu, issi Israaꞌeela asi ba dosan he ashotuppe yarshshiyo wode, Yihooway keehi ufayttees. Hegaa Yihoowawu immida Israaꞌeela asi I baassi deꞌiya keehi loꞌꞌobaa Xoossawu immanawu koyidoogaa bessees. Hegaadan, Yesuusi Yihoowa siiqiyo gishshawu, Yihoowawu haggaazanawu bawu danddayettida ubbabaa oottiyoogan, ba dosan baassi deꞌiya keehi loꞌꞌobaa Yihoowawu immiis. (Yoh. 14:31) Xoossaa sheniyaa oottiyoogee Yesuusa ufayssees; I Xoossaa higgiyaa keehi siiqees. (Maz. 40:8) Yesuusi ba dosan haggaaziyoogaa beꞌidi Yihooway keehi ufayttiis!

11. Nu haggaazoy he issippetettaa yarshshuwaa mala waani gidii, qassi hegee nuna waati minttettana danddayii?

¹¹ Nuuni Yihoowawu haggaaziyoogee A xeelliyaagan nuussi siyettiyaabaa ayyo bessiyooba gidiyo gishshawu, hegee he issippetettaa yarshshuwaara issi mala. Nuussi deꞌiya keehi loꞌꞌobaa Yihoowayyo immoos; qassi nuuni A nu kumetta wozanaappe siiqiyo gishshawu hegaadan oottoos. Bantta dosan goynniya miilooniyan qoodettiya asay Yihoowanne A ogiyaa wozanappe siiqidi haggaaziyoogaa beꞌidi Yihooway ay keena ufayttaneeshsha! Yihooway nuuni oottiyoobaa xalla gidennan, nu hegaa aybissi oottiyaakko akeekeesinne xoqqu ootti xeellees. Hegee nuna keehi minttettees. Leemisuwawu, neeni cima gidikko, ne koyiyoogaadan oottana danddayennaagaa Yihooway akeekiyoogaa ammanettana danddayaasa. Yihoowawu darobaa oottana danddayennabadan neessi siyettennan waayi aggana; shin neeni oottana danddayiyoobaa oottanaadan nena denttettiyay Yihoowa wozanappe siiqiyoogaa gidiyoogaa I akeekees. Neeni immana danddayiyo, neessi deꞌiya loꞌꞌobaa I ufayttidi ekkees.

12. Issippetettaa yarshshuwaa xeelliyaagan Yihoowawu aybi siyettii, qassi hegee nuna waati minttettii?

¹² Issippetettaa yarshshuwaappe nu ay tamaariyoo? Mehiyaa ashuwaappe doretida murutta ashuwaa taman xuuggiyo wode kiyiya sawuwan Yihooway ufayttees. Hegaa gishshawu, neeni ne dosan Yihoowawu haggaazanawu neessi danddayettida ubbabaa oottiyo wode, I nenankka ufayttiyoogaa ammanettana danddayaasa. (Qol. 3:23) Yihooway nenan ay keena ufayttiyaakko qoppa. Daro gidin guutta gidin, neeni ayyo siiquwan haggaaziyoogaa Yihooway nashsheesinne mule dogenna.—Maa. 6:20; Ibr. 6:10.

YIHOOWAY BA DIRIJJITIYAA ANJJEES

13. Wogaabaa 9:23, 24y yootiyoogaadan, qeese gididi sunttettidaageetun Yihooway ufayttidoogaa waati bessidee?

¹³ Tamaariyo oyddanttobaa: Yihooway ba dirijjitiyawu saꞌaa baggaa anjjiiddi deꞌees. Xoossaa dunkkaanee Siinaa Deriyaa matan 1512n K.K. tolettido wode aybi hanidaakko qoppa. (Kes. 40:17) Muusee Aarooninne A naati qeese gidanaadan sunttettido wogaa kaalettiis. Qeeseti bantta mehiyaa yarshshuwaa koyroogaa yarshshiyo wode beꞌanawu Israaꞌeela deree issippe shiiqiis. (Wog. 9:1-5) Mati qeese gididi sunttettidaageetun Yihooway ufayttidoogaa waati bessidee? Aarooninne Muusee asaa anjjido wode, yarshshiyoosaa bollan deꞌiya yarshshuwaa muleera maanaadan Yihooway saluwaappe tamaa yeddiis.—Wogaabaa 9:23, 24 nabbaba.

14. Yihooway Aarooni qeese gidiyoogan ufayttidoogee ha wodiyan nuussi koshshiyoy aybissee?

¹⁴ Saluwaappe wodhdhida tamay ay qonccissii? Qeese gidanaadan doorettida Aaroonaaninne A attuma naatun ufayttidoogaanne eta sunttidoogaa bessanawu Yihooway saluwaappe he tamaa yeddiis. Qeeseta Yihooway sunttidoogaa bessiya he qoncce naqaashaa Israaꞌeelati beꞌido wode, eti he qeesetuura hashetana koshshiyoogaa akeekidosona. Israaꞌeelatu qeesetettan Yihooway ufayttidoogee ha wodiyan nuussi keehi koshshiyoy aybissee? He qeesetettay hegaappe aadhdhiya qeesetettawu eeshsho gidido gishshataassa. Qeesenne kawo gididi Qeese Ubbatu Halaqaa gitaa, Kiristtoosaara saluwan oottana 144,000ti deꞌoosona.—Ibr. 4:14; 8:3-5; 10:1.

15-16. ‘Ammanettida wozannaama ashkkaran’ Yihooway ufayttiyoogaa waati bessidee?

¹⁵ Yesuusi 1919n ayyaanan tiyettida amarida ishantta ‘ammanettida wozannaama ashkkara’ oottidi sunttiis. He ashkkaray sabbakiyo oosuwaa minni oottiiddi deꞌees; qassi Kiristtoosa kaalliyaageetussi “qumaa koshshiyo wodiyan” immees. (Maa. 24:45) Ammanettida wozannaama ashkkaran Yihooway ufayttiyoogaa bessiyaabaa akeekidetii?

¹⁶ Seexaanaynne aara hashetiyaageeti ammanettida ashkkaraa oosuwaa teqqanawu baaxetoosona. He ashkkaraa Yihooway maaddennaakko, ha oosuwaa oottana danddayettenna. Koyronne naaꞌꞌantto alamiyaa olay, zarbbenna yedetay, kumetta alamiyan miishshaa metoy, qassi naaqoy deꞌishinkka, ammanettida wozannaama ashkkaray saꞌan deꞌiya Kiristtoosa kaalliyaageetussi ayyaanaa qumaa aggennan immees. Ha wodiyan, miishshaa qanxxennan nuuni demmiyo, 900⁠ppe dariya qaalatun deꞌiya daro xuufeta ane qoppa! Hagee Xoossay ashkkaraa maaddiiddi deꞌiyoogaa bessiya naqaasha. Sabbakiyo oosoykka Yihooway anjjiiddi deꞌiyoogaa bessiyaaba. Mishiraachchoy “sa7a ubban” sabbakettiiddi deꞌees. (Maa. 24:14) Yihooway ha wodiyan ba dirijjitiyaa kaalettiiddinne darissidi anjjiiddi deꞌiyoogaa akeekana danddayoos.

17. Yihooway goꞌettiiddi deꞌiyo dirijjitiyaa maaddiyoogaa nuuni waati bessana danddayiyoo?

¹⁷ Nuna hagaadan oychchana danddayoos: ‘Taani Yihoowa dirijjitiyaa bagga gidiyoogaa nashshiyaanaa?’ Yihooway Muuse wode I sunttidoogeetun ufayttidoogaa bessanawu saluwaappe tamaa yeddiis. Hegaadan, ha wodiyan Yihooway ba dirijjitiyaa goꞌettiiddi deꞌiyoogaa bessiya qoncce naqaashay nuussi deꞌees. Nuuni galatanaadan oottiya darobay deꞌees. (1 Tas. 5:18, 19) Yihooway goꞌettiiddi deꞌiyo dirijjitiyaa nuuni waati maaddana danddayiyoo? Nu xuufetun, gubaaꞌe, woradaanne killiliyaa shiiqotun nuuni Geeshsha Maxaafaappe tamaariyoobaa oosuwan peeshshiyoogan hegaadan maaddoos. Hegaa bolli qassi, sabbakanawunne tamaarissanawu nuussi danddayettida ubbabaa oottiyoogan maaddiyoogaa bessana danddayoos.—1 Qor. 15:58.

18. Neeni ay oottanawu murttadii?

¹⁸ Simmi yaakko, Wogaabaa maxaafaappe nuuni tamaaridobaa oosuwan peeshshanawu murttidaageeta gidoos. Nu yarshshuwaa Yihooway ekkanaadan nuuni koyoos. Nuuni Yihoowa galatanawu ayyo haggaazoos. Nu kumetta wozanaappe Yihoowa siiqiyo gishshawu nuussi deꞌiya keehi loꞌꞌobaa ayyo ubbatoo immoos. Qassi ha wodiyan I goꞌettiiddi deꞌiyo dirijjitiyaa maaddanawu nuuyyo danddayettida ubbabaa oottoos. Hageeta oottiyoogan, Yihoowa Markkata gididi awu haggaaziyo maataa xoqqu ootti xeelliyoogaa bessoos!